Chɔŋ

8 12 Mi Chiisu dimul nda vɛlɛ aa: “Ya cho nyɛ teŋgaa le chieeŋndo ni.+ Wana o wana tol la kɔɔli pɛ, o kela o manyum niŋ te, kɛ mbo sɔla nyɛ teŋgaa+ yɔŋgu yoomoo wo.” 13 Okoŋ mi Falisiiya dimul ndu aa: “A numpila okɔɔ ŋ cho seileŋ timbioo ni. Seile numndeŋ le cho tonya le.” 14 Mi Chiisu dimul nda aa: “O yɔŋ bɛɛ mi timbi seileŋ a yapila okɔɔ, seile nileŋ le cho tonya, kanifuule I sina naa ya fula wa a naa ya cho kɔlaŋ nda.+ Kɛ la sina naa ya fula wa a naa ya cho kɔlaŋ nda le. 15 O nɛi iwana chieeyaa choo nya kialu yamaŋ ni.+ Kɛ ya, I kilul wana o wana iyama kposoŋ te. 16 Nduyɛ o yɔŋ bɛɛ mi kelu yamɛi, yamɛi nii wa sakpo, kanifuule I cho yapilɛ le. Finya ni vem ya wo cho a ya latulu.+ 17 I cho vɛlɛ i poonyiaa o Sawala nyalaŋ niŋ aa: ‘Te wanaa ŋiɔɔŋ timbi seileŋ pɛ, mɛɛ seile leŋ le cho tonya.’+ 18 I cho seileŋ timbioo a yapila okɔɔ. Finya ni vem ya wo bɛɛ cho seileŋ timbioo a ya okɔɔ.”+ 19 Okoŋ ma nyuna Chiisu aa: “Kuɛɛnɛ Finya num cho yɛ?” Mbo muli aa: “La sina ya le, la sina vɛlɛ Finya nuu le.+ Te nyaa sina ya pɛ, la wa vɛlɛ Finya nuu sina.”+ 20 O fondaŋ nda kɛsi kɔfula ŋkanilaŋ* o chiɛi Mɛlɛkaa niŋndo Chiisu dimi sɔɔŋ muŋ ni,+ mɛɛ o wa waŋnda pɛɛkoo. Kɛ wana o wana bii ndu le, kanifuule teleŋ ndɔɔ ndoo fuuluuwɔ le.+

21 Mbo dimul nda vɛlɛ aa: “I cho lakɔŋnɔŋ mi la koma nuuviaa ya. Kɛ nduyɛ, la cho wu o hakila nyalaŋ niŋ.+ Naa ya cho kɔlaŋ nda, la nɔla mi la kuɛ loŋ te.”+ 22 Mi Chuuwa kandu dimioo aa: “Baa o hɛnaŋ mbo diinuŋ? Kanifuule o dimi aa, ‘Naa ya cho kɔlaŋ nda, la nɔla mi la kuɛ loŋ te.’” 23 Mbo hiau lachi a suɛi o nda lo aa: “Lɛŋ nanuŋ nya fula ni. Kɛ ya, choo choo ya fula ni.+ Chuauwaa waŋnda chieeya nya cho ni. Kɛ ya, I cho chua wanachiee le. 24 Le saboo hoo ya dimul nya ni maa la cho wu o hakila nyalaŋ niŋ. Te la laalaŋ maa ya le cho wana ndoo nɔ le hunɔɔ wo le, la cho wu o hakila nyalaŋ niŋ.” 25 Ma kandu ndu nyunaa aa: “Wana maavɛɛ ŋ cho yɛ?” Mi Chiisu dimul nda aa: “Le yɛɛnɛ pɛŋ mi tɛɛmbuu teleŋ nuu le suɛi o nya lo? 26 I nɔ sɔɔŋ tau le dimioo a nya okɔɔ, a le yamɛi kiolɔɔ. Nduyɛ pɛŋ, wana vem ya wo cho wana tonya. Sɔɔŋ ya tuei ndu o sondo woŋ ya cho dimioo o chieeŋndo choo ni.”+ 27 A bii bila maa a Finya ndɔ o choo choo niŋ okɔɔ le o wa nda dimullo le. 28 Okoŋ mi Chiisu dimi aa: “Te la heelu Po wanachioo o yɔmndo choo pɛ,+ a boondii keŋ nya cho sina wana ya cho wo ni,+ nduyɛ mi la sina maa I tosa nyɛ o nyɛ a ba ni le.+ Kɛ sɔɔŋ Finya nuu pɛɛku ya woŋ, muŋ ya dimi ni. 29 Wana vem ya wo cho a ya latulu, o mel la yapilɛ le, kanifuule nyɛ o hɛnaŋndo ya tosa teleŋ o teleŋ ni.”+ 30 Mɛɛ o wa sɔɔŋ muŋ dimioo, mi wanaa bɔɔbɔɔ duau laalaŋndo o ndu niŋ.

31 Okoŋ mi Chiisu dimul Chuuwaa ndaa dɔu laalaŋndo o ndu niŋnda aa: “Te la hiou pɛ lachi a nyɛ ya dimi wo tosaa, mɛɛ buɛiyaa niaa lekɛndɛi nya cho ni. 32 La cho tonyaa sina,+ nduyɛ mi tonyaa soli nya o chɛleŋ niŋ.”+ 33 Ma dimul Chiisu aa: “Chuauwaa mamaa Ebilahamnda naŋ cho ni, nduyɛ lepilɛ bɛɛ ŋ kue wɔ o lechɛ niŋ te. Le yɛɛnɛ ŋ dimi yɛ aa, ‘La cho fula o chɛleŋ niŋ’?” 34 Mi Chiisu mulul nda aa: “A tonya mi dimul nya, wana o wana tosa pɛ hakioo, chiɔɔ o cho hakioo o ba bɛŋgu ni.+ 35 Chiɔɔ lo o masanɔ ndɔɔ lo chiɛiniŋ lefafɛɛŋ te, kɛ mi po masanɔ ndɔɔ lo loŋ lefafɛɛŋ. 36 Lelaŋ, te Poo soli nya pɛ o chɛleŋ niŋ, mɛɛ la sɔla baŋa kpeekpeiyo. 37 I sina maa chuauwaa mamaa Ebilaham nda nya cho ni, kɛ la cho nɛilaŋ nuuviaa le ya diyɔɔ, kanifuule la chɛl pɛɛkula nilaŋ te. 38 Sɔɔŋ ya che teleŋ ya wa naa Finya nuu woŋ ya cho dimioo ni.+ Kɛ nya, sɔɔŋ nya tuei finya nya dimioo woŋ nya tosa ni.” 39 Ma mulul ndu aa: “Ebilaham cho finya naa ni.” Mi Chiisu dimul nda aa: “Te nyaa wa pɛ chuauwaa Ebilaham nda,+ la wa sɔɔŋ tosa maa Ebilaham. 40 Kɛ la cho nɛilaŋ nuuviaa le ya diyɔɔ, ya dimul nya tonya cho a Mɛlɛka okɔɔ wo wo.+ Ebilaham tosa keŋ te. 41 Walta finya nya tosa laŋ nya cho tosaa ni.” Ma dimul ndu aa: “Ŋ cho violɔɔ sama* le. Mɛlɛka ndupilɛ kpe cho Finya naa ni.”

42 Mi Chiisu dimul nda aa: “Te Mɛlɛka ndoo wa pɛ Finya nya, la wa ya kaala,+ kanifuule o Mɛlɛka lo ya fula ni mi huŋ nanuŋ. I hiŋ a ba ni le, kɛ ndu vem ya ni.+ 43 La yeema mi la chɛl pɛɛkula nilaŋ te. Le saboo hoo, la nɔla mi la bii nyɛ ya dimi wo bila le. 44 Setana* cho finya nya ni, nduyɛ hɛnaŋ finya nya wo nya yeema tosaa ni.+ Chɔŋ o kandɔŋndo, wana diyaa o wa ni.+ O sim yi o tonyaa niŋ te, kanifuule tonya cho ndu niŋ te. Choolaŋ o dimi ni, kanifuule kaa ndɔɔ cho koŋ ni. Wana lachoowaa o cho ni, nduyɛ ndu cho finyaa le choolaŋ ni.+ 45 O baa pilɔɔ choo, I cho nya tonyaa dimullo, kɛ la laalaŋ ya le. 46 Nɛɛnɛ cho yɛ nya tɛɛŋ mbo chɔm haki ya tosa wo? Te I dimi pɛ tonyaa, le yɛɛnɛ la laalaŋ ya le? 47 Wana cho le Mɛlɛka wo, nilaŋ o yaŋ o pɛɛkula Mɛlɛkalaŋ ni.+ Kɛ nya la cho le Mɛlɛka le, lelaŋ nya kɛɛ le nilaŋ yaŋɔɔ ni.”+

48 Mi Chuuwa dimul ndu aa: “A che le sabu naŋ dimi maa ‘Sameeliaŋnɔɔ ŋ cho ni,+ nduyɛ nyina wɔɔŋndo cho num kɔɔli’ wo?”+ 49 Mi Chiisu dimi aa: “Nyina wɔɔŋ cho ya kɔɔli le. Finya nuu ya cho bɛɛleŋ kioo ni, kɛ mi nya wa ya bɛɛlaŋ tɛɛmbuuwo. 50 I cho saŋgala nuuviaa le yapila le.+ Mɛlɛka cho ndu nuuviaa le ya ni, nduyɛ ndu cho wana kialaa ŋyamaa ni. 51 A tonya mi dimul nya, wana o wana tosa nyɛ ya dimi wo pɛ, fɛɛŋ bɛɛ o del piɔmndo lehɔl te.”+ 52 Okoŋ mi Chuuwa dimul ndu aa: “Ŋ sina niko kɛsɛ maa nyina wɔɔŋndo cho num kɔɔli. Ebilaham vi, nduyɛ wanaa ndaa suaa le Mɛlɛka wa bɛɛ. Kɛ mi num dimi aa, ‘Wana o wana tosa nyɛ ya dimi wo pɛ, fɛɛŋ bɛɛ o del piɔmndo lehɔl te.’ 53 A cho o sɔvɛ ma hiau Ebilaham finya naa mama vi wo le, lende le? Wanaa ndaa suaa le Mɛlɛka wa bɛɛ ma wu. Wana maavɛɛ ŋ cho yɛ?” 54 Mi Chiisu muli aa: “Te yapila saŋgalaŋ pɛ, mɛɛ saŋgalaŋ nuu cho nyɛ o nyɛ le. Finya nuu saŋgala ya ni,+ o nya dimi maa ndu cho Mɛlɛka nyaa ni wo. 55 La sina ndu le,+ kɛ ya I sina ndu.+ Te I dimi pɛ maa I sina ndu le, mɛɛ I cho simnɔŋ wana lachoowaa maa nya. Kɛ I sina ndu, nduyɛ I cho nyɛ o dimi wo tosaa. 56 Ebilaham finya nya wa a nyaale tau le paale nileŋ chɔɔ nduyɛ mbo cha leŋ, okoŋ mbo duaunuŋ nyaale.”+ 57 Mi Chuuwa dimul ndu aa: “A nɔ wɔ bɛɛ wɔsila 50 le, a dimi aa ma cha Ebilaham?” 58 Mi Chiisu dimul nda aa: “A tonya mi dimul nya, tuupa mi Ebilaham vialuŋ, I wa niŋ.”+ 59 Le hei, ma chɔuviaa poutaŋ le Chiisu vii viiyo, kɛ mbo viaŋnuŋ mbo fulaŋ o chiɛi Mɛlɛkaa niŋ.