Luku

17 Okoŋ mbo dimul buɛiyaa nduaa aa: “A tonya, sɔɔŋ tosa mi acheleŋnda mal laalaŋ ndaa woŋ cho wa, kɛ kpundɔɔ cho le wana tosa mi sɔɔŋ muŋ yɔŋnuŋ ndo! 2 O bɛnda ma baa wana koŋ pou bɛndoo o labolo ma kɔ mal ndu o mɛŋma ihɛllaŋ niŋ, mbo hiau tosaa mi wanaa pɔmbuaa haa o pilɛ bɛɛ mal laalaŋ ndɔɔ.+ 3 La mandaŋ. Te puaapilɛnɔ numndo tosa pɛ hakioo a num, miŋgi ndu o nɛi.+ Te o siŋgaŋ pɛ a mal ndu haki.+ 4 O yɔŋ bɛɛ mbo tosa hakioo a num bɛmbɔɔ le ŋɔmmɛu o paaleŋ niŋ, okoŋ mbo huŋ nyɔɔlu num bɛmbɔɔ le ŋɔmmɛu aa, ‘Yandii mal la haki,’ a nɔ ma mal ndu haki.”+

5 Mi kiilaa nduaa dimul ndu aa: “Mala naa mi laalaŋ naa chɔɔlu kalu poŋ!”+ 6 Mi Masanɔɔ dimul nda aa: “Te la nɔ pɛ laalaŋndo o yɔŋ bɛɛ maa kulii mɔsitaa ve, la nɔla mi la dimul yɔmndo hoo aa, ‘Suŋguŋ ma kɔ tɔlnuŋ o mɛŋma ihɛllaŋ niŋ!’ mi i yɔŋnuŋ.+

7 “Te waŋndo nɔ pɛ buɛiyo o nya tɛɛŋ, nduyɛ mi buɛi koŋ fula waa o chiɛi niŋ ɔɔ saa mandaa, o dimul ndu pa aa, ‘Huŋ niko ma huŋ dio nyɛdiaa o tibiiyo* choo’? 8 Sako. Kɛ nuaa o dimul ndu ni aa, ‘Kɔ wounuŋ nyɛlaŋ, ma toosial la nyɛdiaa ni ichɔllo mi de. Ma lo ya ikɛi haaa mi chii ndu dio a kolɔɔ. Te I chii pɛ, a de o numndo a kol.’ 9 Baa wana koŋ mel pa buɛi ndɔɔ balikaa le nyɛ o vem ndu tosaa wo? 10 Lende koni, nya bɛɛ te la chii pɛ tosa nyɛ o nyɛ nda dimul nya le tosaa, la dimi aa: ‘Chiaa koni naŋ cho ni. Nyɛ cho naa kuee le tosaa wo, ndu naŋ tosa ni.’”+

11 Mɛɛ Chiisu wa kɔlaŋ Chulusalɛm, mbo kei Sameeliaa a Kalili tɛɛŋ. 12 Mɛɛ o wa fuuluuwo o sɔndɔkɔlɔ pum, mi puaa wa a naa ŋlɛlɔɔ wa ŋwaŋ tɔ huŋ naa ndu chua, kɛ ma simnuŋ landaŋ.+ 13 Ma deŋi choo choo aa: “Chiisu, Wana Pɛɛkaa, tuiinuŋ naa inyiɛɛ fɔ!” 14 Mɛɛ o che nda, mbo dimul nda aa: “La kɔ chɔɔmuŋ o wanaa soliaa lasalaa lo.”+ Mɛɛ nda wa kɔlaŋ, ma siaŋgu.+ 15 Wana pilɛ wa nda tɛɛŋ, mɛɛ o sina maa o seŋgu, mbo miiŋgu pila, nduyɛ o wa kɔlaŋ a Mɛlɛka saŋgalaa choo choo kpeleŋ. 16 Mbo kɔ beŋ Chiisu wulaŋ, mbo mel ndu balikaa. Nduyɛ Sameeliaŋnɔɔ o wa ni.+ 17 Mi Chiisu nyuna ndu aa: “Ŋwaŋ tɔ le sɔla sioŋgɔɔ le? Kɛ, ɔɔ a ŋɔmahiɔɔluaa? 18 Mɛɛ nda kpou wana pilɛ bɛɛ hiŋ mbo mel Mɛlɛka balikaa le, mɛɛ wana lekaa wo hoo?” 19 Okoŋ mbo dimul ndu aa: “Chɔŋ ma kuɛŋnuŋ. Laalaŋ numndo siŋgi num.”+

20 Mɛɛ Falisiiya nyuna Chiisu le teleŋ Masale Mɛlɛkaleŋ le cho hunɔɔ wo, mbo mulul nda aa: “Masale Mɛlɛkaleŋ le hiŋ niŋ+ mi waŋnda kpou che le. 21 Kɛlɛŋgaa mi waŋnda dimi aa, ‘Nuawɔ leŋ nanuŋ!’ ɔɔ ‘Nuawɔ leŋ nda!’ Kanifuule, Masale Mɛlɛkaleŋ le cho nya tɛɛŋ.”+

22 Okoŋ mbo dimul buɛiyaa nduaa aa: “Teleŋ cho fuuluu, la yeema niŋ mi la che paale Po wanachioo cho wa latulu a nya leŋ, kɛ la chi niŋ leŋ te. 23 Nduyɛ waŋnda dimul niŋ nya aa: ‘Mi cheŋ ndu nda!’ ɔɔ ‘Mi cheŋ ndu nanuŋ!’ La fula mi la kuɛ nda kɔɔli le,+ 24 kanifuule mɛɛ nyɔɔ tosa nuaa ŋualalɛi o choo choo niŋ mi paŋgeloo tiu silɔ yɛ, lende paale Po wanachioo+ le wa niŋ ni.+ 25 Mɛɛ mbo sɔla fɛlɛŋ saŋgaa tau, nduyɛ mi waŋnda kɛɛ ndu.+ 26 Mɛɛ i yɔŋnuŋ o palɛi Nuuwa ve niŋ yɛ,+ lende koni i yɔŋnuŋ niŋ o palɛi Po wanachioo niŋ ni.+ 27 Waŋnda wa diolaŋ, a wa kolɔɔ, puaa wa laanduaa chuaa, waŋ laanduaa wa challe o nɔlaŋ, haaa a paale Nuuwa luɛi o dɛndɔɔ niŋndeŋ,+ nduyɛ mi Mɛŋma Koŋgi Bɛnduaŋ ma huŋ basu nda tɛɛ.+ 28 Lende koni i yɔŋnuŋ vɛlɛ o palɛi Lɔtu ve niŋ ni.+ Waŋnda wa diolaŋ a kolɔɔ, a wa nyɔɔŋ piinduuwo a pisioo, a wa tɔlɔɔlaŋ a taŋgultaŋ. 29 Kɛ paale Lɔtu faŋaŋ Sodɔm chiee leŋ, mi yiŋndeŋ le fula choo choo latulu a pouta leyiŋndaŋ mi le luam nda chilikɔ.+ 30 Lende koni i cho yɔŋnɔŋ o paale leŋ choo ni, te Po wanachioo chɔɔmuŋ pɛ.+

31 “O paale leŋ choo, wana cho wa o chiɛiyo choo kɛ mi nyɛm ndɔŋ wa chiɛiniŋ ndo, o tual lɛ mbo luɛi chiɛiniŋ le muŋ chua le. Wana cho wa o chiɛi nduɛi niŋndo bɛɛ miiŋgu lɛ le nyɛm o mɛi kɔɔli woŋ te. 32 La loonuŋ a lanɔɔ Lɔtu.+ 33 Wana o wana kindiŋ pɛ le yoomu ndɔɔ piŋioo, o cho ndu hiɔlɔŋ. Kɛ wana o wana chɛl pɛ mi yoomu ndɔɔ hɛluŋ ndu, o cho ndu miŋgi sɔla.+ 34 Mi dimul nya, a nyumma maŋ, waŋnda a ŋiɔɔŋ cho wa ihini o kpele pilɔɔ choo ma chua o pilɛ, kɛ ma mɛi o pilɔɔ.+ 35 Waŋ laanduaa a ŋiɔɔŋ cho wa chuoo o chiei niŋ ma chua o pilɛ, kɛ ma mɛi o pilɔɔ.” 36* —— 37 Okoŋ ma nyuna ndu aa: “Kuɛɛnɛ, Masanɔɔ?” Mbo mulul nda aa: “Ba o ba nyɛ vilɛiyo wa pɛ, loŋ koviaa* chuuŋgiaŋ ni.”+