Masaa Tasiaa

8 A teleŋ koŋ, mi Sɔlɔmɔŋ chuuŋgiaa+ waŋ banaa kpou o Isɔluɛi niŋ. Nda cho ni, wanaa wa kaalaŋ bolle wa, vɛlɛ a wanaa wa yuŋgula leboltaŋ o Isɔluɛi niŋnda kpou.+ Ma kua Chulusalɛm naa Masaa Sɔlɔmɔŋ chua ma kɔ chua kɔfu kpema Chɛhowa wo o Chiee Deeve Wo,+ koŋ cho ni, Saayɔŋ.+ 2 Mi puaa o Isɔluɛi niŋ kpou chuuŋgiaŋ Masaa Sɔlɔmɔŋ lachi, o bɔŋaŋ* nda bii o paŋgii Itanim* nde niŋndo, ndi cho yɛ paŋgii ŋɔmmɛu ve ni.+ 3 Nduyɛ, mi waŋ banaa o Isɔluɛi niŋ kpou huŋ, okoŋ mi wanaa soliaa lasalaa chua Kɔfoo.+ 4 Ma kua a Kɔfu Chɛhowa wo, tɛndii bɔŋaŋndo,+ vɛlɛ a nyɛm laanduŋ diandaŋ wa o tɛndii koŋ niŋndoŋ kpou. Wanaa soliaa lasalaa a Livaiya kuɛ a nyɔɔŋ muŋ ni. 5 Mi Masaa Sɔlɔmɔŋ a waŋnda Isɔluɛi kpou chuuŋgiaŋ ma sim Kɔfoo hoo lachi. Okoŋ, ma soli saa a nauwa salaa tau,+ wanaa nɔla ma chii nda chɔm te.

6 Okoŋ, mi wanaa soliaa lasalaa huŋ a kɔfu kpema Chɛhowa wo ma kɛsi ndu o fondaŋ ndɔɔ+ o lumui cho leniŋ di wo, koŋ cho ni, Fondaŋ Hiou Diondɔɔ Wo. O kumbaŋnda chɛlɔbiiya+ bɛŋgu nda kɛsi ndu ni.

7 Kumbaŋnda chɛlɔbiiya la wa la pɛŋgɛlaa o fondaŋ Kɔfoo wa wo choo. Le hei, mi chɛlɔbiiya haa kumbu Kɔfoo vɛlɛ a yɔmii nda kua a ndu ve.+ 8 Yɔmii ndaa kua a ndu ve+ wa i vilɛi vilɛi. Wanaa lo o Fondaŋ Diandaa ma che ndi bolle naa i wa o lumui wa leniŋ di wo niŋnda. Kɛ wanaa lo o bɛɛ ma che ndi le. Nduyɛ i cho wɔ loŋ haaa a paale hauleŋ ndeŋ. 9 Nyɛ o nyɛ ve o Kɔfoo hoo niŋ te, mɛɛ pouta yɛndɛla tiɔɔŋnda+ Muuse kɛsi leniŋ+ o Pembii Holuɛɛbi Ve laŋ. A teleŋ koŋ Chɛhowa yii kpemaa+ a waŋnda Isɔluɛi ni, mɛɛ nda wa fulaa Ichipi.+

10 Mɛɛ wanaa soliaa lasalaa fula o fondaŋ diandaa hoo niŋ, mi yumbu yumboo+ kumbu chiɛi Chɛhowa wo kpu.+ 11 Le hei, wanaa soliaa lasalaa nɔla ma sim ma tosa wallo le, kanifuule mi paŋgele Chɛhowa wo tiu silɔ o chiɛi Chɛhowa wo niŋ.+ 12 A teleŋ koŋ, mi Sɔlɔmɔŋ dimi aa: “Chɛhowa, num dimi ni maa a cho wa o yumbu yumbu ikpuŋgba tiŋi bɛndoo niŋ.+ 13 I chii chiɛi tɔɔma bɛndoo taŋgul le num, fondaŋ ŋ cho wa leniŋ le fɛɛŋ a fɛɛŋ ndo.”+

14 Okoŋ, mi masaa muliŋ mbo kandu Isɔluɛiyaa wa isisi loŋ nda kpou salaa dɔwɔɔ.+ 15 Mbo dimi aa: “Maa Chɛhowa, Mɛlɛka Isɔluɛiya sɔla saŋgalaa, Mɛlɛka chuel Deeve finya ni buŋgɛi nduyɛ mbo peelu ndi a bala ndɔlaŋ ndo. Mbo dimi aa, 16 ‘Chɔŋ a paale ya soli wanaa niaa Isɔluɛi o Ichipi niŋndo, I hɛli chiee bɛndu kɛ kɛ o kaalaŋ Isɔluɛi niŋ kpou le ma teŋgul la chiɛiyo, mi diola nilaŋ la wa loŋ te.+ Kɛ I hɛli Deeve le mbo wa wanaa niaa choo, Isɔluɛiya.’ 17 Nduyɛ Deeve finya ni ndoo nɔ yeemɛi le mbo taŋgul chiɛiyo le diola Chɛhowa laŋ, Mɛlɛka Isɔluɛiya.+ 18 Kɛ mi Chɛhowa dimul Deeve finya ni aa, ‘I cho tonya maa yeemɛi numnde cho le ma taŋgul chiɛiyo le diola nilaŋ ni. Nduyɛ yiyaŋ kɛndɔɔ pila ŋ nɔ koŋ ni. 19 Kɛ nduyɛ, o cho num te cho ya chiɛiyo hoo teŋgul te. Po ŋ cho hunɔɔ violɔɔ wo,* ndu cho chiɛiyo taŋgul le diola nilaŋ ni.’+ 20 Chɛhowa peelu buŋgɛi o chua ve, kanifuule I miiŋgu o foofo Deeve finya nuu, nduyɛ mi chal o kpeŋgbei* lemasaa choo Isɔluɛi, a mɛɛ ndu Chɛhowa chua buŋgɛi yɛ. I taŋgul vɛlɛ chiɛiyo le diola Chɛhowa laŋ, Mɛlɛka Isɔluɛiya.+ 21 Nduyɛ, I toosiaa fondaa o chiɛiyo hoo niŋ le Kɔfoo kɛsioo.+ Kpema Chɛhowa yii a finyaa naa mamaa lɔɔ o wa nda solioo o lɛŋnde Ichipi leŋ niŋndo, o Kɔfoo hoo niŋ o cho ni.”

22 Okoŋ, mi Sɔlɔmɔŋ sim bandu luamaa lasala Chɛhowa wo hɔlndɔ, waŋnda Isɔluɛi kpou lachi. Nduyɛ, mbo heelu balaŋ choo choo.+ 23 Mbo dimi aa: “Oo Chɛhowa, Mɛlɛka Isɔluɛiya, mɛlɛka o mɛlɛka cho o choo choo niŋ ɔɔ o lɛŋndeŋ choo maa num te.+ Kanifuule, ma lo o kpema numndo choo. Nduyɛ, ma chɔm kaala lo lechoo wo+ o buɛiyaa numnda lo, a cho kɔlaŋ o nɛi numndo choo a kɔl ndaa kpou wa.+ 24 Buŋgɛi ŋ chuel buɛi numndo Deeve finya ni ve, ma peelu ndi. Numpila chua buŋgɛi keŋ ni, nduyɛ ma peelu ndi hau a bala numndaŋ.+ 25 Lelaŋ Oo Chɛhowa, Mɛlɛka Isɔluɛiya, maa siou buŋgɛi ŋ chuel buɛi numndo Deeve finya ni ve peelu. Ma dimul ndu aa: ‘Te puaa numnda chaa pɛ kela ya o hɔl mɛɛ numpila kela yɛ, waŋndo cho wa teleŋ o teleŋ o pulale numndeŋ choo le challe o kpeŋgbei lemasaa choo ya lachi Isɔluɛi.’+ 26 Oo Mɛlɛka Isɔluɛiya, yandii, maa buŋgɛi ŋ chuel buɛi numndo Deeve finya ni ve peeluŋ fɔ.

27 “Kɛ baa num Mɛlɛka a huŋ niŋ pa ma chal o lɛŋndeŋ choo?+ Kanifuule, choo choo cho bɛɛ o kuaŋnaŋ kɛ kɛ wo, o cho letuu a num te.+ Ɔɔ niŋ chiɛi taaniŋ ya taŋgul hoo wo?+ 28 Lelaŋ, Oo Chɛhowa Mɛlɛka nuu, yaŋ nilaŋ o piɛile ya buɛi numndo cho num, mi wa num nyunaa le ma tuiinuŋ ya inyiɛɛ wo. Yaŋ nilaŋ o chaŋ ya cho naa num chua le malaa wo, a piɛile ya cho num hau lachi naŋ ndeŋ. 29 Maa hɔlte numndeŋ le wa chiɛiyo hoo choo idii a ichɔl fɔ! Kanifuule, o fondaa hoo ŋ dimi ni maa diola numndaŋ la cho wa.+ Te buɛi numndo muliŋ pɛ kumbuii chiɛiyo hoo cho ve mbo piɛi naa num chua, maa yaŋ ndu nilaŋ.+ 30 Te buɛi numndo piɛi pɛ le ma tuiinuŋ ndu inyiɛɛ, nduyɛ mi wanaa numnda Isɔluɛi bɛɛ muliŋ kumbuii chiɛiyo hoo cho ve ma piɛi naa num chua, maa lo o fondaŋ num chalaa o choo choo niŋ+ ma yaŋ nilaŋ o piɛile ndaleŋ, nduyɛ ma mal nda haki fɔ.+

31 “Te waŋndo hol pɛ chaaŋ ndɔ suɛi maa o tosal ndu yɔŋ wɔɔŋndo, nduyɛ mbo baŋ ndu le mbo mɛnaŋ, okoŋ mbo wa o sendi koŋ bɛŋgu mbo hiŋ o bandu luamaa lasala numndo hɔlndɔ o chiɛiyo hoo niŋ,+ 32 maa tuei naa ŋ cho o choo choo niŋnda ma tosa isɔɔ, nduyɛ ma kelu buɛiyaa numnda haa yamɛi tɛɛŋ fɔ. Chɔɔmuu wana tosa dɛnɛ wɔɔŋndo wo, ma miŋgi ndu dɛnɛ wɔɔŋ ndɔɔ o lebol, okoŋ ma paawa* wana cho sakpo wo le dɛnɛ ndɔ kɛndɔɔ.+

33 “Te yaamɔɔwa kɔ yom pɛ wanaa numnda o chɔuwo le mɛɛ nda lambaŋ hakioo tosaa a num yɛ,+ okoŋ ma muliŋ o numndo ma saŋgala diola numndaŋ,+ ma piɛi naa num chua nduyɛ ma nyɔɔlu num o chiɛiyo hoo niŋ+ le ma tuiinuŋ nda inyiɛɛ, 34 maa tuei piɛile ndaleŋ naa ŋ cho o choo choo niŋnda ma mal nda haki, nduyɛ ma miŋgi nda o lɛŋnde ŋ ke finyaa ndaa mamaa leŋ niŋ fɔ.+

35 “Te choo choo kindaŋ pɛ mi piɔɔ kɛɛ le siaa+ le mɛɛ wanaa numnda lambaŋ hakioo tosaa a num yɛ,+ okoŋ ma muliŋ kumbuii chiɛiyo hoo cho ve ma saŋgala diola numndaŋ nduyɛ ma mulul yɔŋ nda wɔɔŋndo kɔɔ le mɛɛ ŋ tusi nda nyɛpalaa choo yɛ,*+ 36 maa tuei piɛile buɛiyaa numnda, Isɔluɛiya, naa ŋ cho o choo choo niŋnda, nduyɛ ma mal nda haki. Okoŋ, ma tosa mi piɔɔ sia o lɛŋnde ŋ ke nda maa nyɛm kɛŋ nda leŋ choo.+ Kanifuule, a cho nda pɛɛku+ nɛila kɛndɛla nda nɔ ma kuɛ choo laŋ.

37 “Te yima bɛnduaŋ+ ɔɔ naa taŋ waŋnda wo del pɛ wanaa numnda choo o lɛŋndeŋ niŋ, ɔɔ mi haŋgul tuuwo+ a dɛluaa tɛɛmbuu tɔlɔɔla ndalaŋ, ɔɔ mi soonuaa kunda bɛnduaa ɔɔ soonuaa tɛɛmbuu tɔlɔɔlaŋ nda de laŋ paku, ɔɔ mi yaamɔɔwaa ndaa luei nda o piŋndo niŋ o chieeŋ ndaŋ i kɛ kɛ niŋ, ɔɔ mi kpundɛ cheleŋ ɔɔ naa kɛ kɛ cheleŋ del nda choo,+ 38 piɛile kɛ kɛ waŋndo ɔɔ wanaa numnda Isɔluɛi kpou piɛi pɛ kumbuii chiɛiyo hoo cho ve, ma heelu balaŋ choo choo ma nyuna num le malaa+ (kanifuule, wana o wana sina nyɛ nɛiyaa cho ndu o kɔl lo),+ 39 maa tuei piɛile ndaleŋ naa ŋ cho o choo choo niŋnda,+ ma mal nda haki,+ ma tosa isɔɔ, nduyɛ ma paawa wana o wana a mɛɛ kelala ndɔlaŋ la cho yɛ fɔ.+ Kanifuule, num sina kɔl ndɔɔ ni (numpilɛ kpe sina kɔl wanachiee kɛ kɛ ni).+ 40 Keŋ cho tosa ma nɔ siooŋii numnde le teleŋ o teleŋ o lɛŋnde ŋ ke finyaa naa mamaa leŋ niŋ.

41 “Nduyɛ te miallo, o cho Isɔluɛinɔ le wo fula pɛ o lɛŋnde cheleŋ niŋ pɔ mbo hiŋ le diola numndaŋ*+ 42 (kanifuule, waŋnda cho wa tueiyɔɔ a diola numnda tɔɔmala bɛndulaŋ+ vɛlɛ a ba num kpaaya bɛndoo okɔɔ), okoŋ mbo piɛi kumbuii chiɛiyo hoo cho ve, 43 maa yaŋ mial koŋ nilaŋ naa ŋ cho o choo choo niŋnda,+ nduyɛ ma tosa nyɛ o nyɛ o nyuna num le ndu. Hei cho tosa mi waŋnda o lɛŋndeŋ choo kpou sina diola numndaŋ, ma nɔ siooŋnde le num+ maa wanaa numnda Isɔluɛi. Nduyɛ, ma sina vɛlɛ maa diola numndaŋ la cho o chiɛi ya taŋgul hoo wo choo.

44 “Te a vem pɛ wanaa numnda ba o ba fee o chɔuwo le ma kɔ sɔŋga a yaamɔɔwaa ndaa,+ Okoŋ ma muli hɔlla o chiee num Chɛhowa hɛli hoo wo+ vɛlɛ a chiɛi ya taŋgul hoo le diola numndaŋ+ ndo ma piɛi+ o numndo, 45 maa tuei piɛile ndaleŋ naa ŋ cho o choo choo niŋnda ma tuiinuŋ nda inyiɛɛ, nduyɛ ma chɔulaba le nda.

46 “Te a tosa pɛ hakioo a num (kanifuule wana o wana cho mbo kɛɛ hakioo tosa le),+ nduyɛ ma dɔɔnuŋ tumbe o kala kala a nda ma mal nda yaamɔɔwaa ndaa o ba, okoŋ ma kuɛ a nda o biyɔɔ niŋ, o wa lɛŋnde cho levil ɔɔ kpɛɛluŋ,+ 47 te a lo pɛ o lɛŋnde nda cho o biyɔɔ niŋ ndeŋ+ ma miiŋgu o ndapila niŋ, okoŋ ma muliŋ naa num chua+ naa nda cho o biyɔɔ niŋ nda+ ma nyɔɔlu num le ma tuiinuŋ nda inyiɛɛ, nduyɛ ma dimi aa, ‘Ŋ tosa hakioo. Ŋ tosa suɛi dɛnɛ wɔɔŋ bɛndu,’+ 48 te a miiŋgu pɛ num o ibuŋ a kɔlta ndalaŋ kpou+ vɛlɛ a yoomula* ndalaŋ kpou o lɛŋnde yaamɔɔwaa ndaa kuɛ a nda o biyɔɔ niŋndeŋ niŋ, okoŋ ma muli hɔlla kumbuii lɛŋnde ŋ ke finyaa ndaa mamaa leŋ a chiee ŋ hɛli wo, vɛlɛ a chiɛi ya taŋgul hoo le diola numndaŋ+ ndo ma piɛi naa num chua, 49 maa tuei piɛile wanaa numnda, nduyɛ ma tuiinuŋ nda inyiɛɛ naa ŋ cho o choo choo niŋnda+ ma sɔŋga le nda, 50 nduyɛ ma mal nda haki le mɛɛ nda tosa hakioo a num yɛ. Yɔŋ wɔɔŋ o yɔŋ wɔɔŋ nda tosa a num, maa mal nda haki le ndu. Maa tosa mi yaamɔɔwaa ndaa kuɛ kaŋ a nda o biyɔɔ niŋnda tuiinuŋ nda inyiɛɛ.+ 51 (Kanifuule wanaa numnda nda cho ni, nyɛm kɛŋ+ num ŋ soli o lɛŋnde Ichipi leŋ+ niŋndoŋ. A wa saŋgaa loŋ mɛɛ waŋndo wa nuaa o yiŋnde tondoleŋ niŋ yɛ.)+ 52 Maa hɔlte numndeŋ le wa buɛi numndo choo a wanaa numnda Isɔluɛi, nduyɛ ma yaŋ nilaŋ o piɛile ndaleŋ teleŋ o teleŋ nda nyuna num pɛ+ le ma tuiinuŋ nda inyiɛɛ.+ 53 Kanifuule, o wanaa cho o lɛŋndeŋ choo wa tɛɛŋ kpou,+ nda ŋ hɛli ni ma siiŋguu nda nyɛm num kiɔɔŋ, a mɛɛ ŋ dimul buɛi numndo Muuse yɛ, teleŋ ŋ wa finyaa naa mamaa solioo o lɛŋnde Ichipi leŋ niŋndo, Oo Chɛhowa, Mɛlɛka Kpuluŋguma Bɛndoo.”

54 Dimioo nuaa Sɔlɔmɔŋ chii piɛileŋ ndeŋ kpou o Chɛhowa lo, mbo chaŋ isisi bandu luamaa lasala Chɛhowa wo lachi, naa ndoo baŋ wulaŋ mbo heelu balaŋ choo choo wa.+ 55 Okoŋ mbo sim, nduyɛ mbo duau waŋnda Isɔluɛi kpou salaa choo choo kpeleŋ aa: 56 “Saŋgalaa cho le Chɛhowa, kanifuule o ke wanaa nduaa Isɔluɛi naa pɛŋgiaa, a mɛɛ o chua buŋgɛi yɛ.+ Sɔɔŋ kɛndɛŋ o chua buŋgɛi le tosaa sanaa a buɛi ndɔɔ Muuse woŋ, i pilɛ bɛɛ lo kɔɔli le peelɔŋndo le.+ 57 Maa Chɛhowa Mɛlɛka naa wa a naa latulu, mɛɛ o wa a finyaa naa mamaa latulu yɛ fɔ!+ Maa o mal naa miŋ wa kpeele le.+ 58 Maa o tosa mi kɔlta naalaŋ la muliŋ o ndu lo,+ le miŋ kuɛ o nɛila ndɔlaŋ choo, sawala ndɔlaŋ, yamaŋ ndɔŋ, a nyɛ o nyɛ o dimul finyaa naa mamaa le tosaa fɔ! 59 Nduyɛ, nyɛ o nyɛ ya nyɔɔlu Chɛhowa Mɛlɛka o piɛileŋ niŋ le ndu le mbo tuiinuŋ naa inyiɛɛ, maa Chɛhowa Mɛlɛka naa loonuŋ a ndu okɔɔ idii a ichɔl. Lepaa o lepaa, bahawɛi kɛ kɛ komal pɛ buɛi ndɔɔ a wanaa nduaa Isɔluɛi, maa o ke nda mala nda yeema wo, 60 le mi waŋnda o lɛŋndeŋ niŋ kpou sina maa Chɛhowa cho Mɛlɛka tonyaa ni.+ Mɛlɛka o mɛlɛka cho maa ndu le!+ 61 La yɔŋgu kɔlta nyalaŋ kpou+ o Chɛhowa Mɛlɛka naa lo, mi la hiou lachi a kɔlaŋ o nɛila ndɔlaŋ choo, nduyɛ mi la bii sawala ndɔlaŋ a mɛɛ nya cho hau tosaa yɛ.”

62 Okoŋ, mi masaa a Isɔluɛiya kpou soli sala bɛndoo Chɛhowa lachi.+ 63 Mi Sɔlɔmɔŋ soli salala kɔl nyulu laŋ+ o Chɛhowa lo: Nauwa 22,000 a saa 120,000. Okoŋ, mi masaa a Isɔluɛiya kpou mal Chɛhowa chiɛiyo hoo o ba.+ 64 O paale leŋ choo, mi masaa dindi luŋ wa chiɛi Chɛhowa wo lachi wo tɛɛŋ, kanifuule loŋ ndoo nɔ le salala luamaa laŋ, salala ŋkultaŋ, a chuɛima salala kɔl nyulu laŋ solioo ni. Bandu luamaa lasala nda toosiaa a chiliŋii siaŋɛi,+ mbo wa Chɛhowa lachi wo ve o bɔɔ le salala luamaa laŋ, salala ŋkultaŋ, a chuɛima+ salala kɔl nyulu laŋ ndaŋ solioo le. 65 A teleŋ koŋ, mi Sɔlɔmɔŋ bii bɔŋaŋndo+ latulu nda waŋnda Isɔluɛi kpou. Mi waŋnda faŋga bɛndoo chaŋ Lɛbo-hamaati* haaa o Kpoloŋndo* Ichipi,+ ma huŋ. A wa Chɛhowa Mɛlɛka naa lachi le palɛi 7, okoŋ ma chua vɛlɛ palɛi cheleŋ 7. Kpou kpou, palɛi 14. 66 Diimandɔɔ,* mbo miŋgi waŋnda o la nda lo, nduyɛ a wa a kɔl kɛndɛ le sɔɔŋ kɛndɛŋ+ Chɛhowa tosal Deeve a waŋnda Isɔluɛi kpou woŋ. Okoŋ, mi waŋnda duau ndu masaa sala.