Lɛvitikɔɔ

16 Mɛɛ puaa ŋiɔɔŋaa Elɔŋ nda vi le mɛɛ nda soli salaa o nɛi Chɛhowa chɛl te wo choo+ yɛ, mi Chɛhowa suaa o Muuse lo. 2 Mi Chɛhowa dimul Muuse aa: “Dimul Elɔŋ bɛ num maa, o cho teleŋ o teleŋ te o nɔ mbo luɛi o fondaŋ diandaa+ o kola bɛndoo kɔɔli,+ o kumbu kɔfu kpemaa hɔlndɔ le, yɔŋii o sɔla piɔmndo.+ Kanifuule, o kumbu kɔfu kpema koŋ choo+ ya cho wa chɔɔmɔŋndo o yumbu yumboo niŋ+ ni.

3 “Te Elɔŋ wa pɛ hunɔɔ o fondaŋ hiou diondɔɔ wo, chɔluaa o nɔ mbo hiŋ o ba wa cho haa ni: nau towa fɔŋndɔɔ le sala hakioo,+ a saa kondoo le sala luamaa.+ 4 O nɔ mbo wounuŋ doma feŋgbɛ bɛndoo+ a lɛmbɛ biŋgioo+ le dialuŋ ndɔŋ* kumbɔɔ, mbo yiinuŋ kola ipɛŋgɔɔ o chaŋ,+ nduyɛ mbo wounuŋ mɔsillo.+ Nyɛla chuɛɛnaŋnda cho la diandaa laŋ+ la cho ni. O nɔ mbo puluŋ,+ okoŋ mbo wounuŋ ndaŋ.

5 “O nɔ mbo bii Isɔluɛiya+ chuiŋaa tooyiaa a ŋiɔɔŋ o ba le sala hakioo, a saa kondoo o pilɛ le sala luamaa.

6 “Elɔŋ nɔ mbo hiŋ a nau towa cho le sala hakioo wo le ndupila, nduyɛ mbo nyuna le malɔɔ hakioo le ndupila+ a le yuŋgu ndɔɔ.

7 “O nɔ mbo chua chuiŋaa ŋiɔɔŋnda mbo simi nda ya Chɛhowa lachi o tɛndii bɔŋaŋndo hɔlndɔ. 8 Elɔŋ cho kooŋ wuu le chuiŋaa ŋiɔɔŋaa kaŋ. I pilɛ le ya Chɛhowa, i pilɛi le Asasɛɛ.* 9 Kuei cho le ya Chɛhowa ve, chuiŋ i cho biyɔɔ wo,+ Elɔŋ cho ndu chua mbo soli ndu sala hakioo. 10 Kɛ kuei cho le Asasɛɛ ve, chuiŋ i cho biyɔɔ wo, o nɔ mbo hiŋ a ndu yoomu mbo simi ndu ya Chɛhowa lachi, nduyɛ mbo nyuna le malɔɔ hakioo o ndu choo, okoŋ mbo mal ndu mbo kuɛŋnuŋ o pollo niŋ+ le Asasɛɛ.

11 “Elɔŋ nɔ mbo hiŋ a nau towa cho le sala hakioo wo le ndupila, nduyɛ mbo nyuna le malɔɔ hakioo le ndupila a le yuŋgu ndɔɔ. Okoŋ kɔɔli, o nɔ mbo dii nau towa cho le sala hakioo wo le ndupila.+

12 “O nɔ mbo chua nyɛ chuaa leyiŋndo,+ mbo chua dɛŋgultaŋ o bandu luamaa lasala+ cho ya Chɛhowa lachi wo choo mbo pei leniŋ cha, nduyɛ mbo kɔndu nyɛm chuŋ kɛndɔŋ+ baa le diiŋ, okoŋ mbo luɛi a muŋ o fondaŋ hiou diondɔɔ wo o kola bɛndoo+ kɔɔli. 13 Te o luɛi pɛ, o dɔu nyɛm chuŋ kɛndɛŋ muŋ o yiŋndeŋ choo ya Chɛhowa lachi.+ Nduyɛ kumii nyɛm chuŋ kɛndɔŋ cho tiu o kumbu Kɔfu+ Kpemaa choo,+ le halikpeŋ o sɔla piɔmndo le.

14 “O nɔ mbo chua kooma nau towa+ koŋ ma tiŋ, mbo fasaŋiaa maŋ a suei nduɛi o kumbu kɔfu kpemaa hɔlndɔ ba paaleŋ le chaŋ ndo, nduyɛ mbo fasaŋiaa vɛlɛ kooma maŋ ma tiŋ bɛmbɔɔ le ŋɔmmɛu, o kumbu kɔfu kpemaa lachi.+

15 “O nɔ mbo dii chuiŋ cho le sala hakioo wo le waŋnda,+ nduyɛ mbo hiŋ a kooma nduaŋ o fondaŋ hiou diondɔɔ wo o kola bɛndoo kɔɔli,+ mbo tosa a maŋ mɛɛ o tosa a kooma nau towaa+ yɛ. O nɔ mbo fasaŋiaa maŋ kpeŋgii kumboo cho ve, o kumboo hɔlndɔ.

16 “Elɔŋ nɔ mbo nyuna le malɔɔ hakioo le fondaŋ hiou diondɔɔ wo. O nɔ mbo tosa hei yɔŋii fondaŋ hiou diondɔɔ wo simnuŋ o nɔɔlɛi le sɔɔŋ nɔɔlɛiyoŋ, nilakalulaŋ, a hakila waŋnda Isɔluɛi+ cho tosaa laŋ. O nɔ mbo tosa nyɛ pilɛ koŋ kpe le tɛndii bɔŋaŋndo, o cho Isɔluɛiyaa cho a nɔɔlɛiya tɛɛŋ ndo.

17 “Te o luɛi pɛ o fondaŋ hiou diondɔɔ wo niŋ le nyunaa le malɔɔ hakioo, wana o wana nɔ mbo luɛi o tɛndii bɔŋaŋndo niŋ te haaa mbo fula. O cho nyuna le malɔɔ hakioo le ndupila, le yuŋgu ndɔɔ,+ a le waŋnda Isɔluɛi kpou.+

18 “Te o fula pɛ, o nɔ mbo kuɛ o bandu luamaa lasalaa,+ o cho ya Chɛhowa lachi wo, mbo kɔ nyuna le malɔɔ hakioo le bandu koŋ. Nduyɛ o nɔ mbo chua kooma nau towaa ma tiŋ a kooma chuiŋndo ma tiŋ, mbo wou maŋ o leela bandu luamaa lasalaa balɔɔ silɔ. 19 O nɔ vɛlɛ mbo fasaŋiaa kooma maŋ ma tiŋ o bandu luamaa lasalaa choo a suei nduɛi bɛmbɔɔ le ŋɔmmɛu, le ndu dindioo le sɔɔŋ nɔɔlɛi waŋnda Isɔluɛi tosa woŋ.

20 “Te o chii pɛ nyuna le malɔɔ hakioo+ le fondaŋ hiou diondɔɔ wo, le tɛndii bɔŋaŋndo, a le bandu luamaa lasalaa,+ o nɔ vɛlɛ mbo hiŋ a chuiŋ cho yoomu wo.+ 21 Elɔŋ nɔ mbo handu chuiŋ cho koŋ yoomu wo balaŋ o lebol, mbo chɔɔmuu biondɔŋnda Isɔluɛiya, nilakalula ndalaŋ, a hakila ndalaŋ kpou, nduyɛ mbo handu laŋ chuiŋ koŋ o lebol.+ Okoŋ, mbo dimul wana nda hɛli wo* mbo kuɛ a chuiŋ koŋ o pollo niŋ mbo kɔ mal ndu loŋ. 22 Chuiŋ ndo hoo cho lakɔ a biondɔŋnda ndalaŋ+ kpou o pollo niŋ.+ Nduyɛ, o cho lakɔ chuiŋ ndo hoo malɔɔ o pollo niŋ.+

23 “Elɔŋ nɔ mbo luɛi o tɛndii bɔŋaŋndo niŋ, mbo soli nyɛla ndoo wounuŋ le luɛiyɔɔ o fondaŋ hiou diondɔɔ wo niŋndaŋ, nduyɛ mbo kɛsi laŋ ndoŋ. 24 O nɔ mbo puluŋ+ o fondaŋ diandaa, nduyɛ mbo wounuŋ nyɛla ndɔla soliaa lasalalaŋ.+ Te o fula pɛ o bɛɛ, o nɔ mbo soli sala luamaa+ le ndupila, mbo soli vɛlɛ sala luamaa+ le waŋnda. Okoŋ, o nyuna le malɔɔ hakioo le ndupila a le waŋnda.+ 25 O nɔ mbo lom chuɛima cho le sala hakioo waŋ o bandu luamaa lasalaa choo.

26 “Wana kuɛ a chuiŋndo le Asasɛɛ+ wo nɔ mbo tɔɔ nyɛla ndɔlaŋ nduyɛ mbo puluŋ, tuupa mbo miiŋgu o dɔɔŋgɔɔ niŋ.

27 “Nau towa sala hakioo a chuiŋ sala hakioo, a nda kuɛ a kooma ndaŋ o fondaŋ hiou diondɔɔ wo niŋ le nyunaa le malɔɔ hakioo wa, a nɔ ma chua yaula ndalaŋ, visiŋ ndaŋ, a poola ndalaŋ, ma soli o dɔɔŋgɔɔ niŋ ma kɔ lom.+ 28 Wana cho nyɛm muŋ lomɔɔ wo nɔ mbo tɔɔ nyɛla ndɔlaŋ nduyɛ mbo puluŋ, tuupa mbo miiŋgu o dɔɔŋgɔɔ niŋ.

29 “Sawaa hoo cho le nya le fɛɛŋ a fɛɛŋ: O paŋgii ŋɔmmɛu ve niŋ malɔ tɔ, la nɔ mi la bii mɔnɛi* le hakila nyalaŋ. Nduyɛ nya ni, mialaa cho nya tɛɛŋ nda ni, la nɔ mi la tosa wali kɛ kɛ+ o paale leŋ choo le. 30 O paaleŋ ndeŋ choo wana soliaa lasalaa cho nyuna le malɔɔ hakioo+ le nya ni, le mi la simnuŋ a diandaa. La cho malɔɔ lahakioo sɔla, nduyɛ mi la simnuŋ a diandaa ya Chɛhowa o hɔl.+ 31 Paale pɛŋgiaaleŋ le cho le nya ni. La nɔ mi la bii mɔnɛi+ le hakila nyalaŋ. Sawaa hoo cho le nya le fɛɛŋ a fɛɛŋ.

32 “Wana soliaa lasala nda pɔya+ nduyɛ ma yulu ndu iso le mbo wa wana soliaa lasalaa+ o foofo finya ndɔ+ wo wo, o nɔ mbo nyuna le malɔɔ hakioo, mbo wounuŋ nyɛla soliaa lasalalaŋ.+ Nyɛla cho la diandaa laŋ+ la cho ni. 33 O nɔ mbo nyuna le malɔɔ hakioo le fondaŋ diandaa,+ le tɛndii bɔŋaŋndo,+ a le bandu luamaa lasalaa.+ Nduyɛ mbo nyuna vɛlɛ le malɔɔ hakioo le wanaa soliaa lasalaa, a le waŋnda Isɔluɛi kpou.+ 34 Sawaa hoo cho wa le nya+ le fɛɛŋ a fɛɛŋ. La nɔ mi la nyuna le malɔɔ hakioo le pilɛ o wɔsioo niŋ,+ le hakila Isɔluɛiya tosa laŋ kpou.”

Okoŋ, mi Elɔŋ tosa mɛɛ Chɛhowa dimul Muuse yɛ.