Chɔŋ
14 “La wa a kɔlta tambɛi le.+ La dɔu laalaŋndo o Mɛlɛka niŋ,+ mi la dɔu vɛlɛ laalaŋndo o ya niŋ. 2 O chiɛi Finya nuu niŋ, yiyalaŋ la cho loŋ tau. Te ndii ve lende le, I wa nya dimul, kanifuule I cho kɔlaŋ mi kɔ bɛɛndiaa pɔɔ fondaa le nya.+ 3 Te I kɔ bɛɛndiaa pɛ fondaa le nya, I cho vɛlɛ miiŋgu mi huŋ kɔ a nya naa ya cho wa, le halikpeŋ mi la wa naa ya cho wa wa.+ 4 Nduyɛ, la sina nɛiyo le kɔlaŋ naa ya cho kɔlaŋ nda.”
5 Mi Tɔmɔsi+ dimul ndu aa: “Masanɔɔ, ŋ sina naa ŋ cho kɔlaŋ nda le. Vɛɛ naŋ cho yɛ nɛiyo sina le kɔlaŋ loŋ?”
6 Mi Chiisu dimul ndu aa: “Ya cho nɛiyo,+ a tonyaa,+ a yoomoo ni.+ Wana o wana kue o Finya nuu lo le, mɛɛ mbo keeku o ya niŋ.+ 7 Te nyaa sina ya pɛ, la wa vɛlɛ Finya nuu sina. Chɔŋ a boondei hei, la cho ndu sina. Nduyɛ pɛŋ, la che niŋ ndu.”+
8 Mi Filipi dimul ndu aa: “Masanɔɔ, chɔm naa Finya num miŋ hini kɔl.”
9 Mi Chiisu nyuna ndu aa: “Filipi, mɛɛ a viouwɔɔ ya viou hoo a nya wo kpou, la sina wɔ ya le? Wana o wana che ya pɛ, mɛɛ o chii Finya nuu chɔ.+ Le yɛɛnɛ ŋ dimi yɛ vɛlɛ aa, ‘Chɔm naa Finya num’? 10 Baa a laalaŋ ndɔ maa Finya nuu cho diompilɛ a ya, mi ya bɛɛ wa diompilɛ a ndu le?+ Sɔɔŋ ya dimul nya woŋ, I dimi muŋ o kpaaya ni niŋ te,+ kɛ Finya ni naŋ cho diompilɛ wo cho walta ndɔlaŋ tosaa ni. 11 Laalaŋ ya maa I cho diompilɛ a Finya nuu, mi Finya nuu bɛɛ wa diompilɛ a ya, ɔɔ ma laalaŋ le walta ya cho tosaa laŋ.+ 12 A tonya mi dimul nya, wana o wana dɔu pɛ laalaŋndo o ya niŋ, wana koŋ cho walta ya tosa laŋ tosa. Nduyɛ o tosa niŋ waltaŋ mbo hiou bɛɛ la ya tosa laŋ,+ kanifuule I cho kɔlaŋ o Finya nuu lo.+ 13 Nyɛ o nyɛ nya nyuna pɛ o diola nilaŋ niŋ, I cho ndu tosa le halikpeŋ mi Poo saŋgala Finya ndɔ.+ 14 Nyɛ o nyɛ nya nyuna pɛ o diola nilaŋ niŋ, I cho tosa.
15 “Te la kaala ya pɛ, mɛɛ la cho sawala nilaŋ biyɔɔ.+ 16 I cho Finya nuu nyuna mbo ke nya wana malaa cheleŋ le mbo wa a nya lefafɛɛŋ.+ 17 Wana malaa koŋ cho nyina tonyaa ni.+ Chieeŋndo nɔla mbo sɔla ndu le, kanifuule o chi ndu le kɛlɛŋgaa mbo sina ndu.+ Kɛ nya sina ndu, kanifuule o cho nya niŋ, nduyɛ o cho lo a nya latulu. 18 I cho nya mɛi kpeele le.* I cho vɛlɛ miiŋgu naa nya chua.+ 19 O lo niŋ chobe chieeŋndo chi lɛ niŋ ya le. Kɛ, nya cho ya chɔ,+ kanifuule I cho yoomu, nduyɛ nya bɛɛ cho wa yoomu. 20 O paale leŋ choo, la cho sina maa I cho diompilɛ a Finya nuu, mi nya wa diompilɛ a ya, mi ya wa diompilɛ a nya.+ 21 Wana o wana chɛl pɛ sawala nilaŋ, nduyɛ mbo bii laŋ, mɛɛ wana koŋ kaala ya ni. Wana o wana kaala ya pɛ, Finya nuu cho ndu kaala. Nduyɛ I cho wana koŋ kaala, mi chɔɔmuŋ ndu kpendekele.”
22 Mi Chuda,+ kɛ o cho Chuda Isikaliɔɔ le, nyuna ndu aa: “Masanɔɔ, le yɛɛnɛ ŋ yeema yɛ naa chɔɔmɔŋndo kpendekele, kɛ a chɔɔmuŋ chieeŋndo le?”
23 Mi Chiisu mulul ndu aa: “Wana o wana kaala ya pɛ, o cho sawala nilaŋ biyɔɔ,+ nduyɛ Finya nuu cho ndu kaala. Ŋ cho hunɔɔ o ndu lo, miŋ wa o yiya naa ndaa latulu.+ 24 Wana o wana kaala ya le, o bii sawala nilaŋ te. Sɔɔŋ nya cho muŋ ya tueiyɔɔ dimioo woŋ, o cho yapila le kɛɛsiaa muŋ te, kɛ Finya nuu vem ya muŋ dimioo ni.+
25 “I dimul nya sɔɔŋ muŋ pɛŋgu ya cho wɔ hoo a nya latulu wo. 26 Kɛ wana malaa, ndu yɔŋnuŋ maa nyina diandaa ni, o Finya nuu cho yɔŋ o diola nilaŋ niŋndo cho nya sɔɔŋ kpou pɛɛku, nduyɛ mbo yiyalaŋ nya sɔɔŋ ya dimul nya woŋ kpou.+ 27 I mel nya kɔl nyuloo. I ke nya kɔl nyulu nuu.+ O cho mɛɛ chieeŋndo yɔŋgu ndu yɛ le ya ke nya ndu le. La wa a kɔlta tambɛi le, nduyɛ la yɔŋ isiooŋ te. 28 La tuei mi dimul nya aa, ‘I cho kɔlaŋ, kɛ I cho vɛlɛ miiŋgu naa nya chua.’ Te la kaala ya pɛ, la cho wa a nyaale le mɛɛ ya cho kɔlaŋ o Finya nuu lo yɛ, kanifuule Finya nuu nɔ kpaayaa mbo hiau ya poloŋ.+ 29 I cho nya pɔɔ dimullo tuupa i yɔŋnuŋ, le mi la laalaŋ te i huŋ yɔŋnuŋ pɛ.+ 30 I nɔ lɛ teleŋ bɔɔ le suukaŋndo naa nyaa le, kanifuule wana cho masaa le chieeŋndo wo+ cho hunɔɔ. Nduyɛ o nɔ ya kpaaya o kpaaya choo le.+ 31 Mɛɛ Finya nuu vem ya le tosaa yɛ, lende kinɛi ya cho tosaa ni,+ le mi chieeŋndo sina maa I kaala Finya nuu. La chɔŋ miŋ faŋaŋ nanuŋ.