Luomaŋnda

9 Tonyaa ya cho dimioo o Kiliti niŋ ni, o cho lachoo le. Kɔl iyama ni cho o chɛlaŋ a nyina diandaa wo cho lesei. 2 Mɔnɛi bɛnduei cho ya, nduyɛ nyɛ nɛiyaa cho lɔɔlɔɔ o kɔl nuu niŋ. 3 Te ndii yɔŋnuŋ pɛ, I cho o bɛɛndiaŋ le mi faŋaŋ Kiliti kɔɔli maa wana sendioo cho choo wo, le halikpeŋ mi mala puaapiliaa niaa naŋ cho kaale pilɛleŋ nda. 4 Nda cho yɛ Isɔluɛiya ni. Nda Mɛlɛka ndoo hɛli ni le mbo siiŋguu nda chuauwaa nduaa.+ Mbo chɔm nda biilu ndɔɔ, mbo yii kpemalaŋ+ a nda, mbo ke nda Sawalaŋ*+ a dioo le ndu piɛiyo,+ nduyɛ mbo chuel nda buŋgaŋ.+ 5 O pulale finyaa naa mamaa choo nda fula ni,+ pulale Kiliti bɛɛ veluŋ o dialloŋ niŋndeŋ.+ Maa Mɛlɛka cho nyɛ o nyɛ fee bolleŋ ndo sɔla saŋgalaa le fɛɛŋ a fɛɛŋ fɔ! Amiina.*

6 O cho nuaa maa Mɛlɛka kɛɛ nyɛ o chua buŋgɛiyo tosa le. Kanifuule, o cho waŋnda Isɔluɛi kpou le cho “Isɔluɛiyaa” kpeekpeiya le.+ 7 O cho nda kpou le cho chuauwaa kpeekpeiya le mɛɛ nda cho chuauwaa mamaa Ebilaham nda* yɛ le.+ Mi Mɛlɛka dimul ndu aa: “O Aase niŋ sanaa chuauwaa numnda* cho fula ni.”+ 8 Koŋ cho ni, chuauwaa veluŋ o dialloŋ niŋnda, a cho chuauwaa Mɛlɛkaa kpeekpei le.+ Kɛ chuauwaa Mɛlɛka chuel buŋgɛiya,+ nda cho chuauwaa mamaa kpeekpeiya* ni. 9 Buŋgɛi Mɛlɛka chua ve cho hei ni: “Nyilasiaŋ a teleŋ waa nuaa, I cho hunɔɔ, nduyɛ Sela cho poo violɔɔ.”+ 10 Lende koni i wa ni mɛɛ Lubeka chua foli* ŋpɛndoo le Aase finya naa mamaa.+ 11 Ndaa viluŋ ndɔ le, nduyɛ ndaa tosa wɔ suɛi kɛndɛ ɔɔ suɛi wɔɔŋ te, mi Mɛlɛka chɔm sabu ndɔɔ le waŋnda hɛlioo. O cho le nyɛ waŋndo tosa wo le, kɛ ndupila hɛli wana o yeema veeloo wo ni. 12 Okoŋ mi Mɛlɛka dimul Lubeka aa: “Po num tasoo cho wa buɛiyo le pɔmbɔ ndɔ.”+ 13 A mɛɛ i cho i poonyiaa yɛ aa: “I kaala Chekɔpu, kɛ mi tul Iisɔ leyɛ.”+

14 Yɛɛnɛ naŋ nɔ yɛ niko miŋ dimi? Baa wana lakafaa Mɛlɛka cho ni? Sako+ bɛɛ! 15 Mi Mɛlɛka dimul Muuse aa: “Wana ya yeema pɛ mi tuiinuŋ inyiɛɛ, ndu ya tuiinuŋ inyiɛɛ ni. Nduyɛ wana ya yeema le kaalaa chɔmndo wo, ndu ya chɔm kaalaa ni.”+ 16 Lelaŋ, o cho le yeemɛi waŋndo ɔɔ sɛmbɛ ndɔɔ le Mɛlɛka hɛli ndu le, kɛ nyiɛɛye Mɛlɛka tuiinuŋ ndu ni.+ 17 Kanifuule, mi Yau Mɛlɛkaa dimul Feloo aa: “Le saboo hoo kpeekpei ya mal num ni ma wa wɔ yoomu, le mi chɔm num kpaaya nuu, nduyɛ mi waŋnda o lɛŋndeŋ choo kpou sina diola nilaŋ.”+ 18 Lelaŋ, wana Mɛlɛka hɛnaŋ nyiɛɛye tuiinɔŋndo wo, ndu o tuiinuŋ inyiɛɛ ni. Kɛ wana yeema pɛ mbo tosa bolle kala leŋ, Mɛlɛka chɛl ndu o tosa bolle kala leŋ.+

19 Mi apum nyuna ya dɔɔ aa: “Mɛɛ le yɛɛnɛ Mɛlɛka bii yɛ niko waŋnda chieeya tɔɔyaŋ? Nɛɛnɛ nɔla yɛ mbo simul nyɛ Mɛlɛka dimi wo?” 20 Kɛ wana maavɛɛ ŋ cho yɛ le ma mulul Mɛlɛka?+ Baa kpɛɛnɛi nda chɔu a puuloo ve dimul pa wana chɔu ndi wo aa: “Le yɛɛnɛ ŋ chɔu yɛ ya nuaa?”+ 21 La sina nuaa maa wana chuauwaa ŋkpɛɛnɔɔ nɔ dioo le mbo chɔu nyɛ o yeema wo a puuloo le?+ A puulu pilɛ koŋ kpe, o tiuba mbo chɔu kpɛɛnɛi sɔvɛ sɔvɛi, te koŋ te, mbo chɔu kpɛɛnɛi cho isɔvɛ le ve. 22 Lende koni i cho a Mɛlɛka ni. Mbo kɛɛsiaa le mbo dɔɔnuŋ tumbe, okoŋ mbo chɔm wanaa tɛɛmbuu ndu kɔllo wa kpaaya ndɔɔ. Nduyɛ o cho wanaa nɔ le hunɔɔ tambei sɔlaa wa biuwɔŋndo. 23 Mɛlɛka tosa hei le mbo chɔm wanaa cho hunɔɔ nyiɛɛyii nduɛi sɔla wa biilu ndɔ bɛndoo.+ O chii nda niŋ bɛɛndiaa le ma sɔla biiloo. 24 Naŋ cho wanaa o hɛli kaŋ nda ni. O cho ko Chuuwa tɛɛŋ te o hɛli naa le, kɛ wanaa cho ŋChuu le wa tɛɛŋ bɛɛ.+ 25 I cho yɔŋnɔŋndo a mɛɛ o dimi o Hoosiaa niŋ yɛ aa: “Wanaa cho wanaa ni le wa,+ I cho nda veelu aa ‘wanaa niaa.’ Wana lanɔ yaa kaala le wo, I cho ndu veelu aa ‘laa ni kaalaa.’+ 26 Nduyɛ o fondaŋ yaa dimul nda maa, ‘La cho lɛ wanaa ni le’ wo, a sɔla niŋ veelɔŋndo loŋ aa, ‘chuauwaa Mɛlɛka cho yoomu wa.’”+

27 Mi Aisaya bɛɛ dimi a Isɔluɛi okɔɔ aa: “O yɔŋ bɛɛ mi Isɔluɛiya a kui mɛɛ siooŋnde cho o pee mɛŋma ihɛllo yɛ, waŋnda nyɛɛmbɔ koni cho pioŋɔɔ sɔla ni.+ 28 Kanifuule, Chɛhowa* cho chieeŋndo yamɛi kilul. O cho ndi kiolɔɔ suŋ suŋ.”+ 29 Nduyɛ a mɛɛ Aisaya dimi vɛlɛ yɛ aa: “Te Chɛhowa,* Mɛlɛka puaa chɔuwa* ndoo mel naa chuauwaa mamaa* le, ŋ wa simnɔŋ maa Sodɔm a Komoolua.”+

30 Yɛɛnɛ naŋ nɔ yɛ niko miŋ dimi? Maa wanaa cho ŋChuu le wa chɔm laalaŋndo ma simnuŋ wanaa sakpuaa Mɛlɛka o hɔl,+ mi che bɛɛ a ve sakpoyɛi tolɔɔ kɔɔli le.+ 31 Mi che bɛɛ Isɔluɛiya wa kindiŋndo le nyɛ sawaa dimi le waa sakpo wo tolɔɔ kɔɔli, kɛ a tiuba ma tosa nyɛ sawa koŋ dimi wo le. 32 Le yɛɛ? Kanifuule, a sɔɔŋ nda wa tosaa woŋ nda wa kindiŋndo le sawaa tolɔɔ kɔɔli ni, kɛ a ve laalaŋ chɔm te. O hei niŋ, ma boŋ o “pou mal wana wo.”+ 33 A mɛɛ i cho i poonyiaa yɛ aa: “I cho pou+ mal wana wo, a pou tosa mi waŋnda dɔɔnuŋ tumbe wo kɛsi Saayɔŋ. Kɛ wana o wana dɔu pɛ laalaŋndo o ndu niŋ, wana koŋ tulnuŋ lasiɔmbu le.”+