Walta Kiilaa
6 A boondii keŋ, mɛɛ wanaa laalaŋnda wa hiouwɔɔ lachi a kuiyo, mi Chuuwaa dimi Kilikiiye wa kandu ŋɔɔchiaŋndo a Chuuwaa dimi Hibuluiye wa, kanifuule waŋ laanduaa Chuuwaa dimi Kilikiiye mi piaandaa ndaa wu wa, a ve nyɛdiaa ndaa piɔu lepaa o lepaa wo sɔla le.+ 2 Okoŋ, mi kiilaa 12 nda chuuŋgiaa buɛiya naapilɛ, ma dimul nda aa: “O bɛnda miŋ mal waŋnda suɛi Mɛlɛkɛi pɛɛkoo le nyɛdiaa piɔuwo le.+ 3 Lelaŋ, puaapiliaa naa, la hɛli waŋ piaanduaa nɔ tamasi kɛndɔɔ wa+ nya tɛɛŋ a ŋɔmmɛu, a nɔ nyina diandaa, ma nɔ taasioo tau wa,+ le miŋ yulu nda iso ma wa wali sɔviɔɔ hoo tosaa.+ 4 Kɛ naŋ cho wa piɛileŋ a waŋnda diom Mɛlɛkaa pɛɛkoo.” 5 Mi waŋnda kpou naŋ kɔl le nyɛ nda dimi wo. Okoŋ ma hɛli Stiiviŋ ndoo nɔ laalaŋ kala kalaa a nyina diandaa wo, Filipi,+ Pokolɔɔsi, Naikenɔɔ, Timɔŋ, Pamɛnaasi, a Nikoleyɔɔsi, o fula Aŋtiɔɔ mbo chua piɛile Chuuwa wo. 6 Ma huŋ a nda o kiilaa lo. Mɛɛ kiilaa piɛi le nda, ma handu nda balaŋ choo.+
7 Okoŋ kɔɔli, mi diom Mɛlɛkaa hiau lachi a pɛŋgɛlaŋndo.+ Mi buɛiya hiau lachi a kuiyo tau tau+ o Chulusalɛm niŋ. Mi wanaa soliaa lasalaa a bɔɔbɔɔ simnuŋ wanaa laalaŋnda.+
8 Mi Mɛlɛka duau Stiiviŋ sala, mbo ke ndu kpaayaa tau. Nduyɛ o wa walta kaamaalaŋ a sɔɔŋ kɔndɔfilloŋ tosaa waŋnda tɛɛŋ. 9 Kɛ mi kunda pum, ma veelu nda aa Wanaa Baŋaŋnda, a waŋnda apum fulaa Sailuini, Alɛkisandiliaa, Siliisiaa a Eesiaa huŋ le sɛɛŋgiaŋndo a Stiiviŋ. 10 Kɛ le mɛɛ ndoo nɔ taasioo nduyɛ mi nyina diandaa wa ndu choo yɛ, a nɔla ma bii ndu a sondo le.+ 11 Okoŋ ma kei waŋnda kɔɔli sɔɔsɔɔ le ma dimi aa: “Ŋ tuei ndu diola Muuse laŋ a diola Mɛlɛkalaŋ tɛɛmbuuwo.” 12 Ma tosa mi waŋnda, laŋgbaa kalla, a wanaa pɛɛku waŋnda sawala Mɛlɛkalaŋ nda tuulu kɔl a Stiiviŋ, ma kuel ndu sululu. Okoŋ ma bii ndu a kaka, ma kua a ndu o Laŋgbaa Kalaa Kialu Yamaŋ Nda lo. 13 Ma huŋ a seiyaa lachoowaa, ma dimi aa: “Poo hoo cho hiouwɔɔ lachi a sɔɔŋ wɔɔŋndoŋ dimioo a fondaŋ diandaa hoo okɔɔ, vɛlɛ a Sawala Mɛlɛka ke Muuse laŋ. 14 Le tamaseliiyo, ŋ tuei ndu dimioo maa Chiisu fula hoo Naasaluɛi yo cho chiɛiyo hoo piɔlɔɔ, mbo siŋga sawala Muuse ke naa laŋ.”
15 Mɛɛ Laŋgbaa Kalaa Kialu Yamaŋ Nda kpou chal Stiiviŋ tofaa, ma cha hɔlaa nduaa maa hɔlaa maalikɛinɔ.