Kɔliŋtiaŋ Tasoo

9 Baa o cho wana baŋaŋndo le ya cho le? O cho kiilanɔɔ le ya cho le? Baa I chi Masanɔ naa Chiisu le?+ O cho nya le cho tɔnɔ ya sɔla o wali Masanɔɔ niŋndo le? 2 O yɔŋ bɛɛ mi ve kiilanɔ le waŋnda a tuaa le, kɛ kiilanɔɔ kɛsɛ ya cho le nya ni! Nya cho tamasioo ni le chɔmndo maa kiilanɔɔ ya cho le Masanɔɔ ni.

3 Wanaa hɛɛnduu ya sɔɔŋ choo wa, nyɛ ya nɔ mi dimul nda wo cho hoo ni: 4 Baa ŋ nɔ di le miŋ de, nduyɛ miŋ kol te? 5 Baa I nɔ di le mi chua wana laalaŋndo o nɔɔ niŋ,+ nduyɛ mi wa balɔɔ a ndu mɛɛ kiilaa a tuaa, pɔmbuaa Masanɔɔ,+ a Sifaasi*+ tosa yɛ le? 6 Mɛɛ naa Banabaa koni+ nɔ ni miŋ wa wallo tosaa le nyɛ naŋ dia wo? 7 Wana chɔu kuɛɛ wa yɛ wali chɔuwo tosaa, mbo nuuviaa vɛlɛ nyɛdiaa le ndupila?+ Nɛɛnɛ tual lɛ kilepiiyaŋ, o di komɔɔ ndɔɔ le? Ɔɔ nɛɛnɛ wa yɛ chɔluaa mandaa, o kol mɛɛma ndaŋ ma tiŋ te?

8 Baa o yiyaŋ iwana chieeyaa niŋ ya cho sɔɔŋ muŋ dimioo ni? Baa Sawaa* bɛɛ dimi sɔɔŋ muŋ te? 9 I cho i poonyiaa o Sawala Mɛlɛka ke Muuse laŋ niŋ aa: “Te nau towaa wa num pɛ witiiyoŋ nɛilullo, yii ndu sondoo le.”+ Mbo wa maa le nauwa Mɛlɛka buulaŋ ni? 10 Baa o cho le naa kpeekpei le o dimi suɛi hei le? Le naa kpeekpei i poonyiaŋ ni, kanifuule wana cho waa wo nda wana cho niɔuwo wo, o kɛ kɛ nɔ mbo nɔ tiindaŋndo le nyɛ sɔla.

11 Te ŋ saŋ pɛ nyɛm fula Mɛlɛka o ba woŋ nya tɛɛŋ, baa o bɛnda miŋ sɔla nya nyɛm naŋ hauba woŋ o ba le?+ 12 Te wanaa cheleŋnda nɔ pɛ di le ma sɔla nya nyɔɔŋ o ba, mɛɛ ŋ nɔ dioo miŋ hiau nda poloŋ. Mi che bɛɛ ŋ nɔ di koŋ, kɛ ŋ nyuna nya le nyɛ o nyɛ le.+ Ŋ cho nyɛ o nyɛ biuwɔŋndo, le mi yooŋgu kɛndɛ cho a Kiliti okɔɔ wo hiou lachi a dimiŋndo.+ 13 La sina nuaa maa wanaa cho wallo tosaa o chiɛi Mɛlɛkaa wa, maa loŋ te nda sɔla nyɛdiaa ndaa le? Nduyɛ wanaa cho wallo lɔɔlɔɔ o bandu luamaa lasalaa wa bɛɛ, loŋ te nda sɔla nyɛdiaa ndaa le?+ 14 O nɛi pilɛ koŋ choo, Masanɔɔ dimi maa wanaa dimi yooŋgu kɛndɔɔ wa, o ndu dimioo niŋ nda sɔla nyɛm nda hauba woŋ ni.+

15 Kɛ le pilɛ bɛɛ I nyuna nya le nyɔɔŋ muŋ te.+ O cho le mi la tosal la sɔɔŋ muŋ te ya poonyial nya le. Kanifuule, o bɛnda mi vi mbo hiau chɛlɔɔ mi waŋndo tɛɛmbuu di ya nɔ le yoŋgaa kiolɔɔ o yooŋgu kɛndɔɔ dimioo niŋndo.+ 16 Nduyɛ te I wa pɛ waŋnda yooŋgu kɛndɔɔ dimullo, sabu o sabu cho mi kelu yoŋgaa le, kanifuule i cho ya kuee le mi tosa ndi. Lelaŋ, te I dimul waŋnda yooŋgu kɛndɔɔ le, nyɛpalaa cho le ya!+ 17 Te I tosa ndi pɛ a kɔllo kpou, I cho fandaa sɔla. Kɛ o yɔŋ bɛɛ mi wa ndi tosaa a ŋɔɔchiaŋndo, Mɛlɛka nɔ tiindaŋndo o ya niŋ le wallo hoo tosaa.+ 18 Yɛɛ cho yɛ fanda nuu? Fanda nuu cho ni, waŋnda yooŋgu kɛndɔɔ dimullo a paawa* nyɛ o nyɛ le. O nɛiyo hoo choo, te I wa pɛ yooŋgu kɛndɔɔ dimioo, I nɔla mi fafaŋ waŋnda nyunaa le nyɛm ya nɔ di mi nyuna le muŋ ndoŋ.

19 Mi che bɛɛ I sɔla baŋaŋndo, kɛ mi simnuŋ chiɔɔ le wana o wana, le halikpeŋ mi mala wanaa bɔɔbɔɔ ma simnuŋ wanaa laalaŋnda. 20 Mi simnuŋ maa Chuunɔ le halikpeŋ mi sɔla Chuuwa.+ Mi che bɛɛ I cho o sawa bɛŋgu le, kɛ mi simnuŋ maa wana cho o sawaa bɛŋgu wo, le halikpeŋ mi sɔla wanaa cho o sawaa bɛŋgu wa.+ 21 Mi che bɛɛ I cho o sawa Mɛlɛkaa a o sawa Kiliti wo bɛŋgu,+ kɛ mi simnuŋ maa wana cho o sawa bɛŋgu le wo, le halikpeŋ mi sɔla wanaa cho o sawa bɛŋgu le wa. 22 Mi simnuŋ maa wana dialuŋ vilɛi, le halikpeŋ mi sɔla wanaa vi dialloŋ nda.+ Mi simnuŋ mɛɛ waŋnda suu o suu cho yɛ, le halikpeŋ mi mala apum ma sɔla pioŋɔɔ. 23 Le sabu yooŋgu kɛndɔɔ ya cho sɔɔŋ muŋ kpou tosaa ni, le halikpeŋ mi dimul acheleŋnda ndu.+

24 La sina nuaa maa mi wanaa nyaanuŋ le fandaa sɔlaa wa kpou nyaanuŋ, kɛ wana pilɛ kpe le sɔla fandaa le? La nyaanuŋ le mi la sɔla fandaa.+ 25 Wana o wana wa pɛ nyaanɔŋ* waa nuaa, o nɔ mbo dɔu ndupila o mandaa bɛŋgu o nyɛ o nyɛ niŋ. Mi waŋnda haa tosa hei le fanda viu le wo sɔlaa.+ Kɛ naa, le fanda tembu le wo sɔlaa naŋ cho ndi tosaa ni.+ 26 Lelaŋ, o cho fondo fuu le ya cho nyaanɔŋndo le.+ Nduyɛ sɔŋga ya cho wo, o cho nuaa maa bɔtala fondolaŋ te ya cho wuuwo o hueiye niŋ te. 27 I dɔu dialuŋ nuŋ o mandaa bɛŋgu,*+ nduyɛ mi siiŋguu muŋ maa chɛ. Te I tosa lende le, mi che bɛɛ I cho acheleŋnda yooŋgu kɛndɔɔ dimullo, kɛ Mɛlɛka cho ya kɛɛ.