Ditɔnɔmii

2 “Miŋ muliŋ miŋ kua a nɛi kuɛ o Pee Siaŋa Mɛŋma Ihɛllo wo, le kɔlaŋ o pollo niŋ a mɛɛ Chɛhowa dimul la yɛ.+ Nduyɛ, le palɛi bɔɔbɔɔ ŋ wa kɔlaŋ a tanda ŋpemboo Sɛyaa holnɔŋndo. 2 Okoŋ kɔɔli, mi Chɛhowa dimul la aa, 3 ‘La viou niŋ bɔɔ pemboŋ muŋ holnɔŋndo. Lelaŋ, la muliŋ mi la kuɛ ba luaŋ ndo. 4 Dimul waŋnda aa: “O pɛŋgulaŋ a puaapiliaa nyaa, wanaa fula o pulale Iisɔ leŋ choo wa+ nya cho keeku ni. Sɛyaa nda cho ichali ni.+ Nduyɛ siooŋnde cho nda biyɔɔ le nya,+ kɛ la nɔ mi la wa yekeŋ. 5 La chiŋalaŋ nda a sɔŋgɔɔ le. I cho nya lɛŋnde ndaleŋ ke nyɛɛmbɔ bɛɛ le. Naa kɛsiaa ipelu bɛɛ la cho sɔla le. Iisɔ ya ke tanda ŋpemboo Sɛyaa ni, le mbo wa nyɛ ndɔ.+ 6 La nɔ mi la ke nda kanioŋ* le nyɛdiaa nya cho dio wo, nduyɛ mi la paawa* le mɛŋma nya cho kolɔɔ waŋ.+ 7 Ya Chɛhowa Mɛlɛka nyaa dɔu niŋ nya sala o nyɛ o nyɛ niŋ nya tosa. I sina mɛɛ nya kela niŋ o poli bɛndoo hoo niŋ yɛ. Wɔsilaŋ niŋ 40, ya Chɛhowa Mɛlɛka nyaa cho a nya latulu, nduyɛ nyɛ o nyɛ cho nya lepɛŋ te.”’+ 8 Okoŋ miŋ keeku puaapiliaa naa ikɛi, a fula o pulale Iisɔ leŋ choo ma wa+ ichali Sɛyaa wa. Miŋ mɛi nɛi kuɛ Aluaba, Ɛlati, a Ɛsiɔŋ-kɛbɛ wo.+

“Miŋ muliŋ miŋ kua a nɛi kuɛ o pollo niŋ Mowaabi wo.+ 9 Mi Chɛhowa dimul la aa, ‘La chiŋalaŋ Mowaabi ɔɔ mi la sɔŋga a ndu le. I cho nya lɛŋnde leŋ ke nyɛɛmbɔ bɛɛ le mi la chal loŋ te. Kanifuule, I chii niŋ wanaa fula o pulale Lɔtu leŋ choo wa Aa ke, le ma chal loŋ.+ 10 (Imimnda+ wa loŋ paandu ni. Waŋnda haa wa a bɛndu, a wa faŋga, nduyɛ bandei naŋ chaa Anakimnda ni. 11 Luɛfemnda+ bɛɛ, waŋnda ndaa chua nda maa Anakimnda nda cho ni.+ Nduyɛ mi Mowabaitiiya ndaa veelu nda aa Imimnda. 12 Holuaitiiya+ wa paandu ichali Sɛyaa ni, kɛ mi wanaa fula o pulale Iisɔ leŋ choo wa bii lɛŋnde leŋ, ma diu diu nda, nduyɛ ma chal o fondaŋ ndaa.+ Lende Isɔluɛiya cho tosa a lɛŋnde nda nɔ le challe leŋ ni, lɛŋnde ya Chɛhowa nɔ le nda kioo leŋ.) 13 La kɔ niko mi la kɔ taŋ Kpoloŋndo* Sɛluɛɛdi.’ Okoŋ, miŋ taŋ Kpoloŋndo* Sɛluɛɛdi.+ 14 Chɔŋ Kedɛsi-baniaa haaa miŋ kɔ taŋ Kpoloŋndo* Sɛluɛɛdi, wɔsilaŋ 38 naŋ chii ni. Mi puaa chɔuwa kpou chuu wu o dɔɔŋgɔɔ niŋ, mɛɛ Chɛhowa mɛnaŋ yɛ.+ 15 Mi Chɛhowa tosa a kpaaya ndɔɔ,* mbo lo nda diu diu wo o dɔɔŋgɔɔ niŋ haaa ma chuu kpou.+

16 “Dimioo nuaa mi puaa chɔuwa kpou chuu wu waŋnda tɛɛŋ,+ 17 mi Chɛhowa dimul la vɛlɛ aa, 18 ‘La cho hau tanda Mowaabi wo hiouwɔɔ, koŋ cho ni, Aa. 19 Te la sɔɔŋguu pɛ Amɔnaitiiya ikɛi, la paaliaŋ nda ɔɔ mi la tiŋ nda le. I cho nya lɛŋnde Amɔnaitiiya ke nyɛɛmbɔ bɛɛ le. Kanifuule, I chii niŋ wanaa fula o pulale Lɔtu leŋ choo wa leŋ ke, le ma chal loŋ.+ 20 Fondaŋndo hoo bɛɛ, waŋnda ndaa chua ndu maa lɛŋnde Luɛfemnda.+ (Luɛfemnda wa paandu ichali loŋ ni. Nduyɛ, mi Amɔnaitiiya ndaa veelu nda aa Samsumi. 21 Waŋnda haa wa a bɛndu, a wa faŋga, nduyɛ bandei naŋ chaa Anakimnda ni.+ Kɛ mi Chɛhowa tosa mi Amɔnaitiiya yam nda, ma tuau nda, nduyɛ ma chal o fondaŋ ndaa. 22 Lende Mɛlɛka tosa le wanaa fula o pulale Iisɔ leŋ choo, ma wa ichali Sɛyaa wa ni.+ Mbo tosa ma diu diu Holuaitiiya,+ ma tuau nda, nduyɛ ma chal o fondaŋ ndaa haaa huŋ bii a paale hauleŋ ndeŋ. 23 Avimnda wa ichali o sɔndɔkɔltaŋ haaa kɔ Kaasa.+ Kɛ mi Kafitɔluimnda,+ fulaa Kafitɔɔ* huŋ diu diu nda, ma chal o fondaŋ ndaa.)

24 “‘La chɔŋ mi la taŋ Kpoloŋndo* Anɔŋ.+ I chii nya Saihɔŋ,+ Amɔluaitiinɔɔ, masaa le Hɛsibɔŋ malɔɔ o ba. Lelaŋ, la kɔ chiŋalaŋ ndu a sɔŋgɔɔ mi la kandu lɛŋnde ndɔleŋ biyɔɔ. 25 Paale hauleŋ ndeŋ, I cho tosa mi siooŋnde kandu wana o wana o lɛŋndeŋ choo biyɔɔ te a tuei pɛ a nya okɔɔ. Siooŋii bɛnduei cho nda biyɔɔ ma nyiiya kpa kpa le nya.’+

26 “Okoŋ, mi viam waŋnda ma chaŋ o pollo niŋ Kɛdɛmɔti,+ ma kua o Saihɔŋ ndo masaa Hɛsibɔŋ, ma kɔ dimul ndu yooŋgu kɔl nyuloo hoo aa,+ 27 ‘Yandii chɛl naa miŋ keeku o lɛŋnde numndeŋ niŋ. O nɛi sakpo naŋ cho lakɔ ni. Ŋ cho sei o ba kɛndɔɔ choo ɔɔ o ba miallo choo le.+ 28 Nyɛdiaa ŋ cho naa pisi o ba wo kinɛi naŋ cho dio ni, nduyɛ mɛŋma ŋ cho naa pisi o ba waŋ kinɛi naŋ cho kolɔɔ ni. Chɛl naa kinɛi miŋ keeku o lɛŋnde numndeŋ niŋ a ŋpelu. 29 Lende koni wanaa fula o pulale Iisɔ leŋ choo ma wa ichali Sɛyaa wa, a Mowabaitiiyaa cho ichali Aa wa tosa le naa ni. Lende naŋ lo kɔlaŋ ni haaa miŋ taŋ Chɔɔdaŋ ndaŋ, miŋ fuuluu o lɛŋnde Chɛhowa Mɛlɛka naa cho naa kioo leŋ niŋ.’ 30 Kɛ Saihɔŋ, masaa le Hɛsibɔŋ chɛl naa miŋ keeku o lɛŋnde ndɔleŋ niŋ te. Kanifuule, mi Chɛhowa Mɛlɛka naa tosa mbo luɛi bolle kalaleŋ,+ nduyɛ mi kɔl yoŋgaa luɛi ndu niŋ le halikpeŋ mbo mal ndu nya o ba, a mɛɛ i yɔŋnuŋ niŋ nuaa yɛ.+

31 “Mi Chɛhowa dimul la aa, ‘I chii nya Saihɔŋ malɔɔ o ba a lɛŋnde ndɔleŋ. Lelaŋ, la kɔ niko mi la kɔ chal loŋ.’+ 32 Mɛɛ Saihɔŋ hiŋ a puaa nduaa chɔuwa kpou le naa chiŋalaŋndo a sɔŋgɔɔ Chahasi,+ 33 mi Chɛhowa Mɛlɛka naa mal naa ndu o ba, miŋ yam ndu, puaa nduaa, a puaa nduaa chɔuwa kpou. 34 A teleŋ koŋ, miŋ bii chieeŋ ndɔŋ bɛndoŋ, nduyɛ miŋ tɛɛmbuu muŋ kpou. Wana pɔnɔ ni, wana lanɔ ni, chuaambɔ ni, wana pilɛ bɛɛ ŋ mɛi yoomu le.+ 35 Chɔluaa kinɛi naŋ biu ni, nduyɛ miŋ chua nyɛm kɛndɛŋ wa o chieeŋ naŋ bii yoŋ niŋndoŋ le naapila. 36 Chɔŋ Aloya,+ chiee cho o Kpoloŋndo Anɔŋ ikɛiyo, (kɔ bii a chiee cho o kpoloŋndo hoo niŋ ndo,) mbo kua haaa Kiliaadi, mi Chɛhowa Mɛlɛka naa mal naa muŋ kpou o ba.+ 37 Kɛ lɛŋnde Amɔnaitiiya,+ Kpoloŋndo* Chabɔki kpou,+ chieeŋ wa o tanda ŋpemboo niŋndoŋ, a chieeŋ cheleŋ Chɛhowa Mɛlɛka naa dimul naa maa naŋ pilaŋ te woŋ, ŋ kue muŋ ikɛi le.