Luku
3 Wɔsi Tabiliɔɔ Siisa chiŋa wɔsilaŋ 15 o masaleŋ choo wo, Pɔŋtiɔɔ Paile wa masaa Chudiaa ni. Hɛlɔɔ+ wa masa ibuŋgaa Kalili ni, mi Filipi bɛ ndɔ wa masa ibuŋgaa le lɛŋnde Ituluaa leŋ a lɛŋnde Tiluakonaitii leŋ. Nduyɛ Laisenia wa masa ibuŋgaa Abilini ni. 2 O teleŋ masaa wanaa soliaa lasalaa Anasi nda Kayafaa wo niŋ,+ mi Mɛlɛka ke Chɔŋ,+ po Sɛkalaya wo yooŋgoo o pollo niŋ.+
3 Mi Chɔŋ kua o tanda Chɔɔdaŋ ndo niŋ mbo wa waŋnda dimullo le ma wookuŋ ma yiŋ, okoŋ ma sɔla malɔɔ hakioo.+ 4 A mɛɛ i cho i poonyiaa o yau Aisaya, wana ndoo suaa le Mɛlɛka wo niŋ yɛ aa: “Waŋndo cho yondaa o pollo niŋ aa: ‘La bɛɛndiaa nɛi Chɛhowa* wo! La toosiaa ndu nyɛkɛndɛi.+ 5 La peelu kpoloŋndaŋ, nduyɛ mi la pesi pesi pemboŋ kpou. La siɛɛnduu nɛila tuunduɛilaŋ, mi la toosiaa nɛila wɔɔŋndaŋ nyɛkɛndɛi. 6 Okoŋ waŋnda chieeya kpou cho chɔ mɛɛ Mɛlɛka piŋi niŋ nda yɛ.’”+
7 Mbo kandu wanaa wa hunɔɔ naa ndu chua le yiŋɔɔ wa dimullo aa: “Nya kɛuwaa wɔɔŋ wɔɔŋnda haa, nɛɛnɛ dimul lɛ nya le mi la nyaanuŋ kɔl tuu Mɛlɛka cho hunɔɔ wo?+ 8 Lelaŋ, la tosa sɔɔŋ chɔm maa la wookuŋ ndoŋ. La yiyaŋ pɛŋ o kɔlta nyalaŋ niŋ mi la dimi aa: ‘Ebilaham cho finya naa ni’ le. Mi dimul nya maa, Mɛlɛka nɔla mbo siiŋguu poutaŋ ndaŋ chuauwa le Ebilaham. 9 Chuei cho niŋ i kɛsiaa o yɔmnde bɛŋgu le ndi kioŋndo. Yɔm o yɔm kum komɔɔ kɛndɛ le, a cho ndu kioŋ ma lom ndu.”+
10 Mi faŋgaa nyuna ndu aa: “Mɛɛ, yɛɛnɛ naŋ nɔ yɛ miŋ tosa?” 11 Okoŋ mbo mulul nda aa: “Te waŋndo nɔ pɛ domalaŋ la tiɔɔŋ, mɛɛ o ke wana nɔ le wo o pilɛ. Mi wana nɔ nyɛdiaa o ba wo bɛɛ ke wana nɔ le wo.”+ 12 Mi wanaa biyaa paawaa* bɛɛ huŋ naa ndu chua le mbo yiŋ nda.+ Ma nyuna ndu aa: “Wana Pɛɛkaa, yɛɛnɛ naŋ nɔ yɛ miŋ tosa?” 13 Mbo mulul nda aa: “La bii waŋnda paawaa o ba mbo hiou mɛɛ nda dimul nya yɛ le.”+ 14 Mi puaa chɔuwa bɛɛ nyuna ndu aa: “Yɛɛnɛ naŋ nɔ yɛ miŋ tosa?” Mbo mulul nda aa: “La del wana o wana choo le. Nduyɛ la baalaŋ wana fondo fuu le.+ La hini kɔl a paawa nyaa.”
15 Waŋnda kpou wa lehɔl o nɛi, nduyɛ a wa nyunaŋndo o lakɔl a Chɔŋ okɔɔ aa, “Baa ndu cho Kiliti ni?”+ 16 Mi Chɔŋ mulul nda kpou aa: “Ya ya, o mɛŋndaŋ niŋ ya cho nya yiŋɔɔ ni. Kɛ wana cho hunɔɔ ya kɔɔli wo hiou ya poloŋ. I suliŋ bɛɛ pɛŋ le yuei nduɛi lakɔwɛiye* timbioo le.+ Ndu ndu, a nyina diandaa vɛlɛ a yiŋndeŋ o cho nya yiŋɔɔ ni.+ 17 Fɛlɛ ndɔ hɛyaa cho ndu o ba, le mbo bɛɛsuu yasaba ndɔ luaa ŋwitiiyo fo fo, okoŋ mbo wou witiiŋ ndɔŋ o konda. Kɛ tɛfɛlaŋ ndaŋ, mbo lom ndaŋ o yiŋnde nyum te leŋ niŋ.”
18 Mi Chɔŋ pɛɛku nda vɛlɛ sɔɔŋ bɔɔbɔɔ. Mbo hiau lachi a waŋnda yooŋgu kɛndɔɔ dimullo. 19 Mi Chɔŋ sila Hɛlɔɔ, o wa masa ibuŋgaa wo le suɛi Hɛloodiaa lanɔɔ bɛ ndɔ ve, a le sɔɔŋ wɔɔŋ cheleŋ o tosa woŋ. 20 Dɛnɛ wɔɔŋ ndɔɔ chiiyo kpou wa ni, mbo duau Chɔŋ o chiɛi manyumndo niŋ.+
21 Mɛɛ Chɔŋ chii waŋnda kpou yiŋɔɔ, mbo yiŋ Chiisu.+ Mɛɛ Chiisu wa piɛileŋ, mi choo choo kumbiŋ.+ 22 Mi nyina diandaa tual ndu choo maa kaŋgbo. Okoŋ, mi diomndo suaa o choo choo niŋ aa: “Num cho Po nuu ni. I kaala num, nduyɛ I hini kɔl a num.”+
23 Teleŋ Chiisu+ kandu wali ndɔɔ tosaa wo, o wa niŋ le wɔsilaŋ 30.+ Nduyɛ waŋnda ndaa yiyaŋ maa,
Choosɛ wa finya ndɔ ni,+
po Hilai yo,
24 Hilai po Matati wo,
Matati po Livai yo,
Livai po Mɛliki wo,
Mɛliki po Chanai yo,
Chanai po Choosɛ wo,
25 Choosɛ po Matatayasi wo,
Matatayasi po Emɔɔsi wo,
Emɔɔsi po Nehum ndo,
Nehum po Ɛsilai yo,
Ɛsilai po Nakai yo,
26 Nakai po Meya wo,
Meya po Matatayasi wo,
Matatayasi po Sɛmiɛɛ wo,
Sɛmiɛɛ po Chosɛki wo,
Chosɛki po Choda wo,
27 Choda po Chohanaŋ ndo,
Chohanaŋ po Luesa wo,
Luesa po Sɛlubabɛl lo,+
Sɛlubabɛl po Siaatiɛɛ lo,+
Siaatiɛɛ po Niluaa wo,
28 Niluaa po Mɛliki wo,
Mɛliki po Adii wo,
Adii po Kosam ndo,
Kosam po Ɛlimedam ndo,
Ɛlimedam po Ɛɛ wo,
29 Ɛɛ po Chiisu wo,
Chiisu po Ɛliɛɛsa wo,
Ɛliɛɛsa po Choluim ndo,
Choluim po Matati wo,
Matati po Livai yo,
30 Livai po Simiɔŋ ndo,
Simiɔŋ po Chuda wo,
Chuda po Choosɛ wo,
Choosɛ po Chonam ndo,
Chonam po Iliaakim ndo,
31 Iliaakim po Mɛliaa wo,
Mɛliaa po Mɛna wo,
Mɛna po Matata wo,
Matata po Netaŋ ndo,+
Netaŋ po Deeve wo,+
32 Deeve po Chɛɛse wo,+
Chɛɛse po Obɛdi wo,+
Obɛdi po Bowaa wo,+
Bowaa po Salimɔŋ ndo,+
Salimɔŋ po Naasiɔŋ ndo,+
33 Naasiɔŋ po Aminadabi wo,
Aminadabi po Anai yo,
Anai po Hɛsilɔŋ ndo,
Hɛsilɔŋ po Piluɛsi wo,+
Piluɛsi po Chuda wo,+
34 Chuda po Chekɔpu wo,+
Chekɔpu po Aase wo,+
Aase po Ebilaham ndo,+
Ebilaham po Tɛlua wo,+
Tɛlua po Nahɔɔ wo,+
35 Nahɔɔ po Silɔɔki wo,+
Silɔɔki po Luiyu wo,+
Luiyu po Pilɛki wo,+
Pilɛki po Ɛba wo,+
Ɛba po Silua wo,+
36 Silua po Kenaŋ ndo,
Kenaŋ po Apasadi wo,+
Apasadi po Siɛm ndo,+
Siɛm po Nuuwa wo,+
Nuuwa po Lamɛki wo,+
37 Lamɛki po Mɛtusila wo,+
Mɛtusila po Inɔki wo,
Inɔki po Chaluɛdi wo,+
Chaluɛdi po Mahelaliɛɛ lo,+
Mahelaliɛɛ po Kenaŋ ndo,+
38 Kenaŋ po Inɔɔsi wo,+
Inɔɔsi po Sɛti wo,+
Sɛti po Adam ndo,+
Adam po Mɛlɛkaa.