Luomaŋnda

8 Lelaŋ, wanaa cho o diompilɔɔ niŋ a Chiisu Kiliti wa, a cho lɛ nda iyama kilul te. 2 Sawa nyina diandaa ke nya yoomoo, le mi la wa o diompilɔɔ niŋ a Chiisu Kiliti. Sawa koŋ soli nya vɛlɛ sawa hakioo,+ a sawa piɔmndo o ba bɛŋgu. 3 Sawaa* ndoo nɔla nya baŋa le,+ kanifuule ndoo nɔ kpaaya+ o dialloŋ niŋ te. Kɛ mi Mɛlɛka yɔŋ Po ndɔɔ+ o velaŋ waŋnda chieeyaa lahakiaa niŋ,+ le mbo faŋa hakioo. Okoŋ mi Mɛlɛka kilul hakioo yamɛi o dialloŋ niŋ. 4 O tosa hei le mi sɔɔŋ sakpoŋ Sawaa dimi maa naŋ tosa woŋ tosaŋ o naa niŋ,+ naŋ cho nyɛ nyina diandaa dimi wo tosaa wa.+ Kɛ o cho le miŋ tosa nyɛ dialuŋ naŋ hakioŋ dimi wo le. 5 Wanaa cho yeemɛi dialuŋ ndaŋ tosaa wa, o yeemaŋ ŋdialloŋ choo nda handu kɔlta ndalaŋ ni.+ Kɛ wanaa cho yeemɛi nyina Mɛlɛkaa tosaa wa, o yeemaŋ nyina Mɛlɛkaa choo nda handu kɔlta ndalaŋ ni.+ 6 Kanifuule, kɔllo handɔɔ o yeemaŋ ŋdialloŋ choo tosa miŋ sɔla piɔmndo.+ Kɛ kɔllo handɔɔ o yeemaŋ nyina Mɛlɛkaa choo ke naa yoomoo a kɔl nyuloo.+ 7 Kɔllo handɔɔ o yeemaŋ ŋdialloŋ choo tosa miŋ simnuŋ yaamɔɔwaa Mɛlɛkaa,+ kanifuule dialloŋ tul nyɛ sawa Mɛlɛkaa dimi wo kɔɔli le. A tonya, dialloŋ diikuŋ sawa Mɛlɛkaa le. 8 Lelaŋ, wanaa tual yeemaŋ ŋdialloŋ kɔɔli wa nɔla ma nɛŋi Mɛlɛka kɔl te.

9 Kɛ nya nya, la cho yeemaŋ ŋdialloŋ tolɔɔ kɔɔli le. Te nyina Mɛlɛkaa wa nya pɛ choo kɛsɛ, mɛɛ nyɛ o dimi wo nya tual kɔɔli ni.+ Wana o wana nɔ kaa* Kiliti wo le, mɛɛ wana koŋ cho le Kiliti le. 10 Te Kiliti wa pɛ o diompilɔɔ niŋ a nya,+ dialloŋ cho wu, kanifuule ŋ nɔ hakioo. Kɛ nyina Mɛlɛkaa cho nya yoomoo ke, le mɛɛ Mɛlɛka siiŋguu nya wanaa sakpuaa yɛ. 11 Nyina Mɛlɛkaa miŋgi Chiisu yoomu ni. Te nyina koŋ wa nya pɛ choo, mɛɛ nya bɛɛ te la vi pɛ, Mɛlɛka miŋgi koŋ Chiisu Kiliti yoomu wo+ cho nyina ndɔ cho nya choo wo soliŋ kpeku mbo miŋgi nya yoomu.+

12 Lelaŋ puaapiliaa, ŋ nɔ miŋ tol yeemaŋ ŋdialloŋ kɔɔli le.+ 13 Te la tol pɛ yeemaŋ ŋdialloŋ kɔɔli, la cho piɔmndo sɔla. Kɛ te la chɛl pɛ mi kpaaya nyina diandaa mala nya mi la dii yeemaŋ ŋdialloŋ,+ mɛɛ la cho wa yoomu.+ 14 Wanaa nyina Mɛlɛkaa cho nɛiyo chɔmndo wa kpeekpei cho chuauwaa Mɛlɛkaa ni.+ 15 O cho nyina siiŋguu nya chiaa, nduyɛ mi la wa lɛ a isiooŋ te nya sɔla le. Kɛ nyina Mɛlɛka ke nya mbo siiŋguu nya chuauwaa ndɔ wo nya sɔla ni. Nyina koŋ tosa ni miŋ veelu Mɛlɛka choo choo aa: “Aba,* Kɛkɛ!”+ 16 Nyina Mɛlɛkaa tosa ni miŋ sina o kɔlta naalaŋ niŋ+ maa chuauwaa Mɛlɛkaa naŋ cho ni.+ 17 Te chuauwaa nduaa naŋ cho yɛ ni, mɛɛ ŋ cho nyɛm kɛŋ ndɔŋ sɔla, nduyɛ miŋ sɔla nyɛm kiɔɔŋ+ latulu a Kiliti. Kɛ ŋ nɔ fɛlɛŋ miŋ saŋga naa ndaa latulu+ malaŋ naŋ sɔla biiloo a ndu latulu.+

18 I laalaŋ maa saŋga naŋ cho hau sɔlaa wo cho nyɛ o nyɛ le, te I tuu ndu pɛ a biilu wa niŋ o naa niŋndo.+ 19 Nyɛm Mɛlɛka toosiaa woŋ kpou cho chumndo a yeemɛi tau le lɔɔ Mɛlɛka chɔm niŋ biilu chuauwaa nduaa wo.+ 20 Nyɛm Mɛlɛka toosiaa woŋ muŋ yeema miŋ simnuŋ nyɛ fondoo fuu le.+ Kɛ mi Mɛlɛka chɛl miŋ simnuŋ nyɛ fondoo fuu, le halikpeŋ mi nyɛm muŋ sɔla tiindaŋndo. 21 Mbo sina maa nyɛm o toosiaa woŋ cho baŋaŋndo sɔla+ miŋ fula o chɛleŋ niŋ, ŋ se lɛ le. Nduyɛ, miŋ sɔla baŋaŋndo maa chuauwaa Mɛlɛkaa. Hei cho suɛi kɔndɔfili bɛndu. 22 Ŋ sina maa nyɛm Mɛlɛka toosiaa woŋ kpou cho kuŋndaŋ a saŋgaa, nduyɛ miŋ wa o nyɛ nɛiyaa niŋ haaa suŋ suŋ. 23 O cho ko nyɔɔŋ muŋ te cho kuŋndaŋ te, kɛ naŋ sɔla kɔmnde taseleŋ nda bɛɛ, koŋ cho ni nyina Mɛlɛkaa, ŋ cho kuŋndaŋ o kɔlta naalaŋ niŋ.+ Ŋ cho chumndo a yeemɛi kpeekpei le boondii Mɛlɛka siiŋguu niŋ naa chuauwaa ndɔ ve.+ A teleŋ koŋ dialuŋ naŋ cho baŋaŋndo sɔla ni. 24 Mɛɛ naŋ sɔla piŋioo, miŋ nɔ tiindaŋndo hoo. Kɛ te waŋndo che niŋ pɛ nyɛ o tiindaŋ ndo, o nɔ lɛ tiindaŋ le ndu le. Te waŋndo che pɛ nyɔɔ, o nɔ lɛ pa tiindaŋndo le ndu? 25 Kɛ te ŋ nɔ pɛ tiindaŋndo+ le nyɛ naŋ chi wɔ le wo,+ miŋ biunuŋ chumndo le ndu chɔɔ.+

26 Mi nyina diandaa mala naa te ŋ vi pɛ dialloŋ.+ Ŋ sina maa ŋ nɔ miŋ piɛi, kɛ ŋ sina le nyɛ naŋ nɔ miŋ piɛiyo le. Te ŋ wa pɛ kuŋndaŋ miŋ sina nyɛ kpeekpei naŋ dimi wo le, mi nyina Mɛlɛkaa nyɔɔlu le naa. 27 Mi Mɛlɛka yaasiaa nyɛ cho naa o lakɔl lo,+ nduyɛ mbo sina nyɛ nyina diandaa cho dimioo wo, kanifuule o cho nyɔɔloo o hɛnaŋ Mɛlɛkaa niŋ le wanaa diandaa.

28 Ŋ sina maa Mɛlɛka tosa mi walta ndɔlaŋ kpou la wa tosaŋndo kpɛ kpɛ, le tɔnɔ wanaa kaala ndu wa, koŋ cho ni, wanaa o hɛli le mi hɛnaŋ ndɔɔ tosaŋ nda.+ 29 Waŋnda haa fɛlɛŋ Mɛlɛka mulul hɔlla, mbo kɛɛsiaa sindɛ pa maa nda bɛɛ nɔ ma wa maa Po ndɔɔ.+ O nɛiyo hoo choo, Po ndɔɔ cho wa po tasoo+ puaapiliaa bɔɔbɔɔ tɛɛŋ ni.+ 30 Okoŋ kɔɔli, mbo veelu+ wanaa o hɛli wa.+ Nduyɛ mbo tosa vɛlɛ ma simnuŋ wanaa sakpuaa.+ O mɛɛlulaŋ kpɔŋ, mbo tosa mi wanaa simnuŋ kaŋ wanaa sakpuaa wa sɔla biiloo.+

31 Yɛɛnɛ naŋ nɔ yɛ niko miŋ dimi a sɔɔŋ muŋ okɔɔ? Te Mɛlɛka wa le naa pɛ, wana o wana nɔla naa le.+ 32 Mɛlɛka kukaŋ Po ndɔɔ choo le saŋgaa le, kɛ mbo yɔŋgu ndu mbo wu le naa kpou.+ Baa mbo kɛɛ naa nyɔɔŋ kpou ke a Po ndɔɔ latulu? 33 Nɛɛnɛ nɔla yɛ mbo pɛɛsa wanaa Mɛlɛka hɛli wa?+ Mɛlɛka tosa ni ma simnuŋ wanaa sakpuaa.+ 34 Nɛɛnɛ pɛɛsa yɛ nda? Wana o wana bɛɛ. Chiisu Kiliti vi le nda ni, nduyɛ mbo miiŋgu yoomu. Suŋ suŋ niŋ, o cho o ba kɛndɛ Mɛlɛkaa choo+ mbo wa nyɔɔloo le naa.+

35 Yɛɛnɛ nɔla yɛ mbo faŋa naa o kaala Kiliti nɔ le naa wo bɛŋgu?+ Baa nyɛpalaa, kɔl landɛi bɛndoo, tɔɔndaŋndo, yiaaŋ, fɛlioo, kpundɔɔ, ɔɔ muɛi?+ 36 Yau Mɛlɛkaa dimi aa: “Lepaa o lepaa, waŋnda cho naa diuwo le sabu numndo. A cho naa chuaa maa saa nda cho kɔlaŋ le diyɔɔ wo.”+ 37 Kɛ o muŋ niŋ kpou, wana kaala naa wo cho tosaa miŋ wa batiuwaa sɔlaa.+ 38 I laalaŋ kɛsɛ maa o wa piɔmndo, o wa yoomoo, o wa maalikɛiya, o wa masɛi, o wa sɔɔŋ cho suŋ suŋndoŋ, o wa sɔɔŋ cho hunɔɔ woŋ, o wa kpaayalaŋ,+ 39 o wa nyɔɔŋ o choo choo niŋ, o wa muŋ lɛŋ nanuŋ, ɔɔ nyɛ o nyɛ cheleŋ Mɛlɛka toosiaa, o nɔla naa faŋa o kaala Mɛlɛkaa bɛŋgu o Chiisu Kiliti, Masanɔ naa chɔm naa wo le.