Nɔmbaa
27 Okoŋ kɔɔli, mi waŋ laanduaa Sɛlofɛhadi velu wa+ chaŋ ma kua naa Muuse chua. Nda cho yɛ, Maala, Nuuwa, Hɔkila, Milika, a Tiɛsa ni. Sɛlofɛhadi yɛ, finya ndɔ wa Hɛfa ni, po Kiliaadi wo. Kiliaadi yɛ, finya ndɔ wa Makaya ni, po Manaasɛ wo. Nduyɛ Sɛlofɛhadi yɛ, o yuŋgu Manaasɛ wo choo o fula ni, po Choosɛ wo. 2 Ma kɔ sim Muuse, Ɛlieesa wana soliaa lasalaa, yuŋgula leboltaŋ,+ a Isɔluɛiyaa tuaa kpou lachi o dio tɛndii bɔŋaŋndo sondoo, ma dimi aa: 3 “O pollo niŋ finya naa vi ni. Kɛ o vi latulu a wanaa toolu Kolua,+ ma simul Chɛhowa wa le. Le haki ndɔɔ o vi ni, nduyɛ o vilu wana pɔnɔ le. 4 Le yɛɛnɛ mi diola finya naa la wɔɔsuŋ o yuŋgu ndɔɔ choo, le mɛɛ o vilu wana pɔnɔ le yɛ? Lelaŋ, ke naa lɛŋndeŋ finyaa naa bɛnduaa a finyaa naa pɔmbuaa tɛɛŋ.” 5 Okoŋ, mi Muuse fuuluu Chɛhowa suɛi ndɛi o ba.+
6 Mi Chɛhowa dimul Muuse aa: 7 “Chuauwaa Sɛlofɛhadi wa nɔ di. Lelaŋ, kindiŋ o nɛi o nɛi niŋ ma ke nda nyɛm kiɔɔŋ finyaa ndaa bɛnduaa a finyaa ndaa pɔmbuaa tɛɛŋ. Nduyɛ, ma ke nda nyɛm kɛŋ finya nda ndoo nɔ le sɔlaa woŋ.+ 8 Dimul Isɔluɛiya aa, ‘Te wana pɔnɔ kɛ kɛ vi pɛ mbo mɛi po le, la nɔ mi la chua nyɛm kɛŋ ndɔŋ, mi la ke chua ndɔɔ. 9 Kɛ te o nɔ chua le, la chua nyɛm kɛŋ ndɔŋ mi la ke bɛndaa nduaa ɔɔ pɔmbuaa nduaa. 10 Te o nɔ bɛndu ɔɔ pɔmbɔ le, la chua nyɛm kɛŋ ndɔŋ mi la ke finyaa nduaa bɛnduaa ɔɔ finyaa nduaa pɔmbuaa. 11 Nduyɛ, te finya ndɔ nɔ bɛndu ɔɔ pɔmbɔ le, la chua nyɛm kɛŋ ndɔŋ mi la ke wanayɛi nduɛi kpɛɛluŋnde o yuŋgu ndɔɔ niŋ, miŋ wa le ndu. Nyɛ ya Chɛhowa dimul num hoo wo cho wa sawaa le Isɔluɛiya.’”
12 Okoŋ, mi Chɛhowa dimul Muuse aa: “Kɔ hel o pembii bɛnduii cho o tanda Abaluim ndo niŋnde choo,+ ma mɛɛndaŋ lɛŋnde ya cho Isɔluɛiya ke leŋ.+ 13 Te a chii leŋ mɛɛndaŋ pɛ, a cho wu, ma kumbu num maa finyaa num aa mamaa,+ a mɛɛ i yɔŋnuŋ Elɔŋ bɛ num yɛ.+ 14 Kanifuule, teleŋ waŋnda Isɔluɛi wa ŋɔɔchiaŋndo a ya o pollo niŋ Siŋ ndo, mi la simul la, nduyɛ mi la kɛɛ le ya saŋgalaa waŋnda o hɔl o mɛŋndaŋ+ Mɛluiba+ ikɛi Kedɛsi,+ o pollo niŋ Siŋ.”+
15 Okoŋ mi Muuse dimul Chɛhowa aa: 16 “Oo Chɛhowa, num cho Mɛlɛka yɔŋgu wana o wana fee yoomoo wo ni.* Hɛli simlachinɔɔ le waŋnda haa, 17 o cho wa fulaa mbo luɛi a nda, nduyɛ mbo wa simlachinɔ ndaa o nyɛ o nyɛ niŋndo. Te o cho koŋ te, wanaa Chɛhowa wa cho simnɔŋ mɛɛ saa wa nuaa a nɔ wana mandaa le yɛ.” 18 Okoŋ kɔɔli, mi Chɛhowa dimul Muuse aa: “Chɔɔsuaa, po Nuŋ ndo nɔ suliŋndaŋ le mbo wa simlachinɔɔ. Lelaŋ, chua ndu ma handu ndu balaŋ choo.+ 19 Okoŋ, ma simi ndu Ɛlieesa wana soliaa lasalaa a waŋnda Isɔluɛi kpou lachi, nduyɛ ma siiŋguu ndu simlachinɔɔ nda o hɔl.+ 20 A nɔ ma ke ndu kpaaya numndo o tiŋ,*+ le halikpeŋ mi waŋnda Isɔluɛi kpou yaŋ ndu nilaŋ.+ 21 O nɔ mbo sim Ɛlieesa wana soliaa lasalaa lachi, okoŋ mi Ɛlieesa soliŋ Yuluim kpeku+ le Chɛhowa nyunaa a ndu okɔɔ. Nduyɛ, nɛi ndɔ chɔmaa ndu a Isɔluɛiyaa tuaa kpou cho wa tolɔɔ kɔɔli ni.”
22 Okoŋ, mi Muuse tosa mɛɛ Chɛhowa dimul ndu yɛ. Mbo chua Chɔɔsuaa, mbo simi ndu Ɛlieesa wana soliaa lasalaa, a waŋnda Isɔluɛi kpou lachi. 23 Mbo handu ndu balaŋ choo, nduyɛ mbo siiŋguu ndu simlachinɔɔ+ a mɛɛ Chɛhowa dimul ndu Muuse yɛ.+