Daaniɛɛ

7 Wɔsi tase Bɛlsiaasa,+ masaa le Babilɔŋ wa o masaleŋ choo wo, Daaniɛɛ wa ihini o kpele ndɔɔ choo,+ mbo cha yilaŋndoŋ o lɔma sɔlaŋ niŋ. Okoŋ mbo poonyiaa lɔma sɔlaŋ maŋ,+ nduyɛ mbo kɛsi kona o poonyiaa wo kpou nyɛkɛndɛ kɛndɛi. 2 Mi Daaniɛɛ dimi aa:

“I lo tofaa o yilaŋii ya che ichɔllo ve niŋ, mi cha hueiye fulaa o kpeŋguŋ hiɔɔloŋ o choo choo niŋ, mi i wa pee mɛŋma ihɛllo kalaŋiaa.+ 3 Mi cha visiaa bɛndu bɛnduaa a hiɔɔlu+ fulaa o pee mɛŋma ihɛllo niŋ, o kɛ kɛ wa teŋgeŋ a apiliaa.

4 “O tasoo wa maa kpɔkuŋ,*+ a kumbaŋndaŋ maa kowɛ.+ I lo ndu tofaa haaa ma suŋgu kumbaŋnda ndɔlaŋ, ma heelu ndu, okoŋ ma tosa mbo sim o peluŋ ndɔŋ muuŋ ndoŋ choo maa wanachiee, ma ke ndu kɔl iwana chieeyaa.

5 “Mi cha visi diiŋ ndɔɔ, o wa maa suluku.+ Ma heelu ndu o kpeŋgei i pilɛ choo. Kpɛndɔŋ ŋgaa wa ndu o sondo o chiŋuŋ ndɔŋ tɛɛŋ. Ma dimul ndu aa, ‘Chɔŋ ma de visioŋ tau.’+

6 “Okoŋ kɔɔli, mi hiau lachi a tofaa, mi cha visi cheleŋ. O wa maa tambil,+ kɛ kumbaŋndaŋ la hiɔɔlu wa ndu o kɔɔ maa kumbaŋnda you. Visioo hoo ndoo nɔ bolle i hiɔɔlu,+ nduyɛ ma ke ndu kpaayaa le mbo wa o masaleŋ choo.

7 “Okoŋ kɔɔli, mi hiau lachi a tofaa o yilaŋndoŋ muŋ niŋ ichɔllo, mi cha visi hiɔɔlu ndɔɔ. Visioo hoo ndoo wueenuŋ, wanaa che ndu dɔɔ pɛ siooŋnde bii num. Ndoo nɔ kpaaya teŋgeŋndo. Chiliŋnde chiŋuŋ ndɔŋ wa ni, nduyɛ ŋ wa ŋ bɛndu bɛndu. O wa nyɔɔŋ tɛɛmbuuwo mbo pesi pesi muŋ. O kɛ kɛ lo pɛ, o kpaatiaa ndu a ŋpelu.+ Visioo hoo wa teŋgeŋ a visiaa tasiaa fula ndu lachi wa kpou. Ndoo nɔ leelaŋ tɔ. 8 I lo leelaŋ ndaŋ tofaa, mi cha mi lee pɔmbɔ cheleŋ+ fula o leelaŋ ndaŋ tɛɛŋ. Mi leela taselaŋ la yaa la suŋguŋ lee pɔmbɔɔ hoo lachi. Lioo hoo ndoo nɔ hɔltaŋ maa hɔlta wanachiee, nduyɛ ndoo nɔ sondoo mbo wa suɛi a yoŋgaa.*+

9 “I lo tofaa haaa ma kɛsi kpeŋgbeila* lemasalaŋ, mi Wana Cho Kani Masindɛ Wo+ chal.+ Nyɛla wa ndu lekɔɔ laŋ la wa la humbu fo fo maa mɔm,+ nduyɛ yiiŋii wa ndu o lebol le wa mɛɛ yiiŋii saa wa nuaa i diandaa fo yɛ. Yiŋnde wule wule leŋ kpeŋgbei ndɔ lemasaa wa ni, mi yiŋndeŋ le wa sandei o kandula peluŋ ndɔŋ.+ 10 Yiŋndeŋ le wa fulaa o kpeŋgbei ndɔ lemasaa mi le wa ndu talaa lachi.+ Maalikɛiya waalaŋ o waalaŋ niŋ wa ndu wallo tosallo, nduyɛ mi maalikɛiya miiliɔŋndaŋ o miiliɔŋndaŋ niŋ wa ndu isisi lachi.+ Ma kila Toŋgo Kɔɔsɔɔ,+ okoŋ ma kumbi yaulaŋ.

11 “A teleŋ koŋ, mi hiau lachi a tofaa le diomnda yoŋgala* lioo hoo wa dimioo laŋ.+ I lo tofaa haaa ma dii visi koŋ, ma tɛɛmbuu dialuŋ ndɔŋ, nduyɛ ma yɔŋgu ndu le ma lom ndu o yiŋndeŋ niŋ. 12 Kɛ visiaa tuaa nda,+ ma puu nda masaleŋ o ba, nduyɛ ma hiau lachi a waa yoomu le teleŋndo vɛlɛ a boondei.

13 “Mi hiau lachi a tofaa o yilaŋndoŋ muŋ niŋ a nyumndaŋ, okoŋ mi cha waŋndo fulaa o yumbu yumboo niŋ choo choo maa po wanachioo,+ mbo wa hunɔɔ. Mbo sɔla dioo le mbo sɔɔŋguu Wana Cho Kani Masindɛ Wo ikɛi,+ okoŋ ma huŋ a ndu wana koŋ ikɛi kpɛɛluŋ. 14 Ma ke ndu kpaayaa+ le mbo wa masaa. Ma ke ndu bɛɛleŋ,+ a masaleŋ, le mi waŋnda kpou, lekaa o lekaa, a isɔɔ o isɔɔ maŋgalaa biilu ndu.+ Masale ndɔleŋ le cho masale faŋaŋ le fɛɛŋ a fɛɛŋ te, nduyɛ le cho tambii sɔla le.+

15 “‘Kɛ ya Daaniɛɛ, kɔl nuu wa ya paaliaŋndo tau, kanifuule mi yilaŋuŋ ya che muŋ ndoŋ luei ya siooŋnde.+ 16 Mi sɔɔŋguu maalikɛiyaa wa isisi wa o pilɛ ikɛi, mi nyuna ndu le mbo chɔm ya nyɛ kpeekpei hei sim ndo. Okoŋ mbo mulul la, nduyɛ mbo chɔm ya nyɛ sɔɔŋ ya che muŋ ndoŋ sim ndo.

17 “‘Mbo dimi aa: Visiaa bɛnduaa hiɔɔluaa haa,+ a sim le masaa a hiɔɔlu, a cho hunɔɔ chɔnɔŋ o lɛŋndeŋ choo wa.+ 18 Kɛ Mɛlɛka Bɛndoo,+ wanaa nduaa diandaa cho masaleŋ sɔla,+ nduyɛ mi le wa le nda+ lefafɛɛŋ. A tonya, le fɛɛŋ a fɛɛŋ.’

19 “Yaa yeema mi chɔɔlu sina a visi hiɔɔlu ndɔɔ okɔɔ, o wa teŋgeŋ a visiaa tuaa kpou wo. Visi wueenaŋ bɛndoo pila o wa ni. Chiliŋnde chiŋuŋ ndɔŋ wa ni, nduyɛ chiliŋii siaŋɛi yɛmbɛŋ ndɔŋ wa ni. O wa nyɔɔŋ tɛɛmbuuwo mbo pesi pesi muŋ. O kɛ kɛ lo pɛ, o kpaatiaa ndu a ŋpelu.+ 20 Yaa yeema vɛlɛ mi chɔɔlu sina a leela tɔla+ wa ndu o lebol taŋ, vɛlɛ a lee cheleŋ fula o laŋ kɔɔli, mi la yaa la del lo,+ lee ndoo nɔ hoo hɔltaŋ a sondoo nduyɛ mbo wa sɔɔŋ dimioo a yoŋgaa wo, o wa o bɛndu mbo hiau la tɔlaŋ kpou wo.

21 “I wa hiouwɔɔ lachi a tofaa, mi lioo hoo chiŋalaŋ wanaa diandaa a chɔuwo, nduyɛ mbo wa nda yomɔɔ.+ 22 O lo lende haaa mi Wana Cho Kani Masindɛ Wo+ huŋ mbo huŋ kiolu yamɛi, okoŋ mi Mɛlɛka Bɛndoo+ wanaa nduaa diandaa sɔla di. Okoŋ mi teleŋ Mɛlɛka kɛɛsiaa wo fuuluu, le mi wanaa diandaa sɔla masaleŋ.+

23 “Nyɛ o dimi wo cho hoo ni: ‘Visi hiɔɔlu ndɔɔ hoo sim le masale hiɔɔlule cho wa o lɛŋndeŋ choo leŋ. Le cho wa teŋgeŋ a masɛi tuɛi kpou. Masaleŋ ndeŋ le cho hunɔɔ lɛŋndeŋ tɛɛmbuu, mi le pesi pesi leŋ, nduyɛ mi le niɔu niɔu leŋ.+ 24 Leela tɔ laŋ ndaŋ la sim le masaa tɔ, a cho hunɔɔ chɔnɔŋ o masaleŋ ndeŋ niŋnda. Masa cheleŋ cho vɛlɛ chɔnɔŋ o nda kɔɔli, o cho wa teŋgeŋ a masaa tasiaa wo, okoŋ mbo faŋa masaa a yaa o masaleŋ choo.+ 25 O cho Mɛlɛka Hiou Kpou Wo+ simul mbo dimul ndu diomndaŋ, nduyɛ mbo hiou lachi a Mɛlɛka Bɛndoo wanaa nduaa diandaa nyɛpalaa tusioo choo. O cho kindiŋ le teleŋndaŋ vɛlɛ a sawaa siŋgaa, okoŋ ma mal ndu wanaa diandaa o ba le teleŋndo, a teleŋndaŋ, vɛlɛ a teleŋndo tɛndaa tɛɛŋ.*+ 26 Kɛ ma kila Toŋgo Kɔɔsɔɔ, okoŋ ma poonda ndu masaleŋ o ba, le halikpeŋ ma tɛɛmbuu ndu kpata kpata.+

27 “‘Mi Mɛlɛka Bɛndoo+ wanaa nduaa diandaa sɔla masaleŋ, dioo le waa masaa, a tɔɔmayɛi le waa o chieeŋndo choo kpou. Masale cho le fɛɛŋ a fɛɛŋ ndeŋ masale ndaleŋ le cho ni,+ nduyɛ masɛi kpou cho nda biilu ma diikuŋ nda.’

28 “Mɛɛlula suɛi hei la cho laŋ ni. Kɛ ya Daaniɛɛ, mi sɔɔŋ ya wa muŋ yiyaŋndo choo woŋ luei ya siooŋnde tau, nduyɛ mi hɔlla siŋgaŋ ya kpou. Mi kɛsiŋ sɔɔŋ muŋ o kɔl kpiŋ.”