Saamiɛɛ Tasoo

23 Mɛɛ teleŋ tiŋ hiou, ma dimul Deeve aa: “Filitiaŋnda kɔ chiŋalaŋ Kɛlaa a sɔŋgɔɔ,+ nduyɛ ma wa witiiŋ nda kɛsi o yasabalaŋ ndoŋ puŋgaa.” 2 Mi Deeve nyuna Chɛhowa aa:+ “Baa I kɔ mi kɔ chiŋalaŋ Filitiaŋnda haa a sɔŋgɔɔ?” Mi Chɛhowa mulul Deeve aa: “Ei, kɔ chiŋalaŋ nda a sɔŋgɔɔ, okoŋ ma piŋi Kɛlaa.” 3 Kɛ mi puaa Deeve wa dimul ndu aa: “Fallo, ŋ cho o Chuda niŋ miŋ wa a siooŋnde,+ vɛɛ kpɛ i wa yɛ niŋ te ŋ kuɛ pɛ Kɛlaa miŋ kɔ chiŋalaŋ Filitiaŋnda a sɔŋgɔɔ?”+ 4 Okoŋ mi Deeve nyuna vɛlɛ Chɛhowa.+ Mi Chɛhowa mulul ndu aa: “Chɔŋ ma kuɛ Kɛlaa, kanifuule I cho Filitiaŋnda num malɔɔ o ba.”+ 5 Mi Deeve nda puaa nduaa kua Kɛlaa, ma kɔ sɔŋga a Filitiaŋnda. Mbo kuaŋnuŋ a chɔluaa ndaa, nduyɛ ma diu Filitiaŋnda diuwo pila. Okoŋ mi Deeve piŋi waŋnda Kɛlaa.+

6 Teleŋ Abiaata+ po Ahimɛlɛki wo nyaanuŋ o Deeve lo Kɛlaa wo, mbo kua a doma biŋgioo* o ba. 7 Ma dimul Sɔɔ aa: “Deeve cho Kɛlaa.” Okoŋ mi Sɔɔ dimi aa: “Mɛlɛka mal la ndu o ba,*+ kanifuule o luei ndupila o yaŋɔɔleŋ niŋ, le mɛɛ o luɛi o chiee bɛndu nɔ diola kpakilaŋ a sulukula ŋchiliŋndaŋ ndo niŋ yɛ.” 8 Mi Sɔɔ chuuŋgiaa puaa nduaa kpou le ma kuɛ Kɛlaa, ma kɔ del Deeve a puaa nduaa choo a chɔuwo. 9 Mɛɛ Deeve tuei maa Sɔɔ cho kɛɛsiaa le ndu hunɔɔ delɔɔ choo, mbo dimul Abiaata wana soliaa lasalaa aa: “Huŋ a doma biŋgioo nanuŋ.”+ 10 Okoŋ mi Deeve piɛi aa: “Oo Chɛhowa, Mɛlɛka Isɔluɛiya, I tuei maa Sɔɔ yeema le mbo huŋ del Kɛlaa choo mbo tɛɛmbuu ndu le mɛɛ ya cho nanuŋ yɛ.+ 11 Baa waŋ banaa Kɛlaa* cho ya pa malɔɔ ndu o ba? Baa Sɔɔ cho pa hunɔɔ nanuŋ a mɛɛ buɛi numndo tuei yɛ? Oo Chɛhowa, Mɛlɛka Isɔluɛiya, a yandii, dimul la.” Okoŋ mi Chɛhowa dimi aa: “Ei, o cho lakɔ loŋ.” 12 Mi Deeve nyuna vɛlɛ aa: “Baa waŋ banaa Kɛlaa cho ya a puaa niaa malɔɔ Sɔɔ o ba?” Okoŋ mi Chɛhowa muli aa: “Ei, a cho num malɔɔ ndu o ba.”

13 O lepilɛ niŋ kpe, mi Deeve nda puaa nduaa faŋaŋ Kɛlaa ma kuaŋnuŋ naa cheleŋ. A wa le 600.+ Mɛɛ Sɔɔ tuei maa Deeve faŋaŋ Kɛlaa, o tisa ndu kɔɔli le. 14 Mi Deeve kɔ waŋnuŋ o pollo niŋ, o fondaŋnda ndii wa ikala le fuuluuwo laŋ, o tanda ŋpemboo o pollo niŋ Sifi.+ Sɔɔ wa ndu nuuviaa teleŋ o teleŋ.+ Kɛ Chɛhowa mel Deeve ndu o ba le. 15 Teleŋ Deeve wa o pollo niŋ Sifi o Hɔluɛɛsi niŋndo, mbo sina maa* Sɔɔ cho ndu nuuviaa le ndu diyɔɔ.

16 Okoŋ, mi Chonataŋ po Sɔɔ wo kua naa Deeve chua Hɔluɛɛsi, nduyɛ mbo mala ndu le mbo kindi tiindaŋ ndɔɔ* o Chɛhowa niŋ.+ 17 Mbo dimul ndu aa: “Yɔŋ isiooŋ te. Finya nuu cho num saalɔŋ te. Num cho wa masaa o Isɔluɛi niŋ ni,+ nduyɛ ya cho wa wana diiŋ ndɔɔ ni. Sɔɔ finya ni bɛɛ sina keŋ walaŋ.”+ 18 Mi nda ŋiɔɔŋ yii kpemaa+ Chɛhowa lachi, mi Deeve lo Hɔluɛɛsi, okoŋ mi Chonataŋ miiŋguŋ o ndu lo.

19 Mɛɛ teleŋ tiŋ hiou, mi puaa Sifi kua naa Sɔɔ chua Kibiya.+ Ma dimul ndu aa: “Deeve cho o viaŋnaŋ naa ikɛi+ Hɔluɛɛsi,+ o fondaŋnda i cho ikala le kɔlaŋ ndaŋ. O cho o pembii Hachilaa ve,+ Chɛsimɔŋ ba tou wo.*+ 20 Fallo masaa, teleŋ o teleŋ ŋ yeema pɛ le hunɔɔ, huŋ. Ŋ cho num ndu malɔɔ o ba.”+ 21 Le hei, mi Sɔɔ dimi aa: “Maa Chɛhowa dɔu nya sala fɔ, kanifuule la tuiinuŋ ya inyiɛɛ. 22 A yandii, la kɔ mi la kindiŋ le sinaa fondaŋ kpeekpei o cho wo, nduyɛ a wana che ndu loŋ ndo. Kanifuule, a dimul la maa poombɔ koŋ cho bɔɔ mɛlɛlɛ mɛlɛlɛ. 23 La kɔ mɛɛndaŋ fondaŋnda o viŋi viŋiŋ ndaŋ kpou, mi la huŋ doonuŋ ya kona. Nduyɛ te o wa pɛ loŋ, I cho lakɔ latulu a nya, mi nuuviaa ndu o waŋnda waalaŋ tɛɛŋ o Chuda niŋ.”

24 Okoŋ ma mal, ma hiau Sɔɔ lachi Sifi.+ A teleŋ koŋ, Deeve a puaa nduaa wa o pollo niŋ Mawɔŋ+ o Aluaba+ niŋ, Chɛsimɔŋ ba tou wo. 25 Okoŋ mi Sɔɔ nda puaa nduaa kua ndu nuuviaa.+ Mɛɛ Deeve tuei hei, o lepilɛ niŋ kpe mbo kua o pou bɛndoo+ o pollo niŋ Mawɔŋ mbo kɔ waŋnuŋ ndoŋ. Mɛɛ Sɔɔ tuei a ndi okɔɔ, mbo tisa Deeve kɔɔli o pollo niŋ Mawɔŋ. 26 Sɔɔ wa o pembii bɛnduei kpeŋgei i pilɛ, mi Deeve nda puaa nduaa wa lekɔɔlioo. Deeve wa kindi kindiŋndo kpeekpei le Sɔɔ nyaanɔŋndo,+ kɛ Sɔɔ nda puaa nduaa wa niŋ Deeve nda puaa nduaa sɔɔŋguuwo ikɛi kpɛɛluŋ le nda biyɔɔ.+ 27 Okoŋ mi waŋndo huŋ dimul Sɔɔ aa: “Huŋ chɔ chɔ, Filitiaŋnda del lɛŋndeŋ choo!” 28 O lepilɛ niŋ kpe, mi Sɔɔ pɛŋgi Deeve touwɔɔ,+ nduyɛ mbo miiŋgu le mbo kɔ sɔŋga a Filitiaŋnda. Le sabu koŋ nda ke fondaŋ koŋ diolaŋ ni aa Pou Piɔuwaŋndo.

29 Mi Deeve kuaŋnuŋ o fondaŋnda ndii wa ikala le fuuluuwo laŋ o Ɛŋ-kɛdi+ niŋ, nduyɛ mbo waŋnuŋ loŋ.