Walta Kiilaa
4 Pitɛ nda Chɔŋ lo suɛi o waŋnda lo, mi wanaa soliaa lasalaa, wana bɛndu wanaa manda chiɛi Mɛlɛkaa wa, a Sadusiiya+ huŋ naa nda chua. 2 Ma tuulu kɔl le mɛɛ kiilaa Chiisu wa wa waŋnda pɛɛkoo, ma wa nda dimullo kpendekele maa Chiisu miiŋgu yoomu yɛ.+ 3 Ma bii nda, ma kɔ dɔu nda o chiɛi manyumndo niŋ+ haaa diimandɔɔ, kanifuule paaleŋ lee del niŋ. 4 Kɛ mi wanaa yaŋ sɔɔŋ muŋ nilaŋ nda a bɔɔbɔɔ laalaŋ, nduyɛ mi waŋ piaanduaa fuuluu 5,000.+
5 Diimandɔɔ, mi masaa waa, laŋgbaa kalla, a wanaa pɛɛku waŋnda sawala Mɛlɛkalaŋ nda chuuŋgiaŋ Chulusalɛm. 6 Nduyɛ Anaasi+ masa wanaa soliaa lasalaa, Kayafaa,+ Chɔŋ, Alɛkisanda, a wanayaŋ masa wanaa soliaa lasalaa kpou bɛɛ wa loŋ. 7 Ma huŋ simi Pitɛ a Chɔŋ nda tɛɛŋ, ma kandu nda nyunaa aa: “A kpaaya nɛɛnɛ ɔɔ o diola nɛɛnɛ niŋ nya tosa yɛ suɛi hei?” 8 Mi nyina diandaa tual Pitɛ choo,+ mbo mulul nda aa:
“Masaa waa a laŋgbaa kalla, 9 te o yɔŋ pɛ maa le dɛnɛ kɛndɛ yɔŋnuŋ po bɛvɛiyo hoo wo nya cho naa hau nyuuniaa ni,+ a le sinaa wana tosa mbo siaŋgu wo, 10 nya kpou a wana o wana cho Isɔluɛi, la sina pɛŋgu maa Chiisu Kiliti, o fula Naasaluɛi+ mi la dii ndu o yɔmndo choo,+ kɛ mi Mɛlɛka miŋgi ndu yoomu wo,+ o diola ndɔlaŋ niŋ poo hoo sɔla sioŋgɔɔ ni. 11 Ndu cho ‘pou nya wanaa taŋgulaa che fondo fuu, kɛ mbo simnuŋ pou kpeekpei saa taŋgullo wo ni.’+ 12 Wana o wana cheleŋ nɔla mbo baŋa naa le, kanifuule diola cheleŋ+ la cho o chieeŋndo choo, la Mɛlɛka yɔŋgu wanachioo le miŋ sɔla baŋaa le.”+
13 Mɛɛ nda che Pitɛ nda Chɔŋ suɛi walaŋ siooŋii ve nda le, mi kɔndɔfillo bii nda tau, kanifuule ndaa sina maa a ve wanaa sinaa yau le.* Nduyɛ ndaa pelnuŋ ladio le.+ Okoŋ ma sina maa a wa latulu a Chiisu.+ 14 Mɛɛ nda che po sɔla sioŋgɔɔ wo isisi Pitɛ nda Chɔŋ ikɛi,+ a nɔla ma soo nyɛ o nyɛ le.+ 15 Okoŋ ma dimul nda le ma fula o bɛɛ. Ma kandu nyuuniaŋndo, 16 ma dimi aa: “Yɛɛnɛ naŋ tosa yɛ a puaa haa?+ Waŋnda Chulusalɛm kpou sina maa nda tosa suɛi kɔndɔfili bɛnduei hei ni.+ Nduyɛ ŋ nɔla miŋ sɛɛŋgiaa nyɛ yɔŋnuŋ hoo wo le. 17 Lelaŋ ŋ kɔŋgɔliaŋ nda, miŋ dimul nda maa a suaa lɛ o wana o wana lo a diola poo hoo okɔɔ le, yɔŋii suɛi hei pɛŋgɛlaŋ.”+
18 Okoŋ kɔɔli, ma veelu nda ma dou nda sawaa maa, a suaa lɛ o wana lo ɔɔ ma pɛɛku waŋnda a diola Chiisu laŋ okɔɔ le. 19 Kɛ mi Pitɛ nda Chɔŋ dimul nda aa: “I kuɛɛ wa yɛ ikɛndɛ Mɛlɛka o hɔl? Diikɔŋndo nya ɔɔ nyɛ Mɛlɛka dimi wo tosaa? Nyapila kiolu wɔ yamɛi. 20 Kɛ naa naa, ŋ nɔla miŋ pɛŋgi suɛi a sɔɔŋ naŋ che, nduyɛ miŋ tuɛi yoŋ okɔɔ le.”+ 21 Mɛɛ nda chɔɔlu nda kɔŋgɔliaŋ, ma mal nda. Kanifuule a seeluŋ nyɛ o nyɛ nda tɛɛmbuu le ma saaŋgiaa nda le. Siooŋnde wa nda vɛlɛ le waŋnda,+ kanifuule nda kpou wa Mɛlɛka saŋgalaa le nyɛ yɔŋnuŋndo. 22 Po sɔla sioŋgɔɔ a kaamaa hoo wo ndoo hiou niŋ wɔsilaŋ 40.
23 Mɛɛ nda mal nda, ma miiŋgu o wanaa ndaa lo, ma kɔ doonuŋ nda kona a nyɛ masaa wanaa soliaa lasalaa, a laŋgbaa kalla dimul nda wo. 24 Mɛɛ nda tuei hei, ma piɛi Mɛlɛka diompilɛ aa:
“Mɛlɛka Kpuluŋguma Bɛndoo, num toosiaa choo choo, lɛŋndeŋ, pee mɛŋma ihɛllo, a nyɛm cho leniŋ ndoŋ kpou ni.+ 25 O sabu nyina diandaa niŋ, ma tosa mi Deeve finya naa mamaa,+ o wa buɛi numndo wo dimi aa: ‘Le yɛɛnɛ kaalaŋ la tuulu yɛ kɔl, nduyɛ mi waŋnda wa yiyaŋndo o sɔɔŋ fondoŋ choo? 26 Masaa lelɛŋnda bɛɛndiaŋ, mi wanaa bɛnduaa chuuŋgiaŋ diompilɛ le ma simul Chɛhowa,* a wana ndɔ o pɔya wo.’+ 27 Lekɛndɛi mi Hɛlɔɔ, Pɔŋtiɔɔ Paile,+ wanaa lekaa wa, a waŋnda Isɔluɛi chuuŋgiaŋ diompilɛ o chiee bɛndoo hoo niŋ ma simul Chiisu, buɛi num diandaa ŋ pɔya wo.+ 28 Ma chuuŋgiaŋ le ma tosa nyɛ ŋ dimi wo. Sɔɔŋ muŋ yɔŋnuŋ, kanifuule a nɔ kpaayaa, nduyɛ keŋ ŋ kɛɛsiaa sindɛ pa ni.+ 29 Lelaŋ Chɛhowa,* yaŋ nilaŋ o kɔŋgɔliaŋnda nda cho naa laŋ, ma mala buɛiyaa numnda ma hiou lachi a diom numndo dimioo a kɔl simulaa. 30 Tosa mi waŋnda sɔla sioŋgɔɔ, nduyɛ miŋ tosa kaamaalaŋ+ o diola Chiisu laŋ niŋ, buɛi num diandaa.”+
31 Mɛɛ nda chii Mɛlɛka nyɔɔlu o piɛileŋ niŋ, mi fondaŋ nda chuuŋgiaŋndo nyiiya. Nda kpou mi nyina diandaa tual nda choo,+ okoŋ ma wa diom Mɛlɛkaa dimioo a kɔl simulaa.+
32 Mi che bɛɛ wanaa laalaŋnda wa tau, kɛ ndaa nɔ yiyaŋ pilɔɔ. Wana pilɛ bɛɛ nda tɛɛŋ dimi nuaa maa nyɛm o nɔ woŋ le ndupilɛ le ŋ wa le. Kɛ nyɛ o nyɛ ndaa nɔ, a wa piɔuviaŋndo.+ 33 Mi kiilaa hiau lachi a seileŋ timbioo a miiŋgu Chiisu miiŋgu yoomu wo* okɔɔ a dialuŋ fulaa.+ Nduyɛ mi Mɛlɛka duau nda sala tau tau. 34 Wana pilɛ bɛɛ ve nda tɛɛŋ a lepɛŋ te,+ kanifuule wanaa ndaa nɔ kpelelaŋ ɔɔ chiɛilaŋ nda kpou, ma piisuu laŋ, ma huŋ a nyɛsɔlaa koŋ, 35 ma yɔŋgu kiilaa.+ Okoŋ mi kiilaa piɔu ndu, mi wana o wana sɔla a mɛɛ bahawɛi ndɔɔ wa yɛ.+ 36 Livainɔ pilɛ wa diolaŋ Choosɛ, fulaa Saipulɔɔ. Kiilaa ndaa veelu ndu vɛlɛ aa Banabaa+ (koŋ cho ni, “Po Dɛɛniaa Waŋnda Kɔltaŋ Ndo”). 37 Ndu bɛɛ ndoo nɔ kpeloo. Mbo pisi ndu, mbo huŋ a kaniŋ* muŋ, mbo yɔŋgu kiilaa.+