Kɔliŋtiaŋ Tasoo

10 Puaapiliaa, I yeema mi la sina maa mi finyaa naa mamaa kpou kua o yumbu yumbu ikpuŋgbaa bɛŋgu,+ nduyɛ ma keeku o pee mɛŋma ihɛllo niŋ.+ 2 Mi nda kpou sɔla yiŋɔɔ o yumbu yumboo niŋ a o pee mɛŋma ihɛllo niŋ a Muuse latulu. 3 Nda kpou ma dia nyɛdiaa fula Mɛlɛka o ba wo,+ 4 nduyɛ ma kol mɛŋma fula Mɛlɛka o ba waŋ.+ Mi ndaa kol mɛŋndaŋ o pou fula Mɛlɛka o ba, mbo wa nda kɔlaŋ kɔɔli wo. Pou koŋ sim le Kiliti ni.+ 5 Kɛ a bɔɔbɔɔ Mɛlɛka ndoo hini kɔl a nda le. Le hei, mbo diu nda o pollo niŋ.+

6 Sɔɔŋ yɔŋnuŋ muŋ ndoŋ cho maa tamasi le naa silaa, yɔŋii naa bɛɛ nɔ yeemɛi le sɔɔŋ wɔɔŋndoŋ tosaa maa nda.+ 7 La simnuŋ wanaa soolaa lapiɔm, mɛɛ apum nda tɛɛŋ tosa yɛ le. A mɛɛ i cho i poonyiaa yɛ aa: “Ma chal diolaŋ a kolɔɔ laŋ, nduyɛ ma wa yoomu ndaa tueiyɔɔ yeela.”+ 8 La ŋ lueinuŋ balaŋ o kaa ihini nɔɔlɛiyo* niŋ, mɛɛ apum nda tɛɛŋ luei balaŋ o kaa ihini nɔɔlɛiyo* niŋ, mi waŋnda 23,000 sɔla piɔmndo nda tɛɛŋ o paaleŋ niŋ yɛ le.+ 9 La ŋ tɔɔndaŋ Chɛhowa,* mɛɛ apum nda tɛɛŋ tɔɔndaŋ ndu,+ mi kɛuwa lɔuviaa nda ma wu yɛ le.+ 10 Nduyɛ, ŋ waŋnuŋ wanaa ŋɔɔchiaŋ, mɛɛ apum nda tɛɛŋ ŋɔɔchiaŋ,+ mi wana diyaa* huŋ diu nda yɛ le.+ 11 Sɔɔŋ yɔŋnuŋ nda muŋ ndoŋ kpou cho maa tamasi, nduyɛ ŋ poonyiaŋ le naa silaa,+ yɔŋii naŋ cho o teleŋ mɛɛlaa hoo niŋnda wa maa nda.

12 Lelaŋ, wana o wana yiyaŋ pɛ maa o sim yi, mɛɛ o mandaŋ yɔŋii o del.+ 13 Tɔɔndaŋ o tɔɔndaŋ cho nya komallo, o komal niŋ waŋnda.+ Mɛlɛka cho wana lo o lediom, nduyɛ o chɛl mi tɔɔndaŋ nya nɔla biunɔŋ te wo komal nya le.+ Kɛ te tɔɔndaŋndo komal nya pɛ, o cho nya nɛilaŋ chɔm le mi la nɔla ndu biunɔŋ.+

14 Lelaŋ chaaŋaa niaa kaalaa, la luei balaŋ o piɔmnda sooluuwo niŋ te.*+ 15 I cho suɛi naa nya chua maa wanaa nɔ sinapɛŋgoo wa. Nyapila kiolu yamɛi a nyɛ ya dimi wo okɔɔ. 16 Taala mamuɛi naŋ piɛi choo wo, o cho kooma Kiliti waŋ te naŋ cho maŋ kolɔɔ le?+ Beedii* naŋ yimi yimi wo, o cho dialuŋ Kiliti woŋ te naŋ cho muŋ dioo le?+ 17 Beediiyo o pilɛ cho ni. Mi che bɛɛ ŋ cho tau, dialle i pilɛ naŋ cho ni,+ kanifuule naa kpou beedii pilɛ koŋ naŋ cho dioo ni.

18 La yiyaŋndɔ a Isɔluɛiya okɔɔ. Te ndaa wa pɛ sala nda soli o bandu luamaa lasalaa choo wo dioo, o cho a Mɛlɛka latulu le nda wa ndu koŋ dioo le?+ 19 Baa dimioo ya cho ni maa salala waŋnda soli le piɔmnda laŋ la cho nyɛ sɔvɛ? Baa piɔmnda cho nyɛ sɔvɛ? 20 Sako. Nyɛ ya yiyaŋndo cho ni maa, salala waŋnda soli laŋ, le nyinaa wɔɔŋnda nda soli laŋ ni, o cho le Mɛlɛka le.+ Nduyɛ I yeema nya mi la luei balaŋ o sɔɔŋ nyinaa wɔɔŋnda niŋ te.+ 21 La ve kolɔɔ o taala Chɛhowa* wo niŋ, mi la wa vɛlɛ kolɔɔ o taala nyinaa wɔɔŋnda niŋ te. Nduyɛ la ve dioo o “tibii* Chɛhowa”* wo choo,+ mi la wa vɛlɛ dioo o tibii nyinaa wɔɔŋnda choo le. 22 Baa ŋ yeema miŋ tosa mi Chɛhowa* paŋala naa?*+ Ŋ nɔ pa kpaayaa miŋ hiau ndu?

23 A nɔ di ma tosa nyɛ o nyɛ fee, kɛ o cho sɔɔŋ kpou le bɛnda le tosaa le. A nɔ di ma tosa nyɛ o nyɛ fee, kɛ o cho sɔɔŋ kpou le taŋgul wana le.+ 24 Lelaŋ, wana o wana hiou lachi a tosaa nyɛ mala acheleŋnda wo, kɛ o wa ko nyɛ mala numpila suee wo le.+

25 La dia visiŋ nda pisi o lɔɔlaŋ niŋndoŋ, kɛ la nyuna wana le, yɔŋii kɔlta nyala iyamalaŋ la paaliaŋ nya. 26 Kanifuule, “lɛŋndeŋ a nyɛ o nyɛ cho lechoo, Chɛhowa* nɔ ni.”+ 27 Te wana cho wana laalaŋ te wo veelu nya pɛ o ndu lo bɛɛ, nduyɛ mi la yeema le kɔlaŋ, nyɛ o nyɛ o ke nya pɛ, la dio. La nyuna le, yɔŋii nya paaliaŋ kɔlta iyamala nyalaŋ. 28 Kɛ te waŋndo dimul nya pɛ aa, “Nyɛdiaa lasooluuwo cho hoo ni,” la dia nyɛdiaa koŋ te, le wana dimul nya koŋ ndo, yɔŋii keŋ paaliaŋ kɔl iyama wana.+ 29 O cho kɔl iyama numndo le ya yiyaŋ te, kɛ kɔl iyama wana koŋ. Mi che bɛɛ I nɔ dioo, kɛ vɛ mi kɔl iyama wana cheleŋndo kɔɔsa a kɔl iyama nuu?+ 30 Te I mel pɛ Mɛlɛka balikaa le nyɛdiaa ya cho dioo wo, vɛ mi waŋnda dimi sɔɔŋ wɔɔŋndoŋ a ya okɔɔ, le nyɛdiaa ya chii balikaa malɔɔ le ndu wo?+

31 Lelaŋ, la wa nyɛdiaa dio, la wa kolɔɔ, ɔɔ la wa nyɛ o nyɛ cheleŋ tosaa, la tosa muŋ kpou le Mɛlɛka saŋgalaa.+ 32 La tɛɛmbuu wana o wana kɔl te, o wa Chuunɔ, Kilikiinɔ, ɔɔ kunda wanaa laalaŋaa Mɛlɛkaa.+ 33 Lende koni ya bɛɛ cho kindiŋndo le wana o wana fee kɔllo nɛŋioo ni. O cho le yapila malaa le ya cho kindiŋndo le,+ kɛ le wanaa bɔɔbɔɔ malaa, le halikpeŋ ma sɔla pioŋɔɔ.+