Maki
12 Okoŋ, mbo kandu suɛi o nda lo o talelaŋ niŋ. Mbo dimul nda aa: “Po pilɛ ndoo nɔ kpele makilepiiyo,+ mbo duau ndu o kuŋgaa niŋ, okoŋ mbo tuau doolaa* le maŋ waayiaa leniŋ, nduyɛ mbo taŋgul bandu vilɛiyo leniŋ.+ Mɛɛ o chii, mbo ke waŋnda le ma wa ndu hɔlteŋ, mbo kuaŋnuŋ o lɛŋnde cheleŋ niŋ pɔ.+ 2 Mɛɛ boondei fuuluu le tɔlɔɔ hoo kendioo, mbo viam buɛi ndɔɔ naa waŋnda haa chua le ma ke ndu kilepiiyaŋ ma nduaŋ. 3 Kɛ ma bii ndu, ma luaa ndu, nduyɛ ma miŋgi ndu bala fondo. 4 Mbo viam vɛlɛ buɛi cheleŋ o nda lo. Ma luaa ndu bolleŋ, nduyɛ ma tɛɛmbuu ndu labɛɛ.+ 5 Mbo viam vɛlɛ o cheleŋ, kɛ ma dii ndu. Mbo viam vɛlɛ a bɔɔbɔɔ o haa kɔɔli. Apum ma luaa nda, apum yɛ ma diu diu nda. 6 Pole ndɔle kaalaa leŋ le wa ndu o ba.+ Ndu o mɛɛlu viomɔɔ ni. Mbo dimi aa, ‘Po nuu ndu, a cho ndu bɛɛleŋ ke.’ 7 Kɛ mi waŋnda haa dimulaŋ aa, ‘Hoo cho hunɔɔ nyɛm kiɔɔŋ loo ni.+ La huŋ ŋ diinuŋ ndu mi nyɛm kɛŋ ndɔŋ lo le naa.’ 8 Ma bii ndu, ma dii ndu pɛ. Okoŋ, ma soli ndu o kpeloo niŋ.+ 9 Yɛɛnɛ wana kpeloo cho yɛ tosa? O cho nda hunɔɔ diu diu kpou, okoŋ mbo chua kpele ndɔɔ, mbo ke wanaa cheleŋ.+ 10 Baa la nue wɔ o yau Mɛlɛkaa niŋ maa, ‘Pou wanaa taŋgulaa kɛɛ wo, ndu le simnuŋ pou kpeekpei saa taŋgullo wo le?+ 11 O Chɛhowa* lo pou koŋ chɛŋ ni, nduyɛ hei cho bɔɔ suɛi kɔndɔfili bɛndu naa o hɔl.’”+
12 Le hei, ma yeema le ndu biyɔɔ, kɛ ma wo faŋgaa. Kanifuule, ma sina maa le nda o dimi taloo hoo ni. Okoŋ, ma faŋaŋ ndu kɔɔli ma kuaŋnuŋ.+
13 Okoŋ kɔɔli, ma viam Falisiiya apum, a kunda Hɛlɔɔ wo naa Chiisu chua, le halikpeŋ ma bii ndu a nyɛ o wa dimi wo.+ 14 Mɛɛ nda fuuluu, ma dimul ndu aa: “Wana Pɛɛkaa, ŋ sina maa a cho sakpo, nduyɛ a tosa sɔɔŋ le mi waŋnda hɛnaŋ a num te. O cho mɛɛ waŋnda chieeya cho yɛ le ŋ nua le, kɛ tonya cho a Mɛlɛka okɔɔ wo ŋ pɛɛku waŋnda ni. Baa o bɛnda pa miŋ mal paawaa* le Siisa* ɔɔ o bɛnda le? 15 Ŋ nɔ miŋ mal ɔɔ ŋ nɔ miŋ mal te?” Kɛ mɛɛ Chiisu sina sondo yeelɛi ndaa, mbo dimul nda aa: “Le yɛɛnɛ nya cho yɛ ya yaŋɔɔleŋ yeŋndo? La chuu wɔ ya dinaluɛiye* mi tofa.” 16 Ma chuu ndu i pilɛ, okoŋ mbo nyuna nda aa: “Hɔlaa nɛɛnɛ a diola nɛɛnɛ la cho yɛ laŋ lechoo?” Ma muli aa: “Siisa.” 17 Mi Chiisu dimul nda aa: “Mɛɛ la ke Siisa nyɛ cho le Siisa wo,+ mi la ke Mɛlɛka nyɛ cho le Mɛlɛka wo.”+ Mi kɔndɔfillo bii nda.
18 Mi Sadusiiya, a dimi maa wanaa vi wa miiŋgu lɛ niŋ yoomu le wa+ huŋ nyuna ndu aa:+ 19 “Wana Pɛɛkaa, mi Muuse poonyiaa maa te waŋndo vi pɛ mbo mɛi lanɔɔ kɛ a vilu nda lanɔ koŋ te, pɔmbɔ ndɔ ɔɔ bɛ ndɔ nɔ mbo chua lanɔ koŋ o nɔɔ niŋ le mbo vilul wana vi wo chuauwa.+ 20 Puaa pum wa nda ŋɔmmɛu, pɔmbɔɔ a bɛndoo waa nda wa ni. Mi o tasoo yil lanɔɔ, kɛ o vilu le mbo wu. 21 Mi o diiŋ ndɔɔ loo lanɔ koŋ, kɛ ndu bɛɛ o vilu le mbo wu. O yaa ndɔɔ bɛɛ lende koni. 22 Nda ŋɔmmɛu kpou ma wu a vilu le. O mɛɛlulaŋ kpɔŋ, mi chuaa bɛɛ wu. 23 Te nda kpou huŋ miiŋgu pɛ yoomu, lanɔɔ nɛɛnɛ chuaa hoo wa yɛ niŋ? Kanifuule, nda ŋɔmmɛu kpou mi chuaa hoo keeku nda o ba o nɔɔ niŋ.” 24 Mi Chiisu mulul nda aa: “La bendu nɛiyo, kanifuule la sina nyɛ Yau Mɛlɛkaa dimi wo le, kɛlɛŋgaa kpaaya Mɛlɛkaa.+ 25 Te waŋnda huŋ miiŋgu pɛ yoomu, a chue lɛ niŋ ŋlaandu kɛlɛŋgaa ŋpiaandu le. A cho simnɔŋ maa maalikɛiya o choo choo niŋ.+ 26 A wanaa vi wa miiŋgoo yoomu okɔɔ, baa la nue wɔ o yau Muuse poonyiaa a bɔɔ leyiŋndo okɔɔ wo le? Mi Mɛlɛka dimul ndu aa, ‘Ya cho Mɛlɛka Ebilaham ndo, Mɛlɛka Aase wo, a Mɛlɛka Chekɔpu wo ni.’+ 27 O cho Mɛlɛka ŋwaŋ vilɛi le, kɛ Mɛlɛka wanaa cho yoomu wa. La bendu bɔɔ nɛiyo.”+
28 Mɛɛ wanaa pɛɛku waŋnda sawala Mɛlɛkalaŋ nda o pilɛ tuei nda suukaŋndo, nduyɛ mbo sina maa Chiisu mulul nda nyɛkɛndɛi, mbo nyuna ndu aa: “O sawala Mɛlɛkalaŋ tɛɛŋ, o kuɛɛnɛ cho yɛ sawa tasoo?”*+ 29 Mi Chiisu muli aa: “O tasoo cho ni, ‘Nya waŋnda Isɔluɛi, la yaŋ nilaŋ. Chɛhowa* Mɛlɛka naa, ndupilɛ kpe cho Chɛhowa* ni. 30 A nɔ ma kaala Chɛhowa* Mɛlɛka numndo a kɔl numndo kpou, a yoomu numndo kpou, a yiyaŋ numndo kpou, nduyɛ a kpaaya numndo kpou.’+ 31 Sawa diiŋ ndɔɔ cho ni, ‘A nɔ ma kaala wana nya chiɛɛliaŋ ndo* mɛɛ ŋ kaala numpila yɛ.’+ Sawa o sawa cheleŋ cho mbo hiau sawala tiɔɔŋ ndaŋ te.” 32 Mi wana pɛɛku waŋnda sawala Mɛlɛkalaŋ ndo dimul ndu aa: “Wana Pɛɛkaa, a chaa muli. Tonyaa kpeekpei ŋ dimi ni. ‘Ndupilɛ kpe cho ni, nduyɛ mɛlɛka o mɛlɛka cheleŋ cho o ndu kɔɔli le.’+ 33 A kaala ndu pɛ a kɔl numndo kpou, a sinapɛŋgu numndo kpou, a kpaaya numndo kpou, nduyɛ ma kaala wana nya chiɛɛliaŋ ndo mɛɛ ŋ kaala numpila yɛ, koŋ hiou wa nyɛ sɔvɛ a salala luamaala kpulukuulaŋ vɛlɛ a salala kɛ kɛ cheleŋ.”+ 34 Mɛɛ Chiisu che maa poo hoo dimi suɛi kɔl kaluei, mbo dimul ndu aa: “A cho levil a Masale Mɛlɛkaleŋ te.” Kɛ wana o wana bii lɛ kɔllo mbo nyuna ndu le.+
35 Mɛɛ Chiisu hiou lachi a waŋnda pɛɛkoo o chiɛi Mɛlɛkaa niŋ, mbo nyuna nda aa: “Le yɛɛnɛ wanaa pɛɛku waŋnda sawala Mɛlɛkalaŋ nda dimi yɛ maa po Deeve wo Kiliti cho ni?+ 36 Mi nyina diandaa tosa+ mi Deeve dimi aa, ‘Chɛhowa* dimul Masanɔ nuu aa: “Chal o ba ni kɛndɔɔ choo haaa mi handu yaamɔɔwaa numnda o peluŋ numndoŋ bɛŋgu.”’+ 37 Te Deeve pila veelu ndu pɛ aa Masanɔɔ, vɛɛ o looku yɛ vɛlɛ mbo wa po ndɔɔ?”+
Faŋga bɛndoo wa a kɔl kɛndɛ le ndu nilaŋ yaŋɔɔ. 38 Mɛɛ o wa waŋnda pɛɛkoo, mbo dimul nda aa: “La mandaŋ a wanaa pɛɛku waŋnda sawala Mɛlɛkalaŋ nda, kanifuule a hɛnaŋ kelaa a domala bɛndulaŋ lekɔɔ. Te a wa o luŋ* pɛ, a yeema mi waŋnda yil nda yilɔɔ teŋgeŋndo.+ 39 Te a kuɛ pɛ o chiɛila Chuuwa piɛi Mɛlɛka laŋ niŋ a o dunyaŋ, o kpeŋgbeila cho lachi laŋ* choo, a o fondaŋnda kɛndɛ kɛndɛlaŋ nda yeema challe ni.+ 40 Ma poondiaa nyɛm waŋ laanduaa vii piaanduaa wa. Nduyɛ ma bɛndi piɛile ndaleŋ le mi waŋnda muli nda hɔlla kɔɔli. A cho nyɛpalaa sɔla mbo hiou wana o wana.”
41 Okoŋ, mbo chal o fondaŋ o cha kɔfula ŋkanilaŋ* ndo.+ O wa tofaa mbo cha mɛɛ waŋnda wa kanioŋ dɔwɔɔ o kɔfulaŋ niŋ yɛ. Wanaa sulaa bɔɔbɔɔ wa kaniŋ kpalɛiyoŋ malɔɔ leniŋ tau.+ 42 Mi wɛɛŋ bala fondo vii pɔnɔɔ wo huŋ dɔu kaniŋ pɔmbɔŋ kpalɛiyoŋ ŋ muuŋ.*+ 43 Okoŋ mbo veelu buɛiyaa nduaa mbo dimul nda aa: “A tonya mi dimul nya, wɛɛŋ bala fondo vii hoo pɔnɔɔ wo dɔu kanioŋ mbo hiau wana o wana dɔu kanioŋ o kɔfula ŋkanilaŋ niŋ.+ 44 Kanifuule, waŋnda haa kpou, kaniŋ nda nɔ woŋ, nyɛɛmbɔ koni nda dɔu ni. Kɛ ndu ndu, nyɛ wa ndu o ba wo kpou o dɔu ni. Nyɛ ndoo tiindaŋ o yoomu ndɔɔ niŋndo.”+