2 O paale yaa ndɔleŋ choo, mi bɔŋaŋ nɔ kɛsiaa tosaŋ Kena o Kalili niŋ. Nduyɛ kalaa Chiisu wa loŋ. 2 Chiisu nda buɛiyaa nduaa bɛɛ, ma veelu nda o bɔŋaŋ nɔ kɛsiaa koŋ.

3 Mɛɛ muɛiyaŋ ma dɔɔnaŋ, mi Chiisu kala ndɔ dimul ndu aa: “Muɛiyaŋ ma chuu nda o ba.” 4 Kɛ mi Chiisu dimul ndu aa: “Wɛɛŋndo, o cho suɛi naa le cho keŋ te. Teleŋ nuu fuuluu wɔ le.” 5 Mi kala ndɔ dimul wanaa wa nyɛdiaa piɔuwo wa aa: “Nyɛ o nyɛ o dimul nya pɛ, la tosa.” 6 A mɛɛ sawa Chuuwa wa le ndapila dindioo yɛ,+ kpɛɛnɛŋ pouwoŋ wa loŋ ŋɔmpum, ŋ ndaa wou mɛŋndaŋ leniŋ ndoŋ. Kpɛɛnɛi kɛ kɛ ndii chua le litɛilaŋ 44 ɔɔ 66. 7 Mi Chiisu dimul nda aa: “La pei mɛŋndaŋ o kpɛɛnɔŋ muŋ niŋ.” Okoŋ ma pei maŋ cha cha. 8 Mbo dimul nda aa: “La kɔndu ma tiŋ mi la yoo wana cho bɔŋaŋ nɔ kɛsiaa chilaŋ ndo.” Okoŋ ma yoo ndu maŋ. 9 Mɛɛ wana wa bɔŋaŋ nɔ kɛsiaa chilaŋ ndo dembi mɛŋma nda siiŋguu muɛiyaŋ ndaŋ, mi che bɛɛ ndoo sina naa ma fula wa le (kɛ wanaa kɔndu mɛŋndaŋ nda ndaa sina), mbo veelu wana cho lanɔɔ chuaa wo. 10 Mbo dimul ndu aa: “Muɛima kɛndɛ kɛndiaŋ fɛlɛŋ wana ke waŋnda. Te ma bii nda pɛ, a soli niko ma niŋ lapi le waŋ. Kɛ ma kɛsi wɔ muɛima kɛndiaŋ haaa a teleŋndo hoo.” 11 Teleŋ Chiisu wa Kena o Kalili niŋndo o tosa kaamaa ndɔ tasoo hoo ni. Mi kaamaa hoo chɔm naŋɔɔ ndɔɔ kpendekele,+ nduyɛ mi buɛiyaa nduaa duau laalaŋndo o ndu niŋ.