Maatiu

9 Mɛɛ Chiisu luɛi o dɛndɔɔ niŋ, mbo taŋ leeloo, mbo kua o ndu lo chiee.+ 2 Okoŋ, ma chuu ndu wana bɛvɛiyo o mboomaa niŋ. Mɛɛ o che mɛɛ kpɛ ndaa laalaŋ yɛ, mbo dimul po bɛvɛiyo aa: “Poo, tambu kɔl te! A sɔla malɔɔ hakioo le hakila numndaŋ.”+ 3 Okoŋ, mi wanaa pɛɛku waŋnda sawala Mɛlɛkalaŋ nda apum dimulaŋ aa: “Poo hoo cho diola Mɛlɛkalaŋ tɛɛmbuuwo.” 4 Mɛɛ Chiisu sina nyɛ wa nda o lakɔl lo, mbo nyuna nda aa: “Le yɛɛnɛ nya nɔ yɛ yiyaŋnda wɔɔŋndaŋ o lakɔl?+ 5 Le tamaseliiyo, dimioo aa, ‘A sɔla malɔɔ hakioo le hakila numndaŋ,’ a dimioo aa, ‘Chɔŋ ma kuɛ,’ i kuɛɛ hiou yɛ wa tɛtɛlɛ?+ 6 Kɛ le mi la sina maa Po wanachioo nɔ kpaayaa o lɛŋndeŋ choo le waŋnda malɔɔ haki . . .” mbo dimul po bɛvɛiyo aa: “Chɔŋ ma chua mbooma numndo ma kuɛŋnuŋ o numndo.”+ 7 Okoŋ, mbo chaŋ, mbo kuaŋnuŋ o ndu lo. 8 Mɛɛ waŋnda che nyɛ yɔŋnuŋ ndo, mi siooŋnde bii nda. Okoŋ ma saŋgala Mɛlɛka, o ke waŋnda chieeya kpaaya waa nuaa wo.

9 Mɛɛ Chiisu faŋaŋ loŋ mbo wa hiouwɔɔ, mbo cha poo diolaŋ aa Maatiu. O wa ichali o chiɛi biyaa paawaa.* Mbo dimul ndu aa: “Huŋ ma tol la kɔɔli.” Mbo chaŋ, mbo tual ndu kɔɔli.+ 10 Okoŋ kɔɔli, mɛɛ Chiisu wa nyɛdiaa dioo* nda buɛiyaa nduaa o Maatiu lo chiɛiniŋ, mi wanaa biyaa paawaa a wanaa lahakiaa cheleŋ huŋ tau, ma wa nyɛdiaa dioo latulu.+ 11 Kɛ mɛɛ Falisiiya che hei, ma nyuna buɛiyaa nduaa aa: “Vɛ mi wana nya pɛɛkaa wa nyɛdiaa dioo latulu nda wanaa biyaa paawaa a wanaa lahakiaa?”+ 12 Mɛɛ Chiisu tuei nyɛ nda dimi wo, mbo dimi aa: “Wanaa cho kɛndiaa wa heu ba a wana chiɔuwaa le. Kɛ wanaa cho a naalaŋ nda hauba a ndu ni.+ 13 La kɔ yiyaŋ o nyɛ hei sim ndo choo: ‘Nyiɛɛye ya yeema ni, o cho salalaŋ solioo le.’+ Kanifuule, o cho le wanaa cho sakpo wa le ya hiŋ te, kɛ le wanaa lahakiaa.”

14 Okoŋ, mi buɛiyaa Chɔŋ nda huŋ nyuna Chiisu aa: “Le yɛɛnɛ mi naa a Falisiiya bii sumndo, kɛ buɛiyaa numnda bii sum te?+ 15 Mi Chiisu mulul nda aa: “Te wana cho lanɔɔ chuaa+ wo cho wɔ pɛ nda chaaŋaa nduaa latulu, a nɔ kuee ma bii mɔnɛi le, lende le? Kɛ teleŋ cho fuuluu ma faŋa wana cho lanɔɔ chuaa wo nda tɛɛŋ,+ okoŋ ma bii sumndo. 16 Wana o wana beŋul tɛɛŋgei o doma paandoo a pɛŋgɛi kola sɛnɛiyo le. Kanifuule, te pɛŋgɛi kola sɛnɛiyo i ŋɔunuŋ pɛ, i chɔɔlu doma paandoo sɛɛsa, okoŋ tɛɛŋgei chɔɔlu kumbiŋ.+ 17 Nduyɛ, waŋnda dou muɛima sɛnɛiyaŋ o bɔlɔ mamuɛi* paandoo niŋ te. Te a dɔu pɛ, bɔlɔɔ cho piɔl, mi muɛiyaŋ ma choŋ, okoŋ mi bɔlɔɔ tambu. Kɛ o bɔlɔ mamuɛi sɛnɛiyo niŋ waŋnda duau muɛima sɛnɛiyaŋ ni. Okoŋ, muɛiyaŋ ma choŋ te, nduyɛ bɔlɔɔ bɛɛ tembu le.

18 Chiisu lo nda sɔɔŋ muŋ dimullo, mi masa* pum huŋ naa ndu chua, mbo beŋ ndu wulaŋ.* Mbo dimul ndu aa: “Chua nuu kɛɛ niŋ dɔɔ wu le, kanifuule I mɛi ndu tendu piɔm. Huŋ hendul la ndu baa choo, mbo miiŋgu yoomu.”+

19 Okoŋ, mi Chiisu nda buɛiyaa nduaa chaŋ ma tual ndu kɔɔli. 20 Nduyɛ, mi chua wa saŋgaa a naa ŋwaŋ laandoo le wɔsilaŋ 12+ huŋ Chiisu amakɔɔ, mbo pilaŋ bɔɔle doma ndɔɔ.+ 21 Kanifuule, o wa dimioo o kɔl niŋ aa: “O yɔŋ bɛɛ aa doma ndɔɔ kinɛi ya pilaŋ ni, I cho sioŋgɔɔ.” 22 Mɛɛ Chiisu muliŋ mbo cha ndu, mbo dimul ndu aa: “Bii kɔllo chua nuu! Laalaŋ numndo siŋgi num.”+ Mi chuaa hoo siaŋgu o lepilɛ niŋ kpe.+

23 Mɛɛ Chiisu fuuluu niko o chiɛi masaa,* mbo komal waŋnda nyɛchaa lɔɔ. Nduyɛ waŋnda wa bɔɔluuwo a chaŋndaŋ.+ 24 Mbo dimi aa: “Nya kpou la fulawɔ o bɛɛ. Chuaambɔɔ vi le, kɛ o luaŋ o cho ni.”+ Okoŋ ma kandu ndu mamɔɔ. 25 Mɛɛ waŋnda kpou fula o bɛɛ, mbo luɛi chiɛiniŋ, mbo saa chuaambɔɔ baa,+ okoŋ mbo chaŋ.+ 26 Mi tɔɔ tiu silɔ o buŋgɛi keŋ niŋ a nyɛ yɔŋnuŋ hoo wo okɔɔ.

27 Mɛɛ Chiisu faŋaŋ loŋ mbo hiau lachi, mi puaa sumɛiya a ŋiɔɔŋ+ tual ndu kɔɔli, ma wa deŋioo choo choo aa: “Num Po Deeve wo, tuiinuŋ naa inyiɛɛ fɔ!” 28 Mɛɛ Chiisu luɛi chiɛiniŋ, mi puaa sumɛiya haa kua naa ndu chua. Mbo nyuna nda aa: “La laalaŋ pa maa I nɔla mi siŋgi nya?”+ Ma mulul ndu aa: “Ei, Masanɔɔ.” 29 Mi Chiisu pilaŋ nda hɔltaŋ,+ mbo dimi aa: “Le mɛɛ nya nɔ laalaŋndo yɛ, maa i yɔŋnuŋ nya lende.” 30 Okoŋ ma kandu chɔɔ. Kɛ mi Chiisu sila nda o kala kala aa: “La dimul wana o wana a ndi okɔɔ le.”+ 31 Kɛ mɛɛ nda fula o bɛɛ, ma sɛŋi tɔɔ ndɔɔ o tanda koŋ niŋ kpou.

32 Boondii puaa ŋiɔɔŋnda haa wa fulaa ve, ma chuu ndu po bobonɔ pilɛ, o nyina wɔɔŋndo wa kɔɔli wo.+ 33 Mɛɛ o tou ndu nyina wɔɔŋ koŋ kɔɔli, mi po bobonɔɔ kandu suɛi,+ nduyɛ mi kɔndɔfillo bii waŋnda. Ma dimi aa: “Le pilɛ bɛɛ i waa nuaa yɔŋnuŋndɔ o Isɔluɛi niŋ te.”+ 34 Kɛ mi Falisiiya wa dimioo aa: “A kpaaya masa nyinaa wɔɔŋnda o cho nyinaa wɔɔŋnda touwɔɔ ni.”+

35 Mi Chiisu balu o sɔndɔkɔltaŋ a o chieeŋ bɛndoŋ niŋ kpou. O wa keiyo waŋnda pɛɛkoo o chiɛila Chuuwa piɛi Mɛlɛka laŋ niŋ vɛlɛ a yooŋgu kɛndɛ leMasaa dimioo. Nduyɛ o wa naala suu o suu siŋgioo.+ 36 Mɛɛ o che waŋnda faŋga bɛndoo, mi nyiɛɛye bii ndu tau le nda,+ kanifuule a wa ko maa saa nɔ wana mandaa le wa.+ 37 Okoŋ, mbo dimul buɛiyaa nduaa aa: “Chiɛi vesa tau le kouwɔɔ, kɛ wanaa kuauwaa bɔɔ cho le.+ 38 Lelaŋ, la nyɔɔlu wana ichiɔɔ le mbo yɔŋ wanaa walla o chiɛi nduɛi niŋ.”+