Ɛsodɔɔ

20 Okoŋ, mi Mɛlɛka dimul nda diomndaŋ ndaŋ kpou aa:+

2 “Ya cho Chɛhowa Mɛlɛka nyaa ni. Ya soli nya o chɛleŋ niŋ o lɛŋnde Ichipi leŋ niŋ ni.+ 3 La nɔ mi la piɛi mɛlɛkaa cheleŋ o ya kɔɔli le.*+

4 “La nɔ mi la sɛl piɔmndo ɔɔ velaŋ nyɛ o nyɛ waa o choo choo niŋ, o lɛŋndeŋ choo, ɔɔ nyɛ cho o mɛŋndaŋ bɛŋgu wo le.+ 5 La nɔ mi la beŋ muŋ wulaŋ, ɔɔ mi wana vɛɛlu nya le muŋ sooluuwo le.+ Kanifuule ya Chɛhowa Mɛlɛka nyaa, yapilɛ kpe nya nɔ ni mi la piɛi.+ Nduyɛ wanaa tul la leyɛ wa, I cho chuauwaa ndaa, chuauwaa ndaa mamaa, a chuauwaa mamaa o chuauwaa ndaa mamaa kɔɔli nyɛpalaa tusi choo, le hakila finyaa ndaa tosa laŋ. 6 Kɛ wanaa kaala ya nduyɛ ma bii sawala nilaŋ nda, I cho chuauwaa ndaa, a chuauwaa mamaa o chuauwaa ndaa mamaa kɔɔli kaala lo lechoo wo chɔm.+

7 “La nɔ mi la tɛɛmbuu diola ya Chɛhowa Mɛlɛka nyaa labɛɛ le.+ Kanifuule wana o wana tɛɛmbuu pɛ diola nilaŋ labɛɛ, nyɛpalaa ya Chɛhowa tusi ndu choo ni.+

8 “La loonuŋ a Paale Pɛŋgiaaleŋ, mi le wa le diandaa.+ 9 La nɔ mi la tosa walta nyalaŋ kpou o palɛi i ŋɔmpum bɛŋgu.+ 10 Kɛ paale ŋɔmmɛu leŋ, paale pɛŋgiaaleŋ le cho le Chɛhowa Mɛlɛka nyaa ni. Nya ni, puaa nyaa ni, chuauwaa nyaa laanduaa ni, buɛiyaa nyaa piaanduaa ni, buɛiyaa nyaa laanduaa ni, chɔluaa nyaa ni, vɛlɛ a mialaa cho nya tɛɛŋ nda kpou, la nɔ mi la tosa wali o wali o paale leŋ choo le.+ 11 Kanifuule, o palɛi i ŋɔmpum bɛŋgu Chɛhowa toosiaa choo choo, lɛŋndeŋ, pee mɛŋma ihɛllo, vɛlɛ a nyɛ o nyɛ cho leniŋ ni, okoŋ mbo pɛŋgi o paale ŋɔmmɛu leŋ choo.+ Le saboo hoo Chɛhowa dɔu paale pɛŋgiaaleŋ sala ni, mbo tosa mi le wa paale diandaa.

12 “Ke finya num a kala num bɛɛleŋ,+ le halikpeŋ ma viou yoomu o lɛŋnde Chɛhowa Mɛlɛka nyaa cho nya ke leŋ niŋ.+

13 “A nɔ ma dii wanachioo le.+

14 “A nɔ ma suunda le.+

15 “A nɔ ma yɔŋ levii le.+

16 “A nɔ ma timbi seile lakafaleŋ a chaaŋ num wanachioo okɔɔ le.+

17 “A nɔ ma luɛi chiɛi chaaŋ num wanachioo hɔlteŋ te. Nduyɛ nyɛ o nyɛ cheleŋ o nɔ, o wa laa ndɔ,+ buɛi ndɔ piaandoo, buɛi ndɔ laandoo, nau ndɔɔ, ɔɔ sofɛlɛ ndɔɔ, a nɔ ma luɛi ndu hɔlteŋ te.”+

18 Waŋnda kpou wa tueiyɔɔ taŋndaŋ deŋioo a bulu wa suɛi yo. A wa chɔɔ nyɔɔ kiolioo ŋualalɛi ŋualalɛi, vɛlɛ a kumnde helɔɔ tukpe tukpe o pembei choo. Mɛɛ nda che sɔɔŋ muŋ, ma nyiiya kpa kpa a siooŋnde o fondaŋ nda wa wo.+ 19 Le hei, ma dimul Muuse aa: “Siooŋnde cho naa maa te Mɛlɛka soo pɛ o naa lo, ŋ cho wu. Lelaŋ, numpila soo o naa lo miŋ yaŋ num nilaŋ.”+ 20 Okoŋ, mi Muuse dimul Isɔluɛiya aa: “La yɔŋ isiooŋ te. Kanifuule le nya dɔwɔɔ o tofaa bɛŋgu Mɛlɛka tonyaa hiŋ ni,+ le halikpeŋ mi la hiou lachi a siooŋii nduɛi nɔɔ, okoŋ la tosa hakioo le.”+ 21 Mi waŋnda hiau lachi a simndaŋ naa nda wa isisi wa, kɛ mi Muuse sɔɔŋguu yumbu yumbu piimiɛiyo ikɛi, naa Mɛlɛka tonyaa wa wa.+

22 Okoŋ, mi Chɛhowa dimul Muuse aa: “Nyɛ ŋ nɔ ma dimul Isɔluɛiya wo cho hoo ni, ‘Nyapila che kpendekele maa I lo o choo choo niŋ mi suaa o nya lo.+ 23 La toosiaa mɛlɛkaa cheleŋ a kanii humbuei ɔɔ a kooliiye le, kanifuule o fulawɔ o ya kɔɔli, la nɔ mi la nɔ mɛlɛkaa cheleŋ te.+ 24 La toosiaa bandu luamaa lasalaa a puuloo le ya, mi la wa salala nyala luamaa laŋ, salala nyala kɔl nyulu laŋ, saa nyaa, chuiŋaa nyaa, vɛlɛ a nauwaa nyaa salaa solioo lechoo. Fondaŋ kɛ kɛ ya hɛli pɛ le mi la wa diola nilaŋ veeloo loŋ,+ I cho lakɔ naa nya chua loŋ, mi dɔu nya sala. 25 Te la wa ya bandu luamaa lasalaa teŋgullo a poutaŋ pɛ, la taŋgul ndu a pouta sialaa laŋ* te.+ Te la soliŋ pɛ nyɛ sialaa lapouwo kpeku le ndu toosiaa, I chɛl bandu luamaa lasala koŋ te. 26 Bandu ni luamaa lasalaa nɔ mbo nɔ fondaŋ wana keeku le helɔɔ wo le, yɔŋii waŋnda chɔ labɛŋguniŋ nyaa.’*