Koloosiaŋnda

3 Te o yɔŋ pɛ maa nya Mɛlɛka miŋgi yoomu a Kiliti latulu ni,+ mɛɛ la landuŋ kɔl le nyɛm cho o choo choo niŋndoŋ, naa Kiliti cho ichali o ba kɛndɛ Mɛlɛkaa choo wa.+ 2 La handu kɔlta nyalaŋ o nyɛm cho o choo choo niŋndoŋ choo,+ kɛ o wa o nyɛm cho o lɛŋndeŋ choo woŋ choo le.+ 3 Kanifuule, la vi mi yoomu nyaa wa o viaŋaa Kiliti o ba. Nduyɛ hɛnaŋ Mɛlɛkaa cho koŋ ni. 4 Kiliti cho yoomu naa ni.+ Teleŋ o cho chɔɔmɔŋ ndo, nya bɛɛ cho chɔɔmɔŋ, okoŋ mi la luɛi o biilu ndɔɔ niŋ.+

5 Lelaŋ, la dii dialuŋ nyaŋ+ le yeemaŋ wɔɔŋ cho o lɛŋndeŋ choo woŋ. Muŋ cho ni, kaa ihini nɔɔlɛiyo,* sɔɔŋ nɔɔlɛiyoŋ, yeemɛi wɔɔŋ wɔɔŋnde le hiniei,+ yeemaŋ nɔɔlɛiyoŋ, a hɔlteŋ luɛiyɔɔ o nyɛm pilaŋ. Hɔlteŋ luɛiyɔɔ o nyɔɔŋ cho ko maa piɔmnda sooluuwo. 6 Mɛlɛka cho hunɔɔ tumbe dɔɔnɔŋ a wanaa cho sɔɔŋ muŋ tosaa wa. 7 Boondii nya wa maa nda ve, nya bɛɛ wa sɔɔŋ muŋ tosaa.+ 8 Kɛ suŋ suŋ niŋ, la nɔ mi la soli balaŋ po o sɔɔŋ muŋ niŋ: kɔl tuuwo, kɔl biŋgioo, dɛnɛ wɔɔŋndo,+ diomnda wɔɔŋndaŋ+ a sɔɔŋ nɔɔlɛiyoŋ dimioo.+ 9 La dimulaŋ choolaŋ te.+ La soliŋ wana chieeyɛi paanduei lekɔɔ+ a kaala ndɔlaŋ, 10 okoŋ mi la chuɛɛnuŋ wana chieeyɛi sɛnɛiye.+ Wana chieeyɛi sɛnɛiye hei toosiaŋ o velaŋ Mɛlɛkaa niŋ. Lelaŋ, mɛɛ nya hiau lachi a Mɛlɛka sinaa fau, lende koni nya simnuŋ a sɛnɛi ni.+ 11 O hei niŋ, Chuunɔ ni, Kilikiinɔ ni, wana sɔla hivi chiɛi kɔɔli, sɔla hivi chiɛi kɔɔli le, Sitiaŋnɔ* ni, chɛ ni, wana baŋaŋ ni, nya kpou nyɛpilɔɔ kpe nya cho o Chiisu Kiliti niŋ ni.+

12 Nya cho wanaa Mɛlɛka hɛli wa ni.+ La cho a diandaa ndu o hɔl, nduyɛ o kaala nya. Lelaŋ, la chuɛɛnuŋ nyiɛɛye,+ kɛndɛi, tusiŋndo,+ biuwɔŋndo,+ nduyɛ mi la wa mɔɔsɔlɔɔ.+ 13 La hiou lachi a biuwaŋndo vellaa velle, nduyɛ mi la malnaŋ haki fasɛi,+ o yɔŋ bɛɛ mi waŋndo benduŋ a num.+ Mɛɛ Chɛhowa* mal nya haki fasɛi yɛ, nya bɛɛ la nɔ mi la tosa lende.+ 14 Kɛ i hiou kpou ve, la chuɛɛnuŋ kaalaa,+ kanifuule ndu mɔɔsa waŋnda diompilɛ nyɛkɛndɛi ni.+

15 Maa kɔl nyulu Kiliti wo tosa wallo nya o lakɔl,+ kanifuule Mɛlɛka veelu nya le mi la wa dialle i pilɛ o kɔl nyuloo niŋ. Nduyɛ, la wa ndu balikaa mello lɔɔlɔɔ. 16 Maa pɛɛkula Kiliti laŋ la piɔ nya o lakɔl cha, nduyɛ mi la sɔla taasioo. La wa pɛɛkaŋndo a dɛɛniaŋndo vellaa velle o chondoŋ niŋ.+ La soli chondoŋ le Mɛlɛka saŋgalaa a ndu balikaa mello. La soli muŋ a kɔl nyaa kpou o Chɛhowa* lo.+ 17 Nyɛ o nyɛ nya wa pɛ dimioo ɔɔ tosaa, la tosa ndu o diola Masanɔɔ Chiisu laŋ niŋ. O nyɛ o nyɛ niŋ, la wa Mɛlɛka balikaa mello o Chiisu niŋ.+

18 Nya laanduaa, la tusiŋ piaandaa nyaa o ba bɛŋgu+ mɛɛ buɛiyaa Masanɔɔ nɔ ma tosa yɛ. 19 Nya piaanduaa, la hiou lachi a laandaa nyaa kaalaa,+ nduyɛ la wa ŋuasu ŋuasu a nda le.+ 20 Nya chuauwa, la diikuŋ wanaa velu nya wa o nyɛ o nyɛ niŋ.+ Kanifuule, hei nɛŋi Masanɔɔ kɔllo ni. 21 Nya finyaa, la wa chuauwaa nyaa biyɔɔ wɔɔŋndo le,+ yɔŋii nda tambu kɔl. 22 Nya chiaa, la diikuŋ wanaa nyaa banaa o nyɛ o nyɛ niŋ.+ O wa ko le waŋnda chieeya kɔllo nɛŋioo teleŋ nda wa o hɔlndɔ wo le, kɛ la tosa ndi a kɔllo kpou le mɛɛ nya nɔ siooŋnde le Chɛhowa* yɛ. 23 Nyɛ o nyɛ nya wa pɛ tosaa, la tosa ndu a kɔllo kpou le Chɛhowa,*+ kɛ o wa le wanachiee le. 24 Kanifuule, la sina maa Chɛhowa* o ba nya cho hunɔɔ fandaa sɔla ni maa nyɛm ŋkɛ.+ La wa chiaa le Masanɔɔ Kiliti. 25 Wana tosa pɛ suɛi wɔɔŋnde, o cho hunɔɔ paawaa* sɔla le suɛi wɔɔŋii o tosa keŋ nde.+ Kanifuule, Mɛlɛka cho wana hɛliaa le.+