Hiou Lachi a Chiisu Tolɔɔ Kɔɔli te a Sɔla pɛ Yiŋɔɔ

1-2. Salala kuɛɛ waŋndo sɔla yɛ te o sɔla pɛ yiŋɔɔ?

I WA bɔɔ suɛi nyaale bɛndu te ŋ sɔla pɛ yiŋɔɔ, nduyɛ miŋ luɛi o yuŋgu Chɛhowaa niŋ. Wanaa sɔla dikeŋnaŋndo hoo wa cho chɛlɔɔ diomnda wana ŋchondoo Deeve dimilaŋ. Mbo dimi aa: “Wanaa ŋ hɛli, nduyɛ ma hiŋ a nda le ma huŋ wa o fonda num [diandaa] wa, a pɛl tɔnɔɔ.”—Sam 65:4.

² O cho wana o wana fee le Chɛhowa chɛl le mbo wa o yuŋgu ndɔɔ niŋ te. A mɛɛ naŋ pɛɛku o buŋgɛi hiou ve niŋ yɛ, mbo kɛɛsiaa le mbo naŋnuŋ wanaa chɔm kɛsɛ maa a yeema ma nɔ chaŋyɛi kpɛɛluŋnde a ndu wa o ibuŋ. (Chemi. 4:8) Te a yɔŋguŋ pɛ o Chɛhowa lo nduyɛ ma sɔla yiŋɔɔ, a cho ndu naŋnɔŋ ikɛi o nɛi teŋgeŋndo choo. Okoŋ kɔɔli, o cho ‘num dɔwɔɔ sala mbo hiou bɛɛ mɛɛ ŋ yeema yɛ.’—Mala. 3:10; Chɛlui. 17:​7, 8.

3. Kalaŋ yɛɛ Kilisiɔŋaa yɔŋguŋ o Chɛhowa lo, nduyɛ ma sɔla yiŋɔɔ wa nɔ yɛ? (Ikilisiaatii 5:​4, 5)

³ A tonya, te a yiŋ pɛ, mɛɛ kandɔɔ ko ŋ kandu koŋ wali ŋ tosa niŋ le Chɛhowa wo ni. Nduyɛ a nɔ kalaŋndo le nyɛ ŋ tiuba wo tosaa, le halikpeŋ ma lo o buŋgɛi ŋ chua ve choo, o yɔŋ bɛɛ ma wa o tɔɔndaŋndo bɛŋgu. (Nuawɔ Ikilisiaatii 5:​4, 5.) Le mɛɛ ŋ cho niŋ buɛi Chiisu wo yɛ, a cho tamasi ndɔɔ tolɔɔ kɔɔli, nduyɛ ma diikuŋ nɛila ndɔla chɔmaalaŋ kpou. (Maa. 28:​19, 20; 1 Pitɛ 2:21) Buŋgɛi hei cho num mala le keŋ tosaa.

HIOU LACHI A CHIISU TOLƆƆ KƆƆLI O YƆŊ BƐƐ MA WA O TƆƆNDAŊNDO BƐŊGU

4. O nɛi kuɛɛ choo buɛiyaa Chiisuaa chua yɛ “yɔm imɔnɔɔ”? (Luku 9:23)

⁴ Yiyaŋ nuaa maa te a sɔla yiŋɔɔ pɛ, yoomu numndo cho wa bɛɛŋ bɛɛŋ te. Nduyɛ pɛŋ, mi Chiisu dimi kpendekele maa, buɛiyaa nduaa cho “yɔm imɔnɔɔ” chua. Nduyɛ “lepaa o lepaa” a cho wa keŋ tosaa. (Nuawɔ Luku 9:23.) Baa dimioo Chiisu wa ni maa buɛiyaa nduaa cho wa o nyɛkindilaa bɛŋgu lepaa o lepaa? Sako. Kɛ dimioo o wa ni maa, o faŋaŋ o salala nda cho wa tueiyɔɔ yeela laŋ kɔɔli, simultaŋ la cho wa vɛlɛ nda komallo. Nduyɛ o simultaŋ ndaŋ tɛɛŋ, latiŋ la wɔu niŋ bɔɔ.—2 Timo. 3:12.

5. Yɛɛ Chiisu mɛi yɛ lediom le wanaa soliŋ niŋ sala wa kioo?

⁵ Naapum wanaa nya cho o yuŋgu pilɔɔ niŋnda simul num niŋ. Ɔɔ a soliŋ niŋ sala le kiɔɔ nyɛm kiɔɔŋ nuuviaa, nduyɛ ma kɛsi Masale Mɛlɛkaleŋ nyɛ tase o yoomu numndo niŋ. (Maa. 6:33) Te lende i cho ni, mɛɛ nɔ tiindaŋndo maa, Chɛhowa cho chɔɔ nyɛ o nyɛ ŋ cho tosaa le ndu. (Hibu. 6:10) Kɛlɛŋgaa, a che niŋ tonyaa o diomnda Chiisu dimilaŋ ndaŋ niŋ. Mbo dimi aa: “Wana o wana mɛi pɛ chiɛi ndɔɔ, ɔɔ pɔmbuaa nduaa, ɔɔ yemaa nduaa, ɔɔ kala ndɔ, ɔɔ finya ndɔ, ɔɔ chuauwaa nduaa, ɔɔ yondala ndɔlaŋ le mɛɛ o cho buɛi nuu a le sabu yooŋgu kɛndɔɔ yɛ, Mɛlɛka cho ndu hunɔɔ hendul lechoo hiouwɔɔ bɛmbɔɔ 100 o teleŋndo hoo niŋ. Okoŋ mbo sɔla chiɛilaŋ, bɛnduaa, pɔmbuaa, yemaa, kalla, finyaa, chuauwa, a yondolaŋ. A koŋ kpou, tɔɔndaŋndaŋ la cho ndu komal. Nduyɛ mbo huŋ sɔla yoomu fafɛɛŋndo o chilaŋ niŋ.” (Maki 10:​29, 30) Salala ŋ sɔla niŋndaŋ la hiou poloŋ a sala kɛ kɛ ŋ soliŋ niŋ.—Sam 37:4.

6. Te a yiŋ pɛ, le yɛɛ ŋ nɔ yɛ ma hiou lachi a “yeemaŋ ŋdialloŋ” chɔulabaa?

⁶ Te a yiŋ pɛ, a nɔ ma hiou lachi kɛ a “yeemaŋ ŋdialloŋ” chɔulabaa. (1 Chɔŋ 2:16) O faŋaŋ okoŋ kɔɔli, chua mama Adam ndo ŋ cho wɔ ni. Naapum, ma sinaŋ lepum mɛɛ kiilanɔɔ Pɔɔl ndoo sinaŋ yɛ. Mbo poonyiaa aa: “I nɔ kaalaa tau o kɔl nuu niŋ le sawa Mɛlɛkaa. Kɛ I saaluŋ maa sawa cheleŋ cho o dialuŋ nuŋ niŋ mbo wa chɔulabaa a sawa cho ya o kɔl lo. Nduyɛ mbo siiŋguu ya chiɔɔ le haki cho ya o dialloŋ niŋndo.” (Luomaŋ. 7:​22, 23) Naapum, ma tambu kɔl le mɛɛ ŋ nɔ ma chɔulaba yeemaŋ wɔɔŋndoŋ yɛ. Kɛ, yiyaŋndo o buŋgɛi ŋ chuel Chɛhowa teleŋ ŋ yɔŋguŋ o ndulo wo choo, mala num ma sɔla yoomuaŋ le ma chɔulaba tɔɔndaŋndaŋ. Buŋgɛi ŋ chua keŋ nde cho num vɛlɛ mala ma tosa yoomu numndo tɛtɛlɛ. Vɛɛ keŋ yɔŋnuŋ yɛ?

7. Vɛɛ yɔŋgɔŋndo o Chɛhowa lo mala yɛ num ma lo o laalaŋ numndo choo?

⁷ Mɛɛ ŋ yɔŋgu yoomu numndo o Chɛhowa lo, mi keŋ chɔm maa a cho lɛ le numpila le. Keŋ sim ni maa, ma kɛɛsiaa le yeemaŋ ŋdialloŋ fafaŋndo, nduyɛ a tuula tɛɛmbuu Chɛhowa kɔllo laŋ. (Maa. 16:24) Lelaŋ te a wa pɛ o tɔɔndaŋndo bɛŋgu, kɔndɔfili cho num biyɔɔ a nyɛ ŋ nɔ ma tosa wo le. A chii niŋ kɛɛsiaa le nyɔɔ opilɛ kpe tosaa. Ndu cho ni, loo o laalaŋ numndo choo o Chɛhowa lo. A cho isisi yi le Chɛhowa kɔllo nɛŋioo. O nɛi koŋ choo, a cho wa maa Choobu. Mi che bɛɛ mi tɔɔndaŋnda kala kalalaŋ la komal ndu, kɛ mbo dimi a dialuŋ fulaa aa: ‘Pesiŋ bɛɛ I feŋaŋ o pimbi ni simiaa choo le.’—Choobu 27:5.

8. Vɛɛ yiyaŋndo o piɛile ŋ yɔŋguŋ o Chɛhowa lo leŋ choo mala yɛ num ma fafaŋ tɔɔndaŋndo?

⁸ Te a yiyaŋ pɛ o piɛile ŋ yɔŋguŋ o Chɛhowa lo leŋ choo, a cho yoomuaŋ sɔla le ma fafaŋ tɔɔndaŋ kɛ kɛ komal num pɛ. Le tamaseliiyo, baa a wa niŋ pa i tɛsɛ tɛsɛi tosaa nya wana nya cho o nɔ niŋ te wo? Sako. A chii niŋ kɛɛsiaa le kiɔɔ keŋ tosaa. Te a chɛl mi yeemaŋ muŋ tɔlnuŋ num o kɔl te, keŋ cho num mala le muŋ fafaŋndo te ŋ chɛŋ pɛ. A cho fafaŋ kɔlaŋ ‘ba o ba wanaa dɛnɛwɔɔŋnda kuɛ pɛ.’—Pulɔ. 4:​14, 15.

9. Vɛɛ yiyaŋndo vɛlɛ o piɛile ŋ yɔŋguŋ o Chɛhowa lo leŋ choo, mala yɛ num ma kɛsi ndu wana tasoo o yoomu numndo niŋ?

⁹ Te o yɔŋ yɛ ma sɔla wali tosa a kue lɛ o bɔŋaŋndaŋ lɔɔlɔɔ le wo? A sina nyɛ ŋ nɔ ma tosa wo. Kanifuule, tuupa ma sɔla wali koŋ, a chii niŋ kɛɛsiaa le ma kɛɛ wali waa lende. Lelaŋ, a cho luɛiyɔɔ o tɔɔndaŋ bɛŋgu le wali koŋ chɛlɔɔ, okoŋ ma nuuviaa nɛilaŋ le Chɛhowa kɛsioo wana tasoo o yoomu numndo niŋ te. Te a yiyaŋ pɛ a mɛɛ Chiisu ndoo kɛɛsiaŋ o kɔl le Finya ndɔ kɔllo nɛŋioo yɛ okɔɔ, keŋ cho num mala le ma keleŋa kɛɛ nyɛ o nyɛ tɛɛmbuu Mɛlɛka numndo kɔllo.—Maa. 4:10; Chɔŋ 8:29.

10. Te a yiŋ pɛ, vɛɛ Chɛhowa mala yɛ num le ma hiou lachi a Chiisu tolɔɔ kɔɔli?

¹⁰ A tonya, mi nyɛkindilaa a tɔɔndaŋnda komal naalaŋ, la ke naa fondaa le chɔmndo maa, ŋ cho a bɛɛndiaŋ le hiouwɔɔ lachi a Chiisu tolɔɔ kɔɔli. Te a tosa keŋ pɛ, a cho nɔ tiindaŋndo kɛsɛ maa Chɛhowa cho num mala. Mi Baabuiyo dimi aa: “Mɛlɛka cho wana lo o lediom, nduyɛ o chɛl mi tɔɔndaŋ nya nɔla biunɔŋ te wo komal nya le. Kɛ te tɔɔndaŋndo komal nya pɛ, o cho nya nɛilaŋ chɔm le mi la nɔla ndu biunɔŋ.”—1 Kɔliŋ. 10:13.

VƐƐ Ŋ HIAU YƐ LACHI A CHIISU TOLƆƆ KƆƆLI?

11. Ɔɔ nɛi sɔviɔɔ opilɛ le hiouwɔɔ lachi a Chiisu tolɔɔ kɔɔli? (Tofa vɛlɛ fotueiyo.)

¹¹ Mi Chiisu piɛi Chɛhowa a kɔl ndɔɔ kpou. (Luku 6:12) Num bɛɛ te a yiŋ pɛ, nɛiyo opilɛ o ŋ hiau lachi a Chiisu tolɔɔ kɔɔli wo cho kpeleŋndo kɛsioo, le sɔɔŋ sɔɔŋguu num Chɛhowa ikɛiyoŋ tosaa ni. Mi Baabuiyo dimi aa: “Nɛi naŋ lo kɔlaŋ choo haaa mbo fuuluu a boondei heiyo, ŋ hiounuŋ lachi a kɔlaŋ o nɛi koŋ choo.” (Filipi. 3:16) Teleŋ o teleŋ, a cho wa sɔɔŋ yɔŋnaŋ puaapiliaa a ndepiliaa kɛɛsiaa le ma tosa tau o Chɛhowa piɛiyo niŋndoŋ tueiyɔɔ. Kɛlɛŋgaa puaapiliaa haa kuɛ niŋ o Sukuuwo le Wanaa Dimi Yooŋgu Kɛndɛ leMasaa Wa, ɔɔ a kuɛ niŋ naa yeemɛi cho tau wa. Te a kɛsi pɛ kpeleŋ waa nuaa, mɛɛ kindiŋ o nɛi o nɛi niŋ le ndu komallo. Wanaa Chɛhowaa nɔ yeemɛi le ma tosa tau o ndu piɛiyo niŋ. (Walta. 16:9) Kɛ te o wa yɛ maa a tiuba le keŋ tosaa suŋ suŋ te? Yiyaŋ nuaa maa puaapiliaa cho keŋ tosaa wa cho a sɔvɛ ma hiau num te. Suɛi kulle cho ni maa, a cho hiouwɔɔ lachi a biuwɔŋndo. (Maa. 10:22) Kɛsiŋ o kɔl maa, ma nɛŋi Chɛhowa kɔllo te a tosa pɛ nyɛ ŋ tiuba wo a mɛɛ ŋ tiuba le ndu tosaa yɛ. Te a sɔla yiŋɔɔ pɛ, nɛi sɔviɔɔ opilɛ o ŋ hiau lachi a Chiisu tolɔɔ kɔɔli wo cho koŋ ni.—Sam 26:1.

12-13. Yɛɛ ŋ nɔ yɛ ma tosa te sɛmbɛ numndo kandu pɛ tolɔɔ toolo? (1 Kɔliŋtiaŋ 9:​16, 17) (Tofa vɛlɛ kɔfoo hoo, “Hiou Lachi a Nyaanɔŋndo.”)

¹² Yɛɛ ŋ nɔ yɛ ma tosa, te a yiyaŋ pɛ maa piɛile numndeŋ o Chɛhowa lo le cho lɛ num fula o kɔl te, ɔɔ a tui lɛ yooŋgu kɛndɔɔ dimioo yeela maa paandu le? Nduyɛ, te o wa yɛ maa a tui lɛ diomndaŋ veeloo o Baabuiyo niŋ yeela maa paandu le? Te sɔɔŋ muŋ kandu pɛ num yɔŋnɔŋndo o yiŋɔɔ numndo kɔɔli, yiyaŋ nuaa maa Chɛhowa cho lɛ num nyina ndɔ diandaa ke le le. Le mɛɛ naŋ cho wanaa lahakiaa yɛ, lepum mi sɔɔŋ waa nuaa yɔŋnuŋ. Lelaŋ, te sɛmbɛ numndo kandu pɛ tolɔɔ toolo, yiyaŋ a tamasi kiilanɔɔ Pɔɔllo okɔɔ. Mi che bɛɛ o wa kindiŋndo le tamasi Chiisu wo tolɔɔ kɔɔli, kɛ ndoo sina maa teleŋndaŋ lapum, ndii ve bɛɛŋ bɛɛŋ le keŋ tosaa le. (Nuawɔ 1 Kɔliŋtiaŋ 9:​16, 17.) Mbo dimi aa: “Kɛ o yɔŋ bɛɛ mi wa ndi tosaa a ŋɔɔchiaŋndo, Mɛlɛka nɔ tiindaŋndo o ya niŋ le wallo hoo tosaa.” O dimi niŋ, mi Pɔɔl kɛɛsiaŋ o kɔl le hiouwɔɔ lachi a wali ndɔɔ tosaa, o yɔŋ bɛɛ mi ndoo nɔ iyeema a teleŋ koŋ te.

¹³ O nɛi pilɛ koŋ choo, chɛl mi kɛɛsiaala numndaŋ le tɔlnuŋ o mɛɛ ŋ cho sinaŋndo yɛ choo le. Kɛɛsiaŋ o kɔl le tosaa nyɛ cho sakpo wo, o yɔŋ bɛɛ ma nɔ iyeema le ndu tosa le. Te a hiou pɛ lachi a tosaa nyɛ cho sakpo wo, yiyaŋnda numndaŋ la cho siŋgaŋ te teleŋ tiŋ hiou pɛ. O hei niŋ fau, te a hiou pɛ lachi a sɔɔŋ ŋMɛlɛkayaŋ tosaa, keŋ cho num mala ma hiou lachi a Chiisu tolɔɔ kɔɔli. Nduyɛ hiouwɔɔ num lachioo cho wa maa kɔl dɛɛniaa le puaapiliaa a ndepiliaa numnda.—1 Tɛsa. 5:11.

‘YAASIAŊ NYƐKƐNDƐI . . . NDUYƐ MA MƐƐNDIAŊ KƆL NUMNDO’

14. Yɛɛ ŋ nɔ yɛ ma mɛɛndaŋ teleŋ o teleŋ, nduyɛ le yɛɛ? (2 Kɔliŋtiaŋ 13:5)

¹⁴ I cho suɛi sɔvɛ le ma hiou lachi a numpila mɛɛndaŋndo lɔɔlɔɔ te a yiŋ pɛ. (Nuawɔ 2 Kɔliŋtiaŋ 13:5.) Teleŋnda bɔɔbɔɔ, i wa bɔɔ suɛi sɔvɛ te a mɛɛndaŋ pɛ yoomu numndo a kaala numndaŋ, le sinaa te a cho pɛ piɛileŋ lɔɔlɔɔ, diomndaŋ veeloo o Baabuiyo niŋ a ndu pɛɛkoo, kɔlaŋ o bɔŋaŋndaŋ, vɛlɛ a yooŋgu kɛndɔɔ dimioo. Nuuviaa nɛila ŋ tuɛi sɔɔŋ muŋ tosaa yeela laŋ. Le tamaseliiyo, nyunaŋndɔ aa: ‘Baa mi tɛɛsial pa acheleŋnda tonyala kpeekpeila cho o Baabuiyo niŋndaŋ? Baa nyɛ cho pa o ya nɔ mi tosa le mi tuei yooŋgu kɛndɔɔ dimioo yeela tau wo? A yɛɛ okɔɔ kpeekpei ya piɛi yɛ? Nduyɛ, I chɔm pa maa I dɔu tiindaŋ nuu kpou o Chɛhowa niŋ? Baa mi kuɛ pa o bɔŋaŋndaŋ teleŋ o teleŋ? Vɛɛ ya tosa yɛ hiouwɔɔ lachioo le nilaŋ yaŋɔɔ o bɔŋaŋndaŋ?’

15-16. Yɛɛ ŋ pɛɛku yɛ o tamasi Lɔbɔti wo niŋ te o hiŋ pɛ a tɔɔndaŋndo fafaŋndo okɔɔ?

¹⁵ I wa bɔɔ suɛi sɔvɛ te a mɛɛndaŋ pɛ naa ŋ nɔ dialuŋ vilɛiyoŋ nda. Mi puaapilɛnɔ pilɛ diolaŋ Lɔbɔti chɔm suɛi nduɛi yɔŋnaŋnde a hei okɔɔ. Mbo dimi aa: “Mɛɛ ya hiŋ le fuuluuwo wɔsilaŋ bidiiŋ, mi sɔla wali yaa tosa palɛi itiŋ o lɔɔ tɛɛŋndo. Paale pilɛ mɛɛ naŋ mal wallo, mi chua naŋ tosa wallo latulu wo veelu ya o ndulo bɛɛ. Mbo dimi maa ŋ cho wa kpeele, nduyɛ ŋ cho teleŋ naa tueiyɔɔ yeela tau. O tasela ndɔ, mi yɔŋgu kafɛilaŋ. Kɛ o mɛɛlulaŋ kpɔŋ, mi kɛɛ nduyɛ mi tɛɛsial ndu le sabu ya kɛɛ wo.” Mi Lɔbɔti fafaŋ tɔɔndaŋndo, nduyɛ keŋ cho suɛi sɔvɛ. Teleŋ tiŋ okoŋ kɔɔli, mɛɛ o yiyaŋ a nyɛ yɔŋnuŋndo okɔɔ, mbo cha maa, ndoo nɔ mbo bii ndi o nɛi hiou bɛnda wo choo. Mbo dimi aa: “I keleŋa tɔɔndaŋ koŋ fafaŋ mɛɛ Choosɛ keleŋa lanɔɔ Pɔtifa fafaŋ yɛ le. (Chɛ. 39:​7-9) Nduyɛ pɛŋ, mi kɔndɔfillo bii ya le mɛɛ i wa ikala ya o ba le kiɔɔ yɛ. Mi suɛi yɔŋnaŋnde hei mala ya le mi che maa, yaa nɔ mi kindi chaŋyɛi nii a Chɛhowa poŋ.”

¹⁶ Naapum a cho tɔnɔɔ sɔla te a mɛɛndaŋ pɛ numpila nyɛkɛndɛi mɛɛ Lɔbɔti tosa yɛ. O yɔŋ bɛɛ ma nɔla tɔɔndaŋndo fafaŋndo, nyunaŋndɔ aa, ‘Vɛɛ kpɛ i chua yɛ ya teleŋndo o ba le mi kɛɛ?’ Te a che pɛ naa ŋ nɔ ma tosa hiouwɔɔ lachioo wa, pɛɛsa numpila le. Naŋ kɔl kanifuule, a saaluŋ naa ŋ nɔ dialuŋ vilɛiyoŋ nda. Piɛi o Chɛhowa lo a ndi okɔɔ, nduyɛ ma kindiŋ o nɛi o nɛi niŋ le sawala ndɔlaŋ diikɔŋndo.—Sam 139:​23, 24.

17. Vɛɛ suɛi yɔŋnaŋii Lɔbɔti ve ndii piiliaŋ yɛ diola Chɛhowalaŋ?

¹⁷ Nyɛ cheleŋ cho vɛlɛ o naŋ pɛɛku o tamasi Lɔbɔti wo niŋndo. Mbo hiau lachi a dimioo aa: “Mɛɛ ya kɛɛ veelu chua naŋ tosa koŋ wallo latulu wo, mbo dimulla aa, ‘A hiou tofaa.’ Mi nyuna ndu le mbo chɔm ya nyɛ ndoo yiyaŋndo. Mbo tɛɛsial la maa, chaaŋ ndɔ pilɛ wa paandu Sei Chɛhowaa wo dimul ndu ni maa, te feleŋgɔnɔ cho Chɛhowa piɛiyo wo sɔla pɛ fondaa le suɛi wɔɔŋnde tosaa sɔɔsɔɔ, mbo tosa ndi. Lelaŋ, mbo dimul ndu maa o cho keŋ tofa a ya le chɔɔ te tonyaa o dimi ni. Mi keŋ tosa mi naŋ kɔl tau, le mɛɛ ya ke diola Chɛhowalaŋ bɛɛleŋ yɛ.”

18. Yɛɛ ŋ kɛɛsiaŋ yɛ o kɔl le tosaa te a sɔla pɛ yiŋɔɔ? (Tofa vɛlɛ kɔfoo hoo, “Buŋgaŋ Yɛ Yɛŋ Ŋ Cho Tueiyɔɔ Yeela Woŋ.”)

¹⁸ Mɛɛ ŋ yɔŋguŋ o Chɛhowa lo nduyɛ ma sɔla yiŋɔɔ, ma kɛɛsiaŋ o kɔl maa, a yeema ma dindi diola ndɔlaŋ mɛɛ mɛɛ sɔɔŋ wa. Nduyɛ a sina maa, mi Chɛhowa che simultaŋ a tɔɔndaŋnda ŋ cho fafaŋndo laŋ. O cho num dɔwɔɔ sala le mɛɛ ŋ cho loo o laalaŋ numndo choo yɛ. Nɔ tiindaŋndo maa, a mala nyina ndɔ diandaa, o cho num yoomuaŋ luei le keŋ tosaa. (Luku 11:​11-13) A tonya, sanaa a mala ndɔɔ, a tiuba ma hiou lachi a Chiisu tolɔɔ kɔɔli te a yiŋ pɛ.