Hibuluiya

11 Laalaŋndo cho ni, sinaa o kɔl numndo niŋ maa a tonya, a cho nyɛ ŋ cho lehɔl o nɛi le ndu wo sɔla.+ Nyɛm naŋ chi wɔ kposoŋ te woŋ, sinaa o kɔllo niŋ kɛsɛ maa ŋ cho. 2 Laalaŋ waa nuaa tosa ni mi Mɛlɛka chɔm waŋnda o sindɔɔ niŋ maa o hini kɔl a nda.

3 Laalaŋndo tosa ni miŋ sina maa a diom fula Mɛlɛka o sondo wo o toosiaa nyɛm yɛ yiɔɔŋ o chieeŋndo choo ni. O hei niŋ, mi Mɛlɛka soliŋ nyɛm naŋ chi le woŋ kpeku, le nyɛm naŋ cha woŋ toosiaa.

4 Laalaŋndo tosa ni mi sala Ebɛl soli o Mɛlɛka lo wo wa o sɔvɛ mbo hiau o Keŋ ndo.+ Le laalaŋ ndɔɔ hoo, mi Mɛlɛka chɔm ndu maa o cho wana sakpo, nduyɛ maa o hini kɔl a sala ndɔɔ.+ Mi che bɛɛ Ebɛl vi niŋ, kɛ laalaŋ ndɔɔ cho wɔ naa hau pɛɛkoo.+

5 Laalaŋndo tosa ni mi Mɛlɛka faŋa Inɔki.+ Le hei o saŋga teleŋ o wa piɔmndo wo le. Nduyɛ wana o wana seeluŋ ndu ba o ba le, kanifuule Mɛlɛka faŋa ndu ni.+ Kɛ tuupa mi Mɛlɛka faŋa ndu, mbo chɔm ndu maa o hini kɔl a ndu. 6 Nduyɛ pɛŋ, te waŋndo nɔ laalaŋndo le, o nɔla mbo nɛŋi Mɛlɛka kɔl te. Le mi waŋndo sɔɔŋguu Mɛlɛka ikɛi, mɛɛ mbo laalaŋ fɛlɛŋ maa Mɛlɛka cho kpeekpei, nduyɛ maa mbo fanda wanaa cho ndu nuuviaa a kɔllo kpou wa.+

7 Laalaŋndo tosa ni mi Nuuwa+ nɔ siooŋii Mɛlɛkɛi mɛɛ o dimul ndu a sɔɔŋ nɔ le yɔŋnɔŋndo woŋ okɔɔ, mi che bɛɛ ndoo chi wɔ muŋ te.+ Nduyɛ mbo taŋgul dɛndɛ bɛndoo le yuŋgu ndɔɔ chiindiaa.+ Mi laalaŋ Nuuwa wo chɔm maa chieeŋndo ndoo nɔ le tambei sɔlaa.+ Le laalaŋ ndɔɔ, mi Mɛlɛka chua ndu maa wana sakpoo o cho ni.

8 Laalaŋndo tosa ni mi Ebilaham+ tuɛi Mɛlɛka diom, mɛɛ o dimul ndu le kɔlaŋ o fondaŋ o chua buŋgɛi le ndu kioo wo. Mi che bɛɛ ndoo sina naa ndoo nɔ le kɔlaŋ nda le, kɛ mbo kua.+ 9 Laalaŋndo tosa ni mbo kɔ chal o lɛŋnde Mɛlɛka chuel ndu buŋgɛi leŋ niŋ maa mial.+ O tɛndiilaŋ niŋ+ ndoo lɔl ni nda Aase a Chekɔpu waa. Nda bɛɛ mi Mɛlɛka chuel nda buŋgɛi pilɛi keŋ kpe.+ 10 O wa chumndo le chiee nɔ chiyii kpeekpeiye wo, o Mɛlɛka tuu nduyɛ mbo taŋgullo.+

11 Laalaŋndo tosa vɛlɛ ni mi Sela sɔla kpaayaa le poo violɔɔ, mi che bɛɛ ndoo hiou niŋ teleŋ vialaa.+ Kanifuule ndoo laalaŋ maa wana chuel ndu buŋgɛiyo cho wana lo o lediom. 12 Le saboo hoo, mi Ebilaham vialu chuauwa+ mi che bɛɛ o wa niŋ o yuwɛi kudɛɛ.+ Mbo vialu chuauwa faŋga bɛndoo mɛɛ looŋ o choo choo niŋ cho yɛ, nduyɛ mɛɛ siooŋnde cho o pee mɛŋma ihɛllo kɔŋgɔ, i chuu chɔm te yɛ.+

13 Nda kpou lo o laalaŋ ndaa choo haaa ma wu. Mi che bɛɛ o chilaŋ niŋ pɔ+ sɔɔŋ kalaŋ muŋ nɔ le yɔŋnɔŋndo ni, kɛ le nda, ma cha maa ŋ chuu niŋ yɔŋnɔŋ.+ Le hei ma naŋ kɔl, nduyɛ ma dimul waŋnda kpendekele maa mialla nda wa o lɛŋnde leŋ niŋ ni. 14 Te waŋnda soo pɛ lende, mɛɛ chɔmndo nda cho koŋ kpendekele ni maa, a cho fondaŋndo o ndaa nuuviaa. 15 Te ndaa wa pɛ yiyaŋndo a fonda nda fula wo okɔɔ,+ a wa nɛilaŋ nuuviaa le miiŋgɔŋndo loŋ. 16 Kɛ o fondaŋ hiou naŋɔɔ wo kɔltaŋ la cho nda ni. Koŋ cho ni, fondaŋ cho fula o choo choo niŋndo. Lelaŋ, siɔmbula bii Mɛlɛka le mbo sɔla veeloo aa Mɛlɛka ndaa le,+ kanifuule o bɛɛndiaa chioo le nda.+

17 Mɛɛ Mɛlɛka tɔɔndaŋ Ebilaham+ le Aase po ndɔ salaa solioo, laalaŋndo tosa ni mbo huŋ le ndu salaa solioo. Po ndɔ pilɔɔ hoo kpe, o Mɛlɛka chuel ndu hoo buŋgɛi mbo naŋ kɔl lo ndoo yeema salaa solioo ni.+ 18 Mi Mɛlɛka dimul Ebilaham aa: “O Aase niŋ sanaa chuauwaa numnda* cho fula ni.”+ 19 Kɛ mbo laalaŋ maa Mɛlɛka nɔla mbo miŋgi po ndɔɔ yoomu. Nduyɛ lekɛndɛi mbo miŋgi ndu yoomu, le chɔmndo nyɛ ndoo nɔ le yɔŋnɔŋndo o chilaŋ niŋndo.+

20 Laalaŋndo tosa vɛlɛ ni mi Aase duau Chekɔpu+ nda Iisɔ+ sala, mbo chɔm nda nyɛ wa yɔŋnɔŋ o chilaŋ niŋndo.

21 Mɛɛ Chekɔpu wa niŋ tendu piɔm,+ laalaŋndo tosa ni mbo duau puaa Choosɛ wa sala.+ Okoŋ, mbo tiindaŋ o tinda ndɔɔ choo mbo piɛi Mɛlɛka.+

22 Laalaŋndo tosa ni, mɛɛ Choosɛ wa niŋ o mɛɛlula yoomu ndɔɔ, mbo suaa a fula Isɔluɛiya o Ichipi niŋ okɔɔ. Nduyɛ mbo dimul nda le ma kuɛ a paala ndɔlaŋ o ba.+

23 Laalaŋndo tosa ni mi wanaa velu Muuse wa viaŋ ndu le paŋgoŋ ŋgaa o violɔŋ ndɔɔ kɔɔli.+ Mɛɛ nda che mɛɛ chɛlɛkpɔɔ ndoo naŋ yɛ,+ siooŋii ve nda le sawa masaa ndoo dɔu wo le.+ 24 Mɛɛ Muuse sul,+ laalaŋndo tosa ni mbo kɛɛ le ma veelu ndu aa po mama Feloo wo.*+ 25 Mbo chɛl le saŋgaa a wanaa Mɛlɛkaa latulu, mbo hiau yelelaŋ haki nɛi mɛɛlu le wo tueiyɔɔ yeela. 26 Mbo cha maa saŋgaa sɔlaa maa Kiliti* hiou bɛnda a sultaŋ Ichipi. Nduyɛ hɔlteŋ le wa ndu o nɛi le fanda wa ndu lachi wo. 27 Laalaŋndo tosa ni mi Muuse faŋaŋ Ichipi+ siooŋii ve ndu le tumbe masaa le.+ Mi Muuse hiau lachi a biuwɔŋndo. I wa ko maa o wa chɔɔ Mɛlɛka wana nɔla ma che le wo.+ 28 Laalaŋndo tosa ni mbo bii Bɔŋaŋ Hiouwɔɔ Choo Wo, nduyɛ mbo dimul Isɔluɛiya le ma suu kooma visiaa o diola ndalaŋ, yɔŋii maalikɛinɔɔ ndoo diu puaa ndaa tasiaa.+

29 Laalaŋndo tosa ni ma taŋ Pee Siaŋa Mɛŋma Ihɛllo mɛɛ wana wa nuaa kɔlaŋ o lɛŋnde vesɛileŋ choo yɛ.+ Kɛ mɛɛ waŋnda Ichipi tol nda kɔɔli le taŋɔɔ, mi nda kpou lo o peelo.+

30 Laalaŋndo tosa ni, mɛɛ Isɔluɛiya balu kpakioo Chɛluiko le palɛi i ŋɔmmɛu, mbo komba wɔlɔ wɔlɔ.+ 31 Laalaŋndo tosa ni, Luehabi chua suundɛiyo sɔla tambei a wanaa kɛɛ Mɛlɛka diomnda latulu le. Kanifuule, mɛɛ suaŋsuaŋnda hiŋ naa ndu chua, mbo bii nda nyɛkɛndɛi.+

32 I nɔ teleŋ bɔɔ le mi hiou lachi a nda chɔmndo le. Mɛɛ Kidiɔŋ,+ Baluaki,+ Samsiŋ,+ Chɛfita,+ Deeve,+ Saamiɛɛ,+ a wanaa ndaa suaa le Mɛlɛka wa cho nuaa yɛ. 33 Laalaŋndo tosa ni ma yam masɛi a chɔulaŋ,+ ma tosa sɔɔŋ cho sakpo woŋ, mi Mɛlɛka chuel nda buŋgaŋ,+ ma kinda kpɔkuŋnda* sondolaŋ,+ 34 ma nyumi yiŋnde bɛnduleŋ,+ ma hialuŋ muɛi chɔu ve.+ Laalaŋndo tosa ni ma sɔla yoomuaŋ mi che bɛɛ ndaa nɔ mayoomu le.+ Ma simnuŋ wanaa chɔuwaa dialuŋ kala,+ ma tuau wanaa chɔuwaa wa nda hinullo wa.+ 35 Waŋ laanduaa apum, mi wanaa ndaa kaalaa vi wa miiŋgu yoomu.*+ Kɛ puaa apum, ma tusi nda nyɛpalaa choo, le mɛɛ nda kɛɛ le mi nyɛ cheleŋ baŋa nda yɛ, le halikpeŋ ma sɔla yoomu sɔviɔɔ te a miiŋgu pɛ yoomu. 36 Apum ma mam nda, ma luaa nda. Ma duau apum o yɔlɔŋ,+ ma wou nda o chiɛila manyumndaŋ niŋ.+ 37 Ma vii vii apum a poutaŋ,+ apum ma kilul nda yamɛi. Apum ma kialu nda tɛɛŋ kpali. Ma diu diu apum a mɔɔŋ.+ Haa wa heeloo a tuusoo a yaula saa lekɔɔ, apum a yaula chuiŋnda lekɔɔ.+ A wa o pɛŋndeŋ niŋ, o nyɛpalaa niŋ,+ nduyɛ ma bii nda biyɔɔ wɔɔŋndo.+ 38 Ndoo bɛnda mi wanaa sɔviaa haa ndaa wa o chieeŋ waa nuaa niŋ te. Haa wa keiyo viŋi viŋiŋndo o pollo niŋ, o pemboŋ tɛɛŋ, o kpoloŋndaŋ niŋ, a o buululaŋ niŋ.+

39 Waŋnda haa kpou, laalaŋndo tosa ni mi Mɛlɛka hini kɔl a nda, mi che bɛɛ a chi buŋgɛi Mɛlɛka chuel nda ve o peelɔŋndo le. 40 Kanifuule, Mɛlɛka ndoo chii niŋ chɔ o chilaŋ niŋ nyɛ hiou bɛnda le naa wo,+ le halikpeŋ a simnuŋ wanaa walaŋnda naa tase le.