Luku
16 Okoŋ mbo dimul vɛlɛ buɛiyaa nduaa aa: “Po sulaa pilɛ ndoo nɔ buɛiyo.* Kɛ mi waŋnda loli buɛi ndɔɔ hoo maa o cho nyɛm ndɔŋ tɛɛmbuuwo. 2 Okoŋ mbo veelu ndu. Mbo nyuna ndu aa, ‘I maavɛɛnɛ ya cho yɛ hei tueiyɔɔ a num okɔɔ? Huŋ dɔɔnuŋ kona, kanifuule a cho lɛ wa buɛi ni le.’ 3 Mi buɛiyo hoo nyunaŋ o kɔl niŋ aa, ‘Masanɔ nuu hiŋ ya nyɛm ndɔŋ faŋa o ba. Yɛɛ ya cho yɛ niko tosa? I nɔ yɛ mayoomu le wali yondo tosa le, nduyɛ siɔmbulaŋ la cho ya le balɔɔ waŋnda piɛileŋ. 4 Awa. I sina nyɛ ya cho tosa wo. Okoŋ o yɔŋ niŋ bɛɛ mbo faŋa ya, waŋnda nɔla ma chua ya mi wa nda o bɛŋgu choo.’ 5 Okoŋ kɔɔli, mbo veelu wanaa nɔ kueela masanɔ ndɔɔ wa kpou. Mbo nyuna o tasoo aa, ‘Vɛɛnɛ ŋ nɔ yɛ le masanɔ nuu?’ 6 Mbo muli aa, ‘Chuɛima ɔlifiiyaŋ hemndaŋ kɛmɛ.’* Mbo dimul ndu aa, ‘Mi che yau ŋ pila suei yo. Chal ma poonyiaa hemndaŋ 50 chɔ chɔ.’ 7 Mbo nyuna o pilɔɔ aa, ‘Num yɛ, vɛɛnɛ ŋ nɔ yɛ le ndu?’ Mbo muli aa, ‘Witiiyoŋ bɔlɔlaŋ kɛmɛ.’* Mbo dimul ndu aa, ‘Mi che yau ŋ pila suei yo. Chal ma poonyiaa bɔlɔlaŋ 80.’ 8 Mi buɛiyo hoo masanɔ ndɔɔ chandu ndu le taasi ndɔɔ, mi che bɛɛ o kafalaŋ choo o tosa ndi ni. Wanaa cho le chieeŋndo hoo wa nɔ taasioo a mɛɛ nda biyaŋ o sɔɔŋ choo yɛ, mbo hiau wanaa cho o nyɛ teŋgaa+ niŋnda.
9 “Mi dimul nya: La tosa chaŋyaŋ sanaa a nyɛm sulaŋ chieeŋndoŋ.+ Okoŋ te nyɛm muŋ huŋ chuu pɛ, a cho nya yiya o chalta fafɛɛŋ ndaŋ niŋ.+ 10 Te waŋndo sandu pɛ o sɔɔŋ pɔmbɔŋ niŋ, o nɔla mbo sandu o sɔɔŋ bana banaŋ niŋ. Kɛ te waŋndo sendu o sɔɔŋ pɔmbɔŋ niŋ te, o nɔla mbo sandu o sɔɔŋ bana banaŋ niŋ te. 11 Lelaŋ, te la ve sakpo o nyɛm sulaŋ chieeŋndoŋ muŋ niŋ te, nɛɛnɛ bii yɛ kɔllo mbo ke nya nyɛm sulaŋ kpeekpeiyoŋ? 12 Te la ve sakpo a nyɛm pilaŋ te, nɛɛnɛ bii yɛ kɔllo mbo ke nya nyɛ le nyapila?+ 13 Buɛi o buɛi ve le masaa a ŋiɔɔŋ te. Kanifuule, te hoo o kaala ni, o tul o pilɔɔ leyɛ. Te hoo o diikuŋ ni, o diikuŋ o pilɔɔ le. Lelaŋ, wana ve buɛiyo le Mɛlɛka, ma wa vɛlɛ buɛiyo le nyɛsɔlaa le.”+
14 Mɛɛ Falisiiyaa kaala kanioŋ* nda tuei sɔɔŋ Chiisu dimi muŋ ndoŋ, ma kandu ndu mamɔɔ.+ 15 Okoŋ mbo dimul nda aa: “Mi la chɔm waŋnda o hɔl+ maa la cho wanaa sakpo. Kɛ Mɛlɛka sina nyɛ o nyɛ cho nya o lakɔl,+ kanifuule nyɛ waŋnda che maa o cho nyɛ sɔvɛ wo, ndu Mɛlɛka che nyɛ nɔɔlɛi ni.+
16 “Sawalaŋ a diomnda wanaa ndaa suaa le Mɛlɛka wa dimi laŋ la wa haaa mi Chɔŋ huŋ. Chɔŋ niŋ a boondii keŋ, yooŋgu kɛndɔɔ a Masale Mɛlɛkaleŋ okɔɔ cho dimiŋndo, nduyɛ waŋnda suu o suu cho kindiŋndo le leŋ sɔlaa.+ 17 A tonya, i cho tɛtɛlɛ le mi choo choo a lɛŋndeŋ le hiou, kɛ diom taaniŋndo o pilɛ bɛɛ o Sawalaŋ niŋ feŋaŋ lechoo le haaa mi laŋ kpou la peeluŋ.+
18 “Wana o wana kɛɛ laa ndɔ pɛ mbo chua lanɔ cheleŋ, mɛɛ wana koŋ suunda. Nduyɛ wana o wana chua pɛ wana lanɔ nda kɛɛ o nɔɔ niŋndo, mɛɛ wana koŋ suunda.+
19 “Wana sulaa pilɛ wa, nyɛla baa kala kalalaŋ ndoo wounuŋ ni. Lepaa o lepaa o wa yoomu ndɔɔ tueiyɔɔ yeela a nyɛm kɛndɛŋ ndoo nɔ woŋ. 20 Kɛ po piɛiyaa pilɛ wa diola aa Lasalɔɔ. Pauve wa ndu i tiuwaa lekɔɔ silɔ. O dio kpaki wana sulaa hoo ndaa kɛsi ndu ni. 21 Nduyɛ, ndoo yeema mbo wa kuuwuŋ deli o tibii* wana sulaa hoo bɛŋgu woŋ dioo. Mi tuŋnda bɛɛ ndaa hiŋ pauvii nduɛi deembuuwo. 22 Paale pilɛ, mi poo hoo wu, nduyɛ mi maalikɛiya huŋ chua ndu ma kua a ndu Ebilaham ikɛi.*
“Okoŋ kɔɔli, mi wana sulaa bɛɛ wu, ma kumbu ndu. 23 O wa o Sɛiyo* niŋ, mbo heelu hɔlla. Nyɛ nɛiyaa wa ndu choo tau. Okoŋ mbo cha Ebilaham landaŋ, nduyɛ Lasalɔɔ wa ndu ikɛi.* 24 Okoŋ mbo veelu aa, ‘Finya nuu Ebilaham, tuiinuŋ ya inyiɛɛ fɔ! Viom Lasalɔɔ mbo pila suei nduɛi hɔlle o mɛŋndaŋ niŋ mbo mal la o lediɔɔmu, mi pɔɔla bololeŋ, kanifuule I cho bɔɔ saŋgaa o yiŋnde wule wule leŋ niŋ.’ 25 Kɛ mi Ebilaham dimul ndu aa, ‘Po nuu, loonuŋ maa boondii ŋ wa yoomu ve, ma tuɛi nyɛm kɛndɔŋ yeela tau. Kɛ Lasalɔɔ ndu, nyɛpalaa wa ndu choo. Suŋ suŋ niŋ, ndu cho kɔl dɛɛniaa sɔlaa, mi num wa o nyɛpalaa niŋ. 26 O fulawɔ okoŋ kɔɔli, kpoloŋ yiŋgilɛi bɛndoo cho naa tɛɛŋ naa nyaa. Le hei, waŋnda yeema bɛɛ le chɔnɔŋndo naŋ ma kuɛ loŋ, a nɔla le. Nduyɛ, waŋnda nɔla ma chɛŋ loŋ ma taŋ naa naŋ cho wa le.’ 27 Okoŋ mi po sulaa dimi aa, ‘Te o wa lende pɛ, yandii finya nuu, mɛɛ viom ndu o finya nuu lo chiɛiniŋ, 28 kanifuule I nɔ pɔmbuaa a ŋuɛɛnu le halikpeŋ mbo sila nda yɔŋii nda bɛɛ huŋ o fondaŋ nyɛpalaa hoo niŋ.’ 29 Kɛ mi Ebilaham dimi aa, ‘Muuse nda wanaa suaa le Mɛlɛka wa cho loŋ. A yaŋ nda nilaŋ.’+ 30 Okoŋ mbo dimi aa, ‘Finya nuu Ebilaham, a yeŋ niŋ lani le. Kɛ te o yɔŋ pɛ mi waŋndo miiŋgu yoomu mbo kɔ sila nda, a cho wookɔŋ.’ 31 Kɛ mbo dimul ndu aa, ‘Te a yeŋ Muuse+ nda wanaa suaa le Mɛlɛka wa nilaŋ te, mɛɛ waŋndo miiŋgu bɛɛ yoomu, a yeŋ niŋ ndu lani le.’”