Luku

21 Mɛɛ Chiisu heelu hɔlla, mbo cha wanaa sulaa kela ndalaŋ dɔwɔɔ o kɔfula ŋkanilaŋ* niŋ.+ 2 Okoŋ mbo cha mi wɛɛŋ bala fondo vii pɔnɔɔ wo duau kaniŋ pɔmbɔŋ kpalɛiyoŋ ŋ muuŋ.*+ 3 Mbo dimi aa: “A tonya mi dimul nya, wɛɛŋ bala fondo vii hoo pɔnɔɔ wo dɔu kanioŋ mbo hiau wana o wana.+ 4 Kanifuule, waŋnda haa kpou, kaniŋ nda nɔ woŋ nyɛɛmbɔ koni nda dɔu ni. Kɛ ndu ndu, nyɛ wa ndu o ba wo kpou o dɔu ni. Nyɛ ndoo tiindaŋ o yoomu ndɔɔ niŋndo.”+

5 Okoŋ kɔɔli, mɛɛ waŋnda wa suɛi a mɛɛ chiɛi Mɛlɛkaa wa o kɛɛmiaa nyɛkɛndɛi a pouta kɛndɛlaŋ, vɛlɛ a nyɛm waŋnda yɔŋgu le Mɛlɛka woŋ,+ 6 mi Chiisu dimi aa: “Taŋgulta nya cho laŋ chɔɔ laŋ kpou, teleŋ cho fuuluu pouwo o pilɛ bɛɛ lo niŋ o chaaŋ ndɔ choo le. Laŋ kpou la cho koombiaa.”+ 7 Okoŋ ma nyuna ndu aa: “Wana Pɛɛkaa, boondii kuɛɛnɛ sɔɔŋ muŋ cho yɛ yɔŋnɔŋ kpeekpei? Nduyɛ tamasi yɛɛ yɔŋnuŋ yɛ niŋ le chɔmndo teleŋ sɔɔŋ muŋ cho yɔŋnɔŋndo?”+ 8 Mbo dimi aa: “La mandaŋ yɔŋii wana hui nya,+ kanifuule wanaa bɔɔbɔɔ cho hunɔɔ o diola nilaŋ niŋ ma dimi aa, ‘Ya cho ndu ni,’ nduyɛ maa ‘Teleŋndo sɔɔŋguu kpɛɛluŋ.’ La tual nda kɔɔli le.+ 9 Te la tuei pɛ a chɔulaŋ okɔɔ, vɛlɛ a wooluŋ wooluŋndaŋ, siooŋii bii nya le, kanifuule sɔɔŋ muŋ nɔ le yɔŋnɔŋndo fɛlɛŋ, kɛ mɛɛlulaŋ la hiŋ niŋ a boondii keŋ te.”+

10 Okoŋ mbo dimul nda aa: “Lɛŋndeŋ le cho sɔŋga a lɛŋndeŋ,+ mi masaleŋ le sɔŋga a masaleŋ.+ 11 Lɛŋnde nyiiyaaleŋ le wa niŋ tau. Yima bɛnduaŋ ma del niŋ, nduyɛ mi naala taŋ waŋnda laŋ+ la tiu o fondaŋnda bɔɔbɔɔ. Waŋnda cha niŋ sɔɔŋ ŋsiooŋndoŋ a walta kɔndɔfiltaŋ o choo choo niŋ.

12 “Kɛ tuupa mi sɔɔŋ muŋ yɔŋnuŋ, waŋnda cho nya biyɔɔ ma tusi nya nyɛpalaa choo,+ ma kuɛ a nya o chiɛila Chuuwa piɛi Mɛlɛka laŋ niŋ, nduyɛ ma dɔu nya o chiɛila manyumndaŋ niŋ. A kua niŋ a nya o masaa waa lo, a o wanaa bɛnduaa lo le mɛɛ nya cho buɛiyaa niaa yɛ.+ 13 Hei cho tosa mi la sɔla fondaa le seileŋ timbioo. 14 Lelaŋ, la kɛɛsiaa pɔɔ mɛɛ nya nɔ le kɔɔsɔɔ yɛ le,+ 15 kanifuule I cho nya mala mi la sina nyɛ nya nɔ le dimioo wo, nduyɛ mi ke nya taasioo. Okoŋ yaamɔɔwaa nyaa nɔla ma soo nyɛ o nyɛ le.+ 16 Okoŋ kɔɔli, wanaa velu nya wa, bɛndaa nyaa, pɔmbuaa nyaa, wanayaŋ nyaŋ, a chaaŋaa nyaa bɛɛ mal* niŋ nya waŋnda haa o ba, nduyɛ ma diu nya pumnda.+ 17 Waŋnda kpou a cho nya yɛleŋ tul le diola nilaŋ.+ 18 Kɛ yiiŋii cho nya o lebol le, le pilɛ bɛɛ le kendiŋ niŋ te.+ 19 Nduyɛ te la biunuŋ pɛ, la cho yoomula nyalaŋ piŋi.+

20 “Kɛ nduyɛ, te la che pɛ mi puaa chɔuwa huŋ balu Chulusalɛm,+ mɛɛ la sina niko maa tambii nduɛi cho niŋ kpɛɛluŋ.+ 21 Mɛɛ wanaa cho Chudiaa wa kandu nyaanɔŋndo o pemboŋ choo,+ mi wanaa cho Chulusalɛm nda mal ma nyaanuŋ, nduyɛ wanaa cho o sɔndɔkɔltaŋ nda kua lɛ chiee loŋ te. 22 Kanifuule, palɛi nyɛpalaa tual niŋ nda choo ve i cho wa ni, le mi nyɛ o nyɛ nda poonyiaa yɔŋnuŋ. 23 Kpundɔɔ cho wa le wanaa lafoliaa,* a komsaa o palɛi keŋ niŋ!+ Kanifuule, saŋga bɛndoo tual niŋ o lɛŋndeŋ choo, nduyɛ mi kɔl tuu Mɛlɛkaa tol waŋnda haa choo. 24 A cho apum diu diu a muɛi faŋnde, ma kuɛ a apum o chɛleŋ niŋ o lɛŋnde niŋ kpou.+ Wanaa lekaa wa cho hunɔɔ Chulusalɛm niɔu niɔu, haaa mi boondii wanaa lekaa wa fuuluu o mɛɛlulaŋ.+

25 “Sɔɔŋ kɔndɔfilloŋ cho yɔŋnɔŋ o paaleŋ niŋ, paŋgei a looŋ.+ O lɛŋndeŋ choo bɛɛ, kɔltaŋ la cho waŋnda yɔŋnɔŋ pulaŋ pulaŋ, kanifuule a sina niŋ nyɛ nda tosa le, a mɛɛ pee mɛŋma ihɛllo wa niŋ ikpoku kpokuei yɛ. 26 Waŋnda chieeya cho wou kpandeŋ a siooŋnde, nduyɛ ma wa o kɔl landɛiyo niŋ le nyɛ cho wa yɔŋnɔŋ ndo o lɛŋndeŋ choo wo, kanifuule kpaayalaŋ o choo choo niŋ la cho hiilɔŋ woku woku. 27 Okoŋ, a cho Po wanachioo+ chɔ hunɔɔ o yumbu yumboo niŋ a kpaayaa, vɛlɛ a naŋɔɔ bɛndoo.+ 28 Kɛ te sɔɔŋ muŋ kandu pɛ yɔŋnɔŋndo, la sim sakpo mi la heelu hɔlla choo choo, kanifuule boondii nya nɔ le pioŋɔɔ sɔlaa ve sɔɔŋguu niŋ kpɛɛluŋ.”

29 Okoŋ mbo dimul nda taloo aa: “La yiyaŋndɔ a yɔm mafikiiyo vɛlɛ a yɔmii cheleŋnde kpou okɔɔ.+ 30 Te i kandu pɛ puiyo, la sina dɔɔ maa teleŋ tualaa fuuluu. 31 Nya bɛɛ, te la che pɛ sɔɔŋ muŋ yɔŋnɔŋndo, la sina niko maa Masale Mɛlɛkaleŋ le cho niŋ kpɛɛluŋ. 32 A tonya mi dimul nya, waŋnda teleŋndo hoo chuu niŋ wu le mi sɔɔŋ muŋ kpou ŋ yɔŋnuŋ.+ 33 Choo choo a lɛŋndeŋ cho faŋaŋ, kɛ diomnda nilaŋ la feŋaŋ te.+

34 “La mandaŋ. La yɔŋguŋ nyapila o nyɛdiaa dio bɛndoo niŋ, a kolɔɔ kala kalaa,+ a o kɔl landɛi nyɛ nuuviaa niŋ te,+ yɔŋii paale leŋ le woolu nya 35 maa leyaŋɔɔ.+ Kanifuule, le cho hunɔɔ le wanaa cho o lɛŋndeŋ choo wa kpou. 36 Lelaŋ, la wa lahɔl,+ nduyɛ mi la wa piɛileŋ teleŋ o teleŋ+ le halikpeŋ mi la sɔla kpaayaa le sɔɔŋ cho muŋ hunɔɔ woŋ kpou hiɔlɔŋndo. Nduyɛ mi la nɔla simndaŋ Po wanachioo o hɔl.”+

37 Te paaleŋ lee sɛ pɛ, mi Chiisu ndoo kuɛ waŋnda pɛɛkoo o chiɛi Mɛlɛkaa niŋ. Kɛ ichɔl, mi ndoo kuɛŋnuŋ o Pembii Ɔlifii Ve choo mbo lɔl loŋ. 38 Nduyɛ mi waŋnda kpou ndaa hiŋ o chiɛi Mɛlɛkaa niŋ idii puŋ le ndu nilaŋ yaŋɔɔ.