Ditɔnɔmii
29 Diomnda Chɛhowa dimul Muuse le kpemaa yiiyo a waŋnda Isɔluɛi o lɛŋnde Mowaabi leŋ niŋndaŋ la cho laŋ ni, o faŋaŋ o kpema o yii a nda Holuɛɛbi wo.+
2 Mi Muuse veelu waŋnda Isɔluɛi kpou naapilɛ mbo dimul nda aa: “Nyɛ o nyɛ Chɛhowa tosa a Feloo, buɛiyaa nduaa, vɛlɛ a wanaa nduaa kpou o lɛŋnde Ichipi leŋ niŋ, mi la cha a lehɔl pɛɛŋ.+ 3 Mi la cha nyɛpalaa* o tusi nda choo wo, sɔɔŋ kɔndɔfiliŋ bɛndoŋ, a kaamaalaŋ.+ 4 Kɛ sɔɔŋ nya che muŋ nduyɛ mi la tuɛi yoŋ, mi Chɛhowa tosa la bii muŋ bila le haaa a paale hauleŋ ndeŋ.+ 5 ‘Le wɔsilaŋ 40, I wa nya mandaa o pollo niŋ.+ Nyɛ chuɛɛnaŋ siɔŋ nya lekɔɔ le, nduyɛ kɔwɛila* siɔŋ nya o ŋpelu le.+ 6 La di nyɛdiaa* o nyɛdiaa le, nduyɛ la kol mamuɛi o mamuɛi le,* le halikpeŋ mi la sina maa ya cho Chɛhowa Mɛlɛka nyaa ni.’ 7 Mɛɛ naŋ fuuluu o fondaa hoo, mi Saihɔŋ masaa le Hɛsibɔŋ,+ a Ɔku masaa le Baasiaŋ+ huŋ chiŋalaŋ naa a sɔŋgɔɔ, kɛ miŋ yam nda.+ 8 Okoŋ kɔɔli, miŋ bii lɛŋnde ndaleŋ miŋ ke kaale Lubɛŋ ndeŋ, kaale Kaadi leŋ, a kaale Manaasɛ leŋ tɛndaa tɛɛŋ, le mi le wa nyɛm kɛŋ nda.+ 9 Lelaŋ, la diikuŋ nyɛ o nyɛ dimiŋ o kpemaa hoo niŋ, le halikpeŋ mi nyɛ o nyɛ wa o kɛndɛ a nya.+
10 “Nya kpou cho hau isisi Chɛhowa Mɛlɛka nyaa o hɔl, wanaa cho kaala nyalaŋ bolle wa ni, wanaa nyaa bɛnduaa, wanaa nyaa banaa, wana pɔnɔ o wana pɔnɔ cho Isɔluɛi, 11 chuauwaa nyaa, laandaa nyaa,+ mialaa+ cho nya tɛɛŋ o dɔɔŋgɔ nyaa niŋnda, chɔŋ a wanaa tiŋgul nya yɔmnde wa, mbo kɔ bii a wanaa kondul nya mɛŋndaŋ nda. 12 La cho hau nanuŋ le mi la luɛi o kpema Chɛhowa Mɛlɛka nyaa niŋ, kpema Chɛhowa Mɛlɛka nyaa cho yii a nya, mbo mɛnaŋ po wo,+ 13 le halikpeŋ mbo siiŋguu nya hau wanaa ndɔ,+ nduyɛ mbo simnuŋ Mɛlɛka nyaa+ a mɛɛ o chuel nya buŋgɛi, mbo mɛnaŋ o finyaa nyaa mamaa lo, Ebilaham,+ Aase,+ a Chekɔpu yɛ.+
14 “O cho ko a nya le ya cho kpemaa hoo yiiyo, nduyɛ mi wa mɛnaŋndo le. 15 Kɛ nya cho haa isisi a naa latulu hau Chɛhowa Mɛlɛka naa o hɔl la, vɛlɛ a wanaa cho bɛɛ hau nanuŋ te wa. 16 La sina walaŋ a mɛɛ naŋ wa o lɛŋnde Ichipi leŋ niŋ yɛ, nduyɛ a mɛɛ naŋ keeku o lɛŋii bɔɔbɔɔ niŋ yɛ, boondii naŋ wa hunɔɔ ve.+ 17 Nduyɛ mi nyaa che nyɛm nɔɔlɛiyoŋ, a piɔmaa ndaa nɔɔlɛiyaa*+ nda toosiaa a yɔmnde, poutaŋ, kanii humbuei, a kooliiyoŋ ma wa nda o laba wa. 18 La loonuŋ maa wana o wana wa nya pɛ hau tɛɛŋ, wana pɔnɔ ni ɔɔ wana lanɔ ni, leyuŋgu ni ɔɔ lekaa ni, mbo kɛɛ Chɛhowa Mɛlɛka nyaa nduyɛ mbo muliŋ mɛlɛkaa waŋnda haa sooluuwo pɛ,+ wana koŋ o simnuŋ nya tɛɛŋ maa yɔm wɔɔŋ kuam yondoo niŋ wana di ndu le wo.+
19 “Kɛ te waŋndo tuei pɛ diomnda dimiŋ o kpemaa hoo niŋndaŋ, mbo dimiŋ o kɔl aa, ‘I cho wa o kɔl nyulu niŋ, o yɔŋ bɛɛ mi tosa nyɛ kɔl nuu dimul la wo,’ o chuu acheleŋnda kpundɔɔ wo, 20 Chɛhowa mel wana koŋ haki le.+ Chɛhowa cho dɔɔnɔŋ tumbe o kala kala a wana koŋ, nduyɛ mi sendila cho la poonyiaa o yauwo hoo niŋndaŋ kpou la bii ndu.+ Okoŋ, mi Chɛhowa tosa mi diola ndɔlaŋ la nyum pɔli o lɛŋndeŋ choo. 21 Chɛhowa cho wana koŋ soli kaalaŋ Isɔluɛi kpou tɛɛŋ, mbo tusi ndu nyɛpalaa choo, a mɛɛ sendila cho la poonyiaa o yau laSawaa niŋndaŋ la dimi a wana tɛɛmbuu kpemaa wo okɔɔ yɛ.
22 “Te chuauwaa nyaa mamaa a wanaa lekaawaa cho landaŋ a nya wa che pɛ kpundɛla cho tolɔɔ lɛŋndeŋ ndeŋ choo laŋ, naala Chɛhowa cho tusi o lɛŋndeŋ ndeŋ choo laŋ, 23 ma che mi lɛŋndeŋ kpou le simnuŋ pollo, mi hɛlle kumbu leŋ kpou, okoŋ bil o bil vil lɛ loŋ te, nduyɛ wana tol lɛ nyɛ o nyɛ loŋ te, mi le simnuŋ mɛɛ Chɛhowa tɛɛmbuu Sodɔm, Komoolua,+ Adimaa, a Sɛboyim yɛ,+ teleŋ o dɔɔnuŋ tumbe o kala kala wo, 24 nda a lɛŋii cheleŋnde kpou cho nyuna aa, ‘Le yɛɛnɛ Chɛhowa tosa yɛ hei a lɛŋndeŋ ndeŋ?+ Le yɛɛnɛ o dɔɔnuŋ yɛ tumbe o kala kala nuaa?’ 25 Okoŋ ma dimul nda aa, ‘Le mɛɛ nda tɛɛmbuu kpema Chɛhowa,+ Mɛlɛka finyaa ndaa mamaa yii a nda wo yɛ, teleŋ o soli nda o lɛŋnde Ichipi leŋ niŋndo.+ 26 Ma mal ndu, ma muliŋ tundɔŋndo o mɛlɛkaa cheleŋnda lo le nda sooluuwo, mɛlɛkaa nda sina le wa, a o kuuna nda maa a sooluu le wa.+ 27 Okoŋ mi Chɛhowa duaunuŋ tumbe o kala kala a lɛŋnde leŋ, nduyɛ mbo handu leŋ sendila cho la poonyiaa o yau laSawaa niŋndaŋ kpou choo.+ 28 Le hei, mi Chɛhowa duaunuŋ tumbe o kala kala a nda, mbo soli nda o lɛŋnde ndaleŋ niŋ,+ mbo kua a nda o lɛŋnde cheleŋ niŋ, naa nda cho hau wa.’+
29 “Nyɛ o nyɛ cho o viaŋnaŋ, le Chɛhowa Mɛlɛka naa+ o cho ni. Kɛ nyɛ o nyɛ cho o chɔɔmaŋ kpendekele, le naa a chuauwaa naa o chilaŋ niŋ o cho ni le fɛɛŋ a fɛɛŋ, le halikpeŋ miŋ tosa nyɛ o nyɛ cho o yau laSawaa hoo niŋ.+