Kɔliŋtiaŋ Diiŋ Ndɔɔ
2 I chii kɛɛsiaŋ o kɔl maa I hiŋ lɛ nya yilɔɔ le nya kɔl tɛɛmbuu le. 2 Te I tɛɛmbuu pɛ nya wanaa tosa mi dɔɔnuŋ nyaale wa kɔltaŋ, nɛɛnɛ cho yɛ tosa mi dɔɔnuŋ nyaale? 3 Le sabu koŋ ya poonyial nya ni maa te I hiŋ pɛ, I ve a kɔl tambɛi le, kanifuule nya tosa ni mi wa a nyaale. I laalaŋ maa sɔɔŋ tosa mi dɔɔnuŋ nyaale woŋ, muŋ koni tosa ni mi la dɔɔnuŋ nyaale. 4 A kɔl tambɛi bɛndoo vɛlɛ a mɛmiaŋ o lahɔl ya poonyial nya ni. O cho le nya kɔl tɛɛmbuu le,+ kɛ le nya chɔmndo mɛɛ kpɛ ya kaala nya yɛ.
5 Te waŋndo tosa pɛ suɛi tɛɛmbuu wana kɔllo ve,+ o cho ya le wana koŋ tɛɛmbuu kɔl te, kɛ nya kpou. O cho nuaa maa kindilaa le ya cho ndi hiuwo le. 6 Kɛ sila wana koŋ sɔla wanaa bɔɔbɔɔ o ba wo cho letuu le ndu. 7 Lelaŋ, la mal ndu haki fasɛi, okoŋ mi la dɛɛniaa ndu,+ yɔŋii o hiu kɔllo tambu mbo vi ŋdial.+ 8 I cho nya dɛɛniaa le mi la chɔm kaala nyaa le ndu.+ 9 Le saboo hoo ya poonyial nya ni, le sinaa te la cho wanaa diikuŋ o isɔɔ o isɔɔ niŋ. 10 Te la mal wana haki le nyɛ o nyɛ pɛ, ya bɛɛ I mal ndu haki. Nyɛ o nyɛ ya mal pɛ haki (te I mal pɛ waŋndo haki) le sabu nyaa ya tosa ndi Kiliti o hɔl ni, 11 le halikpeŋ Setana hui naa le.+ Kanifuule, ŋ sina nɛila ndɔla kaŋgalaalaŋ.+
12 Mɛɛ ya fuuluu Towaasi+ le yooŋgu kɛndɔɔ dimioo a Kiliti okɔɔ, mi dioo kumbiŋ le ya o wali Masanɔɔ niŋ. 13 Kɛ mi tambu kɔllo tau, kanifuule I komal Taitɔɔ+ puaapilɛnɔ nuu loŋ te. Okoŋ mi choŋguŋ nda, mi hiau Masidooniaa.+
14 Ŋ mel Mɛlɛka balikaa le mɛɛ o sim naa lachi naa Kiliti waa, mɛɛ puaa chɔuwa wa nuaa miiŋgoo a kɔŋgaŋndo le mɛɛ nda yem chɔuwo yɛ. Mɛlɛkaa cho kɔl kalu ndɔ cho maa nyɛ chuŋ kɛndɛ wo soliŋndo kpeku le mi waŋnda ba o ba fee tuei a ndu okɔɔ. 15 Naŋ cho yooŋgu kɛndɔɔ dimioo a Kiliti okɔɔ wa, ŋ cho ko maa nyɛ chuŋ kɛndɛ le Mɛlɛka. Chuŋ kɛndɔɔ hoo cho wanaa nɔ le pioŋɔɔ sɔlaa wa, a wanaa nɔ le tambei sɔlaa wa komallo. 16 Wanaa nɔ le tambei sɔlaa wa cho chuŋndo tueiyɔɔ le piɔmndo sɔlaa,+ nduyɛ wanaa nɔ le pioŋɔɔ sɔlaa wa cho chuŋndo tueiyɔɔ le yoomoo sɔlaa. Nɛɛ yaa kpeekpei suliŋ yɛ le wallo hoo tosaa? 17 Naŋ suliŋ ni, kanifuule ŋ tosa leyula a diom Mɛlɛkaa+ maa waŋnda apum te. Kɛ o nɛi sakpoo choo naŋ dimul waŋnda yooŋgu Mɛlɛkaa ni. Nduyɛ Mɛlɛka vem naa ni, miŋ wa wallo hoo tosaa naa Kiliti waa latulu ndu o hɔl.