Tɛsaloniaŋ Tasoo
4 Puaapiliaa, a mɛɛ naŋ pɛɛku nya yɛ, la cho yoomula nyalaŋ biyɔɔ o nɛi nɛŋi Mɛlɛka kɔllo wo choo.+ Lelaŋ, ŋ cho nya nyɔɔloo o diola Masanɔɔ Chiisu laŋ niŋ maa, la hiou lachi a ndi tosaa mbo hiou maa paandu. 2 Kanifuule, la sina silala Masanɔɔ Chiisu ke naa le nya silaa laŋ.
3 Hɛnaŋ Mɛlɛkaa cho ni maa la wa a diandaa,+ nduyɛ la wou laba o kaa ihini nɔɔlɛiyo* niŋ te.+ 4 Wana o wana nɔ mbo sina mɛɛ o duau dialuŋ ndɔŋ o mandaa bɛŋgu+ miŋ wa ŋ diandaa,+ nduyɛ mbo keŋnuŋ bɛɛleŋ yɛ. 5 Yeemɛi hiniei nɔ mi i hiou nya o kɔl kɔɔli+ maa wanaa sina Mɛlɛka le wa le.+ 6 Wana o wana hiau kpeleŋndo, okoŋ mbo tosal puaapilɛnɔ ndɔɔ suɛi wɔɔŋnde o hei niŋ te. Kanifuule, a mɛɛ naŋ dimul nya niŋ paandu, nduyɛ miŋ sila nya o kala kala yɛ, Chɛhowa* cho hunɔɔ wanaa tosa sɔɔŋ waa nuaa wa nyɛpalaa tusi choo. 7 Mɛlɛka veelu naa le miŋ wa a diandaa, kɛ o cho le miŋ wa a nɔɔlɛi le.+ 8 Lelaŋ, wana o wana kɛɛ pɛ pɛɛkoo hoo, o cho wanachiee le o kɛɛ diom te, kɛ Mɛlɛka+ yɔŋgu nya nyina ndɔ diandaa wo o kɛɛ diom ni.+
9 A puaapiliaa nyaa kaalaa okɔɔ ndu,+ o cho nyɛ naŋ nɔ miŋ poonyial nya le, kanifuule la sɔla niŋ pɛɛkoo Mɛlɛka pila o ba le kaaliaŋndo vellaa velle.+ 10 Nduyɛ, lende nya cho tosaa a puaapiliaa nyaa cho o Masidooniaa niŋ kpou wa ni. Lelaŋ puaapiliaa, ŋ cho nya nyɔɔloo maa la hiou lachi a ndi tosaa mbo hiou maa paandu. 11 A mɛɛ naŋ pɛɛku nya yɛ, la kindiŋ mi la wa wanaa kɔl nyulu,+ mi la tosa wallo kalaŋ,+ nduyɛ la wou sondo o suɛi pila niŋ te.+ 12 Hei tosa mi wanaa cho wanaa laalaŋ te wa che maa la cho wanaa lebɛɛ,+ nduyɛ maa nyɛ o nyɛ cho nya lepɛŋ te.
13 Puaapiliaa, ŋ yeema nya mi la sina walaŋ a wanaa vi niŋnda* okɔɔ.+ O hei niŋ, la bii lɛ mɔnɛi mɛɛ wanaa nɔ tiindaŋ te wa bii mɔnɛi yɛ le.+ 14 Te ŋ laalaŋ pɛ kɛsɛ maa mɛɛ Chiisu vi mbo miiŋgu yoomu,+ mɛɛ lende koni Mɛlɛka miŋgi niŋ wanaa vi o Chiisu niŋnda yoomu ni, le ma wa a ndu latulu.+ 15 Nyɛ Chɛhowa* dimi wo naŋ cho nya hoo dimullo ni. Ndu cho ni maa, naŋ cho lo yoomu haaa mi boondii Masanɔɔ cho miiŋgu naŋnde fuuluu wa, ŋ cho miiŋgu yoomu. Kɛ wanaa vi naa tase wa fɛlɛŋ cho miiŋgu yoomu. 16 Kanifuule, Masanɔɔ pila cho chɔnɔŋ choo choo mbo tol a bulu Mɛlɛkaa o ba, mbo soo a kpaayaa o diom masa maalikɛiya niŋ.+ Okoŋ, wanaa wa o diompilɔɔ niŋ a Kiliti ma wu wa fɛlɛŋ cho miiŋgu yoomu.+ 17 Okoŋ kɔɔli, naŋ cho wɔ wa yoomu wa, ŋ cho helnɔŋ choo choo o yumbu yumboo niŋ+ naa ndaa latulu, miŋ kɔ chiikaŋ naa Masanɔɔ waa.+ Okoŋ, miŋ wa naa Masanɔɔ waa lɔɔlɔɔ.+ 18 Lelaŋ, la hiou lachi a dɛɛniaŋndo vellaa velle a diomndaŋ ndaŋ.