Lɛvitikɔɔ
10 Okoŋ kɔɔli, mi puaa Elɔŋ nda Nadabi nda Abaihu,+ o kɛ kɛ chua nyɛ chuaa leyiŋndo, mbo wou yiŋndeŋ leniŋ, a nyɛm chuŋ kɛndɔŋ+ lechoo. Ma kandu nyɛm chuŋ kɛndɔŋ lomɔɔ o Chɛhowa lo, mi che bɛɛ o vim nda le keŋ tosa le.+ 2 Okoŋ, mi Chɛhowa yɔŋ yiŋndeŋ mi le huŋ lom nda,+ ma wu Chɛhowa lachi.+ 3 Mi Muuse dimul Elɔŋ aa: “Nyɛ Chɛhowa dimi wo cho hoo ni, ‘Wanaa cho wallo o tɛndii nuu niŋnda nɔ ma wa a diandaa,+ le halikpeŋ mi sɔla saŋgalaa waŋnda kpou o hɔl.’” Nduyɛ, mi Elɔŋ mei doŋ.
4 Mi Muuse veelu Misiayɛɛ nda Ɛlisafaŋ, puaa Yuusiɛɛ wa,+ Elɔŋ finya ndɔ pɔmbɔ, mbo dimul nda aa: “La huŋ chua dialuŋ wanayaŋ nyaŋ o fondaŋ diandaa hɔlndɔ, mi la soli muŋ o dɔɔŋgɔɔ niŋ.” 5 Okoŋ ma huŋ chua puaa haa a nyɛla ndala soliaa lasalalaŋ lekɔɔ, ma soli nda o dɔɔŋgɔɔ niŋ a mɛɛ Muuse dimul nda yɛ.
6 Okoŋ, mi Muuse dimul Elɔŋ nda puaa nduaa apiliaa Ɛlieesa nda Itamaa aa: “La kɛɛ yiiŋnde saandiaa ɔɔ mi la sɛɛsiaŋ nyɛlaŋ lekɔɔ le,+ yɔŋii nya sɔla piɔmndo, nduyɛ mi Mɛlɛka dɔɔnuŋ tumbe o kala kala a waŋnda kpou. Wanaa Chɛhowa yɔŋ haa yiŋndeŋ mi le huŋ dii nda wa, waŋnda Isɔluɛi kpou cho nda chaŋ ni. 7 Lelaŋ, la faŋaŋ o tɛndii bɔŋaŋndo hɔlndɔ le, yɔŋii nya wu. Kanifuule, chuɛima Chɛhowa pɔya nya waŋ ma cho nya choo.”+ Okoŋ, ma tosa mɛɛ Muuse dimul nda yɛ.
8 Mi Chɛhowa dimul Elɔŋ aa: 9 “Num a puaa numnda, te la wa pɛ kɔlaŋ o tɛndii bɔŋaŋndo niŋ,+ la nɔ mi la kol mamuɛi o mamuɛi le, yɔŋii nya wu. Sawa ya dou nya a chuauwaa nyaa mamaa le fɛɛŋ a fɛɛŋ ndo o cho ni. 10 Keŋ cho tosa mi la sina teŋgeŋndo nyɛm cho le Mɛlɛka woŋ tɛɛŋ a nyɛm cho le Mɛlɛka le woŋ, mi la sina vɛlɛ teŋgeŋndo nyɛm nɔɔlɛiyoŋ tɛɛŋ a nyɛm diandaŋ,+ 11 nduyɛ mi la tiuba le Isɔluɛiya pɛɛkoo sawala Chɛhowa ke nya laŋ kpou, sanaa a Muuse.”+
12 Okoŋ kɔɔli, mi Muuse dimul Elɔŋ a puaa nduaa lo wa, Ɛlieesa nda Itamaa aa: “Sala ŋkul nda lom o Chɛhowa lo wo, la chua o tɔ lo wo mi la de ndu mɛɛ nya dia nuaa beedii nɔ yiisii* leniŋ te wo o bandu luamaa lasalaa ikɛi+ yɛ. Kanifuule, nyɛ hiou diondɔɔ wo o cho ni.+ 13 La nɔ mi la de ndu o fondaŋ diandaa.+ Kanifuule, salala nda luam o Chɛhowa lo laŋ, num a puaa numnda, nyɛ nya nɔ mi la sɔla wo cho koŋ ni, a mɛɛ Mɛlɛka dimul la yɛ. 14 Num ni, puaa numnda ni, a chuaa num aa laanduaa,+ la nɔ mi la de takpa chɔlu sala keeliaa a lɔlu sala diandaa+ o fondaŋ diandaa. Kanifuule num a puaa numnda, nyɛ nya nɔ le sɔlaa o salala kɔl nyulula Isɔluɛiya soli laŋ choo wo cho koŋ ni. 15 Isɔluɛiya nɔ ma hiŋ a lɔlu sala diandaa vɛlɛ a takpa chɔlu sala keeliaa latulu a chuɛima salala nda luam o yiŋ ndaŋ, le halikpeŋ ma keeliaa laŋ maa sala keeliaa Chɛhowa lachi. Num a puaa numnda,+ nyɛ nya nɔ mi la sɔla le fɛɛŋ a fɛɛŋ ndo cho hoo ni, a mɛɛ Chɛhowa dimi yɛ.”
16 Mi Muuse nuuviaa chuiŋ cho le sala hakioo+ wo fɛsɛ fɛsɛ, kɛ mbo saaluŋ maa a chii ndu lomɔɔ. Le hei, mbo duaunuŋ tumbe o kala kala a Ɛlieesa nda Itamaa, Elɔŋ puaa nduaa lo yoomu wa, mbo dimul nda aa: 17 “Le yɛɛnɛ nya kɛɛ yɛ le sala hakioo dioo o fondaŋ diandaa?+ Kanifuule, nyɛ hiou diondɔɔ wo o cho ni. Nduyɛ nya Mɛlɛka ke ndu ni, le mi la muli le hakila waŋnda kpou, okoŋ mi la nyuna le malɔɔ hakioo le nda Chɛhowa lachi. 18 Kooma nduaŋ ma luei o fondaŋ diandaa+ le. O kpeekpei niŋ, nyaa nɔ mi nyaa de ndu o fondaŋ diandaa, a mɛɛ Mɛlɛka dimul la yɛ.” 19 Mi Elɔŋ mulul Muuse aa: “Waŋnda hiŋ hau a sala hakioo vɛlɛ a sala luamaa Chɛhowa lachi.+ Kɛ a koŋ kpou, mi sɔɔŋ muŋ komal la hau. Te yaa de pɛ sala hakioo, baa Chɛhowa wa pa kɔl naŋɔɔ a ya?” 20 Mɛɛ Muuse tuei hei, mbo naŋ kɔl.