Walta Kiilaa
5 Po pilɛ wa diolaŋ aa Ananaaya. Ma chɛlaŋ nda Safilua laa ndɔ, ma pisi lɛŋnde ndaleŋ. 2 Kɛ ma faŋa kanioŋ* ŋ tiŋ lechoo sɔɔsɔɔ nda laa ndɔ, mbo huŋ a ŋ tɔɔŋ mbo yɔŋgu kiilaa.+ 3 Mi Pitɛ nyuna ndu aa: “Ananaaya, le yɛɛnɛ ŋ chɛllɛ mi Setana luɛi num niŋ ma dimul nyina diandaa+ choolaŋ,+ okoŋ ma faŋa kaniŋ ŋ pisi lɛŋndeŋ ndoŋ ŋ tiŋ lechoo sɔɔsɔɔ? 4 Le num lɛŋndeŋ ndeŋ le wa ni, lende le? Nduyɛ mɛɛ ŋ pisi leŋ, le num nyɛsɔlaa koŋ wa ni, lende le? Le yɛɛnɛ ŋ kɛɛsiaŋ yɛ suɛi wɔɔŋii waa nuaa o kɔl? O cho wanachiee le ŋ dimul choolaŋ te, kɛ Mɛlɛka ŋ dimul choolaŋ ni.” 5 Mɛɛ Ananaaya tuei sɔɔŋ muŋ, mbo del, mbo wu pɛ. Mi siooŋii bɛnduei bii wanaa tuei a suɛi hei okɔɔ wa kpou. 6 Okoŋ mi laŋgbaa huŋ chua ndu, ma simbul ndu o kolalaŋ niŋ, ma kua a ndu, ma kɔ kumbu ndu.
7 Mɛɛ teleŋndo hiou le hawɛilaŋ* la yaa, mi laa ndɔ huŋ. Kɛ o sina nyɛ yɔŋnuŋndo le. 8 Mi Pitɛ nyuna ndu aa: “Baa nyɛsɔlaa nya pisi lɛŋnde nyaleŋ ndo kpede cho hoo ni?” Mbo muli aa: “Ei, ndu kpede cho koŋ ni.” 9 Mi Pitɛ nyuna ndu aa: “Le yɛɛnɛ nya chɛlaŋ yɛ le nyina Chɛhowa* wo huiyo? Wanaa kɔ kumbu pɔnɔ numnda cho niŋ kpɛɛluŋ o dio, nduyɛ num bɛɛ a cho hunɔɔ lakɔ a num.” 10 O lepilɛ niŋ kpe, mbo del Pitɛ o hɔl, mbo wu pɛ. Mɛɛ laŋgbaa miiŋgu ma saaluŋ ndu o vilɛiyo, okoŋ ma chua ndu, ma kɔ kumbu ndu pɔnɔ ndɔ ikɛi 11 Mi siooŋii bɛnduei bii kunda wanaa laalaŋnda a wanaa tuei sɔɔŋ muŋ nda kpou.
12 Mi kiilaa hiau lachi a sɔɔŋ kɔndɔfilloŋ vɛlɛ a kaamaala bɔɔbɔɔ tosaa waŋnda tɛɛŋ.+ Nda kpou mi ndaa chuuŋgiaŋ o Toŋgo Sɔlɔmɔŋndo niŋ.+ 13 Waŋnda wa sɔɔŋ kɛndɔŋ dimioo a nda okɔɔ tau, kɛ wana o wana cheleŋ bii kɔllo mbo luɛi nda tɛɛŋ te. 14 Mi waŋ piaanduaa a waŋ laanduaa laalaŋ o Masanɔɔ niŋnda hiau lachi a handɔŋndo lechoo tau tau.+ 15 Mi waŋnda huŋ a wanaa lanaa o nɛila bɛndulaŋ, ma yɛɛmbuu nda o kpelela pɔmbɔlaŋ choo a walalaŋ, le mi wundule Pitɛ leŋ le pilaŋ bɛɛ a tiŋ teleŋ o cho wa hiouwɔɔ wo.+ 16 Mi wanaa bɔɔbɔɔ fula vɛlɛ o chieeŋ bɛnduŋ balu Chulusalɛm ndoŋ, ma huŋ a wanaa lanaa, a wanaa nyinaa wɔɔŋnda wa kɔɔli wa. Nduyɛ mi nda kpou siaŋgu.
17 Kɛ mi wana bɛndu wanaa soliaa lasalaa, a wanaa wa a ndu latulu o kunda lepiɛi Sadusiiya choo wa chaŋ a kɔl paŋalɛi bɛndoo. 18 Okoŋ ma bii kiilaa, ma duau nda o chiɛi manyumndo niŋ.+ 19 Kɛ a nyumndaŋ, mi maalikɛinɔ Chɛhowa* wo kumbi diola chiɛi manyumndo,+ mbo soli nda o bɛɛ. Mbo dimi aa: 20 “La kɔ sim o chiɛi Mɛlɛkaa niŋ, mi la hiou lachi a suɛi o waŋnda lo a yoomu cho hunɔɔ wo okɔɔ.” 21 Mɛɛ nda tuei hei, ma luɛi o chiɛi Mɛlɛkaa niŋ a paale siaaleŋ, ma kandu waŋnda pɛɛkoo.
Mɛɛ wana bɛndu wanaa soliaa lasalaa a wanaa wa a ndu latulu wa hiŋ, ma chuuŋgiaa Laŋgbaa Kalaa Kialu Yamaŋ Nda, a laŋgbaa kalla o Isɔluɛi niŋ kpou naapilɛ. Okoŋ ma viam waŋnda o chiɛi manyumndo le ma kɔ huŋ a kiilaa naa nda chua. 22 Kɛ mɛɛ wanaa nda vem nda fuuluu loŋ, a komal nda o chiɛi manyumndo niŋ te. Ma miiŋgu ma kɔ dɔɔnuŋ kona 23 aa: “Ŋ komal chiɛi manyumndo o baŋaa kpaŋ kpaŋ, nduyɛ wanaa mɛŋgɛlaa wa isisi o diolaŋ. Kɛ mɛɛ naŋ kumbi, ŋ chi wana o wana leniŋ te.” 24 Mɛɛ wana bɛndu wanaa manda chiɛi Mɛlɛkaa wa, a masaa wanaa soliaa lasalaa tuei hei, ma buulaŋ a nyɛ wa hunɔɔ yɔŋnɔŋndo. 25 Kɛ mi waŋndo huŋ dimul nda aa: “Puaa nya dɔu o chiɛi manyumndo niŋnda cho isisi o chiɛi Mɛlɛkaa niŋ, ma wa waŋnda pɛɛkoo.” 26 Okoŋ, mi wana bɛndu wanaa manda chiɛi Mɛlɛkaa wa kua nda laŋgbaa nduaa ma kɔ huŋ a nda. Kɛ a tosa ndi a kaka le, kanifuule a wa siooŋnde yɔŋii waŋnda vii vii nda a poutaŋ.+
27 Mɛɛ nda hiŋ a nda, ma simi nda Laŋgbaa Kalaa Kialu Yamaŋ Nda lachi. Okoŋ, mi wana bɛndu wanaa soliaa lasalaa 28 dimul nda aa: “Ŋ dou nya sawaa o kala kala maa la pɛɛku lɛ waŋnda a diola poo hoo okɔɔ le.+ Kɛ la tofawɔ! La tiu pɛɛku nyaa hoo Chulusalɛm kpou, nduyɛ la yeema mi la heelu naa kooma poo hoo o lebol.”+ 29 Mi Pitɛ a kiilaa apiliaa mulul nda aa: “Ŋ nɔ miŋ diikuŋ Masanɔɔ Mɛlɛka mbo hiou wanachioo.+ 30 Mɛlɛka finyaa naa mamaa miŋgi Chiisu yoomu, o nya baŋ o yɔmndo choo mi la dii ndu wo.+ 31 Mɛlɛka heelu ndu tema o ba ndɔ kɛndɔɔ choo,+ mbo siiŋguu ndu Masaa+ a Wana Piŋiaa,+ le mi Isɔluɛi wookuŋ, okoŋ mbo sɔla malɔɔ hakioo.+ 32 Ŋ cho lesei le sɔɔŋ muŋ.+ Nduyɛ nyina diandaa+ Mɛlɛka ke wanaa cho ndu diikɔŋndo wa wo bɛɛ cho lesei.”
33 Mɛɛ nda tuei hei, ma tuulu kɔl tau, ma yeema le kiilaa diyɔɔ. 34 Kɛ Falisiinɔ pilɛ wa o kunda Laŋgbaa Kalaa Kialu Yamaŋ Nda choo diolaŋ aa Kameliɛɛ.+ Wana ndoo pɛɛku waŋnda Sawala Mɛlɛkalaŋ ndo o wa ni. Nduyɛ waŋnda ndaa nɔ bɛɛleŋ le ndu tau. Mbo chaŋ, mbo dimi le ma soli kiilaa o bɛɛ le teleŋ biŋgi. 35 Mbo dimul nda aa: “Waŋnda Isɔluɛi, la mandaŋ a nyɛ nya yeema le puaa haa tosallo wo. 36 Le tamaseliiyo, o wɔsila hiou laŋ niŋ, mi Tiodɔɔ chaŋ, mbo dimi maa wana bɛndoo o cho ni. Mi waŋnda le 400 tual ndu kɔɔli. Kɛ mi waŋnda apum dii ndu, okoŋ mi wanaa tol ndu kɔɔli wa kpou saŋnuŋ. Mi kɛɛsiaala ndalaŋ la tambu. 37 O ndu kɔɔli, mi Chuda, wana waa Kalili chaŋ a teleŋ nda wa waŋnda diolaŋ poonyiaa wo. Mbo tosa mi waŋnda tual ndu kɔɔli. Ndu bɛɛ ma dii ndu. Okoŋ mi wanaa tol ndu kɔɔli wa kpou saŋnuŋ. 38 Lelaŋ mɛɛ ya cho sɔɔŋ chɔɔ yɛ, la yɔŋ puaa haa nyɛ o nyɛ le. La mal nda o ba ndaa choo. Te o yɔŋ pɛ aa waŋnda chieeya kɛɛsiaa sɔɔŋ muŋ ɔɔ waltaŋ ndaŋ ni, mɛɛ a cho dema. 39 Kɛ te kɛɛsiaa Mɛlɛkaa ni, mɛɛ la cho batiuwaa sɔla le.+ Nduyɛ te la baŋ pɛ, mɛɛ Mɛlɛka nya cho wa koŋ chɔulabaa ni.”+ 40 Okoŋ, ma yaŋ Kameliɛɛ nilaŋ. Ma veelu kiilaa, ma luaa nda,+ nduyɛ ma dou nda sawaa maa a suaa lɛ a diola Chiisu laŋ okɔɔ le. Okoŋ ma mal nda ma kuaŋnuŋ.
41 Okoŋ kɔɔli, ma faŋaŋ Laŋgbaa Kalaa Kialu Yamaŋ Nda o hɔl, ma kuaŋnuŋ. A wa kɔlaŋ a nyaaloo+ le mɛɛ Mɛlɛka chɛl ma tusi nda siɔmbulaŋ le diola Chiisu laŋ yɛ. 42 Lepaa o lepaa, a wa hiouwɔɔ lachi a yooŋgu kɛndɔɔ dimioo chiɛiyo a chiɛiyo+ a o chiɛi Mɛlɛkaa niŋ. A wa waŋnda pɛɛkoo a Chiisu Kiliti okɔɔ.+