Maatiu

24 Mɛɛ Chiisu wa faŋaŋndo o chiɛi Mɛlɛkaa, mi buɛiyaa nduaa sɔɔŋguu ndu ikɛi ma chɔm ndu taŋgulta wa o fondaŋ chiɛi Mɛlɛkaa laŋ. 2 Mbo dimul nda aa: “La cho pa taŋgultaŋ ndaŋ chɔɔ? A tonya mi dimul nya, pouwo o pilɛ bɛɛ lo niŋ o chaaŋ ndɔ choo le. Laŋ kpou la cho koombiaa.”+

3 Mɛɛ o wa ichali o Pembii Ɔlifii Ve choo, mi buɛiyaa nduaa sɔɔŋguu ndu ikɛi nda kpeele, ma nyuna ndu aa: “Dimullɔ naa, boondii kuɛɛnɛ sɔɔŋ muŋ cho yɛ yɔŋnɔŋ? Nduyɛ tamasi yɛɛ yɔŋnuŋ yɛ niŋ le chɔmndo maa a cho nanuŋ?*+ Yɛɛ yɔŋnuŋ yɛ niŋ le sinaa maa mɛɛlula chieeŋndo hoo* la fuuluu?”+

4 Mi Chiisu mulul nda aa: “La mandaŋ yɔŋii wana hui nya.+ 5 Kanifuule, wanaa bɔɔbɔɔ cho hunɔɔ o diola nilaŋ niŋ ma dimi aa, ‘Ya cho Kiliti ni,’ okoŋ ma hui wanaa bɔɔbɔɔ.+ 6 La tuɛi niŋ a chɔulaŋ okɔɔ, vɛlɛ a konala chɔulaŋ. Kɛ siooŋii bii nya le, kanifuule sɔɔŋ muŋ nɔ le yɔŋnɔŋndo fɛlɛŋ, kɛ koŋ cho wɔ lamɛɛlu le.+

7 “Lɛŋndeŋ le cho sɔŋga a lɛŋndeŋ, mi masaleŋ le sɔŋga a masaleŋ.+ Yima bɛnduaŋ ma del niŋ,+ nduyɛ lɛŋnde nyiiyaaleŋ le wa niŋ o fondaŋnda bɔɔbɔɔ.+ 8 Kɛ sɔɔŋ muŋ kpou wa niŋ ko mɛɛ pulii vialɛi kandu nuaa wana lanɔɔ nɛiyo yɛ.

9 “A cho nya biyɔɔ ma tusi nya nyɛpalaa choo+ nduyɛ ma dii nya.+ Waŋnda kpou cho nya yɛleŋ tul le diola nilaŋ.+ 10 Nduyɛ keŋ cho tosa mi wanaa bɔɔbɔɔ mal tiindaŋ nda nɔ o Mɛlɛka niŋndo, ma piisiaŋ o waŋnda lo, nduyɛ ma tulnaŋ yɛleŋ vellaa velle. 11 Wanaa lachoowaa dimi maa le Mɛlɛka nda suaa ni wa a wa niŋ tau, nduyɛ ma hui wanaa bɔɔbɔɔ.+ 12 Le mɛɛ dɛnɛ wɔɔŋndo cho hiouwɔɔ lachi a kuiyo yɛ, kaala wanaa bɔɔbɔɔ nɔ wo cho nyulul. 13 Kɛ wana o wana biunuŋ pɛ haaa o mɛɛlulaŋ, o cho pioŋɔɔ sɔla.+ 14 Nduyɛ yooŋgu kɛndɔɔ hoo a Masale Mɛlɛkaleŋ okɔɔ, o cho dimiŋ ba o ba fee o chieeŋndo choo, le mbo wa maa lesei le kaalaŋ kpou,+ okoŋ mi mɛɛlulaŋ la fuuluu.

15 “Lelaŋ, te la che pɛ mi nyɛ nɔɔlɛi tɛɛmbuu nyɔɔŋ ndo sim o fondaŋ diandaa,+ a mɛɛ Daaniɛɛ wana ndoo suaa le Mɛlɛka wo dimi yɛ (wana cho diomndaŋ veeloo wo soliŋ sinapɛŋgoo kpeku), 16 mɛɛ wanaa cho Chudiaa wa kandu nyaanɔŋndo o pemboŋ choo.+ 17 Wana cho o chiɛiyo choo wo tual lɛ lɛŋ mbo chua nyɛm ndɔŋ chiɛiniŋ te. 18 Nduyɛ, wana cho o chiɛi niŋndo miiŋgu lɛ le doma ndɔɔ chuaa le. 19 Kpundɔɔ wa niŋ bɔɔ le wanaa lafoliaa* a komsaa o palɛi keŋ niŋ! 20 La hiou lachi a piɛileŋ yɔŋii kilta laŋ la komal nya a sialteŋ ɔɔ o Paale Pɛŋgiaaleŋ choo. 21 Kanifuule, nyɛpalaa bɛndoo wa niŋ bɔɔ.+ Kani mi chieeŋndo kanduŋ mbo huŋ bii a hau, nyɛpalaa waa lende yɔŋnuŋndɔ le, nduyɛ o yɔŋnuŋ lɛ niŋ vɛlɛ le.+ 22 Te o cho mi Mɛlɛka faŋa palɛi keŋ i tiŋ lechoo le, wana o wana sɔla niŋ pioŋɔɔ le. Kɛ le sabu wanaa o hɛli wa, o cho palɛi keŋ faŋa i tiŋ lechoo.+

23 “Lelaŋ te waŋndo dimul nya pɛ aa, ‘Mi cheŋ Kiliti nanuŋ,’+ ɔɔ ‘O cho o nda!’ la laalaŋ ndu le.+ 24 Kanifuule, wanaa lachoowaa dimi maa nda cho Kiliti ni wa, a wanaa lachoowaa dimi maa le Mɛlɛka nda suaa ni wa,+ a cho chɔnɔŋ ma wa walta kaamaala suu o suu tosaa le waŋnda huiyo,+ hali wanaa sɔla hɛlioo wa bɛɛ. 25 Lelaŋ ya cho nya pɔɔ silaa ni. 26 Te waŋnda dimul nya pɛ aa: ‘La nuawɔ ndu o pollo niŋ nda,’ la kua loŋ te. Ɔɔ ma dimul nya aa, ‘O cho chiɛiniŋ nda,’ la laalaŋ nda le.+ 27 Kanifuule, mɛɛ nyɛ ŋualalɛiyo kiolu nuaa ba paaleŋ le chaŋ ndo mbo kuɛ a dionɔɔ ba paaleŋ le del lo yɛ, lende hunɔɔ* Po wanachioo cho wa ni.+ 28 Ba o ba nyɛ vilɛiyo wa pɛ, loŋ koviaa* chuuŋgiaŋ ni.+

29 “Te palɛi nyɛpalaa koŋ i hiou dɔɔ pɛ, nyumndaŋ ma cho paaleŋ kumbɔɔ kpu,+ mi paŋgei bɛɛ i pɛŋgi diondɔɔ, nduyɛ mi looŋ fula o choo choo niŋ miŋ deli. Okoŋ mi kpaayalaŋ o choo choo niŋ la hiiluŋ woku woku.+ 30 Tamasilaŋ la cho chɔmnɔŋ o choo choo niŋ le sinaa maa Po wanachioo chɛŋ hunɔɔ. Nduyɛ, waŋnda o kaalaŋ niŋ o lɛŋndeŋ choo kpou wa niŋ viiviŋndo a chaŋndo,+ ma che Po wanachioo+ hunɔɔ o yumbu yumboo niŋ o choo choo niŋ a kpaayaa vɛlɛ a naŋɔɔ bɛndoo.+ 31 Nduyɛ te bulu bɛndoo soo pɛ, o cho maalikɛiyaa nduaa viomɔɔ o sɔŋgilaŋ* kpou o lɛŋndeŋ choo, vɛlɛ a ba o ba fee o choo choo niŋ, le wanaa nduaa o hɛli wa chuuŋgiaa.+

32 “La chua wɔ tamaseliiyo a yɔm mafikiiyo okɔɔ. Te lɛuwuŋ ndɔŋ kandu dɔɔ pɛ pei sɛnɛiye solioo, la sina dɔɔ maa teleŋ tualaa fuuluu.+ 33 Nya bɛɛ, te la che pɛ sɔɔŋ muŋ, la sina maa o cho niŋ o dio.+ 34 A tonya mi dimul nya, waŋnda teleŋndo hoo a chuu niŋ wu le mi sɔɔŋ muŋ kpou ŋ yɔŋnuŋ. 35 Choo choo a lɛŋndeŋ cho faŋaŋ, kɛ diomnda nilaŋ la feŋaŋ te.+

36 “Wana o wana sina paale leŋ a hawɛi* koŋ te.+ Maalikɛiya o choo choo niŋ a Po wanachioo bɛɛ sina le, mɛɛ Finyaa ndupilɛ kpe.+ 37 Mɛɛ palɛi Nuuwa ve wa yɛ,+ lende koni boondii* Po wanachioo cho wa nanuŋ nde wa niŋ ni.+ 38 A boondii keŋ tuupa Mɛŋma Koŋgi Bɛnduaŋ, waŋnda wa diolaŋ a kolɔɔ, puaa wa laanduaa chuaa nduyɛ mi waŋ laanduaa wa challe o nɔlaŋ, haaa a paale Nuuwa luɛi o dɛndɔɔ niŋndeŋ.+ 39 A dou ndi taasi le, haaa mi Mɛŋma Koŋgi Bɛnduaŋ ma huŋ basu nda tɛɛ.+ Lende boondii Po wanachioo cho wa nanuŋ nde wa niŋ ni. 40 Puaa a ŋiɔɔŋ cho wa o chiɛi niŋ ma chua o pilɛ, kɛ ma mɛi o pilɔɔ. 41 Waŋ laanduaa a ŋiɔɔŋ cho wa chuoo o chiei niŋ ma chua o pilɛ, kɛ ma mɛi o pilɔɔ.+ 42 Lelaŋ, la wa lahɔl, kanifuule la sina paale Masanɔ nyaa cho hunɔɔ leŋ te.+

43 “La sina hei pɛŋgu maa, te wana chiɛiyo ndoo sina pɛ boondii viinɔɔ huŋ ichɔl le,+ o wa lo lahɔl nduyɛ ndoo chɛl mi viinɔɔ ndoo pɛl dio ndɔɔ le.+ 44 Lelaŋ, lende nya wa a bɛɛndiaŋ ni,+ kanifuule Po wanachioo cho hunɔɔ a boondii nya ve niŋ kɔl te ve.

45 “Nɛɛnɛ kpeekpei cho yɛ buɛi cho sakpo, nduyɛ mbo wa buɛi taasi wo, o masanɔ ndɔɔ handu hoo chaaŋaa nduaa buɛiya lachi, le nda nyɛdiaa kioo a teleŋndo kinɛi yo?+ 46 Kɔl kɛndɔɔ cho le buɛi koŋ te masanɔ ndɔɔ miiŋgu pɛ mbo komal ndu keŋ tosaa!+ 47 A tonya mi dimul nya, o cho ndu handɔɔ nyɛm ndɔŋ kpou lachi.

48 “Kɛ te buɛi koŋ wa pɛ buɛi wɔɔŋ, o cho dimi o kɔl ndɔɔ niŋ aa, ‘Masanɔ nuu cho yala hunɔɔ le.’+ 49 Okoŋ, mbo kandu chaaŋaa nduaa buɛiya lɔɔ, nduyɛ mbo luɛinuŋ diola ndɔ a kolɔɔ nda wanaa kolaa bɛnduaa latulu. 50 Buɛi koŋ, paale o ve niŋ masanɔ ndɔɔ kɔl te leŋ, a boondii o wa niŋ o puɛiyaŋ pɔli ve o cho ndu komal ni.+ 51 Okoŋ, mbo tusi ndu nyɛpalaa wɔɔŋ wɔɔŋndo choo, nduyɛ mbo viou ndu naa wanaa mulu muluaŋnda cho wa. Loŋ o wa niŋ koŋullo a chiŋndoŋ sɔmndo ni.+