Walta Kiilaa
13 Wanaa ndaa suaa le Mɛlɛka wa a wanaa ndaa pɛɛku waŋnda wa, wa o kundaa Aŋtiɔɔ niŋ. Nda cho haa ni:+ Banabaa, Simiɔŋ ndaa veelu vɛlɛ aa Wana Tiŋioo wo, Lusiɔɔ fula Sailuini wo, Maniaŋ sɔla pɛɛkoo latulu nda Hɛlɔɔ masa ibuŋgaa wo, a Sɔɔ. 2 Mɛɛ nda wa Chɛhowa* piɛiyo a sumndo biyɔɔ, mi nyina diandaa dimul nda aa: “La kɛsul la Banabaa nda Sɔɔ+ le wali ya hɛli nda wo tosaa.”+ 3 Mɛɛ nda chii sumndo biyɔɔ a piɛileŋ, ma handu nda balaŋ choo, okoŋ ma viam nda.
4 Mi nyina diandaa viam Sɔɔ nda Banabaa, ma kua Sɛluusiaa. Mɛɛ nda chɛŋ loŋ, ma luɛi o dɛndɔɔ niŋ ma kua Saipulɔɔ. 5 Mɛɛ nda fuuluu Salamisi, ma kandu waŋnda suɛi Mɛlɛkɛi dimullo o chiɛila Chuuwa piɛi Mɛlɛka laŋ niŋ. Nduyɛ Chɔŋ wa a nda latulu le nda malaa.+
6 Mɛɛ nda chii lɛŋnde ibuŋgaleŋ kpou balɔɔ haaa ma fuuluu Pefɔɔsi, ma komal po Chuunɔ pilɛ diolaŋ aa Baa Chiisu. Mandenɔɔ poo hoo wa ni, nduyɛ mbo dimi maa wana suaa le Mɛlɛka wo o cho ni. 7 Poo hoo wa wallo le masa ibuŋgaa diolaŋ aa Sɛkiɔɔ Pɔlɔɔ. Mi masaa hoo veelu Banabaa nda Sɔɔ, kanifuule o wa a yeemɛi tau le suɛi Mɛlɛkɛi tueiyɔɔ. 8 Kɛ mi mandenɔ koŋ, o nda veelu vɛlɛ aa Ɛlimasi wo (koŋ cho ni, “mandenɔɔ”), kandu nda simullo. O wa kindiŋndo le mbo kɛɛlu masa ibuŋgaa laalaŋndo dɔwɔɔ o Masanɔɔ niŋ. 9 Nyina diandaa wa Sɔɔ, o nda veelu vɛlɛ aa Pɔɔl lo choo tau. Mɛɛ o tofa Ɛlimasi chiŋ, 10 mbo dimi aa: “Wana lakafaa a wana dɛnɛ wɔɔŋndo ŋ cho ni. Po Setana* wo.+ Yaamɔɔnɔɔ ŋ cho ni le nyɛ cho sakpo wo. Le yɛɛnɛ ŋ cho yɛ pɛɛkula kɛndɛla Chɛhowa* laŋ siŋgaa? 11 Chɛhowa* cho num nyɛpalaa tusi choo ma suma. Le teleŋ tiŋ, a ve niŋ nyɛ o nyɛ chɔ le.” O lepilɛ niŋ kpe, mi nyumndaŋ ma tual ndu o hɔl, mbo kandu waŋndo nuuviaa le mbo saa ndu baa. 12 Mɛɛ masa ibuŋgaa hoo che nyɛ yɔŋnuŋndo, mbo simnuŋ wana laalaŋndo, kanifuule kɔndɔfillo wa ndu a sɔɔŋ o pɛɛku a Chɛhowa* okɔɔ woŋ.
13 Okoŋ mi Pɔɔl nda chaaŋaa nduaa chaŋ Pefɔɔsi ma luɛi o dɛndɔɔ niŋ, ma fuuluu Pɛka o Pamfiliaa niŋ. Kɛ mi Chɔŋ+ mɛi nda loŋ, mbo miiŋguŋ Chulusalɛm.+ 14 Ma chaŋ Pɛka, ma huŋ Aŋtiɔɔ o Pisidiaa niŋ. Mɛɛ nda luɛi o chiɛi Chuuwa piɛi Mɛlɛka wo niŋ+ o Paale Pɛŋgiaaleŋ choo, ma chal. 15 Mɛɛ nda chii nda diomndaŋ veelul o yau laSawaa niŋ+ a nyɛ wanaa ndaa suaa le Mɛlɛka wa dimi wo, mi wanaa bɛnduaa o chiɛi Chuuwa piɛi Mɛlɛka wo niŋ yɔŋ diomndeŋ le nda aa: “Puaapiliaa, te la nɔ pɛ diomnde kɔl dɛɛniaa le waŋnda, la dimul nda.” 16 Okoŋ mi Pɔɔl chaŋ isisi, mbo kpaa nda a ba. Mbo dimi aa:
“Nya waŋnda Isɔluɛi a nya wanaa nɔ siooŋii Mɛlɛkɛi ya, la yaŋ nilaŋ. 17 Mɛlɛka Isɔluɛiya hɛli finyaa naa mamaa ni, mbo tosa ma simnuŋ kaale kpaaya bɛndu teleŋ nda wa mialla o lɛŋnde Ichipi leŋ niŋndo. Mbo kɔ soli nda loŋ a kpaaya ndɔ bɛndoo.*+ 18 Nduyɛ le wɔsilaŋ 40 o wa nda biuwɔŋndo o pollo niŋ.+ 19 Mɛɛ o tɛɛmbuu kaalaŋ la ŋɔmmɛu o lɛŋnde Kenaŋ ndeŋ niŋ, mbo ke wanaa nduaa lɛŋnde leŋ le mi le wa nyɛm kɛŋ nda.+ 20 Sɔɔŋ muŋ kpou yɔŋnuŋ o wɔsilaŋ 450 bɛŋgu.
“Okoŋ kɔɔli, mbo ke nda wanaa kialaa ŋyamaa haaa a teleŋ Saamiɛɛ wo, wana ndoo suaa le Mɛlɛka wo.+ 21 Okoŋ, ma dimi maa a yeema masaa.+ Mi Mɛlɛka ke nda Sɔɔ, po Kisi wo, fulaa o kaale Bɛŋjamiŋ ndeŋ choo,+ mbo wa nda choo masa le wɔsilaŋ 40. 22 Mɛɛ Mɛlɛka faŋa Sɔɔ o masaleŋ choo, mbo hɛli Deeve le waa masaa nda choo.+ A ndu okɔɔ o dimi ni aa: ‘I saaluŋ maa Deeve, po Chɛɛse wo+ cho wana ya hini kɔl lo ni.+ O cho tosa nyɛ o nyɛ ya yeema le tosaa.’ 23 A mɛɛ Mɛlɛka mɛi lediom yɛ, o chuauwaa mamaa Deeve wa* niŋ sanaa o hɛli wana piŋiaa le Isɔluɛi ni, ndu yɔŋnuŋ ni maa Chiisu.+ 24 Tuupa mi wana piŋiaa koŋ huŋ, mi Chɔŋ dimul waŋnda Isɔluɛi kpou maa a wookuŋ le ma sɔla yiŋɔɔ.+ 25 Kɛ mɛɛ Chɔŋ hiŋ le wali ndɔɔ chiiyo, mbo dimi aa: ‘Wana suu maavɛɛ nya yiyaŋ yɛ maa I cho? O cho wana nya cho chumndo wo le ya cho le. Kɛ wana cho hunɔɔ ya kɔɔli wo, I suliŋ bɛɛ pɛŋ le yuei nduɛi lakɔvɛiye* timbioo le.’+
26 “Puaapiliaa, nya fula o pulale Ebilaham ndeŋ choo wa, a wanaa cho nya tɛɛŋ ma nɔ siooŋii Mɛlɛkɛi ya, naa kpou Mɛlɛka yɔŋ yooŋgoo hoo ni a mɛɛ o cho naa piŋi yɛ.+ 27 Waŋnda Chulusalɛm a masaa ndaa chɛl maa ndu le cho wana piŋiaa le. Kɛ mɛɛ nda kɔɔsa ndu, ma peelu sɔɔŋ wanaa ndaa suaa le Mɛlɛka wa dimi woŋ.+ Sɔɔŋ ndaa veelu diomndaŋ o paale pɛŋgiaale kɛ kɛ choo woŋ. 28 Mi che bɛɛ a seeluŋ nyɛ o nyɛ o tosa le ma dii ndu le,+ kɛ ma dimul Paile le mbo tosa ma dii ndu.+ 29 Mɛɛ nda chii sɔɔŋ poonyiaŋ a ndu okɔɔ woŋ kpou tosa, ma tusi ndu o yɔmndo choo, ma kɔ yambu ndu o sɛiyo* niŋ.+ 30 Kɛ mi Mɛlɛka miŋgi ndu yoomu.+ 31 Le palɛi bɔɔbɔɔ, o wa wanaa nda chɛŋ nda ndaa Kalili ma huŋ Chulusalɛm nda fulaa o hɔl. Waŋnda haa cho niŋ seileŋ timbioo a ndu okɔɔ ni.+
32 “Yooŋgu kɛndɛ Mɛlɛka mɛi lediom le finyaa naa mamaa wo, ndu naŋ cho hoo nya dimullo ni. 33 Mi Mɛlɛka miŋgi Chiisu yoomu le mbo peelu diomnde o mɛi le naŋ cho chuauwaa ndaa mamaa wa.+ Lende i cho i poonyiaa o Sam bolle i ŋiiŋ niŋ ni aa: ‘Num cho po nuu ni. I simnuŋ hau finya num.’+ 34 Le mɛɛ Mɛlɛka miŋgi ndu yoomu nduyɛ mbo ke ndu dialuŋ se le woŋ yɛ, mi hei peelu diomnde o dimi leŋ ndeŋ aa: ‘I cho num kaala lo lechoo wo chɔm mɛɛ yaa mel Deeve lediom yɛ. Nduyɛ, diomnde ya mel ndu leŋ le feŋaŋ lechoo le.’+ 35 Mbo dimi vɛlɛ o Sam niŋ aa: ‘A chɛl niŋ mi wana chɔm lo lechoo wo o numndo wo lo o sɛiyo niŋ te.’*+ 36 Mi Deeve tosa hɛnaŋ Mɛlɛkaa o yoomu ndɔɔ niŋ. Mɛɛ o vi, ma kumbu ndu nda finyaa nduaa mamaa latulu, nduyɛ mi dialuŋ ndɔŋ sia.+ 37 Kɛ wana Mɛlɛka miŋgi yoomu wo ndu, dialuŋ ndɔŋ se le.+
38 “Lelaŋ puaapiliaa, la sina pɛŋgu maa o poo hoo niŋ sanaa waŋnda chieeya sɔla malɔɔ hakioo le yɔŋnda ndala wɔɔŋndaŋ ni. Ndi naŋ cho nya hei dimullo ni.+ 39 Wana o wana laalaŋ o ndu niŋ pɛ, Mɛlɛka nɔla mbo baŋa ndu o yɔŋnda ndɔla wɔɔŋndaŋ niŋ.+ Kɛ Sawala Mɛlɛka ke Muuse laŋ+ la nɔla nya baŋa le. 40 Lelaŋ, la mandaŋ yɔŋii nyɛ wanaa ndaa suaa le Mɛlɛka wa dimi wo yɔŋnuŋ nya. Ma dimi aa: 41 ‘Nya wanaa mamaa haa, la yaŋ nilaŋ, mi la dɔɔnuŋ kɔndɔfili, mi la vi, kanifuule I cho isɔɔ tosa o teleŋ nyaa niŋ, o yɔŋ bɛɛ mi wana chɔm nya ndi, pesiŋ bɛɛ la laalaŋ niŋ te.’”+
42 Mɛɛ Pɔɔl nda Banabaa wa fulaa o chiɛi Chuuwa piɛi Mɛlɛka wo niŋ, mi waŋnda nyɔɔlu nda maa a huŋ vɛlɛ o Paale Pɛŋgiaale cho hunɔɔ leŋ choo, ma dimul nda sɔɔŋ muŋ. 43 Bɔŋaŋndo chuwɔɔ, mi Chuuwaa bɔɔbɔɔ a wanaa simnuŋ Chuuwa wa, a ndaa piɛi Mɛlɛka wa tual Pɔɔl nda Banabaa kɔɔli. Okoŋ ma suaa o nda lo, ma dimul nda le ma hiou lachi a kɛndɛi Mɛlɛkɛi saa kpiŋ.+
44 Paale Pɛŋgiaaleŋ fuuluuwo, sɔŋgɔ waŋnda kpou o chiee koŋ niŋ, ma chuuŋgiaŋ le suɛi Chɛhowa* ve nilaŋ yaŋɔɔ. 45 Mɛɛ Chuuwa che waŋnda faŋga bɛndoo, mi paŋalaa pia nda o lakɔl cha. Okoŋ ma kandu Pɔɔl sɛɛŋgiaa, nduyɛ ma dimi sɔɔŋ wɔɔŋndoŋ a nyɛ o wa dimioo wo okɔɔ.+ 46 Mi Pɔɔl nda Banabaa dimul nda kpendekele aa: “Ndoo bɛnda mi nyaa wa wanaa tasiaa le suɛi Mɛlɛkɛi tueiyɔɔ.+ Kɛ mi la wa ndi kiɔɔ. O hei niŋ, la suliŋ le yoomu fafɛɛŋndo sɔlaa le. Lelaŋ, ŋ cho lakɔ o wanaa cho ŋChuu le wa lo.+ 47 Nyɛ Chɛhowa* dimul naa wo cho hoo ni: ‘I siiŋguu num nyɛ teŋgaa le wanaa cho ŋChuu le wa, le ma dimul waŋnda o lɛŋndeŋ mɛɛlulaŋ mɛɛ ya piŋi niŋ nda yɛ.’”+
48 Mɛɛ wanaa cho ŋChuu le wa tuei hei, ma kandu nyaaloo dɔɔnɔŋndo, nduyɛ ma wa dimioo mɛɛ diom Chɛhowa* wo cho nyɛ kɔndɔfili yɛ. Mi wanaa ndaa nɔ yeemɛi le chɛlɔɔ tonya yɔŋgu yoomu fafɛɛŋndo wo wa simnuŋ wanaa laalaŋnda. 49 Okoŋ kɔɔli, mi diom Chɛhowa* wo hiau lachi a pɛŋgɛlaŋndo o lɛŋnde leŋ niŋ kpou. 50 Kɛ mi Chuuwa hiau waŋ laanduaa ndaa nɔ tɔɔ, nduyɛ ma nɔ siooŋii Mɛlɛkɛi ya, a laŋgbaa kalla kɔɔli, ma tusi Pɔɔl nda Banabaa nyɛpalaa choo,+ ma soli nda o tanda ndaa niŋ po. 51 Okoŋ ma kuaŋ chundu wa nda o ŋpelu wo le mbo wa maa lesei le nda, ma kuaŋnuŋ Akooniɔm.+ 52 Mi buɛiya hiau lachi a waa a nyaale,+ nduyɛ nyina diandaa wa nda choo.