Ditɔnɔmii
15 “O wɔsi ŋɔmmɛu kɛ kɛ mɛɛlulaŋ, la nɔ mi la mal wanaa bii nya kueelaŋ o laba wa.+ 2 Mɛɛ nya nɔ mi la tosa ndi yɛ cho hoo ni: Wana o wana wuu pɛ chaaŋ ndɔ kuoo, o nɔ mbo mal ndu le kuee o bii ndu o ba wo. O nɔ mbo nyuna chaaŋ ndɔ koŋ ɔɔ puaapilɛnɔ ndɔɔ le mbo soli kuee koŋ te. Kanifuule, Chɛhowa dimi ni le mi la mal wanaa bii nya kueelaŋ o laba wa.+ 3 Mialaa cho nya tɛɛŋ nda nɔ ma soli kueela nda bii laŋ.+ Kɛ kuee kɛ kɛ puaapilɛnɔ numndo bii num pɛ o ba, a nɔ ma mal ndu le kuee koŋ. 4 Wana o wana nya tɛɛŋ nɔ mbo simnuŋ wana bala fondo le. Kanifuule, Chɛhowa cho nya salaa dɔwɔɔ+ o lɛŋnde Chɛhowa Mɛlɛka nyaa cho nya ke le mi le wa nyɛm kɛŋ nya leŋ niŋ. 5 Kɛ te o yɔŋ pɛ kinɛi mi la tuei Chɛhowa Mɛlɛka nyaa diom, nduyɛ mi la bii sawala ndɔla ya cho nya laŋ kioo paale hauleŋ ndeŋ ndaŋ kpou,+ 6 Chɛhowa Mɛlɛka nyaa cho nya salaa dɔwɔɔ a mɛɛ o chuel nya buŋgɛi yɛ. La cho lɛŋii bɔɔbɔɔ kueelaŋ wuu, kɛ nya cho kueela biyɔɔ le.+ O fulawɔ okoŋ kɔɔli, la nɔ niŋ lɛŋii bɔɔbɔɔ kpaayaa choo, kɛ nda nɔ niŋ nya kpaaya choo le.+
7 “Te puaapilɛnɔ nyaa simnuŋ pɛ wana bala fondoo o chieeŋ nyaŋ bɛnduŋ Chɛhowa Mɛlɛka nyaa cho nya ke woŋ niŋ i pilɛ, la tuiinuŋ ndu inyiɛɛ nduyɛ mi la mala ndu.+ 8 La nɔ mi la tosal ndu kɛndɛi.+ Nduyɛ nyɛ o nyɛ o hauba pɛ mbo nyuna le ndu, la nɔ mi la wuu ndu kuoo. 9 La wa yekeŋ yɔŋii nya nɔ yiyaŋ dɛnɛ wɔɔŋndo hoo o kɔl, mi la dimi aa, ‘Wɔsi ŋɔmmɛuwo le wanaa bii kueelaŋ nda malɔɔ cho niŋ kpɛɛluŋ le chuwɔɔ.’+ Le saboo hoo, mi la kɛɛ puaapilɛnɔ nya bala fondoo kɛndɛi tosallo, la ke ndu nyɛ o nyɛ le. Te o ŋɔɔchiaŋ pɛ o Chɛhowa lo a nya okɔɔ, hakioo cho wa nya choo.+ 10 La nɔ mi la tosal ndu kɛndɛi a kɔllo kpou,+ nduyɛ la* tosa ndi a ŋɔɔchiaŋ te. Le sabu koŋ Chɛhowa Mɛlɛka nyaa cho nya salaa dɔwɔɔ ni o nyɛ o nyɛ niŋ nya tosa.+ 11 Kanifuule, wanaa bala fonduaa cho wa teleŋ o teleŋ o lɛŋndeŋ niŋ.+ Le sabu koŋ ya cho nya dimullo ni aa, ‘Puaapiliaa nyaa cho nya tɛɛŋ o lɛŋnde nyaleŋ niŋ, ma wa o kuɛi niŋ nduyɛ ma nɔ bala fondolaŋ nda, la tosal nda kɛndɛi.’+
12 “Te a pendu pɛ chaaŋ num Hibuluinɔɔ, o wa wana pɔnɔ ɔɔ wana lanɔ, nduyɛ mbo tosal num wallo le wɔsioŋ ŋɔmpum, wɔsi ŋɔmmɛu ndɔɔ, a nɔ ma mal ndu mbo kuɛŋnuŋ.+ 13 Nduyɛ te a wa ndu malɔɔ pɛ, a nɔ ma mal ndu mbo kuɛ bala fondo le. 14 A nɔ ma ke ndu chɔluaa numnda a tiŋ, nyɛm ŋ sɔla o yasaba numndo woŋ, a nyɛm ŋ sɔla o doola mamuɛiyo a o doola machuɛiyo woŋ. Mɛɛ Chɛhowa Mɛlɛka dɔu num sala yɛ, lende ŋ nɔ ni ma ke ndu. 15 La loonuŋ maa chiaa nya bɛɛ wa o lɛŋnde Ichipi leŋ niŋ ni, mi Chɛhowa Mɛlɛka nyaa soli nya loŋ. Le sabu koŋ ya cho nya dimullo hau ni le mi la tosa hei.
16 “Kɛ te o dimul num pɛ aa, ‘I yeema mi faŋaŋ num o ba le!’ le mɛɛ o kaala num a yuŋgu numndo, nduyɛ mbo wa a kɔl kɛndɛ chɔŋ a teleŋ o wa num o ba wo yɛ,+ 17 o handu nileŋ o dio, okoŋ ma chua chiliŋii sɛɛmbiɛi, ma buli ndu nileŋ a ndi. Chɔŋ niŋ a paale leŋ, o cho simnɔŋ chɛ numndo lefafɛɛŋ. Lende koni ŋ nɔ ma tosa a chɛ num laandoo ni. 18 Te a mal ndu pɛ mbo kuɛŋnuŋ, yiyaŋ nuaa maa sɔɔŋ cho kalu a num te. Kanifuule, num oo chua bɛɛ wana wallo mi num oo wa ndu paawaa, wali o tosal num le wɔsila ŋɔmpum ndaŋ ndo chua paawa wana wali koŋ bɛmbɔɔ lediiŋ. Nduyɛ, mi Chɛhowa Mɛlɛka numndo duau num sala o nyɛ o nyɛ niŋ.
19 “Chɔlu piaandu tase kɛ kɛ chɔluaa nyaa kom pɛ, o nɔ mbo wa le Chɛhowa Mɛlɛka nyaa.+ Kɔmnde taseleŋ o nauwaa nyaa tɛɛŋ, la tosa wali a nda le. Nduyɛ kɔmnde taseleŋ o saa nyaa tɛɛŋ, la kili nda yiinde le. 20 Iwɔsi o iwɔsi, num nya yuŋgu numndo, la nɔ mi la de chɔluaa tasiaa chɔluaa nyaa kuam nda Chɛhowa Mɛlɛka nyaa lachi, o fondaŋ Chɛhowa cho hɛli wo.+ 21 Kɛ te o nɔ pɛ namtaleŋ, mɛɛ pelii yomɛiye, ba yomɛiyo ɔɔ mɛɛ sumaa cho nuaa yɛ, ɔɔ namtale kɛ kɛ cheleŋ, la nɔ mi la soli ndu sala o Chɛhowa Mɛlɛka nyaa lo le.+ 22 La nɔ mi la de ndu o chieeŋ nyaŋ bɛndoŋ* niŋ, mɛɛ nya dia nuaa puuwɔɔ a kiallo yɛ. Wana nɔɔlɛi ni, wana diandaa ni, la nɔ mi la de ndu latulu nya ndaa.+ 23 Kɛ la nɔ mi la de kooma nduaŋ te.+ La nɔ mi la tala maŋ lɛŋ maa mamɛŋ.+