Kɔliŋtiaŋ Tasoo

15 Puaapiliaa, la loonuŋ a yooŋgu kɛndɛ ya dimul nya+ mi la chɛl ndu, nduyɛ mi la sim yi le ndu wo. 2 Te la hiou pɛ lachi a yooŋgu kɛndɛ ya dimul nya wo saa kpiŋ, la cho hunɔɔ pioŋɔɔ sɔla. Kɛ te o cho lende le, mɛɛ laalaŋ nyaa cho simnɔŋ nyɛ fondoo fuu.

3 Suɛi sɔvɛ bɛndu ya pɛɛku ve, ndi ya pɛɛku nya ni. Ndi cho ni maa mi Kiliti sɔla piɔmndo le hakila naalaŋ a mɛɛ Yau Mɛlɛkaa dimi yɛ.+ 4 Ma kumbu ndu,+ nduyɛ mbo miiŋgu yoomu+ o paale yaa ndɔleŋ choo+ a mɛɛ Yau Mɛlɛkaa dimi yɛ.+ 5 Mbo fula Sifaasi* o hɔl.+ Okoŋ kɔɔli, mbo fula kiilaa 12 nda o hɔl.+ 6 Mbo fula vɛlɛ puaapiliaa hiouwɔɔ 500 o hɔl a teleŋ pilɔɔ kpe.+ Mi che bɛɛ apum vi niŋ, kɛ a bɔɔbɔɔ cho wɔ naa tɛɛŋ. 7 Okoŋ mbo fula Chemisi o hɔl,+ nduyɛ mbo fula vɛlɛ kiilaa kpou o hɔl.+ 8 O mɛɛlulaŋ kpɔŋ, ya bɛɛ mbo fula ya o hɔl,+ ya cho hoo maa chɛlɛkpɛ nda velu teleŋ ndɔɔ ndoo fuuluu wɔ le wo.

9 O kiilaa tɛɛŋ kpou, ya cho o sɔvɛ tau le ni. I cho bɛɛ o sɔvɛ le ya veeloo aa kiilanɔɔ le, kanifuule I wa kunda wanaa Mɛlɛkaa nyɛpalaa tusioo choo.+ 10 Kɛ kɛndɛi bɛnduii Mɛlɛkɛi tosa ni mi wa hau nuaa. Nduyɛ kɛndɛi o tosal la ve, i ve fondo fuu le. Ya hiou nda kpou wallo tosa. I tosa hei a kpaaya ni le, kɛ a kɛndɛi bɛnduii Mɛlɛka tosal la ve. 11 Lelaŋ, o wa ya ɔɔ nda dimul nya yooŋgu kɛndɔɔ ni, yooŋgu pilɔɔ kpe naŋ cho dimioo ni. Nduyɛ ndu nya laalaŋ ni.

12 Te ŋ dimul nya pɛ yooŋgu kɛndɔɔ maa mi Kiliti miiŋgu yoomu,+ vɛ mi waŋnda apum nya tɛɛŋ wa dimioo maa wanaa vi wa cho miiŋgu yoomu le? 13 Te wanaa vi wa cho miiŋgu yoomu le, mɛɛ Kiliti bɛɛ miiŋgu yoomu le. 14 Nduyɛ te Kiliti ndoo miiŋgu yoomu le, mɛɛ nyɛ fondoo fuu yooŋgu kɛndɛ naŋ cho dimioo wo, a laalaŋ nyaa cho ni. 15 Te o wa yɛ pɛ lende, mɛɛ choolaŋ naŋ dimi a Mɛlɛka okɔɔ ni,+ kanifuule ŋ dimi maa Mɛlɛka miŋgi Kiliti yoomu.+ Nduyɛ te ndoo miŋgi ndu yoomu le, mɛɛ wanaa vi wa cho miiŋgu yoomu le. 16 Kanifuule, te wanaa vi wa cho miiŋgu yoomu le, mɛɛ Kiliti bɛɛ miiŋgu yoomu le. 17 Te Kiliti ndoo miiŋgu yoomu le, mɛɛ nyɛ fondoo fuu laalaŋ nyaa cho ni, nduyɛ maa la cho wɔ o hakila nyalaŋ niŋ.+ 18 Mɛɛ wanaa wa diompilɛ a Kiliti ma wu wa bɛɛ sɔla piɔm fafɛɛŋndo.+ 19 Te le yoomoo hoo kinɛi naŋ tiindaŋ o Kiliti niŋ ni, mɛɛ naa mɔnɛi hiau niŋ biyɔɔ a wana o wana.

20 Kɛ ŋ sina maa Kiliti miiŋgu yoomu. Nduyɛ ndu cho wana tase Mɛlɛka miŋgi yoomu wanaa vi wa tɛɛŋ ni.+ 21 Wana pilɛ tosa ni mi piɔmndo huŋ.+ Nduyɛ wana pilɛ cho vɛlɛ tosa ni mi wanaa vi wa miiŋgu yoomu.+ 22 Mɛɛ Adam tosa mi waŋnda kpou wa wuoo yɛ,+ lende koni Kiliti bɛɛ cho tosa ni mi waŋnda kpou miiŋgu yoomu.+ 23 Kɛ wana o wana cho miiŋgu yoomu o lepula. Kɔmnde taseleŋ fɛlɛŋ, Kiliti.+ Okoŋ kɔɔli, wanaa cho le Kiliti wa cho miiŋgu yoomu a boondii o cho wa nanuŋ nde.+ 24 O mɛɛlulaŋ, te o chii pɛ masɛi a kpaayalaŋ kpou tɛɛmbuu, o chua niko Masaleŋ o miŋgi Mɛlɛka Finya ndɔ o ba.+ 25 O cho wa o masaleŋ choo haaa mi Mɛlɛka kɛsi yaamɔɔwaa nduaa o peluŋ ndɔŋ bɛŋgu.+ 26 Nduyɛ yaamɔɔnɔ o mɛɛlu niŋ tɛɛmbuu kpɔŋ ndo cho piɔmndo ni.+ 27 Kanifuule, Mɛlɛka “kɛsi nyɛ o nyɛ o peluŋ ndɔŋ bɛŋgu.”+ Kɛ koŋ chɔm nuaa maa wana ‘kɛsi ndu nyɛ o nyɛ o peloŋ bɛŋgu’ wo+ bɛɛ cho ndu o ba bɛŋgu le.+ 28 Kɛ te Mɛlɛka tosa pɛ mi nyɛ o nyɛ wa Po ndɔɔ o ba bɛŋgu, Po ndɔɔ bɛɛ cho tusiŋ ndu o ba bɛŋgu. Okoŋ, Mɛlɛka tosa mi nyɛ o nyɛ wa ndu o ba bɛŋgu wo+ cho wa niko bolleŋ le nyɛ o nyɛ.+

29 Lelaŋ, yɛɛnɛ wanaa cho yiŋɔɔ le piɔmndo sɔlaa wa cho yɛ tosa?+ Te wanaa vi wa miiŋgu niŋ yoomu kposoŋ te, mɛɛ le yɛɛnɛ nda yiŋ yɛ nda le piɔmndo sɔlaa? 30 Mɛɛ le yɛɛnɛ naŋ luei yɛ yoomula naalaŋ teleŋ o teleŋ o kpundɔɔ niŋ?+ 31 Puaapiliaa, lepaa o lepaa piɔmndo cho ya bindu binduuwo, le mɛɛ ya cho yoŋgaa kiolɔɔ a nya okɔɔ o Masanɔ naa Chiisu Kiliti niŋ yɛ. 32 Te I sɔŋga pɛ a visiaa yonduaa o Ɛfisɔɔ niŋ maa wanaa cheleŋnda,+ tɔnɔ yɛɛnɛ ya sɔla yɛ o keŋ niŋ? Te wanaa vi wa cho miiŋgu yoomu le, “mɛɛ ŋ dioŋnuŋ, miŋ kolnuŋ, kanifuule siɔdii ŋ nɔ le piɔmndo sɔlaa.”+ 33 La hui nyapila le. Chaŋyaŋ wɔɔŋndoŋ tɛɛmbuu kaala kɛndɛlaŋ.+ 34 La hiau lɛ lachi a hakioo tosaa le. La tosa nyɛ cho sakpo wo, kanifuule apum nya tɛɛŋ a sina Mɛlɛka kpeekpei le. Le mi siɔmbulaŋ la bii nya ya cho hei dimioo ni.

35 Mi wana pum nyuna dɔɔ aa: “Vɛɛ wanaa vi wa cho yɛ miiŋgu yoomu? A dialuŋ suu kuɛɛ nda cho yɛ miiŋgu yoomu?”+ 36 Wana waa nuaa kendu isɔɔ bila biyɔɔ! Te wana tɔl pɛ kulle, mɛɛ mi kulii keŋ vi fɛlɛŋ malaŋ i wul. 37 Te wana wa pɛ tɔlɔɔ nɔ kululaŋ ndo tɔlɔɔ, o wa kulu ŋwitii ɔɔ kulu tɔlɔɔ cheleŋ, kulle wana tual ni, o cho tɔlɔɔ pila le. 38 Kɛ Mɛlɛka tosa ni mbo hindu mɛɛ o yeema yɛ, nduyɛ mbo tosa mi kulu o kulu yɔŋgu tɔlɔɔ o ndɔɔ yɛ. 39 Nyɛ o nyɛ cho nyɛ yoomaa, a nɔ dialuŋ pilɛ le. Dialuŋ waŋnda chieeya cho yɛ, dialuŋ visiaa cho yɛ, dialuŋ youwa cho yɛ, nduyɛ dialuŋ suuwa cho yɛ. 40 Nyɔɔŋ o choo choo niŋ+ a muŋ o lɛŋndeŋ choo cho nyɛ pilɛ le.+ Nduyɛ nyɔɔŋ o choo choo niŋ nɔ naŋɔɔ o ndɔɔ, mi muŋ o lɛŋndeŋ choo nɔ naŋɔɔ o ndɔɔ. 41 Paaleŋ le nɔ diondɔɔ yɛ, paŋgei nɔ diondɔɔ yɛ,+ looŋ bɛɛ nɔ diondɔɔ yɛ. Nduyɛ luei kɛ kɛ nɔ diondɔɔ yɛ.

42 Lende i cho wa a wanaa cho miiŋgu yoomu wa ni. Te a kumbu dialuŋ vilɛiyoŋ pɛ, ŋ sɛ. Kɛ te ŋ miiŋgu yoomu pɛ, ŋ se lɛ le.+ 43 Te a kumbu pɛ muŋ ŋ nɔ lebɛɛ le. Kɛ te ŋ miiŋgu pɛ yoomu, miŋ nɔ bɛɛleŋ.+ Te a kumbu muŋ pɛ, ŋ nɔ kpaaya le, kɛ te ŋ miiŋgu yoomu pɛ miŋ nɔ kpaayaa.+ 44 Dialuŋ iwana chieeyaŋ nda kumbu ni, kɛ dialuŋ inyinayaŋ miiŋgu yoomu ni. Te dialuŋ iwana chieeyaŋ wa pɛ, mɛɛ dialuŋ inyinayaŋ bɛɛ cho. 45 I cho i poonyiaa aa: “Mi wana pɔnɔ tasoo Adam, simnuŋ wanachiee yoomaa.”+ Mi Adam mɛɛlaa simnuŋ nyina yɔŋgu yoomoo wo.+ 46 Kɛ o cho dialuŋ inyinayaŋ fɛlɛŋ te hiŋ te. Dialuŋ iwana chieeyaŋ fɛlɛŋ hiŋ, okoŋ kɔɔli mi dialuŋ inyinayaŋ huŋ. 47 O lɛŋndeŋ choo wana pɔnɔ tasoo fula ni, nduyɛ a puuloo Mɛlɛka toosiaa ndu ni.+ Wana pɔnɔ diiŋ ndɔɔ ndu, o choo choo niŋ o fula ni.+ 48 Mɛɛ wana Mɛlɛka toosiaa a puuloo wo cho yɛ, lende waŋnda o chieeŋndo niŋ cho ni. Nduyɛ mɛɛ wana fula o choo choo niŋndo cho yɛ, lende wanaa cho o choo choo niŋnda cho ni.+ 49 Mɛɛ naŋ velaŋ a wana Mɛlɛka toosiaa a puuloo wo yɛ,+ lende koni naŋ velaŋ a wana fula o choo choo niŋndo ni.+

50 Kɛ mi dimul nya, puaapiliaa niaa, dialloŋ a koowaŋ ma luei o Masale Mɛlɛkaleŋ niŋ te, kɛlɛŋgaa niŋ te mi dialuŋ sia woŋ sɔla yoomu se le wo. 51 I cho nya suɛi viaŋnaŋnde dimul. O cho naa kpou le cho wu le. Kɛ Mɛlɛka cho naa kpou siŋga+ 52 o teleŋ biŋgi bɛŋgu. Te bulu mɛɛlaa soo pɛ, Mɛlɛka cho naa siŋga o biɔŋɔɔ le pilɛ bɛŋgu.+ Okoŋ wanaa vi wa cho miiŋgu yoomu a dialuŋ se le woŋ. 53 Kanifuule mɛɛ mi dialuŋ sia woŋ simnuŋ dialuŋ se le woŋ,+ nduyɛ mi dialuŋ wu woŋ simnuŋ dialuŋ vi le woŋ.+ 54 Kɛ te dialuŋ sia woŋ simnuŋ pɛ dialuŋ se le woŋ, nduyɛ mi dialuŋ wu woŋ simnuŋ dialuŋ vi le woŋ, okoŋ nyɛ dimiŋ hoo wo peeluŋ. Ndu cho ni: “O mel piɔmndo le fɛɛŋ a fɛɛŋ.”+ 55 “Piɔmndo, ɔɔ kpaaya numndo? Piɔmndo, ɔɔ kefii numnde?”+ 56 Kefii piɔmndo cho hakioo ni,+ nduyɛ kpaaya hakioo cho Sawaa ni.*+ 57 Kɛ ŋ mel Mɛlɛka balika. Kanifuule, o ke naa kpaayaa piɔmndo choo, o sabu Masanɔ naa Chiisu Kiliti wo niŋ.+

58 Lelaŋ chaaŋaa niaa kaalaa, la sim nyɛkɛndɛ yi,+ la kpeŋaŋ te. La hiou lachi a tosaa tau+ o wali Masanɔɔ niŋ. Nduyɛ la sina pɛŋgu maa, saŋga nya cho o wali Masanɔɔ niŋndo cho fondo fuu le.+