Luku

22 Bɔŋaŋ Beedii Nɔ Yiisii* Leniŋ te Wo, o nda veelu vɛlɛ aa Bɔŋaŋ Hiouwɔɔ Choo Wo wo,+ wa niŋ le fuuluuwo.+ 2 Masaa wanaa soliaa lasalaa a wanaa pɛɛku waŋnda sawala Mɛlɛkalaŋ nda wa nɛilaŋ nuuviaa le Chiisu diyɔɔ,+ kanifuule siooŋnde wa nda le faŋgaa.+ 3 Okoŋ mi Setana luɛi Chuda niŋ, o nda veelu aa Isikaliɔɔ wo. Ndu bɛɛ wa kiilaa 12 nda tɛɛŋ.+ 4 Mbo kɔ suukaŋ a masaa wanaa soliaa lasalaa, vɛlɛ a masaa wanaa ndaa manda chiɛi Mɛlɛkaa wa le mɛɛ o looku mbo pisi Chiisu nda o ba yɛ.+ 5 Ma naŋ kɔl tau a ndi, nduyɛ ma chɛlaŋ le ma ke ndu kaniŋ* humboŋ.+ 6 Mbo chɛl. Okoŋ mbo kandu nɛilaŋ nuuviaa le Chiisu pisioo nda o ba, waŋnda sina a ndi okɔɔ le.

7 Mi paale nda toosiaa Beedii Nɔ Yiisii Leniŋ te Wo le fuuluu. O paaleŋ ndeŋ choo ndaa dii saa le Bɔŋaŋ Hiouwɔɔ Choo Wo ni.+ 8 Okoŋ mi Chiisu viam Pitɛ nda Chɔŋ, mbo dimul nda aa: “La kɔ bɛɛndiaa nyɛdiaa Bɔŋaŋ Hiouwɔɔ Choo Wo le miŋ deŋnuŋ.”+ 9 Ma nyuna ndu aa: “Kuɛɛnɛ ŋ yeema yɛ miŋ kɔ bɛɛndiaa ndu?” 10 Mbo mulul nda aa: “Te la luɛi pɛ chiee, la cho bɔŋaŋ a po pilɛ a kpɛɛnɛi mamɛŋnde. Chiɛi o luɛi pɛ, la luɛi ndu kɔɔli.+ 11 Nduyɛ mi la dimul wana chiɛiyo aa, ‘Wana Pɛɛkaa dimi maa naŋ nyuna num aa: “Kuɛɛnɛ fondaŋ mialla cho yɛ le mi de nyɛdiaa Bɔŋaŋ Hiouwɔɔ Choo Wo naa buɛiyaa niaa?”’ 12 O cho nya chɔm fondaŋ fɛkɛi kɛndɛ kɛndɔɔ le mialla. La bɛɛndiaa nyɛdiaa loŋ.” 13 Ma kua, nduyɛ mi i yɔŋnuŋ mɛɛ o dimul nda yɛ. Okoŋ ma bɛɛndiaa nyɛdiaa le Bɔŋaŋ Hiouwɔɔ Choo Wo.

14 Mɛɛ teleŋndo fuuluu le nyɛdiaa dioo, mi Chiisu nda kiilaa nduaa chal o tibiiyo.*+ 15 Mbo dimul nda aa: “Yeemɛi wa ya niŋ bɔɔ le nyɛdiaa Bɔŋaŋ Hiouwɔɔ Choo Wo hoo dioo a nya latulu tuupa mi sɔla saŋgaa. 16 Mi dimul nya, I di lɛ niŋ nyɛdiaa hoo a nya le haaa mɛɛ mi sabu ndɔɔ peeluŋ o Masale Mɛlɛkaleŋ niŋ.” 17 Okoŋ mbo bii taalaa, mbo piɛi. Mbo dimi aa: “La bii mi la keŋnaŋ, mi la kol. 18 Kanifuule mi dimul nya, chɔŋ a hau, I kol lɛ niŋ muɛiyaŋ maŋ te haaa mi Masale Mɛlɛkaleŋ le hiŋ.”

19 Mbo chua beediiyo,+ mbo piɛi, mbo yimi yimi. Okoŋ mbo ke nda. Mbo dimi aa: “Hoo sim le dialuŋ nuŋ ni.+ Muŋ ya cho yɔŋgu le nya ni.+ La wa hei tosaa le loonɔŋndo a ya.”+ 20 Mɛɛ nda chii nyɛdiaa ichɔllo dio, mbo tosa vɛlɛ nyɛ pilɛ koŋ kpe a taalaa. Mbo dimi aa: “Taalaa hoo sim le kpema sɛnɛi yiinuŋ+ a kooma niaŋ ndo ni.+ Maŋ ma cho talaŋ le nya ni.+

21 “Kɛ wana cho ya pisi wo cho a ya latulu o tibiiyo hoo.+ 22 A tonya, Po wanachioo nɔ le piɔmndo sɔlaa a mɛɛ i dimiŋ yɛ.+ Kɛ, kpundɔɔ cho le wana cho ndu pisi wo!”+ 23 Okoŋ ma kandu suukaŋndo ndapila tɛɛŋ le sinaa wana kpeekpei cho ndi tosa wo.+

24 Okoŋ kɔɔli, mi sɛɛŋgiaŋ bɛndoo del nda tɛɛŋ le wana cho wana bɛndoo nda tɛɛŋ ndo.+ 25 Kɛ mi Chiisu dimul nda aa: “Masaa chieeŋnda haa, mɛɛ nda yeema yɛ nda bii waŋnda ni. Nduyɛ, ma veelu wanaa nɔ nda kpaayaa choo wa aa wanaa kɛndiaa.+ 26 Kɛ o cho lende le nya nɔ mi la wa le.+ Wana cho wana bɛndoo nya tɛɛŋ ndo nɔ mbo wa maa chuaambɔ pɔmbɔ,+ okoŋ mi wana cho chilaŋ chuaa wo wa buɛiyo. 27 Nɛɛnɛ cho yɛ wana bɛndoo? Wana cho nyɛdiaa dioo wo ɔɔ wana yɔŋgu nyɛdiaa wo? O cho wana cho nyɛdiaa dioo wo le? Kɛ ya, I cho nya tɛɛŋ maa wana yɔŋgu nyɛdiaa wo.+

28 “A tonya, nya wa a ya latulu+ o nyɛpalaa nuu niŋ ni.+ 29 Nduyɛ I yii kpemaa a nya, mɛɛ Finya nuu bɛɛ yii kpemaa a ya le masaleŋ yɛ.+ 30 La dia niŋ nyɛdiaa, nduyɛ mi la kol a ya latulu o tibii* nuu choo o Masale nileŋ niŋ.+ Nduyɛ, mi la chal o kpeŋgbeila* lemasalaŋ+ choo le mi la kɔɔsa a kayii 12 nde Isɔluɛi.+

31 “Saimɔŋ, Saimɔŋ! Setana yeema mbo hɛi nya kpou mɛɛ nda hɛi nuaa witiiyoŋ yɛ.+ 32 Kɛ I chii Mɛlɛka piɛi le num le mi laalaŋ numndo kendu, a vi ŋdial te.+ Nduyɛ te a miiŋgu pɛ ya o ibuŋ, luei puaapiliaa numnda yoomuaŋ.”+ 33 Mi Pitɛ dimul ndu aa: “Masanɔɔ, I cho o bɛɛndiaŋ le kɔlaŋ naa num o chiɛi manyumndo niŋ, a le piɔmndo sɔlaa naa num latulu.”+ 34 Kɛ mi Chiisu dimul ndu aa: “Mi dimul num Pitɛ, tuupa mi sɔɔ koowa hau, a cho viinɔŋ bɛmbɔɔ le yaa maa a sina ya le.”+

35 Mi Chiisu nyuna nda aa: “Teleŋ ya vem nya mi dimul nya maa la chua bɔlɔ ŋkani* ɔɔ bɔlɔ nyɛdiaa ɔɔ lakɔwɛi* le wo,+ nyɛ wa pa nya lepɛŋ?” Ma muli aa: “Ɛ ɛ!” 36 Okoŋ mbo dimul nda aa: “Kɛ suŋ suŋ niŋ, wana nɔ bɔlɔ ŋkani pɛ, o chua. Wana nɔ bɔlɔ nyɛdiaa pɛ, o chua. Nduyɛ wana nɔ muɛi ifaŋ te, o pisi doma ndɔ bɛndoo mbo pendu muɛi faŋnde. 37 Kanifuule mi dimul nya, nyɛ o nyɛ cho o poonyiaa a ya okɔɔ nɔ mbo peeluŋ. Ndu cho ni, ‘Ma chua ndu maa wana tɛɛmbuu sawaa wo.’*+ Nyɛ dimiŋ hoo a ya okɔɔ wo sɔla peelɔŋndo.”+ 38 Ma dimul ndu aa: “Masanɔɔ, tofawɔ! Ŋ nɔ mɔɔŋ faŋndoŋ ŋ muuŋ.” Mbo dimul nda aa: “Muŋ cho letuu.”

39 Mɛɛ Chiisu faŋaŋ loŋ, mbo kua o Pembii Ɔlifii Ve choo mɛɛ ndoo tosa paandu yɛ. Mi buɛiyaa nduaa tual ndu kɔɔli.+ 40 Mɛɛ nda fuuluu loŋ, mbo dimul nda aa: “La hiou lachi a piɛileŋ, yɔŋii nya del o tɔɔndaŋndo niŋ.”+ 41 Okoŋ mbo faŋaŋ nda ikɛi mbo kua tiŋ landaŋ, mbo kɔ baŋ wulaŋ. Mbo kandu piɛileŋ 42 aa: “Kɛkɛ, te o bɛnda pɛ, mɛɛ faŋa ya taalaa hoo kuee. Kɛ nduyɛ, hɛnaŋ numndo ŋ tosa ni, o cho hɛnaŋ nuu le.”+ 43 Okoŋ mi maalikɛinɔɔ fula o choo choo niŋ mbo huŋ luei ndu yoomuaŋ.+ 44 Kɛ le mɛɛ o wa mɔnɛi biyɔɔ tau yɛ, mbo hiau lachi a piɛileŋ kpeekpei.+ Okoŋ mi lalii nduɛi simnuŋ mɛɛ koowaŋ ma deli nuaa lɛŋ yɛ. 45 Mɛɛ o chii piɛileŋ mbo miiŋgu naa buɛiyaa nduaa chua, mbo komal nda ŋɔŋgɔlaa, kanifuule a wa a saŋgɛi yɔkɔɔ a mɔnɛi.+ 46 Mbo dimul nda aa: “Le yɛɛnɛ nya cho yɛ luaŋ? La tiondu, mi la wa piɛileŋ yɔŋii nya luɛi o tɔɔndaŋndo niŋ.”+

47 Chiisu lo suɛi, mi waŋnda huŋ faŋga bɛndoo. Chuda, wana pilɛ o kiilaa 12 nda tɛɛŋ wa nda lachi ni. Mbo huŋ sɔsa ndu kuuwo.+ 48 Kɛ mi Chiisu nyuna ndu aa: “Chuda, mɛɛ a kuuwo sɔsaa ŋ cho Po wanachioo pisioo ni?” 49 Mɛɛ wanaa wa isisi ikɛiya che nyɛ wa hunɔɔ yɔŋnɔŋndo, ma dimi aa: “Masanɔɔ, ŋ lɔuviaa nda a mɔɔŋ?” 50 Mi wana pilɛ nda tɛɛŋ lɔwa buɛi wana bɛndu wanaa soliaa lasalaa nile ba kɛndɛleŋ, mbo kialu leŋ kpali.+ 51 Kɛ mi Chiisu dimul nda aa: “La pɛŋgi lende.” Okoŋ mbo pilaŋ poo nileŋ, mi le siaŋgu. 52 Mi Chiisu nyuna masaa wanaa soliaa lasalaa, masaa wanaa ndaa manda chiɛi Mɛlɛkaa wa, a laŋgbaa kalla, a hiŋ le ndu biyɔɔ wa aa: “La vɛ hunɔɔ a mɔɔŋ faŋndoŋ vɛlɛ a yɔmii biŋgiei mɛɛ nda yɔŋ ko aa viinɔɔ nya hiŋ biyɔɔ ni?+ 53 Lepaa o lepaa I wa a nya latulu o chiɛi Mɛlɛkaa niŋ,+ la bii ya teleŋ koŋ te.+ Kɛ teleŋ nyaa a teleŋ kpaaya manyumndo cho hoo ni.”+

54 Okoŋ ma bii ndu, ma kua a ndu+ o chiɛi masa wanaa soliaa lasalaa. Mi Pitɛ tual ndu kɔɔli, kɛ o wa tiŋ landaŋ.+ 55 Mɛɛ nda kiisuu yiŋndeŋ o bɛɛ ma chal haŋgɔɔ, mi Pitɛ bɛɛ chal nda tɛɛŋ.+ 56 Kɛ mɛɛ buɛi laandu pilɛ che Pitɛ ichali o yiŋndeŋ ikɛi, mbo tofa ndu chiŋ, mbo dimi aa: “Poo hoo bɛɛ wa ndu kɔɔli.” 57 Kɛ mbo viinuŋ aa: “I sina ndu le chuaa.” 58 Mɛɛ nyɔɔ viou tiŋ, mi wana cheleŋ cha ndu mbo dimi aa: “Num bɛɛ wa ndu kɔɔli.” Kɛ mi Pitɛ dimi aa: “O cho ya le poo.”+ 59 Mɛɛ teleŋndo hiou le hawɛiyo* o pilɛ, mi po cheleŋ baŋ ndi kaŋgalaŋ aa: “Tonya kpeekpei, poo hoo bɛɛ wa ndu kɔɔli, kanifuule wana waa Kalili o cho ni!” 60 Mi Pitɛ dimi aa: “Poo sei, I sina bɛɛ pɛŋ nyɛ ŋ cho hoo dimioo wo le.” Pitɛ lo suɛi, o lepilɛ niŋ kpe mi sɔɔ koowa. 61 Mi Masanɔɔ muliŋ mbo tofa Pitɛ, okoŋ mi Pitɛ loonuŋ nyɛ Masanɔɔ dimul ndu wo aa: “Tuupa mi sɔɔ koowa hau, a cho viinɔŋ bɛmbɔɔ le yaa maa a sina ya le.”+ 62 Okoŋ mbo fula o bɛɛ, mbo kɔ chaŋ chaŋndo pila.

63 Mi wanaa bii Chiisu wa kandu ndu mamɔɔ,+ ma wa ndu kuindi kuindioo.+ 64 Mɛɛ nda kumbu ndu hɔlla, ma nyuna ndu aa: “Dimullɔ naa! Nɛɛnɛ lɔɔ yɛ num?” 65 Nduyɛ ma dimi sɔɔŋ wɔɔŋ cheleŋ tau a ndu okɔɔ.

66 Mɛɛ paaleŋ le sɛ, mi laŋgbaa kalla le waŋnda, nda cho ni, masaa wanaa soliaa lasalaa a wanaa pɛɛku waŋnda sawala Mɛlɛkalaŋ nda chuuŋgiaŋ naapilɛ.+ Ma kua a Chiisu o chiɛi nda Kialu Yamaŋ Ndo niŋ, ma dimul ndu aa: 67 “Te num cho Kiliti ni, dimul naa.”+ Kɛ mbo dimul nda aa: “O yɔŋ bɛɛ mi dimul nya, la laalaŋ niŋ kposoŋ te. 68 Nduyɛ I nyuna bɛɛ nya, la mulul la niŋ te. 69 Kɛ, chɔŋ a boondei hei, Po wanachioo+ cho wa ichali o ba kɛndɛ Mɛlɛka kpaaya bɛndoo choo.”+ 70 Mi nda kpou nyuna aa: “Mɛɛ num cho Po Mɛlɛkaa ni?” Mbo mulul nda aa: “Nyapila chii dimi maa ya cho Po Mɛlɛkaa ni.” 71 Ma dimi aa: “Seiyaa cheleŋ yeemaŋ lɛ pa? Naapila ŋ tuei nyɛ fula ndu o sondo wo.”+