Walta Kiilaa
16 Okoŋ mi Pɔɔl fuuluu Dɛbi. Mɛɛ o chɛŋ loŋ, mbo kua Lista.+ Wana laalaŋ pilɛ wa loŋ diolaŋ aa Timoti.+ Chuunɔɔ kala ndɔ wa ni, nduyɛ ndu bɛɛ wana laalaŋndo o wa ni. Kɛ Kilikiinɔɔ finya ndɔ wa ni. 2 Puaapiliaa Lista a Akooniɔm wa sɔɔŋ kɛndɔŋ dimioo tau a Timoti okɔɔ. 3 Pɔɔl ndoo yeema le kɔlaŋ nda Timoti. Le hei, mbo chua ndu, mbo hivi ndu o chiɛi kɔɔli le Chuuwaa wa o tanda koŋ niŋnda,+ kanifuule nda kpou ndaa sina maa Kilikiinɔɔ finya ndɔ wa ni. 4 Mɛɛ nda wa kɔlaŋ, chiee nda fuuluu ko, a chɔm puaapiliaa loŋ sɔɔŋ kiilaa a bɛnduaa o Chulusalɛm niŋ chɛlaŋ choo woŋ, le ma bii muŋ.+ 5 Mi kundala wanaa laalaŋnda la hiau lachi a kaloo poŋ o laalaŋndo niŋ, nduyɛ lepaa o lepaa waŋnda wa hiouwɔɔ lachi a kuiyo.
6 Okoŋ ma keeku Filichiaa a o lɛŋnde Kaleesiaa leŋ niŋ,+ kanifuule mi nyina Mɛlɛkaa kuuna nda le suɛi Mɛlɛkɛi dimioo o tanda Eesiaa wo niŋ. 7 Mɛɛ nda fuuluu Misiaa, ma kindiŋ le kɔlaŋ Bitiniaa,+ kɛ mi nyina Chiisu wo* kuuna nda. 8 Le hei, ma keeku Misiaa, ma tuusu Towaasi. 9 Ichɔl koŋ, mi Pɔɔl cha po waa Masidooniaa isisi ndu lachi o yilaŋnde niŋ. Mi poo hoo wa ndu dimullo aa: “Huŋ o lɛŋnde Masidooniaa leŋ niŋ ma mala naa.” 10 Mɛɛ Pɔɔl che dɔɔ yilaŋnde hei, miŋ bɛɛndiaŋ le kɔlaŋ Masidooniaa. Miŋ sina kɛsɛ maa Mɛlɛka vem naa le nda kɔlaŋ yooŋgu kɛndɔɔ dimullo ni.
11 Okoŋ miŋ luɛi o dɛndɔɔ niŋ Towaasi, miŋ kua Samotuluasi sakpo. Diimandɔɔ, miŋ kua Niaapolii. 12 Mɛɛ naŋ chɛŋ loŋ, miŋ kua o chiee Luomaŋnda diolaŋ aa Filipai.+ Chiee tɔɔ bɛndoo pila Filipai wa o tanda Masidooniaa wo niŋ ni. Miŋ lɔl o chioo hoo niŋ waali. 13 O Paale Pɛŋgiaaleŋ choo, miŋ kua o kpaki chioo kɔɔli o pioo kɔŋgɔ. Naŋ yiyaŋ maa waŋnda cho chuuŋgiaŋ loŋ le piɛileŋ. Miŋ chal, miŋ kandu waŋ laanduaa chuuŋgiaŋ loŋ nda yooŋgu kɛndɔɔ dimullo. 14 Chuaa pum wa nda tɛɛŋ diolaŋ aa Lidiaa, wana waa Tayatilua.+ Kolala baa kalalaŋ ndoo pisi ni. Mɛlɛka ndoo piɛi ni, nduyɛ o wa nilaŋ yaŋɔɔ. Mi Chɛhowa* kumbi ndu kɔllo le mbo laalaŋ sɔɔŋ Pɔɔl wa dimioo woŋ. 15 Mɛɛ o sɔla yiŋɔɔ nda yuŋgu ndɔɔ,+ mbo dimul naa aa: “Te la chua ya pɛ maa I cho wana laalaŋ kɛsɛ o Chɛhowa* niŋ, mɛɛ la huŋ o ya lo chiɛiniŋ.” O lo naa kɔɔli tei miŋ kua.
16 Mɛɛ naŋ wa kɔlaŋ o fondaŋ nda piɛiyo, miŋ bɔŋaŋ a buɛi laandu pilɛ. Nyina wɔɔŋndo wa ndu kɔɔli, nduyɛ mi ndoo tosa mbo dimi sɔɔŋ waa lachioŋ.+ Mi wanaa nduaa bɛnduaa ndaa sɔla tɔnɔɔ tau o ndu niŋ. 17 Chuaambɔɔ hoo wa hiouwɔɔ lachi a naa tolɔɔ kɔɔli a deŋioo aa: “Buɛiyaa Mɛlɛka Bɛndoo puaa haa cho ni,+ nduyɛ a cho nya chɔmndo mɛɛ nya looku mi la sɔla pioŋɔɔ yɛ.” 18 Le palɛi bɔɔbɔɔ o wa hei tosaa. O mɛɛlulaŋ, mi suɛi pala Pɔɔl, okoŋ mbo muliŋ mbo dimul nyina wɔɔŋ koŋ aa: “O diola Chiisu Kiliti laŋ niŋ, mi dimul num, faŋaŋ ndu kɔɔli.” O lepilɛ niŋ kpe, mi nyina wɔɔŋ koŋ faŋaŋ ndu kɔɔli.+
19 Mɛɛ wanaa nduaa bɛnduaa che maa a sɔla lɛ niŋ tɔnɔ o tɔnɔ o ndu niŋ te,+ ma bii Pɔɔl nda Sailaa, ma lo nda sasɔɔ o luŋ haaa ma kua a nda o masaa waa lo.+ 20 Mɛɛ nda kuɛ a nda o masaa chieeya lo, ma dimi aa: “Puaa haa cho chiee naa laasiaa.+ Chuuwa nda cho ni, 21 ma wa naa naamula naŋ bɛnda miŋ tol kɔɔli le laŋ pɛɛkoo. Naa yɛ, Luomaŋnda naŋ cho ni.” 22 Okoŋ mi faŋgaa chiŋalaŋ nda. Mi masaa chieeya dimul waŋnda le ma sɛɛsiaa nda nyɛlaŋ lekɔɔ, ma lɔɔ nda a sionduei.+ 23 Ma luaa nda lɔɔ pila, okoŋ ma duau nda o chiɛi manyumndo niŋ. Ma dimul wana wa chiɛi manyumndo mandaa wo le mbo kɛsi nda hɔlteŋ choo yɔŋii nda nyaanuŋ.+ 24 Le mɛɛ nda dimul ndu lende yɛ, mbo luei nda leniŋ pɔpɔ, mbo baŋ nda o kpiɔɔ.
25 Kɛ a ditɛɛŋndo, Pɔɔl nda Sailaa wa piɛileŋ a Mɛlɛka saŋgalaa o chondoŋ niŋ,+ mi wanaa wa o biyɔɔ niŋ o chiɛi manyumndo niŋnda wa nda nilaŋ yaŋɔɔ. 26 O lepilɛ niŋ kpe, mi lɛŋndeŋ le nyiiya tau tau. Mi chiɛi manyumndo kandu hiilɔŋndo, okoŋ mi diolaŋ kpou la kuumbuŋ. Mi yɔlɔŋ nda baa wanaa wa o chiɛi manyumndo niŋnda ŋ tiimbuŋ.+ 27 Mɛɛ wana wa chiɛi manyumndo mandaa wo tendu, mbo cha diolaŋ kpou la kumbiaa, mbo naŋ muɛi nduɛi yau le mbo diinuŋ. Kanifuule, ndoo yiyaŋ ko maa wanaa wa o chiɛi manyumndo niŋnda nyaanuŋ.+ 28 Kɛ mi Pɔɔl deŋi choo choo aa: “Diinuŋ te! Naa kpou ŋ cho nanuŋ.” 29 Okoŋ mbo nyuna le lambuiyo, mbo luɛi a kiltaŋ. Mbo baŋ wulaŋ Pɔɔl nda Sailaa lachi a nyiiyaa kpa kpa. 30 Mbo soli nda o bɛɛ. Mbo nyuna nda aa: “Yɛɛnɛ ya tosa yɛ mi sɔla pioŋɔɔ?” 31 Ma muli aa: “Laalaŋ o Masanɔɔ Chiisu niŋ le mi Mɛlɛka piŋi num a yuŋgu numndo.”+ 32 Okoŋ, ma dimul ndu yooŋgu kɛndɔɔ a Chɛhowa* okɔɔ nda yuŋgu ndɔɔ kpou. 33 Mbo chua nda ichɔl koŋ, mbo kua a nda inɛ, mbo kɔ pulu nda pauvii ndɛi. Nduyɛ tamala bɛɛ o doonuŋ te, mbo sɔla yiŋɔɔ nda yuŋgu ndɔɔ kpou.+ 34 Mbo kua a nda o ndu lo chiɛiniŋ, ma toosiaa nyɛdiaa ma kɛsi o tibiiyo* choo. Mbo duaunuŋ nyaale tau nda yuŋgu ndɔɔ kpou le mɛɛ o laalaŋ o Mɛlɛka niŋ yɛ.
35 Mɛɛ paaleŋ le sɛ, mi masaa chieeya viam polisiiya le ma kɔ dimul wana wa chiɛi manyumndo mandaa wo aa: “Mal puaa kaŋ.” 36 Mi wana wa chiɛi manyumndo mandaa wo kɔ doonuŋ Pɔɔl kona aa: “Masaa chieeya vem waŋnda maa ya mal nya. Lelaŋ, la fula mi la kuɛŋnuŋ o kɔl nyulu niŋ.” 37 Kɛ mi Pɔɔl dimul nda aa: “A lɔɔ naa waŋnda o hɔl ma duau naa o chiɛi manyumndo niŋ a kɔɔsa naa le. Nduyɛ Luomaŋnda naŋ cho ni.+ A yeema niŋ ma mal naa sɔɔsɔɔ? Ŋ chɛl ndi le! Ndapila huŋ ma soli naa.” 38 Mi polisiiya kɔ doonuŋ masaa chieeya kona. Mɛɛ nda tuei maa Luomaŋnda puaa haa cho ni, mi siooŋnde bii nda tau.+ 39 Ma huŋ nyɔɔlu nda. Mɛɛ nda soli nda, ma dimul nda maa a mal chioo. 40 Kɛ mɛɛ nda fula o chiɛi manyumndo niŋ, ma kua o Lidiaa lo. Mɛɛ nda che puaapiliaa, ma luei nda yoomuaŋ,+ okoŋ ma kuaŋnuŋ.