Luku

19 Mi Chiisu luɛi Chɛluiko, nduyɛ mbo wa keekoo o chioo tɛɛŋ. 2 Po pilɛ wa loŋ diolaŋ aa Sakiɔɔ. Masa wanaa biyaa paawaa* o wa ni, nduyɛ o wa wana sulaa. 3 O wa kindiŋndo le Chiisu chɔɔ, kɛ o nɔla le, kanifuule faŋgaa wa tau, nduyɛ wana biŋgioo o wa ni. 4 Le hei, mbo nyaanuŋ lachi, mbo kɔ hel o yɔm sikamɔɔ wo choo le halikpeŋ mbo che Chiisu. Kanifuule, o nɛi koŋ Chiisu wa keilaŋ ni. 5 Mɛɛ Chiisu fuuluu o fondaŋ koŋ, mbo tofa o yɔmndo choo. Mbo dimul ndu aa: “Sakiɔɔ, tol chɔ chɔ. Mial num ya cho hau ni.” 6 Okoŋ mbo tual chɔ chɔ, nduyɛ o wa a nyaale le Chiisu yiyaa o ndu lo chiɛiniŋ. 7 Mɛɛ waŋnda kpou che hei, ma kandu nyiimu nyiimoo aa: “Tofawɔ, o kuɛ mi wana yɔŋ wɔɔŋndo yiya ndu.”+ 8 Kɛ mi Sakiɔɔ sim mbo dimul ndu aa: “Masanɔɔ, nyɛ o nyɛ ya nɔ, I cho piɔu tɛɛŋ mi ke wanaa bala fonduaa. Nduyɛ, nyɛ o nyɛ ya bii wana o ba a lakafa, I cho ndu miŋgi bɛmbɔɔ le hiɔɔlu.”+ 9 Okoŋ mi Chiisu dimul ndu aa: “Mɛlɛka piŋi poo hoo a yuŋgu ndɔɔ kpou o paale hauleŋ ndeŋ choo, kanifuule ndu bɛɛ po mama Ebilahamndo o cho ni. 10 Le wanaa luusiaŋ nda nuuviaa a nda piŋioo Po wanachioo hiŋ ni.”+

11 Mɛɛ nda wa sɔɔŋ muŋ nilaŋ yaŋɔɔ, mbo dimul nda tale cheleŋ, kanifuule o wa niŋ Chulusalɛm chiee lekɔɔ, nduyɛ ndaa yiyaŋ maa Masale Mɛlɛkaleŋ le cho hunɔɔ o lepilɛ niŋ kpe.+ 12 Mbo dimul nda aa: “Masa pilɛ, po ndɔɔ chɛŋ ni mbo kua o lɛŋnde cheleŋ niŋ pɔ pɔ,+ le mbo kɔ sɔla masaleŋ, okoŋ mbo miiŋgu. 13 Tuupa mbo kua, mbo veelu buɛiyaa nduaa tɔ, mbo ke nda mainɛiyoŋ tɔ.* Mbo dimul nda aa, ‘La koma tosa yulaleŋ a muŋ haaa mi hiŋ.’+ 14 Kɛ mi pila chieeyaa nduaa tul ndu leyɛ, nduyɛ ma viam waŋnda ndu kɔɔli, ma dimi aa, ‘Ŋ yeema ma wa naa masaa choo le.’

15 “Mɛɛ o kɔ sɔla masaleŋ mbo miiŋgu, mbo veelu buɛiyaa nduaa o ke kanioŋ* nda kpou, le sinaa tɔnɔ nda sɔla o yulale ndaleŋ niŋndo.+ 16 Mi o tasoo huŋ mbo dimi aa, ‘Masanɔɔ, I sɔla mainɛiyoŋ tɔ o mainɛi ŋ ke ya ve choo.’+ 17 Mbo dimul ndu aa, ‘Nuwali tau. A cho bɔɔ buɛi kɛndɛ! Le mɛɛ ŋ chɔm maa a cho sakpo o nyɛm pɔmbɔŋ choo yɛ, a cho wa masaa chieeŋ bɛndoŋ tɔ choo.’+ 18 Mi o diiŋ ndɔɔ bɛɛ huŋ, mbo dimi aa, ‘Masanɔɔ, I sɔla mainɛiyoŋ ŋuɛɛnu o mainɛi ŋ ke ya ve choo.’+ 19 Buɛiyo hoo bɛɛ mbo dimul ndu aa, ‘Num bɛɛ a cho wa masaa chieeŋ bɛndoŋ ŋuɛɛnu choo.’ 20 Kɛ mi o pilɔɔ huŋ mbo dimi aa, ‘Masanɔɔ, a che mainɛi numnde. O kolaa niŋ yaa veŋ ndi ni. 21 Siooŋii numnde wa ya ni, kanifuule I sina maa a cho bɔɔ ŋuasu ŋuasu. Nyɛ ŋ kɛsi le wo ŋ chua ni, nduyɛ nyɛ ŋ seŋ te wo ŋ kuau ni.’+ 22 Mi Masanɔ ndɔɔ dimul ndu aa, ‘A cho bɔɔ buɛi dɛnɛ wɔɔŋ bɛndu. Mɛɛ numpila dimi yɛ, lende ya cho num yamɛi kilul ni. A sina walaŋ maa I cho wana ŋuasu ŋuasu, maa nyɛ ya kɛsi le wo ya chua ni, nduyɛ nyɛ ya seŋ te wo ya kuau ni, lende le?+ 23 Mɛɛ le yɛɛnɛ a dou kanii* nii o chiɛi nda kɛsi nyɛsɔlaa wo niŋ te? Mɛɛ ya hiŋ nuaa yɛ, I wa ndi chua a tɔnɔɔ lechoo.’

24 “Okoŋ, mi Masanɔɔ dimul wanaa wa isisi wa aa, ‘La puu ndu mainɛi keŋ o ba mi la ke wana nɔ mainɛiyoŋ tɔ wo.’+ 25 Kɛ ma dimul ndu aa, ‘Masanɔɔ, ndu nɔ niŋ mainɛiyoŋ tɔ o ba!’ 26 ‘Mi dimul nya, wana o wana nɔ o ba, o cho chɔɔlu sɔla tau. Kɛ wana o wana nɔ o ba le, o pɔmbɔ o nɔ wo bɛɛ, a cho ndu ndu poonda o ba.+ 27 Nduyɛ, la kɔ huŋ a yaamɔɔwaa niaa a yeema mi wa nda masa choo le wa, okoŋ mi la diu diu nda ya o hɔl.’”

28 Mɛɛ Chiisu chii sɔɔŋ muŋ dimi, mbo hiau lachi a kɔlaŋ le helɔɔ Chulusalɛm. 29 Mɛɛ nda wa fuuluuwo nda buɛiyaa nduaa Bɛfee a Bɛtani ikɛi o Pembii Ɔlifii Ve,+ mbo viam buɛiyaa nduaa a ŋiɔɔŋ.+ 30 Mbo dimul nda aa: “La kɔ o sɔndɔkɔlɔɔ hoo nya lachi. Te la fuuluu pɛ, la cho chɔ sofɛlɛ wana o wana chellɔ lechoo le wo o baa. La timbi ndu mi la hiŋ a ndu naŋ. 31 Te wana nyuna nya pɛ aa, ‘Le yɛɛnɛ nya cho yɛ ndu timbioo?’ La dimul ndu aa, ‘Masanɔɔ hau ba a ndu.’” 32 Mi wanaa o vem nda kua, ma komal sofɛlɔɔ o baa mɛɛ o dimul nda yɛ.+ 33 Kɛ mɛɛ nda wa sofɛlɔɔ timbioo, mi wanaa nɔ ndu wa nyuna nda aa: “Le yɛɛnɛ nya cho yɛ sofɛlɛ koŋ timbioo?” 34 Ma muli aa: “Masanɔɔ hau ba a ndu.” 35 Ma kua a sofɛlɔɔ naa Chiisu chua. Okoŋ ma pɛŋgɛliaa domala ndalaŋ sofɛlɔɔ o kɔɔ, mi Chiisu chal lechoo.+

36 Mɛɛ o wa kɔlaŋ, waŋnda wa domala ndalaŋ pɛŋgɛliaa o nɛi.+ 37 Mɛɛ Chiisu fuuluu dɔɔ o nɛi kei le Pembii Ɔlifii Ve tolɔɔ wo, mi buɛiyaa nduaa faŋga bɛndoo kandu nyaaloo dɔɔnɔŋndo. Nduyɛ a wa Mɛlɛka saŋgalaa choo choo kpeleŋ le walta kɔndɔfilta nda che laŋ. 38 Ma wa dimioo aa: “Salaa cho le Masa hiŋ hoo o diola Chɛhowa* laŋ niŋndo! Maa kɔl nyuloo wa o choo choo niŋ, nduyɛ mi saŋgalaa wa le Mɛlɛka cho o choo choo niŋndo fɔ!”+ 39 Kɛ mi Falisiiya apum, a wa o faŋgaa hoo tɛɛŋnda dimul ndu aa: “Wana Pɛɛkaa, kpaa buɛiyaa numnda.”+ 40 Kɛ mbo mulul nda aa: “Mi dimul nya, te nda mei pɛ, poutaŋ la cho yonda kpeleŋ.”

41 Mɛɛ o sɔɔŋguu Chulusalɛm chiee lekɔɔ mbo cha chioo, mbo chaŋ le ndu.+ 42 Mbo dimi aa: “Ndoo bɛnda bɔɔ ma sina sɔɔŋ tosa ma sɔla kɔl nyuloo woŋ, kɛ suŋ suŋ niŋ a nɔla lɛ ma sina muŋ te,+ 43 kanifuule teleŋ cho fuuluu mi yaamɔɔwaa numnda huŋ balu num kpɔkɔsu a yɔmnde, ma luei num o piŋndo niŋ, nduyɛ ma tusi num nyɛpalaa choo.+ 44 Num ni, chuauwaa numnda ni, a cho nya tɛɛmbuu,+ nduyɛ pouwo o pilɛ bɛɛ lo niŋ o chaaŋ ndɔ choo le,+ kanifuule a bii teleŋ nda hiŋ num mɛɛndaŋndo wo bila le.”

45 Okoŋ mbo luɛi o chiɛi Mɛlɛkaa niŋ, mbo kandu wanaa wa nyɔɔŋ pisioo wa touwɔɔ.+ 46 Mbo dimul nda aa: “I cho i poonyiaa aa, ‘A veelu niŋ chiɛi nuu aa chiɛi lepiɛiyo,’+ kɛ mi nya siiŋguu ndu buulu viiya viaŋnuŋndo.”+

47 Mbo hiau lachi a waŋnda pɛɛkoo lepaa o lepaa o chiɛi Mɛlɛkaa niŋ. Kɛ mi masaa wanaa soliaa lasalaa, wanaa pɛɛku waŋnda sawala Mɛlɛkalaŋ nda, a wanaa wa waŋnda bolleŋ nda kandu nɛilaŋ nuuviaa le ndu diyɔɔ.+ 48 Kɛ a seeluŋ nɛi o nɛi nda tosa hei le, kanifuule waŋnda kpou wa ndu nilaŋ yaŋɔɔ yekeŋ.+