Chɔŋ

1 O kandɔŋndo, Diomndo wa.+ Diomndo hoo wa latulu a Mɛlɛka,+ nduyɛ mɛlɛka* Diomndo hoo wa ni.+ 2 O wa a Mɛlɛka latulu o kandɔŋndo. 3 O ndu niŋ sanaa nyɔɔŋ kpou toosiaŋ ni.+ Te ndoo ve o ndu niŋ te, nyɛ o nyɛ ve toosiaŋ te.

Nyɛ toosiaŋ o ndu niŋ 4 sanaa wo wa yoomoo ni. Nduyɛ yoomoo hoo wa nyɛ teŋgaa le waŋnda chieeya ni.+ 5 Nyɛ teŋgaa hoo cho diondɔɔ o nyumndaŋ niŋ,+ nduyɛ nyumndaŋ ma nɔla ndu nyumi le.

6 Mi Mɛlɛka viam po pilɛ hɔlte ndɔ, diolaŋ aa Chɔŋ.+ 7 Mi poo hoo huŋ maa sei, le mbo timbi seileŋ a nyɛ teŋgaa hoo okɔɔ,+ le mi waŋnda suu o suu ndaa laalaŋ sanaa o ndu niŋ. 8 O cho ndu le wa nyɛ teŋgaa koŋ te,+ kɛ le seileŋ timbioo a nyɛ teŋgaa koŋ okɔɔ ndoo hiŋ ni.

9 Nyɛ teŋgaa kpeekpei diandu waŋnda suu o suu choo wo ndoo nɔ le hunɔɔ o chieeŋndo choo.+ 10 O wa o chieeŋndo choo,+ nduyɛ o ndu niŋ sanaa chieeŋndo toosiaŋ ni.+ Kɛ chieeŋndo sina ndu le. 11 Mbo huŋ o ndu lo chiee, kɛ wanaa nduaa chɛl ndu le. 12 Kɛ nduyɛ, wanaa chɛl ndu wa kpou, mbo ke nda dioo le ma simnuŋ chuauwaa Mɛlɛkaa,+ kanifuule a wa laalaŋndo dɔwɔɔ o diola ndɔlaŋ niŋ.+ 13 O cho o nɛi iwana chieeya niŋ, ɔɔ o hɛnaŋ wanachiee niŋ te nda veluŋ te, kɛ Mɛlɛka pila siiŋguu nda chuauwaa ndɔ ni.+

14 Mi Diomndo hoo simnuŋ wanachioo+ mbo huŋ wa naa tɛɛŋ. Nduyɛ miŋ cha naŋɔɔ ndɔɔ, naŋɔɔ suu pole pilɛleŋ+ le sɔla finya ndɔ o ba wo. Kɛndɛi Mɛlɛkɛi wa ndu choo, nduyɛ lɔɔlɔɔ mi ndoo dimi tonyaa. 15 (Mi Chɔŋ timbi seileŋ a ndu okɔɔ choo choo kpeleŋ aa: “A hoo okɔɔ ya wa dimioo ni aa, ‘Wana cho ya hunɔɔ kɔɔli wo hiou ya poloŋ, kanifuule o wa niŋ fɛlɛŋ tuupa mi vialuŋ.’”)+ 16 Kɛndɛi Mɛlɛkɛi wa ndu choo i hɔbɛi, nduyɛ naa kpou cho ndi sɔlaa teleŋ o teleŋ. 17 O Muuse niŋ sanaa Mɛlɛka yɔŋgu Sawalaŋ ni.+ Nduyɛ, o Chiisu Kiliti niŋ+ sanaa naŋ sɔla kɛndɛi bɛnduii Mɛlɛkɛi+ a tonyaa ni. 18 Wana o wana chi wɔ Mɛlɛka le pilɛ bɛɛ le.+ Kɛ mɛlɛka, o cho pole pilɛleŋ,+ nduyɛ mbo wa Finyaa ikɛiyo,*+ ndu tɛɛsiaa wana suu Mɛlɛka cho wo ni.+

19 Seile Chɔŋ timbi leŋ le cho leŋ ni, mɛɛ Chuuwa vem wanaa soliaa lasalaa a Livaiya, fulaa Chulusalɛm, ma huŋ nyuna ndu aa: “Wana maavɛɛ ŋ cho yɛ?”+ 20 Mbo dimi tonyaa kpendekele aa: “O cho ya le cho Kiliti le.” 21 Ma nyuna ndu aa: “Mɛɛ wana maavɛɛnɛ ŋ cho yɛ? Baa num cho Ilaicha ni?”+ Mbo muli aa: “O cho ya le cho Ilaicha le.” “Baa wana suaa le Mɛlɛka wo ŋ cho ni?”+ Mbo muli aa: “Ɛ ɛ!” 22 Okoŋ ma nyuna ndu aa: “Wana maavɛɛ ŋ cho yɛ niko? Dimul naa, le miŋ kɔ dimul wanaa vem naa wa. Chɔm naa wana suu ŋ cho wo.” 23 Mbo muli aa: “Ya cho diom wana cho yondaa o pollo niŋndo ni aa, ‘La bɛɛndiaa nɛi Chɛhowa* wo nyɛkɛndɛi’+ mɛɛ Aisaya, wana ndoo suaa le Mɛlɛka wo dimi yɛ.”+ 24 Falisiiya ndaa vem waŋnda haa ni. 25 Okoŋ ma nyuna ndu aa: “A cho Kiliti le, a cho Ilaicha le, nduyɛ a cho wana suaa le Mɛlɛka le, mɛɛ le yɛɛnɛ ŋ cho yɛ niko waŋnda yiŋɔɔ?” 26 Mi Chɔŋ mulul nda aa: “Ya ya o mɛŋndaŋ niŋ ya cho waŋnda yiŋɔɔ ni. Kɛ, waŋndo opum cho nya isisi tɛɛŋ la sina ndu le. 27 Waŋndo hoo cho ya hunɔɔ kɔɔli ni, nduyɛ I suliŋ bɛɛ pɛŋ le yuei nduɛi lakɔwɛiye* timbioo le.”+ 28 Bɛtani sɔɔŋ muŋ kpou ŋ yɔŋnuŋ ni, Chɔɔdaŋ leeloo, naa Chɔŋ wa waŋnda yiŋɔɔ wa.+

29 Diimandɔɔ, mbo cha Chiisu hunɔɔ naa ndu chua, mbo dimi aa: “La tofawɔ Saa Foŋndɔ+ Mɛlɛkaa, o cho hunɔɔ hakioo faŋa+ o chieeŋndo choo wo!+ 30 A ndu okɔɔ ya wa dimioo ni aa, ‘Wana cho ya hunɔɔ kɔɔli wo hiou ya poloŋ, kanifuule o wa niŋ fɛlɛŋ tuupa mi vialuŋ.’+ 31 Ya bɛɛ yaa sina ndu le, kɛ sabu ya hiŋ yiŋɔɔ o mɛŋndaŋ niŋndo cho ni, le mi waŋnda Isɔluɛi sina ndu.”+ 32 Mi Chɔŋ timbi vɛlɛ seileŋ aa: “Mi cha nyina Mɛlɛkaa fulaa o choo choo niŋ maa kaŋgbo, mbo huŋ chal ndu choo.+ 33 Ya bɛɛ yaa sina ndu le, kɛ wana vem ya yiŋɔɔ o mɛŋndaŋ niŋndo dimul la ni aa: ‘Wana ŋ cho chɔ mi nyina Mɛlɛkaa huŋ chal ndu choo wo,+ mɛɛ ndu a nyina diandaa o cho waŋnda yiŋɔɔ ni.’+ 34 Mi cha ndi a lehɔl pɛɛŋ, nduyɛ mi timbi seileŋ maa Po Mɛlɛkaa cho hoo ni.”+

35 Diimandɔɔ, Chɔŋ wa isisi nda buɛiyaa nduaa a ŋiɔɔŋ. 36 Mɛɛ o che Chiisu hiouwɔɔ, mbo dimi aa: “La tofawɔ Saa Fɔŋndɔ+ Mɛlɛkaa!” 37 Mɛɛ buɛiyaa ŋiɔɔŋnda haa tuei nyɛ Chɔŋ dimi wo, ma tual Chiisu kɔɔli. 38 Mɛɛ Chiisu muliŋ, mbo cha nda ndu tolɔɔ kɔɔli. Mbo nyuna nda aa: “Yɛɛnɛ nya cho yɛ nuuviaa?” Ma mulul ndu aa: “Luabai (Koŋ cho ni, “Wana Pɛɛkaa”), kuɛɛnɛ ŋ cho yɛ o yiya?” 39 Mbo mulul nda aa: “La huŋ mi la che.” Okoŋ ma kɔ chɔ naa o wa o yiya wa, nduyɛ ma lo loŋ niko nda ndaa paale leŋ. Teleŋndo wa niŋ le lɔɔ 4:00 ipalaa.* 40 Andulu,+ pɔmbɔɔ Saimɔŋ Pitɛ wa waŋndo o pilɛ, o wanaa ŋiɔɔŋaa tuei nyɛ Chɔŋ dimi, nduyɛ ma tual Chiisu kɔɔli wa. 41 Saimɔŋ bɛ ndɔ fɛlɛŋ o komal mbo dimul ndu aa: “Ŋ saaluŋ Mɛsayanɔɔ”+ (koŋ cho ni, “Kiliti”). 42 Okoŋ mbo kua a ndu naa Chiisu chua. Mɛɛ Chiisu tofa ndu, mbo dimul ndu aa: “Num cho Saimɔŋ ni,+ po Chɔŋ ndo. A cho num niŋ wa veeloo aa Sifaasi” (koŋ cho ni, “Pitɛ”).+

43 Diimandɔɔ, mi Chiisu yeema le kɔlaŋ Kalili. Okoŋ mbo cha Filipi,+ mbo dimul ndu aa: “Tol la kɔɔli.” 44 Nduyɛ Bɛtisaida Filipi ndoo fula ni, o chiee Andulu nda Pitɛ wo. 45 Mi Filipi komal Nataaniɛɛ+ mbo dimul ndu aa: “Ŋ saaluŋ Chiisu, po Choosɛ wo+ o fula Naasaluɛiyo. Wana Sawala Mɛlɛka ke Muuse laŋ a wanaa ndaa suaa le Mɛlɛka wa soo a ndu okɔɔ wo.” 46 Kɛ mi Nataaniɛɛ nyuna ndu aa: “O yɛɛ kɛndɛ kpeekpei fula yɛ Naasaluɛi?” Mi Filipi mulul ndu aa: “Huŋ ma che.” 47 Mɛɛ Chiisu che Nataaniɛɛ hunɔɔ, mbo dimi a ndu okɔɔ aa: “Isɔluɛinɔɔ kpeekpei cho hoo ni, o nɔ sɔŋ o sɔŋ te wo.”+ 48 Mi Nataaniɛɛ nyuna ndu aa: “Vɛɛ ŋ looku yɛ ya sina?” Mi Chiisu mulul ndu aa: “Tuupa mi Filipi veelu num, a wa o yɔm mafikiiyo bɛŋgu mi cha num.” 49 Mi Nataaniɛɛ dimi aa: “Luabai, num cho Po Mɛlɛkaa ni. Num cho Masaa le Isɔluɛi ni.”+ 50 Mi Chiisu nyuna ndu aa: “Baa le mɛɛ ya dimul num maa mi cha num o yɔm mafikiiyo bɛŋgu yɛ ŋ laalaŋ a ya ni? A cha niŋ sɔɔŋ kɔndɔfiliŋ cheleŋ mbo hiou muŋ.” 51 Okoŋ mi Chiisu dimul ndu aa: “A tonya kpeekpei mi dimul nya, la cho chɔ mi choo choo kumbiŋ, nduyɛ mi maalikɛiyaa Mɛlɛkaa wa helɔɔ a tolɔɔ o Po wanachioo lo.”+