Ditɔnɔmii
16 “La loonuŋ a paŋgii Abibi ve,* nduyɛ mi la bii Bɔŋaŋ Hiouwɔɔ Choo Wo o Chɛhowa Mɛlɛka nyaa lo.+ Kanifuule, ichɔllo o paŋgii Abibi ve niŋ Chɛhowa Mɛlɛka nyaa soli nya Ichipi ni.+ 2 La nɔ mi la chua saa a nauwo,+ mi la soli sala Bɔŋaŋ Hiouwɔɔ Choo Wo o Chɛhowa Mɛlɛka nyaa lo,+ o fondaŋ Chɛhowa hɛli le mi diola ndɔlaŋ la wa wo.+ 3 La dia ndu a nyɛ o nyɛ nɔ yiisiiyo* leniŋ ndo le.+ Le palɛi i ŋɔmmɛu, la nɔ mi la de beedii* nɔ yiisii leniŋ te wo. Kanifuule, beediiyo hoo nya de ni mi la faŋaŋ o lɛŋnde Ichipi leŋ niŋ luku luku.+ Hei tosaa cho nya loonɔŋ a saŋga nya wa niŋndo, nduyɛ mi la loonuŋ paale nya fula o lɛŋnde Ichipi leŋ niŋndo haaa o yoomu nyaa niŋ.+ 4 O palɛi ŋɔmmɛu ve hei bɛŋgu kpou,+ kpeyaŋ nda linda a yiisiiyo wo nɔ mbo wa nya tɛɛŋ te. Nduyɛ, visiŋ nya soli salaa o paale taseleŋ choo a paale delaaleŋ ndoŋ nɔ miŋ lɔl kuya le.+ 5 Chɛhowa Mɛlɛka nyaa cho nya chɛlɔɔ mi la soli sala Bɔŋaŋ Hiouwɔɔ Choo Wo, o chieeŋ bɛnduŋ o cho nya kioo woŋ niŋ kpou le. 6 Kɛ, o fondaŋ Chɛhowa Mɛlɛka nyaa hɛli le mi diola ndɔlaŋ la wa wo nya nɔ ni mi la soli ndu. A paale delaaleŋ nya nɔ ni mi la soli sala Bɔŋaŋ Hiouwɔɔ Choo Wo,+ kanifuule a teleŋ koŋ kpeekpei nya fula o lɛŋnde Ichipi leŋ niŋ ni. 7 La nɔ mi la yau ndu, mi la de ndu+ o foŋndaŋ Chɛhowa Mɛlɛka nyaa cho hɛli wo.+ Nduyɛ diimandɔɔ, la miiŋgu o tɛndiila nyalaŋ niŋ. 8 La nɔ mi la de beedii nɔ yiisii leniŋ te wo le palɛi i ŋɔmpum. O paale ŋɔmmɛu leŋ choo, la nɔ mi la bii bɔŋaŋ bɛndu bɛndoo le Chɛhowa Mɛlɛka nyaa. La tosa wali o paale leŋ choo le.+
9 “La nɔ mi la chɔm lɔɔlaŋ la ŋɔmmɛu. La nɔ mi la kandu lɔɔla ŋɔmmɛu laŋ chɔmndo, chɔŋ a paale tasele nya kandu kuluŋ nyaŋ kiolɔɔ a wɔlɔtɔɔ leŋ.+ 10 Okoŋ mi la bii Bɔŋaŋ Chiɔɔŋ Kuauwaa* le Chɛhowa Mɛlɛka nyaa,+ a salala nya cho soli a kɔl nyaa kpou laŋ. Wana o wana nɔ mbo yɔŋgu mɛɛ Chɛhowa Mɛlɛka ndɔɔ dɔu ndu sala yɛ.+ 11 La nɔ mi la dɔɔnuŋ nyaale Chɛhowa Mɛlɛka nyaa lachi, o fondaŋ Chɛhowa Mɛlɛka nyaa hɛli le mi diola ndɔlaŋ la wa wo. Nyapila ni, puaa nyaa ni, chuaa nyaa laanduaa ni, buɛiyaa nyaa piaanduaa ni, buɛiyaa nyaa laanduaa ni, Livaiyaa cho nya tɛɛŋ o chieeŋ nyaŋ bɛndoŋ* niŋnda ni, mialaa cho nya tɛɛŋ nda ni, chuaambuaa nɔ ŋfinya le wa* ni, a waŋ laanduaa vii piaanduaa ma wa nya tɛɛŋ nda kpou, la nɔ mi la dɔɔnuŋ nyaale.+ 12 La loonuŋ maa teleŋ nya wa chiaa o lɛŋnde Ichipi leŋ niŋndo,+ la wa sawalaŋ ndaŋ biyɔɔ.
13 “Te la chii pɛ kuluŋ nyaŋ lɔɔ o yasabala nyalaŋ, nduyɛ mi la sɔla chuɛiyaŋ a muɛiyaŋ o doolala nyalaŋ, la nɔ mi la bii Bɔŋaŋ laBafɛiyo*+ le palɛi i ŋɔmmɛu. 14 Teleŋ nya cho wa o bɔŋaŋndo hoo choo wo, nyapila ni, puaa nyaa ni, chuaa nyaa laanduaa ni, buɛiyaa nyaa piaanduaa ni, buɛiyaa nyaa laanduaa ni, Livaiya ni, mialaa cho nya tɛɛŋ nda ni, chuaambuaa nɔ ŋfinya le wa ni, a waŋ laanduaa vii piaanduaa ma wa o chieeŋ nyaŋ bɛndoŋ niŋnda kpou, la nɔ mi la dɔɔnuŋ nyaale.+ 15 Le palɛi i ŋɔmmɛu, la cho wa bɔŋaŋndo biyɔɔ+ le Chɛhowa Mɛlɛka nyaa, o fondaŋ Chɛhowa hɛli wo. Kanifuule, Chɛhowa Mɛlɛka nyaa cho nya salaa dɔwɔɔ o nyɛ o nyɛ niŋ nya tosa,+ nduyɛ mi la dɔɔnuŋ nyaale tau tau.+
16 “Waŋ piaanduaa cho nya tɛɛŋ nda kpou nɔ ma kuɛ o fondaŋ Chɛhowa Mɛlɛka nyaa hɛli wo le yaa o wɔsioo niŋ. A nɔ ma tosa hei a teleŋ Bɔŋaŋ Beedii Nɔ Yiisii Leniŋ te Wo,+ Bɔŋaŋ Chiɔɔŋ Kuauwaa,+ a Bɔŋaŋ laBafɛiyo.*+ Nduyɛ, wana o wana nɔ mbo kuɛ bala fondo Chɛhowa lachi le. 17 Wana o wana nɔ mbo yɔŋgu mɛɛ kpɛ Chɛhowa Mɛlɛka nyaa dɔu ndu sala yɛ.+
18 “O kaale kɛ kɛ niŋ, la nɔ mi la hɛli wanaa kialaa ŋyamaa+ a laŋgbaa kalla, o chieeŋ nyaŋ bɛnduŋ Chɛhowa Mɛlɛka nyaa cho nya ke woŋ niŋ kpou. Nduyɛ, a nɔ ma dimi waŋnda sɔɔŋ tɛɛŋ o nɛi sakpoo choo. 19 La nɔ mi la tosa lakafa,+ mi la chɔm kaa hɛliaa,+ ɔɔ mi la bii luɛiyɔɔ niŋ te. Kanifuule, mi luɛiyɔɔ niŋndo suumiaa wana taasioo,+ nduyɛ mbo tosa mi wana sakpoo laasiaa sɔɔŋ. 20 La nɔ mi la tol sandei kɔɔli+ le mi la hiou lachi a waa yoomu o lɛŋnde Chɛhowa Mɛlɛka nyaa cho nya kioo leŋ niŋ.
21 “La tual yɔm o yɔm maa le suŋgbu*+ o bandu luamaa lasala nya toosiaa le Chɛhowa Mɛlɛka nyaa wo ikɛi le.
22 “Nduyɛ fɛɛŋ bɛɛ la simi suŋgbuleŋ le nyapila le,+ kanifuule Chɛhowa Mɛlɛka nyaa tul suŋgbuleŋ leyɛ.