Ikilisiaati

7 Diola kɛndɛlaŋ la* bɛnda mbo hiau chuɛima kɛndɛ kɛndiaŋ.+ Nduyɛ paale waŋndo wu leŋ le bɛnda mbo hiau paale o veluŋ ndeŋ. 2 O bɛnda mi wana kuɛ o bɛɛ biisioo mbo hiau kɔlaŋ o bɛɛ dunyɛi cho wo.+ Kanifuule, loŋ wana o wana cho mɛɛlu ni. Nduyɛ, wanaa cho yoomu wa nɔ ma kɛsiŋ keŋ o kɔl. 3 Kɔl tambɛiyo bɛnda mbo hiau mamɔɔ.+ Kanifuule, mi kɔl tambɛiyo tosa mi waŋndo sinaŋ nyɛkɛndɛi.+ 4 O bɛɛ biisioo wana taasioo handu kɔllo ni. Kɛ diɔmndo ndu, o bɛɛ yelelaŋndo cho wo* o handu kɔllo ni.+

5 O bɛnda mi wana yaŋ nilaŋ o sila wana taasioo,+ mbo hiau chondii diɔmnda soli ve nilaŋ yaŋɔɔ. 6 Mɛɛ yɔɔŋ wa nuaa ŋɔɔ miŋ piɛndi o kpɛɛnɛi bɛŋgu yɛ, lende mamɔɔ diɔmndo cho ni.+ Nduyɛ hei bɛɛ, nyɛ fondoo fuu i cho ni. 7 Kɛ wana taasioo bɛɛ, mi nyɛkindilaa nyindu ndu mbo tosa sɔɔŋ maa wana seemɛi. Nduyɛ, mi luɛiyɔɔ niŋndo luei waŋndo kafalaŋ o kɔl.+

8 Mɛɛlulaŋ la bɛnda o isɔɔ o isɔɔ niŋ mbo hiau o kandɔŋndo. Nduyɛ, o bɛnda mi wana wa wana biuwaŋ mbo hiau waa wana heelaŋ.+ 9 O bɛnda mi wana dɔɔnuŋ tumbe chɔ chɔ le.+ Kanifuule, diɔmnda duaunuŋ tumbe chɔ chɔ ni.*+

10 O bɛnda ma nyuna aa: “Le yɛɛnɛ sɔɔŋ muŋ bɛnda yɛ o sindɔɔ niŋ mbo hiau teleŋndo hoo?” le, kanifuule taasi cho o nyuna waa lende niŋ te.+

11 Taasioo a nyɛm kiɔɔŋ latulu cho bɔɔ nyɛ kɛndɛ, nduyɛ o wa tɔnɔɔ le wanaa cho yoomu wa.* 12 Kanifuule mi taasioo manda wana,+ mɛɛ kaniei* manda wana yɛ.+ Kɛ tɔnɔ kɔl kaloo nɔ wo cho hoo ni: Mi taasioo manda yoomu wana nɔ ndu wo.+

13 Yiyaŋndɔ a walta Mɛlɛka tonyaa okɔɔ. Nɛɛnɛ nɔla yɛ mbo siɛɛnduu nyɛ Mɛlɛka tundu tunduu wo?+ 14 O paale kɔl kɛndɛleŋ choo, tosa sɔɔŋ kɛndɔŋ.+ Nduyɛ te sɔɔŋ palaŋ komal num pɛ, kɛsiŋ o kɔl maa Mɛlɛka chɛl ni mi sɔɔŋ muŋ wa vellaa velle,+ le halikpeŋ waŋnda chieeya nɔla ma sina* nyɛ cho nda yɔŋnɔŋ o chilaŋ niŋndo le.+

15 O yoomu ni fondoo hoo niŋ,+ I che niŋ nyɛ o nyɛ fee. I che niŋ mi wanaa sandaa keleŋa wu o sandii ndɛi choo,+ nduyɛ mi wanaa dɛnɛ wɔɔŋnda viau yoomu o dɛnɛ nda wɔɔŋndo choo.+

16 O bɛnda ma hiu sandei chɔm te,+ nduyɛ o bɛnda ma hiu taasioo chɔm te,+ yɔŋii ŋ tɛɛmbuu numpila.+ 17 Yɔŋguŋ o dɛnɛ wɔɔŋndo tosaa niŋ te, kɛlɛŋgaa niŋ te ma wa diɔm,+ yɔŋii ŋ keleŋa piɔmndo sɔla.+ 18 O bɛnda ma bii silala tiɔɔŋndaŋ ndaŋ kpou. A mulul o kɛ kɛ kɔɔ le.+ Kanifuule, mi wana nɔ siooŋnde le Mɛlɛka wo bii laŋ kpou.

19 Taasioo tosa mi wana taasioo nɔ kpaayaa mbo hiou laŋgbaa dialuŋ kalaa tɔ o chiee bɛndoo niŋ.+ 20 Wana sandaa kɛ kɛ cho o lɛŋndeŋ choo mbo tosa sɔɔŋ kɛndɔŋ teleŋ o teleŋ, o tosa haki le wo le.+

21 O bɛnda vɛlɛ ma kɛsiŋ nyɛ o nyɛ waŋnda dimi wo o kɔl te.+ Kanifuule, naapum a nɔla ma tuei buɛi numndo sɔɔŋ wɔɔŋndoŋ dimioo a num okɔɔ.* 22 Numpila sina o kɔl numndo niŋ kɛsɛ maa teleŋnda bɔɔbɔɔ a dimi niŋ sɔɔŋ wɔɔŋndoŋ a acheleŋnda okɔɔ.+

23 Mi yiyaŋ o sɔɔŋ muŋ choo kpou a taasi ya nɔ wo, nduyɛ mi dimi aa: “I cho simnɔŋ wana taasi.” Kɛ ndii hiou ya mayoomu. 24 Sɔɔŋ yɔŋnuŋ niŋndoŋ, wana nɔla ma sina muŋ pɛŋgu le. Ŋ cho ko maa fondaŋ yiŋgilɛi bɛndu bɛndoo. Nɛɛnɛ nɔla yɛ mbo bii muŋ bila?+ 25 Mi handu kɔllo le sinaa, nduyɛ mi nuuviaa, okoŋ mi yaasiaa le taasioo, mi sina le sabu sɔɔŋ yɔŋnuŋndo, nduyɛ mi bii bila mɛɛ dɛnɛ wɔɔŋndo cho suɛi idiɔm, mi diɔmnde wa suɛi seemɛi yɛ.+ 26 Okoŋ mi bii hei bila: Wana lanɔ cho hoo maa leyaŋɔɔ wo,* o lol o hiou piɔmndo. Kɔl ndɔɔ cho ko maa yala yɔɔyaa, nduyɛ mi bala ndɔlaŋ la wa maa yɔlɔŋ chiɛi manyum. Mi wana nɛŋi Mɛlɛka tonyaa kɔllo wo hɛluŋ ndu,+ kɛ mi wana tosa yɔŋ wɔɔŋndo wo del o yaŋɔɔle ndɔleŋ niŋ.+

27 Mi wana pɛɛkaa+ dimi aa: “Nyɛ ya mɛɛlu sina wo cho hoo ni, mi yaasiaa nyɔɔŋ ŋ pilɛŋ pilɛŋ le mi kelu yamɛi a muŋ okɔɔ. 28 Mi hiau lachi a nuuviaa, kɛ I seeluŋ nyɛ ya wa nuuviaa wo le. O waŋnda waa pilɛ tɛɛŋ, mi saaluŋ wana pɔnɔɔ o pilɛ o cho sakpo wo. Kɛ wana lanɔɔ o pilɛ bɛɛ I seeluŋ ndu nda tɛɛŋ mbo wa sakpo le. 29 Nyɛ ya saaluŋ kinɛiyo cho hoo ni: Mɛlɛka tonyaa toosiaa waŋnda chieeya le ma wa sakpo,+ kɛ ma nuuviaa nɛilaŋ le sɔɔŋ wɔɔŋ bɔɔbɔɔ tosaa.”+