Maki

7 Okoŋ, mi Falisiiya a wanaa pɛɛku waŋnda sawala Mɛlɛkalaŋ nda apum, a ndaa fula Chulusalɛm nda chuuŋgiaŋ Chiisu ikɛi.+ 2 Ma cha buɛiyaa nduaa apum nyɛdiaa dioo a bala nɔɔlɛilaŋ. Koŋ cho ni, a pulu laba le.* 3 (Tuupa mi Falisiiya a Chuuwa kpou ndaa de nyɛdiaa, mɛɛ mi ndaa pulu fɛlɛŋ balaŋ haaa o duŋndo. Kanifuule, naamu finyaa ndaa mamaa nda wa tolɔɔ kɔɔli ni. 4 Nduyɛ te ndaa fula pɛ o lɔɔ niŋ, mɛɛ mi ndaa puluŋ fɛlɛŋ malaŋ ndaa dia nyɛdiaa. A wa naamula cheleŋnda bɔɔbɔɔ tolɔɔ kɔɔli, mɛɛ taalalaŋ, kpɛɛnɔŋ, a nyɛm laanduŋ nda toosiaa a chiliŋii siaŋɛi yoŋ* yiŋɔɔ o mɛŋndaŋ niŋ cho nuaa yɛ.)+ 5 Mi Falisiiya haa a wanaa pɛɛku waŋnda sawala Mɛlɛkalaŋ nda nyuna ndu aa: “Le yɛɛnɛ buɛiyaa numnda cho yɛ naamula finyaa naa mamaa tɛɛmbuuwo, ma wa nyɛdiaa dioo a bala nɔɔlɛilaŋ?”+ 6 Mbo mulul nda aa: “Nya wanaa mulu muluaŋnda haa, a nya okɔɔ kpeekpei Aisaya dimi ni aa: ‘A lasondo waŋnda haa cho ya bɛɛleŋ kioo ni, kɛ kɔlta ndalaŋ la choŋnuŋ landaŋ a ya.+ 7 Fondo fuu nda cho ya piɛiyo ni, kanifuule sawala waŋnda chieeya nda pɛɛku waŋnda ni.’+ 8 La kpeeŋa sawala Mɛlɛkalaŋ ikɛi, mi la wa naamula waŋnda chieeya tolɔɔ kɔɔli.”+

9 Mbo chɔɔlu nda dimul aa: “La chaa bɔɔ kafɛilaŋ nuuviaa le sawala Mɛlɛkalaŋ kiɔɔ, le halikpeŋ mi la tol naamula nyalaŋ kɔɔli.+ 10 Le tamaseliiyo, mi Muuse dimi aa, ‘Ke finya num a kala num bɛɛleŋ.’+ Mbo dimi vɛlɛ aa, ‘Wana o wana dimul pɛ finya ndɔ ɔɔ kala ndɔ diomnda wɔɔŋndaŋ, o nɔ mbo sɔla piɔmndo.’+ 11 Kɛ mi nya dimi aa, ‘Te waŋndo dimul pɛ finya ndɔ ɔɔ kala ndɔ aa: “Nyɛ o nyɛ yaa nɔ le num kioo, kɔbaŋndo o cho ni (koŋ cho ni, ke cho o yɔŋgaŋ o Mɛlɛka lo wo),”’ 12 pesiŋ bɛɛ la chɛllɛ mi wana koŋ mala finya ndɔ ɔɔ kala ndɔ le.+ 13 La siiŋguu diom Mɛlɛkaa nyɛ fondoo fuu a naamula nyalaŋ.+ Nduyɛ la cho sɔɔŋ bɔɔbɔɔ waa nuaa tosaa.”+ 14 Okoŋ, mbo veelu vɛlɛ faŋgaa mbo dimul nda aa: “Nya kpou la yaŋ nilaŋ nyɛkɛndɛi mi la bii bila.+ 15 O cho nyɛ waŋndo dia wo le nɔɔliaa ndu le, kɛ nyɛ fula ndu o sondo wo, ndu nɔɔliaa ndu ni.”+ 16* ——

17 Mɛɛ o mɛi waŋnda mbo luɛi chiɛiniŋ, mi buɛiyaa nduaa kandu ndu nyuuniaa le nyɛ taloo hoo sim ndo.+ 18 Mbo nyuna nda aa: “Mɛɛ nya bɛɛ la sina wɔ suɛi hei lapɛŋgu le? La sina wɔ maa o cho nyɛ waŋndo dia wo le nɔɔliaa ndu le le? 19 Te waŋndo de nyɛdiaa pɛ, o cho o kɔllo niŋ te o kua le, kɛ o dembe, okoŋ mbo kɔ sɔndaŋ ndu.” Nyɛ Chiisu dimi wo chɔm maa nyɛdiaa o nyɛdiaa naŋ le dioo. 20 Mbo hiau lachi a dimioo aa: “Nyɛ fula waŋndo o sondo wo, ndu nɔɔliaa ndu ni.+ 21 Kanifuule, o kɔl wanachioo niŋ sɔɔŋ wɔɔŋndoŋ fula ni:+ yiyaŋnda wɔɔŋndaŋ, kaa ihini nɔɔlɛiyo,* viileŋ, yiyaŋ diyaa wanachioo, 22 suundaa, hɔlteŋ nɔɔ, sɔɔŋ dɛnɛ wɔɔŋndoŋ tosaa, kaŋgalaa, kaa kɔl vesɛiyo,* paŋalaa, sɔɔŋ wɔɔŋndoŋ dimioo a waŋndo okɔɔ, yoŋgaa, a kiɔɔ sinapɛŋgoo nɔɔ. 23 O kɔllo niŋ sɔɔŋ wɔɔŋndoŋ muŋ kpou fula ni, nduyɛ muŋ nɔɔliaa wanachioo ni.”

24 Mi Chiisu faŋaŋ loŋ mbo kua o tanda Taaya a Saidɔŋ ndo niŋ.+ Mbo luɛi o chiɛiyo opum niŋ. Ndoo yeema mi wana sina a ndu okɔɔ le. Kɛ ndoo nɔla vioŋnɔŋndo le. 25 Mɛɛ o fuuluu dɔɔ, mi chua pilɛ, o nyina wɔɔŋndo wa chua ndɔ pɔmbɔɔ kɔɔli wo tuɛi a ndu okɔɔ, mbo huŋ beŋ ndu wulaŋ.+ 26 Kilikiinɔɔ chuaa hoo wa ni, fulaa Foniisiaa o lɛŋnde Siiliaa leŋ niŋ. Mbo lambaŋ Chiisu nyɔɔloo le mbo tou nyina wɔɔŋ wa chua ndɔɔ kɔɔli wo. 27 Kɛ mi Chiisu dimul ndu aa: “Chuaambuaa fɛlɛŋ nɔ ma de ma pim. Kanifuule, o bɛnda mi wana chua nyɛdiaa cho le chuaambuaa wo ma dou tuŋaa chuauwa le.”+ 28 Mbo mulul Chiisu aa: “Tonya i cho ni fallo. Kɛ tuŋaa chuauwa bɛɛ, te chuaambuaa wa pɛ nyɛdiaa dioo, kuuwuŋ deli o tibiiyo* bɛŋgu woŋ, muŋ nda bɛɛ dia ni.” 29 Mi Chiisu dimul ndu aa: “Le nyɛ ŋ dimi hoo wo, kɔŋnuŋ. Nyina wɔɔŋndo faŋaŋ chua numndo kɔɔli.”+ 30 Okoŋ mi chuaa kuaŋnuŋ o ndu lo. Mɛɛ o fuuluu, o komal chuaambɔɔ ihini o kpele. Nyina wɔɔŋndo ndoo faŋaŋ ndu niŋ kɔɔli.+

31 Mɛɛ Chiisu faŋaŋ o tanda Taaya wo niŋ, mbo miiŋgu Saidɔŋ o Pee Mɛŋma Ihɛllo Kalili, o tanda Dɛkapɔlii* yo niŋ.+ 32 Ma chuu ndu po nila baŋulɛiyo, nduyɛ ndoo chiee vɛlɛ suɛi lapi le.+ Ma nyɔɔlu Chiisu le mbo handu ndu baa choo. 33 Mi Chiisu faŋaŋ a poo hoo faŋgaa tɛɛŋ. Mbo wou ndu sooŋ o lani. Nduyɛ mɛɛ o tufu lɔluaŋ, mbo pilaŋ ndu diɔɔmuleŋ.+ 34 Mɛɛ Chiisu heelu hɔlla choo choo, mbo yoomu fuu, okoŋ mbo dimul ndu aa: “Ɛfata,” koŋ cho ni, “Kumbiŋ.” 35 Mi nila poo hoo la kumbiŋ,+ nduyɛ mi diɔɔmule ndɔleŋ le yɔŋnuŋ fefele. Okoŋ mbo kandu suɛi nyɛkɛndɛi. 36 Mi Chiisu sila nda maa a dimul wana o wana le.+ Kɛ mɛɛ o sila nda fau, lende koni nda hiau lachi a ndi pɛŋgɛlaa ni.+ 37 Mi kɔndɔfili bɛndoo bii nda,+ ma dimi aa: “Sɔɔŋ kɔndɔfilloŋ kpu o tosa ni. Mbo tosa pɛŋ mi wanaa nila baŋulɛiya tuei, nduyɛ mi bobuaa soo.”+