Sam
O wana sim lachi le chondei yo lo. Chondii Deeve ve.
68 Maa Mɛlɛka chɔŋ mbo sim, mi yaamɔɔwaa nduaa saŋnuŋ.
Maa wanaa tul ndu leyɛ wa nyaanuŋ ndu.+
2 Maa tou nda mɛɛ hueiye tuau nuaa kumnde yɛ.
Maa wanaa dɛnɛ wɔɔŋnda sɔla tambei Mɛlɛka lachi,+
Mɛɛ yiŋndeŋ le teeŋgiaa nuaa waa maliɔɔ yɛ.
3 Kɛ maa wanaa sakpuaa dɔɔnuŋ nyaale.+
Maa a dɔɔnuŋ nyaale tau tau Mɛlɛka lachi,
Ma huulu a kpeŋjoo.
4 La solul Mɛlɛka chondoŋ.* La solul ndu chondoŋ le diola ndɔlaŋ saŋgalaa.+
La solul wana cho keekoo o pollo* niŋndo chondoŋ.
Diola ndɔlaŋ la cho Chɛhowa ni!+ La dɔɔnuŋ nyaale ndu lachi!
5 Mɛlɛka cho ichali o fondaŋ ndɔ diandaa.+
Ndu cho finyaa le wanaa nɔ ŋfinya le wa ni, nduyɛ ndu manda* wanaa vii piaanduaa wa ni.+
6 Mɛlɛka yɔŋgu wanaa nɔ wanaa malaa le wa naa lɔlaa ni.+
Ndu soli wanaa cho o chiɛila manyumndaŋ niŋnda ni, nduyɛ mbo tosa ma sul.+
Kɛ wanaa bolii kalaa nda, o lɛŋnde polteŋ niŋ nda wa ni.+
7 Oo Mɛlɛka, mɛɛ ŋ sim wanaa numnda lachi le kɔlaŋ a nda,+
Mɛɛ ŋ keeku a nda o lɛŋnde polteŋ niŋ, (Sila)
8 Mi lɛŋndeŋ le nyiiya.+
Mi choo choo tusi piɔɔ le sabu numndo.
Mi Pembii Sanai Ve hei bɛɛ nyiiya le sabu numndo, num Mɛlɛka Isɔluɛiya.+
9 Oo Mɛlɛka, ma tosa mi piɔɔ sia tau tau.
Ma miŋgi wanaa num aa wa a yɔkpɛiya wa* yoomuaŋ luei.
10 Oo Mɛlɛka, ma tosa ma wa o dɔɔŋgɔ num latɛndiiyo niŋ.+
Le mɛɛ ŋ cho wana kɛndɛ yɛ, ma ke wanaa bala fonduaa nyɛdiaa.
11 Mi Chɛhowa dimi aa:
Waŋ laanduaa cho yooŋgu kɛndɔɔ dimioo wa cho a hɔbɛi maa puaa chɔuwaa faŋga bɛnduaa.+
12 Masaa puaa chɔuwa nyaanuŋ,+ a nyaanuŋ.
Wana lanɔ lo o bɛɛ wo sɔla nyɛm kiɔɔŋ ŋ ndɔŋ.+
13 La cho sɔla kumbaŋnda piiŋ nda toosiaa a kanii humbuei,
Mi bɔɔla ndɔlaŋ la wa a kooliiye laŋ,
Mi che bɛɛ la wa ihini o tondola leyiŋndaŋ ikɛi.
15 Pembei Baasiaŋ,+ pembii Mɛlɛkɛi i cho ni.
Pembii nɔ fondaŋnda filioŋndaŋ nde pembei Baasiaŋ cho ni.
16 Nya pembuŋ nɔ fondaŋnda filioŋndaŋ ndoŋ,
Le yɛɛnɛ mi la paŋala pembii Mɛlɛka hɛli le challe loŋ nde?+
A tonya, Chɛhowa cho wa loŋ le fɛɛŋ a fɛɛŋ.+
17 Mɛlɛka nɔ nyɛm nyaanaŋ chɔu suaa naŋndoŋ waalaŋ o waalaŋ niŋ.+
Chɛhowa chɛŋ o Pembii Sanai Ve, mbo luɛi o fondaŋ diandaa.+
18 Oo Chɛhowa Mɛlɛka, a lo choo choo pɔɔli,+
Ma soli wanaa wa o biyɔɔ niŋnda.
Ma yɔŋgu waŋnda maa ke.+
A tonya, hali wanaa bolii kalaa bɛɛ,+ ma yɔŋgu nda le ma wa nda tɛɛŋ.
19 Maa Chɛhowa, o chuel naa wolɔɔla naala lusulɛilaŋ lepaa o lepaa wo sɔla saŋgalaa.+
Ndu cho Mɛlɛka tonyaa ni, wana piŋi naa wo. (Sila)
20 Mɛlɛka tonyaa cho Mɛlɛka piŋi naa wo ni.+
Nduyɛ Chɛhowa, Mɛlɛka Kpuluŋguma Bɛndoo tosa ni miŋ hɛluŋ piɔmndo.+
21 Mɛlɛka cho bolii yaamɔɔwaa nduaa pesi wɔ wɔ,
Mbo pesi kpokpola wana o wana cho hiouwɔɔ lachi a hakioo tosaa.+
22 Mi Chɛhowa dimi aa: “I cho nda miŋgi pila Baasiaŋ.+
I cho nda soli o pee mɛŋma ihɛl yiŋgilɛiyo niŋ,
23 Le halikpeŋ mi peluŋ numndoŋ niɔu niɔu kooma+ yaamɔɔwaa numnda,
Nduyɛ mi tuŋaa numnda deembuu kooma ndaŋ.”
24 Oo Mɛlɛka, waŋnda cho chɔ waŋnda faŋga bɛndoo,
Faŋga bɛndu Mɛlɛka nuu o fondaŋ diandaa.+
25 Wanaa soliaa ŋchonduaa cho kɔlaŋ lachi, mi wanaa luaa nyɛm chaaŋ nda wa nda kɔlaŋ kɔɔli.+
Nduyɛ, chuaa laanduaa feleŋguaa cho nda tɛɛŋ ma wa dundula pɔmbɔlaŋ lɔɔ.+
26 La saŋgala Mɛlɛka o kundala bɛndulaŋ tɛɛŋ.
Nya fula Isɔluɛi ya, la saŋgala Chɛhowa.+
27 Loŋ Bɛŋjamiŋ+ lumndo cho nda wa yomɔɔ ni,
Waŋ banaa Chuda a faŋga bɛndu cho nda kɔɔli wo,
Waŋ banaa o yuŋgu Sɛbulɔŋ ndo niŋ, a waŋ banaa o yuŋgu Nafitalii yo niŋ.
28 Mɛlɛka numndo kɛɛsiaa le mbo tosa ma sɔla kpaayaa.
Oo Mɛlɛka, num suŋgu le naa ni, lelaŋ chɔm kpaaya numndo.+
30 Kpaa visiaa yonduaa,
Nduyɛ ma kpaa nauwaa towaa+ a nauwaa fɔŋnduaa cho kunda bɛndoo wa,
Haaa mi waŋnda hiŋ a kaniŋ humboŋ ma beŋ num wulaŋ.
Puusiaa wanaa kaala chɔuwo wa.
31 Waŋnda cho fula a nyɛm nda toosiaa a bulɔŋsiiye woŋ o Ichipi niŋ ma hiŋ a muŋ.+
Kusi cho keleŋa chɔ chɔ le mbo yɔŋgu Mɛlɛka kelaŋ.
32 Masɛi o lɛŋndeŋ choo kpou, la solul Mɛlɛka chondoŋ.+
La soli chondoŋ* le Chɛhowa. (Sila)
33 La solul wana bii niŋ soo nyaanɔŋndo o choo choo niŋ kani masindɛ wo chondoŋ.+
Nuawɔ! O cho deŋioo choo choo kpeleŋ a kpaaya ndɔ bɛndoo.
34 La sina kpaaya Mɛlɛkaa.+
Tɔɔmayɛi nduɛi cho Isɔluɛi choo kpou,
Nduyɛ kpaaya ndɔɔ cho o halaa* niŋ.
35 Mɛlɛka cho wana kɔndɔfili bɛndu o chiɛi ndɔ bɛndoo niŋ.+
Ndu cho Mɛlɛka Isɔluɛiya ni,
O ke waŋnda yoomuaŋ a kpaayaa wo.+
La saŋgala Mɛlɛka.