Walta Kiilaa

9 Sɔɔ wa hiouwɔɔ lachi a buɛiyaa Masanɔɔ kɔŋgɔliaŋndaŋ le nda diyɔɔ.+ Le hei, mbo kua o wana bɛndu wanaa soliaa lasalaa lo. 2 Mbo nyuna ndu le yaula dilaŋ le mbo kɔ chɔm o chiɛila Chuuwa piɛi Mɛlɛka laŋ niŋ Damasikɔɔ. Maa wana o wana o saaluŋ pɛ o Nɛi Tonyaa choo,+ wana lanɔ ni, wana pɔnɔ ni, o bii ndu, o yii ndu, okoŋ o hiŋ a ndu Chulusalɛm.

3 Mɛɛ o wa kɔlaŋ mbo sɔɔŋguu Damasikɔɔ ikɛi, o lepilɛ niŋ kpe, mi paŋgeloo fula o choo choo niŋ, mbo tiu ndu choo silɔ.+ 4 Mbo del lɛŋ. Mbo tuɛi mi diomndo suaa o ndu lo aa: “Sɔɔ, Sɔɔ, le yɛɛnɛ ŋ cho yɛ ya nyɛpalaa tusioo choo?” 5 Mbo nyuna aa: “Num nɛɛnɛ?” Mi diomndo muli aa: “Ya ni, Chiisu,+ wana ŋ cho nyɛpalaa tusioo choo wo.+ 6 Chɔŋ ma hel chiee. A cho lakɔ num dimul nyɛ ŋ nɔ ma tosa wo.” 7 Mi puaa wa kɔlaŋ a ndu latulu wa sim, a nɔla ma soo nyɛ o nyɛ le. A wa diomndo tueiyɔɔ, kɛ a ve wana chɔ le.+ 8 Okoŋ mi Sɔɔ chaŋ lɛŋ. O wa tofaa, kɛ o ve nyɛ o nyɛ chɔ le. Okoŋ ma saa ndu baa, ma hel a ndu Damasikɔɔ chiee. 9 Le palɛi i yaa, o ve nyɛ o nyɛ chɔ le.+ O ve nyɛdiaa dio le, kɛlɛŋgaa niŋ te mbo kol.

10 Wana laalaŋ pilɛ wa Damasikɔɔ chiee diolaŋ aa Ananaaya.+ Mi Masanɔɔ veelu ndu o yilaŋnde niŋ aa: “Ananaaya!” Mbo chɛl aa: “Ee, Masanɔɔ.” 11 Mi Masanɔɔ dimul ndu aa: “Chɔŋ ma kuɛ o nɛi nda veelu aa Sakpo wo, ma nyuna le po pum o chiɛi Chuda wo niŋ, diolaŋ aa Sɔɔ, fulaa Taasɔɔ.+ Kanifuule o cho piɛileŋ suŋ suŋ, 12 nduyɛ mbo cha num o yilaŋnde niŋ, num Ananaaya, ma huŋ handu ndu balaŋ choo le mbo che vɛlɛ.”+ 13 Kɛ mi Ananaaya muli aa: “Masanɔɔ, I tuei niŋ sɔɔŋ bɔɔbɔɔ a po koŋ okɔɔ, sɔɔŋ wɔɔŋ o tosal buɛiyaa num aa diandaa o Chulusalɛm niŋndoŋ kpou. 14 Nduyɛ masaa wanaa soliaa lasalaa ke ndu dioo le mbo bii wanaa cho diola numndaŋ veeloo wa kpou.”+ 15 Mi Masanɔɔ dimul ndu aa: “Kɔ! Kanifuule, I hɛli poo hoo+ le mbo dimul waŋnda, masaa waa,+ a waŋnda Isɔluɛi a ya okɔɔ.+ 16 I cho ndu chɔm kpendekele mɛɛ kpɛ o sɔla niŋ nyɛpalaa le diola nilaŋ yɛ.”+

17 Mi Ananaaya kua, mbo luɛi o chiɛi Sɔɔ wa wo niŋ, mbo handu ndu balaŋ choo. Mbo dimi aa: “Sɔɔ, chaaŋ nuu, Masanɔɔ Chiisu, o chɔɔmuŋ num o nɛi teleŋ ŋ wa hunɔɔ wo vem ya ni le ma che vɛlɛ, nduyɛ ma sɔla nyina diandaa.”+ 18 O lepilɛ niŋ kpe, mi nyɛlaŋ lapum la fula ndu o lahɔl maa lakɛkɛu, mi la deli. Mbo cha vɛlɛ. Okoŋ mbo chaŋ, mbo sɔla yiŋɔɔ. 19 Mbo dia nyɛdiaa, mbo sɔla yoomuaŋ.

Mbo chua palɛi i tiŋ a wanaa laalaŋaa wa Damasikɔɔ wa latulu.+ 20 O lepilɛ niŋ kpe, mbo kandu yooŋgu kɛndɔɔ dimioo o chiɛila Chuuwa piɛi Mɛlɛka laŋ niŋ maa Chiisu cho Po Mɛlɛkaa ni. 21 Kɛ mi kɔndɔfillo bii wanaa wa ndu nilaŋ yaŋɔɔ wa kpou. Ma wa dimioo aa: “O cho poo hoo le tusi wanaa cho diolaŋ ndaŋ veeloo wa nyɛpalaa choo Chulusalɛm te?+ O cho le nda biyɔɔ mbo kuɛ a nda* o masaa wanaa soliaa lasalaa lo le o hiŋ nanuŋ te?”+ 22 Mi Sɔɔ hiau lachi a kpaayaa sɔlaa. Chuuwaa wa Damasikɔɔ wa nɔla lɛ ma soo nyɛ o nyɛ le, kanifuule mbo chɔm kpendekele maa Chiisu cho Kiliti ni.+

23 Mɛɛ palɛi hiou i tiŋ, mi Chuuwa kɛɛsiaa le ndu diyɔɔ.+ 24 Kɛ mi Sɔɔ sina a kɛɛsiaa ndaa okɔɔ. Chuuwa wa vɛlɛ mɛɛndaŋndo o diola saasa chioo idii a ichɔl le ma dii ndu. 25 Le hei, mi buɛiyaa nduaa chua ndu ichɔl pilɛ o kambɛiyo niŋ,+ ma keeku ndu o tɛɛŋgii saasaa, ma tusi ndu lekɔɔli.

26 Mɛɛ o fuuluu Chulusalɛm,+ mbo kindiŋ le mbo sɔɔŋguu wanaa laalaŋnda choo. Kɛ nda kpou wa a siooŋii nduɛi, kanifuule ndaa laalaŋ ndɔ maa o simnuŋ buɛi Chiisu wo le. 27 Mi Banabaa+ mala ndu, mbo kua a ndu o kiilaa lo. Mbo tɛɛsial nda mɛɛ Sɔɔ looku Masanɔɔ chɔ o nɛi yɛ, mɛɛ Masanɔɔ soo naa ndu chua yɛ,+ nduyɛ a mɛɛ o soo a dialuŋ fulaa Damasikɔɔ a Chiisu okɔɔ yɛ.+ 28 Okoŋ mbo lo a nda latulu. O wa balɔɔ ba o ba fee Chulusalɛm, mbo wa suɛi a diola Masanɔɔ okɔɔ a dialuŋ fulaa. 29 O wa suɛi o Chuuwaa dimi Kilikiiye wa lo. A wa diomndaŋ hiŋaŋndo nda ndaa, nduyɛ ma kindiŋ le ndu diyɔɔ.+ 30 Mɛɛ puaapiliaa sina a ndi okɔɔ, ma kua a ndu Sisaliaa, okoŋ ma yɔŋ ndu Taasɔɔ.+

31 Okoŋ kɔɔli, mi kunda wanaa laalaŋnda Chudiaa, Kalili, a Sameeliaa+ kpou sɔla tiŋ kɔl nyuloo. Mi tiindaŋ ndaa chɔɔlu kalu poŋ. Nduyɛ le mɛɛ ndaa nɔ siooŋii Chɛhowa* ve, mi nyina diandaa wa nda kɔltaŋ dɛɛniaa yɛ,+ ma hiau lachi a kuiyo.

32 Mɛɛ Pitɛ wa balɔɔ o tanda koŋ niŋ kpou, mbo kua vɛlɛ o wanaa laalaŋnda lo Lida.+ 33 Mbo komal po pum loŋ diolaŋ aa Aniasi. Le wɔsilaŋ la ŋɔmaa, o wa ihini o kpele ndɔɔ choo, kanifuule o wa o bɛvɛiyo. 34 Mi Pitɛ dimul ndu aa: “Aniasi, Chiisu Kiliti siŋgi num.+ Chɔŋ ma toosiaa kpele numndo.”+ Mbo chaŋ o lepilɛ niŋ kpe. 35 Mɛɛ waŋnda Lida a waŋnda o Dɛŋgbɔɔ Sialɔŋ niŋ kpou che Aniasi, ma laalaŋ o Masanɔɔ niŋ.

36 Wana laalaŋ pilɛ wa Chopa diolaŋ aa Tabita. Koŋ cho ni, “Dɔkaasi.”* Mi ndoo tosal waŋnda sɔɔŋ kɛndɔŋ tau, nduyɛ mi ndoo ke wanaa bala fonduaa nyɔɔŋ. 37 A boondii keŋ mbo del a naa, mbo wu. Ma pulu ndu, ma yambu ndu o chiɛi choo choo wo niŋ. 38 Lida ve levil a Chopa le. Mɛɛ wanaa laalaŋnda tuei maa Pitɛ cho loŋ, ma viam puaa a ŋiɔɔŋ le ma kɔ veelu ndu aa: “Yandii, huŋndɔ chɔ chɔ.” 39 Mi Pitɛ chaŋ, mbo kua nda ndaa. Mɛɛ o fuuluu, ma kua a ndu o chiɛi choo choo wo niŋ. Mi waŋ laanduaa vii piaanduaa wa kpou huŋ naa Pitɛ chua a chaŋndo, ma chɔm ndu nyɛlaŋ a domala vilɛila Dɔkaasi toosiaa teleŋ o wa yoomu laŋ. 40 Mi Pitɛ soli wana o wana o bɛɛ,+ mbo baŋ wulaŋ, mbo piɛi. Mɛɛ o muliŋ naa dialloŋ wa wa, mbo dimi aa: “Tabita, chɔŋ!” Mbo kumbi hɔltaŋ. Mɛɛ o che Pitɛ, mbo chaŋ mbo chal.+ 41 Mi Pitɛ saa ndu baa, mbo simi ndu. Mbo veelu wanaa laalaŋnda a waŋ laanduaa vii piaanduaa wa, mi nda kpou cha maa Dɔkaasi miiŋgu yoomu.+ 42 Mi tɔɔ koŋ tiu Chopa silɔ. Mi wanaa bɔɔbɔɔ laalaŋ o Masanɔɔ niŋ.+ 43 Mi Pitɛ viau Chopa le palɛi i tiŋ o Saimɔŋ lo chiɛiniŋ, o ndoo tosa wallo a yaula visiaa wo.+