Mɛɛ Naŋ Looku Baabuiyo Sɔla Yɛ

Diomndaŋ ndaŋ la cho tonya, mi che bɛɛ yaula tasela nda poonyiaa Baabuiyo o Hibuluiye a Aluamakiiyea ɔɔ o Kilikiiye niŋ ndaŋ la cho lɛ a teleŋ naa hoo le. Lelaŋ, vɛɛ naŋ looku yɛ sina kɛsɛ maa Baabui naŋ nɔ hau wo chɛlaŋ a yaula tasela nyina Mɛlɛkaa tosa ma poonyiaa laŋ?

MI WANAA MIŊGI DIOM MƐLƐKAA POONYIAA WA MANDA NDU

A yaula maHibuluilaŋ okɔɔ, mulioo o tiŋ tɔlnuŋ o naamu masindɛ Mɛlɛka kila wo choo. Ndu cho ni, le laŋ miŋgioo poonyiaa.b Le tamaseliiyo, mi Chɛhowa dimul masaa o Isɔluɛi niŋ le ma miŋgi Sawalaŋ poonyiaa le ndapila. (Ditɔnɔmii 17:18) Le handɔɔ lechoo, mi Mɛlɛka dimul Livaiya le ma manda Sawalaŋ ndaŋ nduyɛ ma pɛɛku waŋnda laŋ. (Ditɔnɔmii 31:26; Nɛhimaya 8:7) Mɛɛ Chuuwa fula o chɛleŋ niŋ Babilɔŋ, ma kila kunda poonyiaa (Sofiluimnda), le yau Mɛlɛkaa miŋgioo poonyiaa. (Ɛsilua 7:6) Mɛɛ teleŋ tiŋ hiou, mi kundaa hoo miŋgi yaula maHibuluila 39 laŋ poonyiaa.

O wɔsila bɔɔbɔɔ bɛŋgu, mi wanaa poonyiaa miŋgi yaulaŋ ndaŋ poonyiaa nyɛkɛndɛi. O wɔsila 500 a 1500 laŋ tɛɛŋ boondii Chiisu ve, mi kunda wanaa poonyiaa o Chuuwa tɛɛŋ, ma veelu nda aa Masoluɛtiiya tual naamoo hoo kɔɔli. Yau masindɛ tase kundaa hoo chii poonyiaa wo wa Lɛniŋkiladi Kodɛsi ni. A wɔsi 1008 ɔɔ 1009 tɛɛŋ boondii Chiisu ve nda chii ndu ni. Kɛ, o wɔsila 2,000 ndaŋ tɛɛŋ, ma saaluŋ yaula masindɛla Baabuiyo ɔɔ vɛlɛvɛlɔŋ 220 o yaula simbulaala nda saaluŋ o Pee Nyɛ Yoomaa Cho Leniŋ te Laŋ tɛɛŋ. Tuupa mi Lɛniŋkiladi Kodɛsi fula, yaula masindɛlaŋ ndaŋ la wa niŋ le wɔsilaŋ hiouwɔɔ waapilɛ. Te a tuu pɛ yaula simbulaala nda saaluŋ o Pee Nyɛ Yoomaa Cho Leniŋ te Laŋ a Lɛniŋkiladi Kodɛsi, a cho suɛi kulle hei biyɔɔ bila, ndi cho ni: Mi che bɛɛ diomnda cho o yaula simbulaala nda saaluŋ o Pee Nyɛ Yoomaa Cho Leniŋ te Laŋ la cho nyɛpilɛ a laŋ o Lɛniŋkiladi Kodɛsi niŋ te, kɛ kposoŋ bɛɛ teŋgeŋ koŋ paaliaŋ yooŋgu cho leniŋ ndo le.

Ɔɔ niŋ yaula maKilikiila 27 laŋ? Kiilaa Chiisu Kiliti wa a buɛiyaa nduaa tasiaa apum fɛlɛŋ poonyiaa yaulaŋ ndaŋ. Mi Kilisiɔŋaa tasiaa haa tual naamu maChuuwo kɔɔli le yaulaŋ ndaŋ miŋgioo poonyiaa. (Koloosiaŋnda 4:16) Mi che bɛɛ mi Masa maLuomaŋnda Dayokilisiaŋ a wanaa cheleŋnda kindiŋ le yaula Kilisiɔŋaa tasiaa ndaa miŋgi poonyiaa laŋ tɛɛmbuuwo, kɛ yaula masindɛlaŋ a vɛlɛvɛlɛŋ ndɔŋ o waalaŋ niŋ cho wɔ haaa a paale hauleŋ ndeŋ.

Ma hivi vɛlɛ yaula Kilisiɔŋnda haa miŋgi laŋ poonyiaa laŋ o sɔɔŋ maŋgalaŋ cheleŋ niŋ. Sɔɔŋ maŋgalaŋ tase nda hivi Baabuiyo leniŋ ndoŋ cho muŋ ni: Ameniaŋnde, Kopitiiye, Itoopiaŋnde, Chɔɔchiaŋnde, Latiŋnde, a Siliaakiiye.

YAULA MAHIBULUILAŊ A LA MAKILIKIILAŊ BƐƐNDIAA LE HIVIOO

O cho yaula masindɛla Baabuiyo kpou le nɔ diomnda pilɛ laŋ te. Vɛɛ naŋ looku yɛ niko miŋ sina diomnda kpeekpeila wa o yaula masindɛlaŋ niŋndaŋ?

Le nyunaa hoo mulioo, ŋ tofaŋndɔ tamaseliiyo a wana pɛɛkaa okɔɔ. Mbo dimul sukuuwa 100 le ma miŋgi buŋgɛi i pilɛ o yauwo niŋ poonyiaa. O yɔŋ bɛɛ mi buŋgɛi nda wa nuaa le ndi miŋgioo poonyiaa ve lo, kɛ te o tuu pɛ nyɛ sukuwaa 100 wa haa miŋgi poonyiaa wo, keŋ mala ndu mbo sina yooŋgu kpeekpei wa o buŋgɛi keŋ niŋndo. Mi che bɛɛ sukuunɔ kɛ kɛ cho biondɔŋndo tosa, kɛ o ve bɛɛŋ bɛɛŋ le mi sukuuwa kpou tosa biondɔŋ pilɔɔ le. Lende koni, mɛɛ wanaa sinaa dɛniaa tuu vɛlɛvɛlɔŋ a yaula masindɛla wa nda o ba o waalaŋ niŋndaŋ, ma cha biondɔŋ wanaa miŋgi laŋ poonyiaa wa tosa laŋ. Kɛ mi keŋ mala nda le ma sina diomnda kpeekpeila wa o yaula taselaŋ niŋndaŋ.

Yɛɛnɛ ke yɛ naa tiindaŋndo maa yooŋgu wa o yaula tasela Baabuiyo niŋndo kpeekpei nda hivi o yaula naŋ nɔ hau laŋ niŋ ni? Mi wana sinaa dɛnɛ pilɛ diolaŋ Wiliam H. Kiliŋ dimi a yaula maHibuluilaŋ okɔɔ aa: “Wana nɔla ma dimi a kɔllo kpou maa wali kɛ kɛ tosaŋ ndɔ o sindɔɔ niŋ nyɛkɛndɛi mbo sulaŋ a hoo le.” Mi F. F. Bulus, o pɛɛku a Baabuiyo okɔɔ wo dimi a yaula maKilikiilaŋ ɔɔ Yau Kpema Sɛnɛiyo okɔɔ aa: “Nyɛ cho o poonyiaa o Yau Kpema Sɛnɛiyo niŋndo cho o sɔvɛ mbo hiau nyɛ wanaa sinaa dɛniaa bɛnduaa poonyiaa wo poloŋ, wana sɔl pɛŋ malɔ le ndu sɛɛŋgiaa le.” Mbo chɔɔlu dimi aa: “Te ndoo yɔŋ pɛ maa yaula wanaa sinaa dɛniaa poonyiaa laŋ kpou la cho Yau Kpema Sɛnɛiyo ni, wana o wana ndoo nɔ niŋ kiisaŋ a tonya wa wa o laŋ niŋndo le.”

Yaula maHibuluilaŋ: Baabuiyo hoo, Hivioo le Chieeŋ Sɛnɛiyo le Yaula maHibuluilaŋ (1953-1960) ndoo tɔlnuŋ o yau nda veelu aa Bibiliaa Hibulaika wo choo, o Ludɔf Kitɛl soli wo. Chɔŋ niŋ a teleŋ koŋ, ma miŋgi yaula maHibuluilaŋ ndaŋ kpɛlɛkiaa ma ke laŋ diolaŋ aa, Bibiliaa Hibulaika Sutikatɛŋsiaa a Bibiliaa Hibulaika Kuiŋta. Nduyɛ mɛɛ nda tosa yaasiaa o yaula masindɛlaŋ niŋ a yaula simbulaala nda saaluŋ o Pee Nyɛ Yoomaa Cho Leniŋ te Laŋ, ma wou nyɛ nda saaluŋndo o yaula nda miŋgi laŋ kpɛlɛkiaa laŋ niŋ. Mi wali wanaa sinaa dɛniaa tosa hoo wo mala le ma miŋgi Lɛniŋkiladi Kodɛsi soli a diomnda kpeekpeila cho leniŋ ndaŋ, nduyɛ ma wou tɛɛsiaalaŋ amatou la nda soli o yaula cheleŋ niŋ ndaŋ. Lapum la cho laŋ ni, Samelitaŋ Pɛŋtatiɔɔ, yaula simbulaala nda saaluŋ o Pee Nyɛ Yoomaa Cho Leniŋ te Laŋ, Sɛptuaachiŋ maKilikiiyo, Aluamaiki Takɔm, Latiŋ Vɔlket, a Siliaaki Pisita. Mɛɛ nda wa Baabuiyo hoo Hivioo le Chieeŋ Sɛnɛiyo, o naŋ nɔ suŋ suŋndo bɛɛndiaa, ma soliŋ Bibiliaa Hibulaika Sutikatɛŋsiaa a Bibiliaa Hibulaika Kuiŋta kpeku.

Yaula maKilikiilaŋ: A wɔsiŋ 1900 mɛɛlulaŋ, mɛɛ wanaa sinaa dɛniaa haa B. F. Wɛsikɔt nda F. J. A. Hɔt wa yaula maKilikiila kpeekpeilaŋ bɛɛndiaa, ma tuu yaula masindɛla Baabuiyo a vɛlɛvɛlɔŋ, kanifuule ma cha maa yooŋgu pilɔɔ kpe la nɔ ni maa yaula taselaŋ. O wɔsiŋ 2,000 tɛɛŋ, mi Kunda Hiviaa le Hivioo le Chieeŋ Sɛnɛiyo soliŋ yaula kpeekpeila laŋ kpeku le Baabuiyo hivioo. Ma soliŋ vɛlɛ yaula tasela nda toosiaa a kpɛndiaŋ ndaŋ kpeku. Nduyɛ o wɔsiŋ 200 a 300 niŋ boondii Chiisu ve nda toosiaa laŋ ni. Chɔŋ niŋ a teleŋ koŋ, mi yaula nda toosiaa a kpɛndiaŋ ndaŋ la kui tau. Le handɔɔ lechoo, yaula kpeekpeila cheleŋ la wa, mɛɛ la Nɛsitul nda Alaŋ vɛlɛ a la Kɔɔnala Baabuiyo o Amɛlika niŋ soli laŋ la cho nuaa yɛ. Laŋ bɛɛ nyɛpilɔɔ la wa ni a la wanaa sinaa dɛniaa saaluŋ ndaŋ. Sɔɔŋ nda saaluŋ muŋ ndoŋ, ŋ pum cho o Baabui naŋ nɔ suŋ suŋ ndo niŋ.

Te a tofa pɛ nyɛ cho o yaula kpeekpeilaŋ ndaŋ niŋndo, a cho saalɔŋ maa bolii Baabuiye ipum o yaula maKilikiilaŋ niŋ, i cho o Baabuila paandula nda hivi laŋ niŋ, mɛɛ “King James Version” cho nuaa yɛ. Wanaa miŋgi Baabuiyo poonyiaa wa handu ndi loŋ ni, mi che bɛɛ i ve o yaula tasela nyina Mɛlɛkaa tosa ma poonyiaa laŋ niŋ te. Kɛ o wɔsiŋ 1600 niŋ, mɛɛ kɛɛsiaa tosaŋ le Baabuiyo piɔuwo a sɔɔŋ, mi wanaa bɔɔbɔɔ chɛl ndi. Lelaŋ mɛɛ wanaa hiviaa faaŋiaa sɔɔŋ muŋ, mi keŋ soli bahawɛiyo le sɔɔŋ hɛɛnduuwo o lepula o Baabuila bɔɔbɔɔ niŋ. Tamaseliiyo cho o Maatiu 17:21; 18:11; 23:14; Maki 7:16; 9:44, 46; 11:26; 15:28; Luku 17:36; 23:17; Chɔŋ 5:4; Walta Kiilaa 8:37; 15:34; 24:7; 28:29; a Luomaŋnda 16:24 niŋ. O Baabuiyo hoo niŋ, ma handu luei naa nda faŋa sɔɔŋ muŋ nda.

Te o hiŋ pɛ a naa nda bɛndi Maki 16 (sɔɔŋ 9-20), naa nda biŋgul ndu wa, vɛlɛ a diomnda cho o Chɔŋ 7:53- 8:11 niŋ ndaŋ, i cho kpendekelee maa sɔɔŋ muŋ kpou ve o yaula taselaŋ niŋ te. Lelaŋ, ŋ wou sɔɔŋ lachoowaŋ muŋ o Baabuiyo hoo niŋ te.c

Mi diomndaŋ lapum la sɔla kpɛlɛkiaa le mi la chɛlaŋ a nyɛ wanaa sinaa dɛniaa kpou dimi maa la bɛnda nduyɛ maa la chɛlaŋ a yaula taselaŋ ndo. Le tamaseliiyo, Maatiu 7:13 dimi aa: “La keeku o dio sɔɔkɛnyɛɛ wo, kanifuule dio bɛndoo cho o yaa wana o tambei niŋndo.” O Baabuiyo hoo Hivioo le Chieeŋ Sɛnɛiyo o tasoo niŋ, “dioo cho” ve o poonyiaa leniŋ te. Mɛɛ nda chɔɔlu yaasiaa tosa o yaula masindɛlaŋ niŋ, ma cha maa diomndaŋ ndaŋ “dioo cho” wa o yaula tasela Baabuiyo niŋ. Le hei, ma wou ndu o Baabui naŋ nɔ hoo suŋ suŋ ndo niŋ. Fondaŋndaŋ la cho tau la kpɛlɛkiaa waa nuaa tosaŋ ndo. Kɛ a koŋ kpou, kpɛlɛkiaalaŋ ndaŋ la siŋga yooŋgu kpeekpei cho o diom Mɛlɛkaa niŋ ndo le, kanifuule kpɛlɛkiaala pɔmbɔlaŋ koni la cho ni.