Walta Kiilaa

7 Kɛ mi wana bɛndu wanaa soliaa lasalaa nyuna Stiiviŋ aa: “Baa tonya sɔɔŋ muŋ cho ni?” 2 Mbo muli aa: “Chaaŋaa niaa, finyaa niaa, la yaŋ ya nilaŋ. Tuupa mi Ebilaham finya naa mamaa kua le challe Haluaŋ,+ mi Mɛlɛka bɛndoo chɔɔmuŋ ndu teleŋ o wa wɔ Mɛsopoteemiaa wo. 3 Mbo dimul ndu aa: ‘Faŋaŋ o lɛŋnde numndeŋ niŋ, ma mɛi wanayaŋ numndoŋ ma kuɛ o lɛŋnde ya cho num chɔm ndeŋ niŋ.’+ 4 Okoŋ, mbo faŋaŋ o lɛŋnde Kaadiaŋnda niŋ, mbo kɔ chal Haluaŋ. Mɛɛ finya ndɔ vi,+ mi Mɛlɛka tosa mbo huŋ chal o lɛŋnde nya cho leŋ niŋndeŋ.+ 5 Mɛlɛka ke ndu lɛŋnde leŋ mi le wa nyɛ ndɔ le, naa kɛsiaa ipelu bɛɛ o ke ndu le. Kɛ mbo chua buŋgɛi maa o cho ndu, a chuauwaa nduaa* leŋ ke mi le wa nyɛ nda,+ mi che bɛɛ ndoo nɔ wɔ chua le. 6 Mi Mɛlɛka dimul ndu vɛlɛ maa chuauwaa nduaa* cho simnɔŋ mialla o lɛŋnde cheleŋ niŋ, mi wanaa kaŋ a siiŋguu nda chiaa, nduyɛ ma saaŋgiaa nda le wɔsilaŋ 400.+ 7 Mi Mɛlɛka dimi aa: ‘Lɛŋnde nda cho wa o chɛleŋ niŋndeŋ, I cho leŋ kɔɔsa.+ Okoŋ kɔɔli, a cho faŋaŋ o lɛŋnde leŋ niŋ ma huŋ piɛi ya o fondaŋndo hoo.’+

8 “Mi Mɛlɛka yii vɛlɛ kpemaa a ndu. Kpema koŋ cho hivi chiɛi kɔɔlioo ni.+ Okoŋ mbo vialu Aase,+ mbo hivi ndu o chiɛi kɔɔli o paale ŋɔmaaleŋ choo.+ Mi Aase vialu* Chekɔpu, mi Chekɔpu vialu puaa 12 ma simnuŋ yuŋgulaŋ 12. 9 Mi Choosɛ bɛndaa nduaa tul ndu leyɛ,+ okoŋ ma pisi ndu Ichipi.+ Kɛ Mɛlɛka wa a ndu latulu.+ 10 Mbo soli ndu o saŋgala o wa niŋndaŋ kpou. Mbo ke ndu taasioo, nduyɛ mbo tosa mi Feloo, masaa le Ichipi hɛnaŋ a ndu tau. Mi Feloo siiŋguu ndu wana bɛndoo le Ichipi vɛlɛ a chiɛi ndɔɔ kpou.+ 11 Mi yima bɛnduaŋ ma del o Ichipi niŋ a Kenaŋ kpou. Nyɛpalaa bɛndoo pila i wa ni. Finyaa naa mamaa ndaa sɔla nyɛ o nyɛ le dio le.+ 12 Kɛ mɛɛ Chekɔpu tuei maa nyɛdiaa cho Ichipi, mbo viam finyaa naa mamaa loŋ le teleŋ tasoo.+ 13 Mɛɛ nda kuɛ kɔla diiŋ ndɔlaŋ, mi Choosɛ chɔɔmuŋ bɛndaa nduaa a pɔmbɔ ndɔ. Okoŋ mi Feloo sina yuŋgu Choosɛ wo.+ 14 Mi Choosɛ yooŋgu le mi Chekɔpu finya ndɔ a wanayaŋ ndɔŋ kpou kuɛ Ichipi.+ Nda kpou, a wa ŋwaŋ 75.+ 15 Okoŋ, mi Chekɔpu kua Ichipi.+ Loŋ o lo ni mbo wu.+ Nduyɛ finyaa naa mamaa bɛɛ, loŋ nda lo ni ma wu.+ 16 Ma kua a nda Siɛkɛm, ma kɔ kumbu nda o sɛi Ebilaham ndoo pendu puaa Hemɔɔ wa o ba a kaniŋ* humboŋ ndo niŋ.+

17 “Mɛɛ boondei wa niŋ fuuluuwo le mi Mɛlɛka peelu diomnde o mel Ebilaham ndeŋ, mi chuauwaa mamaa Chekɔpu wa chɔɔlu kui tau tau o Ichipi niŋ. 18 Okoŋ kɔɔli, mi wana cheleŋ simnuŋ masaa o Ichipi niŋ, kɛ ndoo sina Choosɛ le.+ 19 O nɛi kaŋgalaa niŋ, mi masaa hoo saaŋgiaa wanaa naa saaŋgiaa pila, nduyɛ mbo baŋ nda le ma mal chɛlɛkpiaa ndaa ma vi.+ 20 A teleŋ koŋ nda velu Muuse ni. O wa chɛlɛkpɛ kɛndɛ bɛndu Mɛlɛka o hɔl. Le paŋgoŋ ŋgaa a wa ndu mandaa o finya ndɔ lo chiɛiniŋ.+ 21 Kɛ mɛɛ wanaa velu ndu wa mal ndu,+ mi chua Feloo wo chua ndu, mbo siiŋguu ndu po ndɔ.+ 22 Mi Muuse sɔla pɛɛku sɔvɛ sɔviɔɔ o Ichipi niŋ. O wa wana kpaaya bɛndu o nyɛ ndoo suaa wo niŋ, a nyɛ ndoo tosa wo.+

23 “Mɛɛ Muuse fuuluu wɔsilaŋ 40, mbo kɛɛsiaa le mbo kɔ tofa wanaa nduaa, Isɔluɛiya.+ 24 Mɛɛ Muuse che mi Ichipiaŋnɔɔ wa Isɔluɛinɔɔ biyɔɔ wɔɔŋndo, mbo suŋgu le ndu. Okoŋ mbo miŋgi maa, mbo dii Ichipiaŋnɔ koŋ. 25 Muuse ndoo yiyaŋ ko maa wanaa nduaa cho taasi dɔwɔɔ maa ndu Mɛlɛka wa soliŋ kpeku ni le nda piŋioo, kɛ a bii ndi bila le. 26 Diimandɔɔ, mi Muuse komal wanaa nduaa a ŋiɔɔŋ a wa sɔŋgɔɔ. Mbo kindiŋ le nda kɔl nyuloo lueiyo tɛɛŋ. Mbo dimi aa: ‘Chaaŋaa niaa, wanaa piliaa nya cho ni. Le yɛɛ nya cho yɛ sɔŋgɔɔ?’ 27 Kɛ mi po wa chaaŋ ndɔ lɔɔ wo nyindu Muuse. Mbo nyuna ndu aa: ‘Nɛɛnɛ siiŋguu yɛ num masaa a wana kialaa ŋyamaa naa choo? 28 A yeema ma dii ya mɛɛ ŋ dii Ichipiaŋnɔɔ chiɛi yɛ?’ 29 Mɛɛ Muuse tuei hei, mbo nyaanuŋ mbo kuaŋnuŋ o lɛŋnde Midiaŋndeŋ niŋ. O lo loŋ mbo vialu puaa a ŋiɔɔŋ.+

30 “Wɔsilaŋ 40 hiouwɔɔ okoŋ kɔɔli, mi maalikɛinɔɔ chɔɔmuŋ ndu o pollo niŋ o Pembii Sanai Ve, o bɔɔ leyiŋndo niŋ.+ 31 Mi kɔndɔfillo bii Muuse a nyɛ o che wo. Kɛ mɛɛ o wa sɔɔŋguuwo ikɛi le mbo tofa nyɛkɛndɛi, mbo tuɛi mi Chɛhowa* dimi aa: 32 ‘Ya cho Mɛlɛka finyaa nyaa mamaa ni. Mɛlɛka Ebilaham ndo, Mɛlɛka Aase wo, a Mɛlɛka Chekɔpu wo.’+ Mi Muuse kandu nyiiyaa. O bii lɛ kɔllo mbo tofa nyɛkɛndɛi le. 33 Mi Chɛhowa* dimul ndu aa: ‘Soli kɔwɛila* cho num o ŋpelu laŋ, kanifuule fondaŋ ŋ cho isisi wo, fondaŋ diandaa o cho ni. 34 I cho chɔɔ kpendekele nyɛkindilaa wanaa niaa cho bɛŋgu Ichipi wo. I cho ŋɔɔchiaŋnda nda cho laŋ tueiyɔɔ,+ nduyɛ I hiŋ le mi piŋi nda. Lelaŋ, I cho num viomɔɔ Ichipi.’ 35 Muuse nda nyindu nduyɛ ma nyuna ndu aa: ‘Nɛɛnɛ siiŋguu yɛ num masaa a wana kialaa ŋyamaa naa choo?’ wo,+ ndu kpeekpei Mɛlɛka vem ni+ maa masa a wana piŋiaa, sanaa a maalikɛinɔ chɔɔmuŋ ndu o bɔɔ leyiŋndo niŋndo. 36 Ndu sim nda lachi ni,+ mbo tosa kaamaalaŋ a sɔɔŋ kɔndɔfilloŋ Ichipi,+ a o Pee Siaŋa Mɛŋma Ihɛllo.+ Nduyɛ mbo hiau lachi a laŋ tosaa le wɔsilaŋ 40 o pollo niŋ.+

37 “Muuse wo hoo dimul Isɔluɛiya ni aa: ‘Mɛlɛka nyaa cho hɛli wana suaa le ndu wo puaapiliaa nyaa tɛɛŋ maa ya.’+ 38 O wa waŋnda tɛɛŋ teleŋ nda wa o pollo niŋndo. O ndu lo+ a o finyaa naa mamaa lo maalikɛinɔɔ+ soo o Pembii Saanai Ve choo ni. Mi Mɛlɛka ke ndu yooŋgula ke wana yoomoo laŋ le naa kioo.+ 39 Mi finyaa naa mamaa kɛɛ ndu nilaŋ yaŋɔɔ, ma mulul ndu kɔɔ.+ Nduyɛ ma miiŋguŋ Ichipi o kɔlta ndalaŋ niŋ.+ 40 Ma dimul Elɔŋ aa: ‘Toosial naa mɛlɛkaa ma sim naa lachi, kanifuule ŋ sina nyɛ yɔŋnuŋ Muuse wo hoo, po soli naa o lɛŋnde Ichipi leŋ niŋndo le.’+ 41 Okoŋ, ma toosiaa piɔmndo maa nau. Ma soli salaa le piɔm koŋ. Ma kandu nyaaloo dɔɔnɔŋndo le nyɛ ndapila toosiaa a laba wo.+ 42 Mi Mɛlɛka mal nda o ba ndaa choo. Mbo chɛl nda le ma sooluu nyɛm cho o choo choo niŋndoŋ,+ a mɛɛ i cho i poonyiaa o yau wanaa ndaa suaa le Mɛlɛka wa niŋ yɛ aa: ‘Oo Isɔluɛi, o cho o ya lo le nya wa salalaŋ solioo a kelaŋ yɔŋgoo le wɔsilaŋ 40 o pollo niŋ te. 43 La cho heeloo a tuusoo a tɛndii Molɔki* wo,+ a luei mɛlɛka nɔ diolaŋ aa Lifaŋ ndo, piɔmaa nyapila toosiaa a laba le sooluuwo wa. Lelaŋ, I cho nya yɔŋ o chɛleŋ niŋ hiouwɔɔ Babilɔŋ choo.’+

44 “Finyaa naa mamaa ndaa nɔ tɛndiiyo o pollo niŋ. Tɛndii koŋ ndoo chɔm ni maa Mɛlɛka wa a nda latulu. Ma toosiaa ndu mɛɛ Mɛlɛka chɔm Muuse yɛ. Mɛɛ o che ndu o tuwaa yɛ, lende nda toosiaa ndu ni.+ 45 Mi Finyaa naa mamaa sɔla ndu, nduyɛ ma huŋ a ndu nda Chɔɔsuaa waa o lɛŋii wanaa lekaawa wa ichali leniŋ nde niŋ,+ a Mɛlɛka tou finyaa ndaa mamaa lachi wa.+ Tɛndii koŋ lo loŋ haaa a teleŋ Deeve wo. 46 Mi Mɛlɛka hɛnaŋ a Deeve tau. Nduyɛ mbo nyuna Mɛlɛka le mbo chɛl ndu mbo taŋgul chiɛiyo le Mɛlɛka Chekɔpu wo.+ 47 Kɛ Sɔlɔmɔŋ taŋgul chiɛiyo le ndu ni.+ 48 Mɛlɛka Bɛndoo chel o chiɛila waŋnda chieeya taŋgul taŋ niŋ te.+ Mi wana suaa le Mɛlɛka wo dimi aa: 49 ‘Chɛhowa* dimi maa choo choo cho kpeŋgbei* ni lemasaa ni,+ nduyɛ lɛŋndeŋ le cho naa niaa kɛsiaa ŋpeluaa ni.+ Chiɛi suu kuɛɛ nya cho yɛ ya teŋgul? Kuɛɛ fondaŋ ni pɛŋgiaa cho yɛ? 50 Bala nilaŋ la toosiaa nyɔɔŋ muŋ kpou ni, lende le?’+

51 “Nya wanaa bolii kalaa haa, kɔlta nyalaŋ a nila nyalaŋ la sɔla hivi chiɛi kɔɔli le. Teleŋ o teleŋ la cho nyina diandaa simullo mɛɛ finyaa nyaa mamaa ndaa tosa yɛ.+ 52 Wanaa ndaa suaa le Mɛlɛka wa kinɛi, o kuɛɛ finyaa nyaa mamaa tusi yɛ nyɛpalaa choo le?+ Ma diu wanaa ndaa yonda sindɛ a hunɔɔ wana cho sakpo wo okɔɔ wo.+ Ndu nya laŋga pisi ni, mi la dii ndu.+ 53 Mi Mɛlɛka soliŋ maalikɛiya kpeku le nya Sawalaŋ kioo,+ kɛ mi la kɛɛ laŋ biyɔɔ.”

54 Mɛɛ nda tuei sɔɔŋ muŋ, ma tuulu kɔl tau. Okoŋ ma mia a ndu kuu. 55 Kɛ nyina diandaa wa Stiiviŋ choo. Mɛɛ o tofa o choo choo niŋ, mbo cha tɔɔmayɛi Mɛlɛkɛi a Chiisu isisi o ba kɛndɛ Mɛlɛkaa choo.+ 56 Mbo dimi aa: “La tofawɔ! I che mi choo choo kumbiŋ, mi Po wanachioo+ wa isisi o ba kɛndɛ Mɛlɛkaa choo.”+ 57 Mɛɛ nda tuei hei, ma deŋi choo choo kpeleŋ, ma kinda nila ndalaŋ a laba. Okoŋ mi nda kpou kuel ndu sululu. 58 Mɛɛ nda soli ndu chiee, ma kandu ndu vii viiyo a poutaŋ.+ Mi wanaa tɛndal ndu seileŋ nda+ kɛsi domala ndalaŋ po chua piaandu pilɛ ikɛi diolaŋ aa Sɔɔ.+ 59 Mɛɛ nda wa Stiiviŋ vii viiyo, mbo piɛi aa: “Masanɔɔ Chiisu, I mal num yoomu nuu o ba.” 60 Mɛɛ o baŋ wulaŋ, mbo deŋi choo choo kpeleŋ aa: “Chɛhowa,* bii nda tɔɔyaŋ le hakioo hoo le.”+ Mɛɛ o dimi lende, mbo lɔl lɔma piɔmndaŋ.