Masaa Tasiaa
10 Mɛɛ masa laandoo o lɛŋnde Siɛba leŋ niŋ tuei konaa a mɛɛ Sɔlɔmɔŋ fula tɔɔ le sabu diola Chɛhowa laŋ yɛ,+ mbo huŋ le ndu tofaa a nyunala kala kalalaŋ.*+ 2 Mbo fuuluu Chulusalɛm a buɛiyaa nduaa ndu kɔɔli a hɔbɛi.+ Mi nyɔɔmiaa nduaa huŋ a chuɛima baasam ndaŋ,+ kooliiyoŋ ŋ hɔbɛi, vɛlɛ a pouta baa kala kalalaŋ. Mbo luɛi naa Sɔlɔmɔŋ chua, mbo dimul ndu nyɛ o nyɛ wa ndu o kɔl. 3 Mi Sɔlɔmɔŋ muli nyunala ndɔlaŋ kpou. Nyɛ o nyɛ ve o kala* mi masaa bumba ndu tɛɛsial te.
4 Mɛɛ masa laandoo le Siɛba che mɛɛ kpɛ Sɔlɔmɔŋ nɔ taasioo yɛ,+ chiɛi o taŋgul lo,+ 5 nyɛdiaa wa o tibii* ndɔɔ+ choo wo, mɛɛ buɛiyaa nduaa ndaa challɛ, wanaa ndaa piɔu nyɛdiaa o tibiiyo choo wa a chuɛɛnɔŋ ndaa, wanaa talal ndu muɛiyaŋ nda, a salala luamaala o soli lepaa o lepaa o chiɛi Chɛhowa wo laŋ, mi yoomuaŋ ma fula ndu po. 6 Mbo dimul masaa aa: “Kona ya tuei o lɛŋnde nileŋ niŋ a batiuwaa numndo vɛlɛ a taasi numndo okɔɔ wo, tonya o cho ni. 7 Kɛ yaa laalaŋ a kona ya tueiyo le, mɛɛ mi yapila huŋ chɔ a lehɔl pɛɛŋ. Nduyɛ pɛŋ, nyɛɛmbɔ koni nda doonuŋ ya kona ni. Taasi numndo a sul numndo hiou nyɛ ya tueiyo poloŋ. 8 Kɔl kɛndɔɔ cho le wanaa numnda, nduyɛ kɔl kɛndɔɔ cho le buɛiyaa numnda, a cho num isisi lachi teleŋ o teleŋ ma wa nilaŋ yaŋɔɔ o taasi numndo wa!+ 9 Maa Chɛhowa Mɛlɛka numndo, o hini kɔl a num mbo kɛsi num o kpeŋgbei* lemasaa choo Isɔluɛi yo sɔla saŋgalaa.+ Kaala Chɛhowa nɔ le Isɔluɛiya wo cho le fɛɛŋ a fɛɛŋ. Le saboo hoo o hɛli num ni le ma wa masa, nduyɛ ma dimi sɔɔŋ o nɛi tonyaa choo a o nɛi sakpoo choo.”
10 Okoŋ, mbo ke Masaa Sɔlɔmɔŋ kooliiyoŋ talɛŋndoŋ 120.* Mbo ke ndu vɛlɛ chuɛima baasam ndaŋ+ tau tau, a pouta baa kalalaŋ.+ Chɔŋ niŋ a teleŋ koŋ, Masaa Sɔlɔmɔŋ sɔla lɛ chuɛima baasam ndaŋ mi ma sulaŋ a chuɛima masa laandoo le Siɛba ke ndu waŋ te.
11 Mi dɛndɛla mamɛŋnda Hiluam ndaŋ laa kuɛ Ofii le kooliiyoŋ.+ Mi laa chua vɛlɛ yɔmii alikɔm nde+ loŋ i hɔbɛi a pouta baa kalalaŋ+ le hunɔɔ a laŋ. 12 Mi Masaa Sɔlɔmɔŋ toosiaa nyɛla wana saa le helɔɔ laŋ a yɔmii alikɔm nde le chiɛi Chɛhowa wo, a le chiɛi ndɔ ndupilaa.* Mbo toosiaa vɛlɛ towalaŋ a nyɛm chaaŋ iyooŋ a ndi, le wanaa soliaa ŋchonduaa.+ Chɔŋ niŋ a teleŋ koŋ haaa huŋ bii a paale hauleŋ ndeŋ, a hiŋ lɛ a yɔmii alikɔm nde i suu keŋ te, nduyɛ i chiŋnuŋ ndɛ le.
13 Mi Masaa Sɔlɔmɔŋ bɛɛ ke masa laandoo le Siɛba nyɛ o nyɛ ndoo yeema nduyɛ mbo nyuna le ndu, o faŋaŋndɔ o nyɛm Sɔlɔmɔŋ pila soli mbo ke ndu woŋ kɔɔli. Okoŋ kɔɔli, mbo mal mbo miiŋgu o lɛŋnde ndɔleŋ niŋ a buɛiyaa nduaa latulu.+
14 Kooliŋ Masaa Sɔlɔmɔŋ ndoo sɔla o wɔsioo niŋndoŋ, lusul ndɔɔ ndoo wa talɛŋndoŋ 666,+ 15 o faŋaŋndɔ o nyɛ ndoo sɔla yulaa pɔmbuaa a yulaa bɛnduaa o ba wo. Mi ndoo sɔla vɛlɛ tɔnɔɔ masaa Alabuiya, a masaa ŋbuŋgaa o lɛŋndeŋ niŋ kpou o ba.
16 Mi Masaa Sɔlɔmɔŋ toosiaa boola bɛndula chɔulaŋ 200 a kooliŋ muuliaŋ ndoŋ.+ (Nduyɛ kooliŋ muuliaŋ ndoŋ siɛkɛlloŋ 600* o soliŋ kpeku ni le boo kɛ kɛ toosiaa.)+ 17 Mbo toosiaa vɛlɛ boola pɔmbɔla chɔulaŋ 300 a kooliŋ muuliaŋ ndoŋ. (Nduyɛ boo kɛ kɛ, kooliiyoŋ mainɛiyoŋ ŋgaa* nda soliŋ kpeku ni le ndu toosiaa.) Okoŋ, mi masaa kɔ kɛsi nyɔɔŋ muŋ o Chiɛi Bundɔɔ Lebanɔŋ.+
18 Mi masaa toosiaa vɛlɛ kpeŋgbei lemasa tɔɔma bɛndoo a chiŋuŋ kamaa,+ okoŋ mbo kumbu ndu a koolii kɛndɛ kɛndɛi.+ 19 Biŋndaŋ la wa la ŋɔmpum le helɔɔ o kpeŋgbei lemasaa hoo. Nduyɛ ndoo nɔ nyɔɔ o tiilaŋ amakɔɔ maa yindɔ. Kpeŋgboo hoo ndoo nɔ vɛlɛ fondaa o kpeŋguŋ muuŋ ndoŋ le balaŋ kɛsioo. Kpɔkuŋnda* a ŋiɔɔŋ+ wa isisi o kpeŋgoŋ vellaa velle, naa nda toosiaa le balaŋ kɛsioo wa. 20 Nduyɛ kpɔkuŋnda 12 wa o biŋnda ŋɔmpum nda wa le helɔɔ laŋ choo. Biŋ kɛ kɛ, kpɔkuŋndo o pilɛ wa kpeŋgei i pilɛ, o pilɔɔ wa kpeŋgei i pilɛi. Masale kɛ kɛ lee toosiaa wɔ kpeŋgbei lemasa waa nuaa le.
21 Taalala kolaala Masaa Sɔlɔmɔŋ ndaŋ kpou, a kooliiye ndaa toosiaa laŋ ni. Nduyɛ nyɛm laanduŋ wa o Chiɛi Bundɔɔ Lebanɔŋ ndoŋ+ bɛɛ, a koolii kɛndɛ kɛndɛi ndaa toosiaa muŋ ni. A toosiaa nyɛ o nyɛ a kanii humbuei le. Kanifuule o palɛi Sɔlɔmɔŋ nde niŋ,+ ndaa chi kanii humbuei nyɛ o nyɛ le. 22 Nduyɛ, Masaa Sɔlɔmɔŋ ndoo nɔ dɛndɛla bɛndula mamɛŋnda kua Taasi+ laŋ o pioo choo, a dɛndɛla Hiluam ndaŋ latulu. Le pilɛ o wɔsilaŋ la yaa bɛŋgu, mi dɛndɛlaŋ ndaŋ laa hiŋ la piaa cha a kooliiyoŋ, kaniŋ humboŋ, chiŋuŋ kamaa,+ tɔkpuaa, a youwaa bɛnduaa kɛndɛ kɛndiaa.
23 Masaa Sɔlɔmɔŋ ndoo sul,+ nduyɛ ndoo nɔ taasioo+ mbo hiau masaa wa o lɛŋndeŋ choo wa kpou. 24 Nduyɛ, waŋnda o lɛŋndeŋ choo kpou wa hunɔɔ naa Sɔlɔmɔŋ chua, le ma tuei taasi Mɛlɛka dɔu ndu o kɔllo.+ 25 Nda kpou te o kɛ kɛ ndoo wa pɛ hunɔɔ, mi ndoo hiŋ a nyɛ o ba le ndu kioo. Mi ndaa chuu ndu nyɛm nda toosiaa a kaniŋ humboŋ ndoŋ, nyɛm nda toosiaa a kooliiyoŋ ndoŋ, nyɛla chuɛɛnaŋ ndaŋ, nyɛm chɔuwoŋ, chuɛima baasam ndaŋ, suaa, a chɔluaa yɛyii muuliaŋ nda.* Nduyɛ, nuaa ndaa tosa iwɔsi o iwɔsi ni.
26 Mi Sɔlɔmɔŋ hiau lachi a nyɛm nyaanaŋ suaa naŋndoŋ deŋgelaa, vɛlɛ a suaa.* Ndoo nɔ nyɛm nyaanaŋ suaa naŋndoŋ 1,400 a suaa* 12,000.+ Mbo kɛsi nyɛm nyaanaŋndoŋ muŋ ŋ tiŋ o chieeŋ o taŋgul le muŋ ndoŋ, mbo kɛsi ŋ tiŋ ndupila ikɛi Chulusalɛm.+
27 Mi masaa tosa mi kaniŋ humboŋ hɔba Chulusalɛm mɛɛ poutaŋ la wa nuaa yɛ. Nduyɛ yɔmii sida ve bɛɛ, i waŋnuŋ i hɔbɛi maa yɔmii sikamɔɔ ve o tanda Siɛfila wo niŋ.+
28 Suaa Masaa Sɔlɔmɔŋ ndoo nɔ wa, Ichipi ndaa kua nda chuaa ni ma huŋ a nda. Nduyɛ, yulaa nduaa ndaa kua nda piondɔɔ loŋ ni a kundalaŋ* mɛɛ baa wa yɛ.+ 29 Nyɛm nyaanaŋ suaa naŋndoŋ, ŋ nda pendu Ichipi woŋ, o pilɛ baa ndɔɔ wa kaniŋ humboŋ 600. Nduyɛ soo o pilɛ, baa ndɔɔ wa kaniŋ humboŋ 150. Okoŋ kɔɔli, mi ndaa kuɛ a nyɔɔŋ muŋ vɛlɛ a suaa haa o masaa Hitaitiiya,+ a o masaa wa Siiliaa wa lo.