Sam
YAU DIIŊ NDƆƆ
(Sam 42-72)
O wana sim lachi le chondei yo lo. Masiki* puaa Kolua wa.+
42 Oo Mɛlɛka nuu, mɛɛ kiallo nuuviaa nuaa pioo yɛ,
Lende koni ya cho num nuuviaa ni.
2 Yeemɛi cho ya bɔɔ le Mɛlɛka cho yoomu wo.+
Lɔɔ kuɛɛ ya cho yɛ hunɔɔ ndu lachi?+
3 Mɛmɛma niaŋ ma cho nyɛdiaa nuu idii a ichɔl ni.
Lepaa o lepaa, waŋnda cho ya mamɔɔ ma dimi aa: “Kuɛɛ Mɛlɛka numndo cho yɛ?”+
4 Te I yiyaŋ pɛ a sɔɔŋ muŋ okɔɔ, mi tambu kɔllo tau,
Kanifuule a teleŋ koŋ te yaa wa pɛ kɔlaŋ, mi waŋnda faŋga bɛndoo ndaa tol la kɔɔli.
Mi yaa kuɛ nda lachi bɛɛŋ bɛɛŋ le kɔlaŋ o chiɛi Mɛlɛkaa.
Mi naŋ soli chonduŋ kɔl kɛndɔŋ, miŋ mel Mɛlɛka balika,
Nduyɛ mi naa kpou tosa dunyɛi bɛnduei.+
5 Le yɛɛnɛ mi wa o kɔl tambɛi bɛndoo hoo niŋ?+
Le yɛɛnɛ kɔl nuu cho yɛ o saŋgaa niŋ?
6 Mɛlɛka nuu, I cho o kɔl tambɛiyo niŋ.+
Le sabu koŋ ya loonuŋ a num ni,
Teleŋ ya wa o lɛŋnde Chɔɔdaŋ ndeŋ niŋ, a o pembuŋ Hɛmɔŋ ndoŋ tullo wo,
Vɛlɛ a teleŋ ya wa o Pembii Misa Ve wo.
7 I cho tueiyɔɔ bal numndo diom,
Mbo wa hiouwɔɔ wolu wolu.
Bahawɛilaŋ la mel la mɛɛ tindiaŋ o peela numndaŋ kpou ma wa nuaa yɛ.+
8 Chɛhowa cho ya kaala lo lechoo ndɔɔ chɔm ipala,
Mi solul Mɛlɛka nuu chondei ichɔl, nduyɛ mi piɛi o ndu lo.+
9 I cho Mɛlɛka nuu dimul aa:
“Pou kpoowa nuu, le yɛɛnɛ ŋ puɛɛnuŋ yɛ a ya okɔɔ?+
Le yɛɛnɛ mi wa kelaa a kɔl tambɛiyo, le mɛɛ yaamɔɔnɔ nuu tusi ya nyɛpalaa choo yɛ?”+
10 Yaamɔɔwaa niaa cho ya mamɔɔ kpeekpei.
Lepaa o lepaa, a cho ya mamɔɔ ma dimi aa: “Kuɛɛ Mɛlɛka numndo cho yɛ?”+
11 Le yɛɛnɛ mi wa o kɔl tambɛi bɛndoo hoo niŋ?
Le yɛɛnɛ kɔl nuu cho yɛ o saŋgaa niŋ?