Kaleesiaŋnda

2 Mɛɛ wɔsilaŋ la hiou 14, miŋ miiŋgu Chulusalɛm naa Banabaa.+ Mɛɛ naŋ wa kɔlaŋ, miŋ kua latulu a Taitɔɔ.+ 2 Nyɛ ya che o yilaŋnde niŋndo tosa ni mi kua. Mɛɛ naŋ kuɛ, mi kɔ bii bɔŋaŋndo a laŋgbaa kalla kpeele. Okoŋ, mi doonuŋ nda kona a mɛɛ ya wa wanaa cho ŋChuu le wa yooŋgu kɛndɛ Mɛlɛkaa dimullo yɛ. I tosa hei le sinaa te fondo fuu wali ya tosa wo, ɔɔ o ya cho tosaa wo cho ni. 3 Taitɔɔ,+ chaaŋ ni naŋ kuɛ wo, mi che bɛɛ Kilikiinɔɔ o wa ni, a beŋ ndu le mbo sɔla hivi chiɛi kɔɔli le.+ 4 Kɛ mi puaapiliaa lachoowaa luɛi naa tɛɛŋ o vioŋnɔŋndo niŋnda soli suɛi hei.+ Boondii naŋ ve o sina choo le ve nda luɛi naa tɛɛŋ ni.+ Ndaa hiŋ naa tɛɛŋ sɔɔsɔɔ le sinaa hɛnɛkɛyɛi naŋ cho o diompilɔɔ niŋ a Chiisu Kiliti wa cho tueiyɔɔ yeela ve, le halikpeŋ ma luei naa o chɛleŋ niŋ.+ 5 Kɛ nyɛɛmbɔ bɛɛ ŋ ke nda fonda le,+ kanifuule naŋ yeema mi tonya cho a yooŋgu kɛndɔɔ okɔɔ wo wa nya tɛɛŋ lɔɔlɔɔ.

6 Kɛ wanaa waŋnda yiyaŋ maa a cho wanaa sɔvɛ wa,+ mɛɛ mɛɛ nda wa, le ya, a cho nyɛ o nyɛ le. Kanifuule, Mɛlɛka o hɔl ndu, nyɔɔ o pilɛ kpe naŋ cho ni. 7 O baa pilɔɔ choo, mi sɔla wallo le wanaa sɔla hivi chiɛi kɔɔli le wa+ yooŋgu kɛndɔɔ dimullo, mɛɛ Pitɛ bɛɛ wa wanaa sɔla hivi chiɛi kɔɔlioo wa yooŋgu kɛndɔɔ dimullo yɛ. 8 Wana ke Pitɛ kpaayaa le waa kiilanɔɔ le wanaa sɔla hivi chiɛi kɔɔlioo wa wo, ndu koni ke ya kpaayaa ni, le waa kiilanɔɔ le wanaa cho ŋChuu le wa.+ 9 Mɛɛ Chemisi,+ Sifaasi,* a Chɔŋ che kɛndɛi bɛnduii Mɛlɛka tosal la ve,+ ma yil naa a laba naa Banabaa.+ Laŋgbaa haa ndaa saa kunda wanaa laalaŋnda ni. Okoŋ miŋ chɛlaŋ le mi naŋ kuɛ o wanaa cho ŋChuu le wa lo, kɛ mi nda kuɛ o Chuuwa lo. 10 Nyɛ nda dimul naa le tosaa kinɛiyo cho ni maa, naŋ puɛɛnuŋ a puaapiliaa bala fonduaa le. Nduyɛ ya bɛɛ, wali ya hɛnaŋ tosaa wo kpeekpei cho koŋ ni.+

11 Kɛ mɛɛ Sifaasi*+ hiŋ Aŋtiɔɔ+ mbo tosa suɛi niŋ kposoŋ te ve, mi dimi ndu o hɔl kpendekele maa nyɛ o tosa wo niŋ te. 12 Kanifuule, tuupa mi puaa pum chaŋ o Chemisi+ lo ma huŋ Aŋtiɔɔ, mi ndoo de nyɛdiaa nda wanaa cho ŋChuu le wa latulu.+ Kɛ mɛɛ nda hiŋ, mbo yɔŋ siooŋnde le wanaa sɔla hivi chiɛi kɔɔlioo wa. Okoŋ mbo kialu nyɛdiaa dioo a nda.+ 13 Mi Chuuwa a tuaa tual ndu kɔɔli a kaa mulu muluaŋ koŋ. Nduyɛ Banabaa bɛɛ mbo tual kaa nda koŋ kɔɔli. 14 Kɛ mɛɛ ya che maa a ve sɔɔŋ tosa mɛɛ yooŋgu Mɛlɛkaa dimi yɛ le,+ mi dimul Sifaasi* nda kpou o hɔl aa: “Te num cho Chuunɔɔ wo mal pɛ sɔɔŋ Chuuwa tosa woŋ tosaa, ma muliŋ sɔɔŋ wanaa cho ŋChuu le wa tosaa, vɛɛ ŋ cho yɛ wanaa cho ŋChuu le wa mala ma chua kaala maChuu laŋ?”+

15 Chuuwa naŋ cho ni, nduyɛ ŋ cho maa wanaa yɔŋ wɔɔŋ cho ŋChuu le wa le. 16 Ŋ sina maa o cho nyɛ sawalaŋ* la dimi wo tosaa le siiŋguu waŋndo wana sakpoo Mɛlɛka o hɔl te, kɛ laalaŋndo+ dɔwɔɔ o Chiisu Kiliti niŋ.+ Lelaŋ naŋ dɔu laalaŋndo o Chiisu Kiliti niŋ ni, le miŋ wa wanaa sakpuaa o Kiliti niŋ, kɛ o cho le nyɛ sawalaŋ la dimi wo tosaa le. Kanifuule, wana o wana nɔla mbo simnuŋ wana sakpoo o nyɛ sawaa dimi wo tosaa niŋ te.+ 17 Te naa bɛɛ ŋ simnuŋ pɛ wanaa yɔŋ wɔɔŋ o kindiŋ naŋ cho le waa wanaa sakpuaa o sabu Kiliti wo niŋ pɛ, baa koŋ chɔm ni maa Kiliti dɛɛniaa naa le hakioo tosaa ni? Sako bɛɛ! 18 Nyɛm ya chii niŋ tɛɛmbuu woŋ, te I miiŋgu muŋ pɛ toosiaa, mɛɛ I chɔm maa ya cho wana yɔŋ wɔɔŋndo ni. 19 O sabu sawaa niŋ, mi sɔla piɔmndo le sawaa,+ kanifuule I yeema mi wa yoomu le Mɛlɛka. 20 Mi sɔla baŋɔɔ o yɔmndo choo a Kiliti latulu.+ Lelaŋ, o cho lɛ o kpaaya ni niŋ te ya cho yoomu le,+ kɛ o kpaaya Kiliti wo niŋ. O Po Mɛlɛkaa niŋ ya dɔu tiindaŋndo le waa yoomu ni,+ kanifuule ndu chɛl ni mbo wu le ya le mɛɛ o kaala ya yɛ.+ 21 I chue kɛndɛi bɛnduii Mɛlɛkɛi nyɛ fondoo fuu le.+ Te o yɔŋ pɛ aa sawaa tosa ni mi waŋndo wa sakpo Mɛlɛka o hɔl, mɛɛ fondo fuu Kiliti vi ni.+