Sɔɔŋ Chɔɔmaŋndoŋ
17 Mi maalikɛiyaa ŋɔmmɛuwaa hɛŋgɛila ŋɔmmɛu laŋ+ la wa o laba wa o pilɛ huŋ dimul la aa: “Huŋ mi chɔm num nyɛpalaa tual niŋ chua suundɛi bɛndu chal o peela faŋga faŋga laŋ choo wo.+ 2 A chuaa hoo masaa o lɛŋndeŋ choo tosa kaa ihini nɔɔlɛiyo* ni.+ Nduyɛ, mbo tosa mi waŋnda o lɛŋndeŋ choo kol muɛima ndɔma kaa ihini nɔɔlɛiyaŋ* mi ma bii nda.”+
3 Okoŋ, mi maalikɛinɔɔ kua a ya o pollo niŋ a kpaaya nyina diandaa. Mi cha wana lanɔɔ ichali o visi biyaa siaŋa sɔɔtɔtɔɔ choo. Diola tɛɛmbuu Mɛlɛka tɔɔ laŋ la wa visioo hoo la tiuwaa lekɔɔ silɔ. Ndoo nɔ bolle i ŋɔmmɛu a leelaŋ tɔ. 4 Doma yim yimndo+ a o siaŋa sɔɔtɔtɔɔ wa chuaa hoo lekɔɔ. Mbo wounuŋ kelaŋ ŋkooliiyoŋ, yɔɔwalaŋ, a nyɛm nda toosiaa a pouta baa kalalaŋ ndoŋ.+ Taala ŋkooliiyo wa ndu o ba o piaa cha a nyɛm nɔɔlɛiyoŋ vɛlɛ a kaala ndɔla ihini nɔɔlɛilaŋ.* 5 Diola kɔndɔfiltaŋ la wa ndu la poonyiaa o itendu. Laŋ la cho ni, “Babilɔŋ Bɛndoo, kalaa wanaa suundɛiya+ a nyɛm nɔɔlɛiyoŋ o lɛŋndeŋ choo.”+ 6 Mi cha maa chuaa hoo kol kooma wanaa diandaa, a kooma seiyaa Chiisu wa mi ma bii ndu.+
Mɛɛ ya che ndu, mi kɔndɔfillo bii ya tau. 7 Mi maalikɛinɔɔ dimul la aa: “Le yɛɛnɛ kɔndɔfillo bii yɛ num? Chuaa hoo, a visi biyaa o chal choo, mbo nɔ bolle i ŋɔmmɛu a leelaŋ tɔ wo,+ I cho num suɛi kɔndɔfili cho a nda okɔɔ ve chɔm.+ 8 Visi biyaa ŋ che koŋ ndo, o wa paandu, kɛ o cho lɛ le. Nduyɛ o cho suŋ fula o sooŋ yiŋgilɛi nɔ lamɛɛlu le wo niŋ,+ ma dii ndu. Kɔndɔfillo cho waŋnda o lɛŋndeŋ choo biyɔɔ, te a che pɛ mi visi wa paandu, kɛ o cho lɛ le wo miiŋgu. Waŋnda haa yɛ, chɔŋ a boondii chieeŋndo kanduŋ nde, diola ndala cho la poonyiaa o yau yoomoo niŋ te.+
9 “Taasioo yeemaŋ ni le hei biyɔɔ bila: Bolii ŋɔmmɛu ve+ sim le pembuŋ ŋɔmmɛu wana lanɔɔ chal choo woŋ. 10 I sim vɛlɛ le masaa a ŋɔmmɛu: Masaa a ŋuɛɛnu del niŋ. O pilɛ cho wɔ o masaleŋ choo. Kɛ o pilɔɔ ndu hiŋ ndɔ le. Nduyɛ te o hiŋ pɛ, le teleŋ biŋgi koni o wa niŋ masa ni. 11 Visi biyaa wa paandu, kɛ o cho lɛ le wo,+ ndu cho masa ŋɔmaa wo ni. Kɛ o masaa ŋɔmmɛu wa niŋ o fula ni, nduyɛ o nɔ le tambei sɔlaa.
12 “Leela tɔla ŋ che laŋ, la sim le masaa tɔ. Masaa haa sɔla wɔ lemasa le, kɛ ma sɔla kpaayaa le ma wa masaa a visi biyaa latulu le hawɛiyo* o pilɛ. 13 Yiyaŋ pilɔɔ kpe masaa haa nɔ ni. Lelaŋ, ma ke visi biyaa kpaaya ndaa a masale ndaleŋ. 14 Masaa haa cho chɔulaba a Saa Fɔŋndɔɔ,+ kɛ mi Saa Fɔŋndɔɔ yem nda. Kanifuule, ndu cho Masa hiou masaa,+ a Masanɔ hiou kpaayaa kpou wo ni. Wanaa sɔla veeloo, ma sɔla hɛlioo, nduyɛ ma wa a ndu latulu wa+ bɛɛ cho nda yomɔɔ.”+
15 Mbo dimul la aa: “Peela ŋ che mi wana lanɔ suundɛiyo wa ichali lechoo laŋ, la sim le waŋnda, a faŋgaa, a lɛŋnde, a isɔɔ o isɔɔ maŋgalaa.+ 16 Leela tɔla+ ŋ che laŋ, a visi biyaa,+ a cho wana lanɔ suundɛiyo+ hoo yɛleŋ tul, ma poondiaa nyɛm ndɔŋ kpou, ma mɛi ndu tum fondo. A cho dialuŋ ndɔŋ dio, nduyɛ ma lom ndu chilikɔ.+ 17 Mɛlɛka pila dɔu nda o lakɔl ni le ma tosa nyɛ o yeema wo.+ Koŋ cho ni, ma nɔ yiyaŋ pilɔɔ le ma ke visi biyaa masale ndaleŋ,+ haaa mi nyɛ Mɛlɛka dimi wo yɔŋnuŋ. 18 Wana lanɔ+ ŋ che wo sim le chiee bɛndu nɔ kpaayaa masaa cho o lɛŋndeŋ choo wa.”