Polowaa
10 Talela Sɔlɔmɔŋ ndaŋ+ la cho laŋ ni:
Mi po nɔ taasioo wo nɛŋi finya ndɔ kɔl,+
Kɛ mi po nɔ diɔmnde wo chuu kala ndɔ kɔl tambɛiyo.
2 Sulta waŋndo sɔla o dɛnɛ wɔɔŋndo choo laŋ la nɔ tɔnɔ le.
Kɛ mi sɔɔŋ tosaa o nɛi sakpoo choo piŋi waŋndo o piɔmndo niŋ.+
3 Chɛhowa chɛl mi wana cho sakpo wo wa a yiaaŋ te.+
Kɛ mbo tosa wana dɛnɛ wɔɔŋndo sɔla nyɛ o yeema wo le.
4 Siɛlɛiye, bala fondolaŋ i chuu wana ni.+
Kɛ wana tosa wallo wo, o sullo niŋ o mɛɛlu ni.+
5 Mi po nɔ taasioo wo kou tɔlɔɔla ndɔlaŋ a wɔɔleŋ.
Kɛ po hiniŋ hoo a teleŋ nda kuau tɔlɔɔlaŋ ndo, mi siɔmbulaŋ la bii ndu.+
6 Salaa cho wana cho sakpo wo choo.+
Kɛ wana dɛnɛ wɔɔŋndo, o dimi sɔɔŋ wɔɔŋ o tuunuŋ o kɔl loŋ te.
7 I cho bɔɔ suɛi tɔnɔ le loonɔŋndo a wana sakpoo okɔɔ.+
Kɛ haupa mi waŋnda puɛɛnuŋ a wana dɛnɛ wɔɔŋndo okɔɔ.+
9 Mi wana wa sakpo o kelala ndɔlaŋ niŋndo waŋnuŋ hɛnɛkɛ.+
Kɛ wana tosa sɔɔŋ o kafalaŋ choo wo, saalɔŋndo nda saaluŋ ndu ni.+
10 Wana wa hoo suɛi mbo kinda hɔlteŋ ikɛi yo, kɔl tambɛiyo o chuu wana ni.+
Nduyɛ, mi wana dimi sɔɔŋ ŋdiɔmndoŋ ndo del o saŋgaa niŋ.+
11 Mi sɔɔŋ wana cho sakpo wo dimi woŋ tosa mi wana sɔla yoomoo.+
Kɛ wana dɛnɛ wɔɔŋndo, o dimi sɔɔŋ wɔɔŋ o tuunuŋ o kɔl loŋ te.+
12 Mi yɛletulaaleŋ le hiŋ a sɔŋgɔlaŋ,
Kɛ kaalaa kumbu biondɔŋndaŋ kpou ni.+
13 Sɔɔŋ wana nɔ sinapɛŋgoo wo dimi woŋ chɔm ni maa o nɔ taasioo.+
Kɛ wana nɔ kɔl kalu bɔɔ le wo, sioŋndeŋ le feŋaŋ ndu o kɔɔ le.+
14 Wanaa nɔ taasioo wa kaala kɔl kaloo.+
Kɛ mi sɔɔŋ diɔmnda dimi woŋ luei wana o nyɛpalaa niŋ.+
15 Wana sulaa, chiee ndɔ bɛndu kala kalaa cho sul ndɔɔ* ni.
Kɛ wanaa bala fonduaa, mi kuɛi luei nda o nyɛpalaa niŋ.+
16 Mi sɔɔŋ wana cho sakpo wo tosa woŋ ke wana yoomoo.
Kɛ mi sɔɔŋ wana dɛnɛ wɔɔŋndo tosa woŋ luei wana o hakioo niŋ.+
17 Wana chɛl silaa wo, nɛi yaa wana o yoomoo wo o cho ni.*
Kɛ wana kɛɛ silaa wo, ndu yaa acheleŋnda o nɛi wɔɔŋndo choo ni.
18 Wana veŋ pɛ yɛle ndɔle tulaaleŋ, choolaŋ o dimi ni.+
Nduyɛ wana kei hoo waŋnda choŋgulaŋ ndo, diɔmndo o cho ni.
19 Te wana hiu suɛi pɛ, a tosa hakioo.+
Kɛ wana o wana dɔu pɛ sondo ndɔɔ o mandaa bɛŋgu, wana taasioo o cho ni.+
20 Diɔɔmule wana cho sakpo wo cho ko maa kanii humbuii kɛndɛ kɛndɛi.+
Kɛ kɔl wana dɛnɛ wɔɔŋndo nɔ tɔnɔ bɔɔ le.
21 Mi sɔɔŋ wana sakpoo dimi woŋ mala wanaa bɔɔbɔɔ.*+
Kɛ mi diɔmndo vi le kɔl kalu lepɛŋndo.+
23 Diɔmndo che ko sɔɔŋ lasiɔmboŋ tosaa maa lapisul.
Kɛ wana nɔ sinapɛŋgoo wo tosa sɔɔŋ a taasi ni.+
24 Sɔɔŋ wana dɛnɛ wɔɔŋndo wa siooŋnde le muŋ ndoŋ, muŋ komal ndu ni.
Kɛ mi wana cho sakpo wo sɔla nyɛ o yeema wo.+
25 Te hueiyii fuku fukuei hɔŋ pɛ, wanaa dɛnɛ wɔɔŋnda ve lɛ niŋ kposoŋ te.+
Kɛ wana cho sakpo wo cho wa le fɛɛŋ a fɛɛŋ.+
26 Mɛɛ muɛima waalɛiyaŋ ma waaliaa nuaa chiŋndoŋ nduyɛ mi kumnde nɛi o lahɔl lɛ,
Lende koni wana siɛlɛiyo tosal wana vem ndu wo* ni.
27 Siooŋnde nɔɔ le Chɛhowa tosa mi wana viou yoomu.+
Kɛ wana dɛnɛ wɔɔŋndo viu yoomu le.+
28 Mi tiindaŋ wana cho sakpo wo chuu ndu nyaaloo.+
Kɛ mi tiindaŋ wana dɛnɛ wɔɔŋndo simnuŋ nyɛ fondoo.+
29 Nɛi Chɛhowa wo cho tiindaŋ kala kalaa le wana tɛɛmbuu isɔɔ le wo ni,+
Kɛ nyɛpalaa o cho ni le wanaa tosa sɔɔŋ wɔɔŋndoŋ nda.+
30 Fɛɛŋ bɛɛ wanaa cho sakpo wa del te.+
Kɛ wanaa dɛnɛ wɔɔŋnda cho lɛ wa o lɛŋndeŋ choo le.+
31 Wana cho sakpo wo, sɔɔŋ taasioŋ o dimi ni.
Kɛ diɔɔmule dimi sɔɔŋ wɔɔŋndoŋ ndeŋ, a cho leŋ hunɔɔ kiolɔɔ kpali.
32 Wana cho sakpo wo sina sɔɔŋ o dimi mi waŋnda naŋ kɔl loŋ.
Kɛ wana dɛnɛ wɔɔŋndo ndu, sɔɔŋ wɔɔŋndoŋ o dimi ni.